(adsbygoogle = window.adsbygoogle || []).push({}); ما تبقي ثقيل انت وبارد و تسألني عن الشهادات وسنة الدفعة وعن موضوع الدكتوراة حقتي والله في أي مجال ما متذكر بس اظنها في الفوائد الاقتصادية للتمباك وأثر المنافسة للمنتجات الباكستانية عليه في الخليج والعالم وكمان الماجستير كانت في كيفية التوفير في قفة الملاح كانت الدراسة في الاحفاد علي ما اذكر وأنا العلم ذاتو بس جاني كدا فجاءة صحيت من الصباح عندي أحساس أني أصبحت بعد العمر الطويل دا وبحمدالله بروف ولازم أتكلم في كل شيء وكمان اشتريت دكشنيري عربي انجليزي عشان أكون عندي لغة تانية دا ما العلم كدا يا أهلنا بس الصبر والله حواء السودانية جاب ناس منتهي الخطورة علي الإنسانية كلها ربك يستر علينا من الحسد والعين الحارة انت زول وهمي ساي ما عارف نحن قاعدبن نشرب العلم من وين انا حسي بسالك انت العلم هو مطرة كذا وصبت ولا شيء الناس ديل الفياقيين ديل كل واحد منهم يشوف شيء يكتب لحدي ما بقت كتب ومدارس وكليات وجامعات حتي الفكي حق الخلوة هارون دا زول فقير ساي في أي شيء ما عارف كتير في الدين غير غسول الميت بعض الاحكام في الزكاة والحج الحمدلله حدود علمو كدا وهو يوميا بكتب زي أربعين الف بخرة في اليوم وزول ما عندو علم في فن كتابة الحجاب والطلاسم بس حظ كدا جات معهو بقي فكي رهيب معروف العاصمة والاقاليم و ذاتو قران ما حافظو كضاب ساي امس في صلاة الفجر ما قدر كمل المساء والطارق لا أسمها النجم والطارق ايوة صح كدا قرأ كدا زي سطرين والله وبعدها تم الموضوع التجاني المجنون قرا السورة صر كدا وساجد بينا الحمدلله تمت الصلاة بسلام وبعدها جري من الجامع لانو كان قاعد ما جري هارون كان طعنو سكين لكين متعود ياكل معنا بعد الفجر لقيمات مجانا بدون شاي حليب بحب السكر حب الله اكبر أنتو تعرفوا قصة عمايل المثقفاتية ديل في المجمتع السوداني هي الخربت المواطن والدولة ودا كلام معروف من جيل السودانة ديل ناس عرقي وحجة فارغة جدا وشمارات وفضايح وكلام فارغ الواحد كان منتج بيكون بني بيت كمان مرات صندوق الإسكان بيكون منحو بيت جاهز بالأقساط ودا حق المساكين لكين تقول شنو في الانانية وكان فيهو خير بيكون مسئول من اسرتو لو مغترب ,لكين لو هو موظف في الوطن الحبيب بيكون مرتشي بامتياز ورهيب جدا ياخي القاضي بقي يقبل الهدايا والعطايا والمنح والزكاة وبياكل الصداقة كان مريت عليهو في المكتب ح تدفع حق الفطور دا لو ما قال عايز مبلغ متوسط عدد خمسة ارقام دين وسلف وبيوعدك انو برجعو نهاية الشهر أنا بالرغم من أني موظف حالتي الله يعلم بيها برضو بعاني من قصة الإرهاب المالي اللي بمارسوه علي المواطن البسيط في بر السودان ,تعرف قصة تعيش في الوطن دي ذاتا مشكلة كان ما عندك سكان احسن تمشي تبقي لاجي ولا أي وظيفة في الخليج والله انا عندي صاحبي طبيب بقي سواق شاحنة في الكويت الأمور معهو طيبه جدا وكمان رسلي خمسه قمصان وتلاته بنطلونات منهم واحد جينز ماركة اللهم بارك له في رزقة لانو بزكي ويدعم أمثالنا من فقراء الأرض , تعرف كمان في ظاهرة جديدة كل الافتدية في الوطن الحبيب الفطور بوش طبعا في ناس في نعمة السمك والماوشاي والبلدي المدنقل الرهيب داك وأعلن لكم بمزيد من المحزن قلة مواردنا ما بنقدر نفطور الفطور القديم داك في بعض الأيام بكون رغيفه وكباية شاي التكلفة 250 جنية برضو الجوع كافر لازم تجازف ليك حاجة كدا أنشالله تمر من الزول اللي ببيع البلح في راس الشارع بتاع مكتبنا البلد بقت كلها فراشه وباعة متجولين تعرفوا حالة الفقر التي ضربت العباد في الوطن زي ما شفتها الا في الهند ولبنان بالجد كدا وصلنا مرحلة عجيبة حتي حبوب العلاج نشتري بالحبة للان العشة حبات بتكون بنص الماهيه وناس السكري والضغط شاغلين ضبر ومع الصلاة الرسول قالوا جققت نتائج رهيبة تعرفوا انا أخر مرة اكلت لحمة متين في عرس ود خالتي الأمريكي وبعدها بقيت مرة هندوسي ومرات بتاع خضار تعرفوا انا بقت عندي حساسية من العدس والخضار والله ببكئ عديل لما القي الغدا عدس لكين برضو الأصدقاء في المهاجر ما قصروا معاي رسلوا الدولار داعمو حياتي الغذائية بما يحلو وطاب من الأطعمة والتي يسيل لها لعاب الفقراء والمساكين في الأرض ربي ارزقهم ولا ترد غربتهم وانت عليم بحالنا يا معين أمين وأخر الدعاء اللهم اصرف جبريل عن وزارة المالية انك قادر عليم وسميع مجيب فقراء السودان وتشاد وارتيريا واثيوبيا وقعر مصر النبوي يدعون ويرفعوا الدعا حار صباح ومساء أقصد النبوبي
أيه رايك في الويسكي الامريكي أبو كبايه والسلام ختام
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة