Nizar Alhameedi 1 يناير 2021 · (مذكرات ضابط مباحث ) وانا مناوب بالقسم الجنوبي امدرمان في أول مناوبة لي بالقسم وحوالي العاشرة مساء وانا جالس بمكتب الضابط المناوب سمعت جلبة وضوضاء أمام مكتب البلاغات صحت لاحد الجنود بأن يحضر لي بالمكتب أولئك الأشخاص أصحاب هذه الضجة احضرهم الجندي وقال لي ديل عاملين مشاجرة في شارع الاربعين نظرت إليهم وجدتهم اربعة اشخاص وشرعوا في التحدث في آن واحد بحدة اسكتهم بإشارة مني وسالتهم الحاصل شنو؟ أجاب أكثرهم حدة :- والله نحن يا جنابو بنبيع الباسطة وعندنا عربياتنا بنلزها وبنكون ماشين وراء بعض بعد نرفع الصواني داخل العربيات من بيت الباسطة وفي شارع الأربعين ماشين أربعة عربات وراء بعض جاء الزول السكران ده سايق عربية دقشنا ردم لينا الأربعة عربات في التلتوار نظرت لسائق العربة وجدته يتمايل من السكر ويقاوم جفناه حتي لا ينطبقان فيغط في سبات وقبل أن أتكلم معه فجأني بصوت متكسر :- الناس ديل جايطين مالهم؟ وجه لي السؤال قلت له انت صدمت عربات الباسطة لخبطت الباسطة مع البسبوسة مع الكنافة قاطعني بصوت كأنه خارج من بير (بسيطة خليهم يبيعوها مشكل) ورفع يده كأنه حل معضلة فيزيائية عندها انفجر أصحاب الباسطة بالضحك وقال كبيرهم الزول ده مسخوط خلوه عفيناهو يا جنابو نزار الحميدي
Nizar Alhameedi 14 يوليو 2021 · .مذكرات ضابط شرطة طبعا النظام البائد بعد 89 ادخل في موظفي الدولة ومنهم بعض ضباط الشرطة هلع وخيفة من حاجة اسمها كشوفات الصالح العام وبعدما كانوا يوفرون الأمن للمواطن أصبحوا غير آمنين في انفسهم فيأتون مكاتبهم كل صباح وهم يتوقعون خطاب بالاحالة للصالح العام فأصبحوا يتوجسون خيفة من قطع ارزاقهم وتشتيت اسرهم فأطلق بعضهم اللحي وقصر آخرون بناطيلهم وعلت هامات بعضهم علامات الصلاة ورفع بعضهم سباباتهم وعقيرتهم تكبيرا وتهليلا في اي مناسبة (هي لله هي لله ) بعد أن كنا نشاهد بعضهم قبل الإنقاذ يصدحون باغنية (الندامي) رأيناهم يتغنون ( لا لدنيا قد عملنا) ركبت مع أحدهم عربته التي يقودها له جندي فادخل سعادته شريط مديح للبرعي ليصدح ب(مصر المؤمنة) و تهتز لحيتة في تناغم روحي ووجداني عميق مع المدحة وارتسمت علي محياه تقطيبة كأنه يسبح في ملكوت سماوي روحاني ولما كان السائق خط سيره مختلف توقف في موقف الحاج يوسف لينزل ويقود العربة زميلي الضابط وفور تحرك العربة أخرج الشريط بعنف وأدخل شريط آخر اخرجه من تحت المقعد والقمه فاه المسجل لترتج العربة بتم تم خطير وترفع عقيرة المغنية بي اغنية ومعها كورس بنات يرددون معها بأصوات نشاز (عزاز علينا شالو نوم عينينا) وخيل لي انني لمحت اهتزاز تلك النجوم في كتف زميلي كأنها تستدعي زمن سحيق دثرته مساحيق دينية زائفة التفت إليه وسألته شنو القلبة دي ياسعادتك؟ قال لي السواق ده انا شاكي فيهو كوز جابوه لينا من الامنية وبرفع تقارير عن الضباط قدامو بشغل مديح وطارق السويدان والشعراوي وتحت مقعدي ده وأشار باصبعه ناسنا الزمان ههههههه وطبعا بقي كل واحد خايف من التاني يرفع فيه تقرير و كان احد الضابط خاتي في رأسه اني من الجماعة مع انو انا زول موسيقي وكورة (وعمري ما عرفت السياسة ولا خضت دروبها لقناعة ذاتية ان مهنة الشرطة لا تأدلج تحت أي تيار كان ولازلت انادي بتلك القناعة. وابعد ما اكون من تلك الادلجة الشائهة التي أودت باعظم مهنة الي التهلكة .) عندما يراني ذلك الضابط يتصنع الوقار رغم أننا تقابلنا كثيرا في جلسات الانس قبل الإنقاذ . ولسوء الحظ تمت إحالته بعد فترة وجيزة ضمن مجموعة للصالح العام لم التقيه إلا بعد عدة أشهر يقف أمام عربة تاكسي بسوق سعد قشرة والظاهر انه شغال بها فهرولت للسلام عليه ازيك يا سعادتك؟ فتجهم وجهه ورمقني بنظرة غاضبة قائلا عليك الله امشي ارفع فيني تقرير لي نقابة التاكسي قول ليهم الزول ده بتاع شربة . هههههههه فلعنت الإنقاذ التي أحالت صفاء نفوسنا وحبنا لبعض لتوجس وريبة وشك نزار الحميدي
Nizar Alhameedi 16 فبراير 2021 · مذكرات ضابط مباحث (ابلول) أبلول يعرفه سكان مدينة بحري ورواد ميدان عقرب واستاد التحرير و يعرفه ضباط ام درمان الذين عملوا فترة الثمانينات وهو صاحب طرفة وبديهة حاضرة ولازالت تعليقاته يتناولها من عاصروه في مجالسهم حتي الآن وأنا ملازم بحضر في إحدي المباريات بميدان عقرب جاء وجلس قربي وقال يا قمندان خارجني من النقل الميكانيكي ده المعلمين كرهوني جيب مفتاح 15 لو غلطت مديت 14 يدوني كبعة بيه في راسي تقول النمرة الواحدة دي خلت المعلم يجلي من طب الخرطوم ولا يقول ليك اديني (الحبة) ديك تقول حبة اموكلان ههههه ياخي شوف لي طريقة معاك في المباحث اخوك صاعقة بس ضحكت قلت ليه مافي مشكلة بخارجك من النقل الميكانيكي لكن تجي تمسك العربات صيانة وغيار زيوت في قمندانية امدرمان ما عندك علاقة بي شغلنا . وفعلا ذهبت للسيد عبدالرحمن صالح بالنقل الميكانيكي بعد يومين وعملت ليه إلحاق معانا بشرطة امدرمان وطبعا من اول يوم اصبح ابلول في القمندانية فاكهة مجالس الضباط والعساكر وبقي يتونس ذيهم بس قصة حفظ المواد القانونية ما قدر عليها يسمع بس يا جنابو المتهم. ده 250 و وده 178 القصة ما وقعت ليه وناس ابوالعزايم وهشام عبدالله ملازمين جدد متكيفين جدا من ابلول وفي يوم انا طالع كمين في امبدة ومعاي أفراد التيم وراكب قدام في البوكس قام ابلول ركب وراء مع التيم بدون ما أشعر لمن وصلنا نقطة امبدة قبل أن تصبح قسم شاهدت هرج ومرج بمكتب البلاغات ودفاتر المكتب ملقاة علي الارض والشاويش المناوب والعساكر واقفين خارج المكتب وشاهدت رجل ضخم الجثة يحمل مرق بيده ويصرخ الراجل يجيني جوه حضر الشاويش أمامي وقال لي ده 82 إجراءات يا جنابو حينها كان ابلول يقف بقربي وسمع الشاويش وإذا به يهرول تجاه الرجل ويمسك به ويقول إذا أنت 82 انا 550 وما كان من الرجل إلا أن هوي بالمرق علي رأس ابلول ووقع ابلول علي الارض مغمي عليه سيطرنا علي الرجل وذهبنا با بلول للحوادث وعندما افاق من غيبوبته التفت الي وسألني وهو يئن 82 دي شنو يا قمندان قلت ليه دي مادة الاختلال العقلي يعني الزول ده مجنون بتقابض ساكت مالك يا ابلول قال لي رجعني النقل اخير لي مفتاح 36 ههههههه نزار الحميدي
01-19-2023, 12:39 PM
مصطفى نور مصطفى نور
تاريخ التسجيل: 05-13-2022
مجموع المشاركات: 4975
قصة حقيقية انا ملازم في مباحث امدرمان عندي واحد في التيم مجنني طوالي يا جنابو في بيت في الشهداء مدور تربيزة قمار وانا ما شغال بي كلامه وفي يوم انا ماري بالشهداء والتيم راكب وراء قام العسكري قال لي داك البيت يا جنابو قلت للسواق كده اقيف جنب الباب نزلت وقلت للتيم خليكم فوق مافي واحد ينزل دفرت الباب لقيتو فاتح دخلت لقيت ناس كبااااار قاعدين في تربيزة أصغر واحد فيهم عمره 70 سنة وماسكين كتشينة ورق تلات سبعات منتهية ومعاهم امرأة شعرها كله ابيض ماسكة سجارة برنجي باصابع مرتعشة باليمين والورق بالشمال سلمت عليهم ردوا السلام دون أن يلتفتوا الي قعدت جنب واحد قاعد بره التربيزة الظاهر حرق سالتو مطعمة ولا ونسة ساى التفت الي وقال شوف يا ابني التربيزة دي مدورة من الخمسينات ونحن نفس الشلة وعمتك دي الغنا القطعو فيها ناس زنقار وابو صلاح بغنو فيهو لغاية هسه الفنانين كانت أجمل واحدة في الشهداء وده بيتها وبنجي نلعب العشرة بي طرادة والعشاء علينا بس الكشتينة بتاعتنا بقت تعبانة ذي النظر بتاع اعمامك ديل وفجأة التفت الي وقال لي انت منو ؟ قلت لي نحن ناس الكهرباء جينا نقرأ العداد وتاني يوم جبت ليهم كشتينة بلاستيك جديدة وحفاظة موية ونقلت فرد المباحث للقراش للإشراف علي العربات نزار الحميدي
نزار الحميدي
01-19-2023, 12:49 PM
مصطفى نور مصطفى نور
تاريخ التسجيل: 05-13-2022
مجموع المشاركات: 4975
Nizar Alhameedi 22 ديسمبر 2020 · قصة حقيقية وانا ملازم بمباحث امدرمان كنا في العادة نتفقد نقاط الشرطة ونراجع دفاتر الاحوال بتلك النقاط وذات يوم بنقطة الموردة قصاد محلات السكي للسمك والتي كانت عبارة عن كشك توتو كورة وبعد إلغائها صارت نقطة أحوال تابعة لشرطة القسم الجنوبي نزلت وجلست أمام النقطة في كرسي مستمتعا ببداية شتاء ذا برودة خفيفة حينها اتي عم ابراهيم ذلك الرقيب الذي افني زهرة شبابه في الشرطة ممسكا بدفتر الأحوال واعطاني اياه راجعت (القيود) ووجدت احوالهم هادئة . اوليت ظهري للشارع ونظرت شرقا تجاه النيل كعادة محيبة لدي استرعي انتباهي عربة صغيرة تقف علي مقربة من الشاطئ قمت و ذهبت تجاهها بارجلي وعندما وصلتها شاهدت منظرا غريبا رجل ستيني يضع علي حجره فتاة لا تكاد تبلغ السادسة عشر عاما لما شاهدني ارتبك وقام هو والفتاة بالنزول من العربة في حالة اضطراب ظاهر كان حينها عم ابراهيم بزيه الرسمي قد وصل ووقف بقربي ذهبنا اربعتنا للنقطة قلت لعم ابراهيم (دخل لي الراجل ده جوه) وجلست في الكرسي اتأمل تلك الفتاة الناحلة سألتها ده منو وانتي منو ؟ كانت المفاجأة حينما أجابت بصوت مرتعش ده ابو صاحبتي في المدرسة وانا بمشي ليها في البيت بشرح ليها الرياضيات لانو انا الأولي بتاعت الفصل ونحن في تاني ثانوي وابوها ده مغترب جاء من السعودية وصلني المرة الفاتت وبدأ يمسك يدي ويضمني عليه انا زعلت لكن المرة دي جاب لي هدايا من السعودية ونحن ناس مساكين ابوي غفير في مدرسة وساكنين في إحدي أحياء امدرمان الطرفية سرحت بعيد وصدري يغلي من الغضب ناديت عم ابراهيم قلت ليه شيل عشرة جنيه من الزول الجوه ده ووقف تاكسي واخد نمرتو وخلي يوصل البت دي بيتهم ونادي لي الزول ده كنت قاعد في الكرسي واتي وجلس في المسطبة أمامي ارضا كانت اعينه زائغة ويرتعش كله تكلم بصوت خافت انا يا جنابو أخصائي في السعودية جيت اجازة قبل أن يكمل قلت ليه بحدة ونبرة يشوبها الغضب اسمع كلامي البقولو ليك ده واتخيل السيناريو الحايحصل لو فتحنا بلاغ في القسم (بنوديكم الاتنين الكشف الطبي . وبنتك ما بتمشي المدرسة تاني وزوجتك ما بتقدر تطلع في الحلة واحتمال تطلب الطلاق ولو عندك بنات متزوجات بتكسرهم قدام نسابتهم وممكن يطلقوهن ولو عندك ولد داير يتزوج ما بدوه لأنك ابوه . ولو عرفو أهل البت المسكينة دي بالقصة دي احتمال يحصل موت ده عرض مالعب ودي بت قاصر واكيد حا تنحرف بعد تصرفك ده معاها وتسوق بنتك معاها في الطريق ده مادام هي صاحبتها وانت بتكون في السعودية ما جايب خبر) شفت عشان الناس الذكرتهم ليك ديل كلللللهم الما عندهم ذنب بجريمتك دي قوم امشي سوق عربيتك وفكر في كلامي ده وانا أتحدث تذكرت العقوبة المتعدية والسيد عادل العاجب وهو يشرحها لنا ونحن طلبة الدفعة 49 والتي لا تلزم الجاني وحده بل تتعدي لابرياء لا ذنب لهم قام بين مصدق ومكذب وذهب التفت الي عم ابراهيم وقال والله يا جنابو تصرفك ده ضابط كبير ما بعمله بارك الله فيك ذهبت ولكن المفاجأة كانت أنني عند حضوري للمكتب صباحا وجدت ذلك الشخص ينتظرني بعد أن رجع للنقطة وسأل عم ابراهيم عن اسمي ومكان عملي عندما جلس أمامي قال انا من امبارح ما نمت رغم صغر سنك أديتني درس لن انساه طوال حياتي تخيلت ابنتي وهي لا تقدر أن تذهب للمدرسة بعد الفضيحة وزوجتي وابنائي وأهل البنت المسكينة دي ذنبهم شنو ونزلت دموعه تشرح ما تعانيه دواخله من ندم وهو خارج التفت الي قال عمرك كم؟ قلت ليه القصة ما عمر . بس ان شاء الله يبقي ليك درس لأنه ممكن تلقي ضابط كان نايم في محاضرة العقوبة المتعدية . الغريبة لمن حكيت القصة دي لي ضابط زميلي أعلي رتبة قال لي انت مصلح اجتماعي كان تفتح بلاغك بلا فلسفة معاك ووعظ نظرت إليه وحمدت الله أنني أتيت من بيئة ومجتمع يعرف كيف أن فقه (السترة) أهم من تصفية حسابات نفسية لا تعرف تركيبة المجتمع السوداني وخفت أن تتولي أمرنا يوم ما مثل هكذا عقليات. نزار الحميدي
01-19-2023, 01:11 PM
مصطفى نور مصطفى نور
تاريخ التسجيل: 05-13-2022
مجموع المشاركات: 4975
Nizar Alhameedi 1 فبراير 2020 · قبل كورة الهلال الباب بدق قوم شوف ده منو ؟ جاني صوت المدام وانا بحنس في النوم وخلاص وصلنا لي اتفاق إطار ي فضل التوقيع علي الجفون إلا أن صوتها جعل وفد النوم ينسحب وانا اقوم اجرجر ارجلي نحو الباب فتحت الباب لقيتو جارنا الذي نزل المعاش ولازال يمارس سطوة الوظيفة علي كل شافع وعنز وكل المارة من خلال كرسيه الذي يقبع تحت شجرة أمام منزله وطوالي دخل فيني شمال عندك عيش ناشف؟ اجبته الغريبة انا قبل شوية جيت من الفرن بعد جهد جهيد تحصلت علي عيش سخن من ناره ممكن اقسم ليك منو بالله نهرني ليك تقول انا مقدم لي إذن في المصلحة الكان شغال فيها قلت ليك عيش ناشف نااااااااشف معاها جرة قلت ليه شكلك عامل سخينة كاربة قلت اكسر حدة الموقف مسك يدي وجراني وراه ذي البت القبضها اخوها في كافتريا مع الجكس بتاعها وقال لي عاين وهو يشير لمجموعة ود ابرق ومعاهم 5 ام قيردون يتجاذبون الصوصوة الرومانسية علي سلك الكهرباء أمام منزله والتفت الي قائلا تعرف ديل بسبحو وتسبيحهم دعاء انت ضعيف في الفقه ولا شنو؟ اها ديل دخلهم شنو بي عيشي الناشف اشار لاتجاه الغرب وقال لي ديل كلهم متوجهين علي امدرمان صااااااح؟ قلت صاح اهاااا ام درمان فيها شنو قلت ليهو قبة المهدي قال لي الدراويش اليقطعوك قلت ليه وقد لفتني الحيرة الاذاعة التلفزيون عوضية سمك سوق ليبيا وظلت الكلمات تخرج من فمي كطلقات الكلاش الساعة النهرني ليك يا حيوان إستاد الهلال الهلااااااال وطيب علاقة العيش الناشف وام قيردون وإستاد الهلال شنو؟ قال لي نكسر العيش الناشف ده للطير ده في طشت ينزل ياكله بي نيه هزيمة الأهلي الليلة يطير من هنا علي الاستاد وطبعا بخش بدون تذكرة ويحوم فوق مرمي الجماعة يجهجهم لينا والشعلة يجيب القون ونتاهل قلت ليه وانا خلاص وصلت الحد شوف يا زول لو القصة اكل طيور كان منتخب السعودية شال كأس العالم 20 مرة مع الحمام البياكل في الحرم الشريف ليه مليون سنة قوم فكنا بلا عيش ناشف بلا جمال سالم معاك نزار الحميدى
01-19-2023, 04:33 PM
Nasr Nasr
تاريخ التسجيل: 08-18-2003
مجموع المشاركات: 10839
Nasr اخى تحيه طيبه والله رجل فى قمه الاخلاق ورجل موهبه شاعر - عازف - ملحن - ضابظ شاطر كان تعرفت عليه فى امريكا وعاد الى السودان ولاعب كره قدم كمان زول رائع حقا والله
اخى ناصر كل الاغانى دى من الحان اخوى المبدع نزار الحميدى
01-19-2023, 06:13 PM
مصطفى نور مصطفى نور
تاريخ التسجيل: 05-13-2022
مجموع المشاركات: 4975
ترنح ------------------------------ رفع عقيرته مغنيا يا زمن وقف شوية واهدي لي لحظات هنية... ولا اقول ليك ماتقيف ذاتو انا هسه ذاااااتي قادر اقيف؟؟؟ وأطلق ضحكة مجلجلة كأنها صادرة من حنجرة مشروخة لتصدر حشرجة اعقبتها كحة عنيفة تسائل ( إحم) بصوت خافت الله ؟ ياربي دي الكورونا تكون جاتني؟ هه هه كورونا وضحك علي بالطلاق عرقي( خميسة) ده يقرض اي كورونا ده قرضني انا وأشار بسبابته الي صدره مترنحا حاول أن يستند علي حائط مكتوب فيه بخط صبياني (تسقط بس) وهو يهوي علي الارض قرأ العبارة بنصف عين مغمضة عندما استلقي علي الارض همهم بصوت متقطع اها سقطنا... ارتحتو؟ نزار الحميدي
01-19-2023, 06:17 PM
مصطفى نور مصطفى نور
تاريخ التسجيل: 05-13-2022
مجموع المشاركات: 4975
Nizar Alhameedi 15 نوفمبر 2018 · الكهرباء و الزوزوة اول ما اتخرجت من كلية الشرطة الوالد قال لي اختار ليك حاجة واحدة تكون مسئول منها من مرتبك في البيت فكرت اقول اللحمة قلت دي ما مضمونة فجأة تطير السماء تلحس المرتب ياربي اقول الخضار نفس الشئ فجأة جاتني فكرة اقول الكهرباء ومن يومها بقيت لافي في البيت ذي المجنون وعامل شمطة يا جماعة اقفلو المروحة ما تخلو النور مولع والحاج بعاين لي بي قعر عينو ولسان حالو بقول عشان تعرف زمان كنتو مجهجهني كيف ؟
01-19-2023, 09:42 PM
مصطفى نور مصطفى نور
تاريخ التسجيل: 05-13-2022
مجموع المشاركات: 4975
Nizar Alhameedi 23 أغسطس 2018 · الإتجار بالأحزان ظاهرة جديدة علي مجتمعنا كم من صحفي هرول وراء أحد المشاهير عندما علم بتدهور حالته الصحية والتقط معه عددا من الصور السيلفي وسرد كثيرا من الحكايات من نسج خياله عن علاقته القديمة به حتي اذا حان أجل النجم لبس نظارة سوداء وارتسمت علي اساريره مسحة حزن زائفة سرعان ما تختفي بانتهاء مراسم النشر. وكم من قناة فضائية تهرول باحاسيس مصطنعة لمراسلين و مذيعين لنقل أخبار الكوارث والمحن التي لايهبوا لنقلها إلا بعد زيارة مسئول أو متنفذ انها عادة دخيلة علي مجتمعنا تعكس مدي الانحطاط الذي وصلنا إليه كدت أن استفرغ وانا أشاهد تلك الدموع الزائفة عند عرض برنامج عن الفخيم الراحل حمدي بدرالدين ومسكت نفسي ولكن عندما شاهدت حلقة شهداء البحيرة لم اتمالك نفسي وهرولت للحمام لافرغ كل ما ابتلعته من مرارات وزيف وسخف انه الإتجار بالأحزان يا سادة نزار حميدي
01-20-2023, 04:05 PM
مصطفى نور مصطفى نور
تاريخ التسجيل: 05-13-2022
مجموع المشاركات: 4975
Nizar Alhameedi 26 أكتوبر 2022 · مذكرات ضابط مباحث دخل النقيب السنجك المكتب وعيناه محمرتان من أثر سهرة الامس حيث عرف ولعه باغاني \الطمبور فهو من منطقة الشايقية فكان يرتاد الاماكن التي يصدح فيها وداليمني وصديق احمد التفت إلي وجفناه يغالبان الانطباق يا ملازم احوالكم كيف قبل أن أرد دخل رقيب الإدارة وادي التحية وخاطب النقيب رئيس القسم دايرك همهم النقيب اصبحنا واصبح الملك لله هي متين اصبحت؟ رجع بعد قليل وقال لي شيل كابك يا ملازم ارح معاي عشان تتعلم الشغل كيف . قالوا في واحد طالع في الكبري داير ينتحر نمشي نشوف دي مصيبة شنو وصلنا كبري النيل الابيض وجدنا جمهرة من المواطنين وواحد طالع فوق والناس تكورك يا زول استهدي بالله مافي حاجة بتستاهل التفت إليهم النقيب خلاص يا جماعة البوليس وصل ما في زول يفتح خشمه مع الزول ده خلوه لينا تسلقنا السياج واصبحنا قريبين من ذلك الشخص بحيث يمكن التحدث إليه صاح فينا :- ما في زول يقرب مني بتلب والله اتلب وطبعا عندها دار اغرب حوار بين النقيب وذلك الشخص يازول داير تتلب عشان حاجة من اتنين يا داير بت عمك وابتك عشان خلقتك دي يا اختلست قروش من خزنة الحيكومة وخايف من الفضيحة وبت عمك لو غصبوها تعرسك ياها الانتحرت ولو سرقت قروش الحيكومة ممكن يعملو ليك كشف ناس الحلة واهلك وتمرق منها دحين ياخوي ما تودر زمنا ساكت وانت لو بقيت صالبنا والشمس دي سخنت ياني الطالع فوق ودافرك بي نفسي ما تمسك بينا زمن لكن اقولك تلب ساكت شكلك كده قاعد تيمومة عدد في البيت وسألتك بي الله لو تلبت وحصل قدر الله بتلقي الحجة بي غادي اسمها البقيع قلها ولدك اترقي بقي نقيب وجابولو بنيه سماها البقيع علي اسمك ولو لميت في الحاج عندو وسم في جبهته قال انضرب في حرب المصريين لكن عرفت انو الضربو عود في راكوبة ودالزين المهم سلم عليه وقول ليه لسه تيمك ما جابلو كاس خارجي دحين هو مرضان كورة . وانا أنظر لذلك الشخص والنقيب وهذا الحوار المن طرف واحد ختم النقيب كلامه بسؤال اهاااا قلت شنو.؟ صاح ذلك الرجل:- بتلب..... بتلب وعمل حركة كأنه يهم بالقفز تعالي صياح المتجمهرين يازول لا عندها خاطبه النقيب ببرود شكلك ده ما غريب علي بتخش دار الرياضة؟ اجابه الرجل ايوه . خاطبه النقيب طيب يا زول ابوعنجة لاعبة الليلة وانا كورة لاعب فيها باكمبا ما بفوتها لو اتجرجرت معاي لغاية مواعيد الكورة ياني الفايت سايبك ولا اقولك انزل ارح نفطر سوا ونضربلنا كباية شاي ونمشي ندخل بعدين الكورة انفرجت اسارير الرجل وبدأ في النزول امسكنا بيده وسط تصفيق الموطنين اتضح أنه مختل عقليا يعتريه جنون من حين لآخر ومن رواد دار الرياضة ويشاغبه الجمهور أثناء المباريات . جلس ذلك الشخص بيننا في العربة والتفت عليه النقيب والعربة تسير ببطء من شدة الزحام والعرق يتصبب منا من سخونة الجو قائلا عليك الله لو تلبت ما كان احسن لك وخاطبني ياملازم أن شاء الله تكون استفدت من جنس العكلتة ذي دي ما بدوها ليكم في الكلية نزار الحميدي
02-02-2023, 06:10 PM
مصطفى نور مصطفى نور
تاريخ التسجيل: 05-13-2022
مجموع المشاركات: 4975
قروبات و قروبات ------------- نزار الحميدي ياخي السودان ده لذيذ جدا وبتحصل فيه حاجات انا متاكد وابصم بالعشرة غير ناسنا هنا مافي مواطن في أي دولة بعملها من ظهر الواتساب وجماعاتنا دورو ليك فيه بالفارغة والمليانة اي تلاتة قشطو نفسهم في قروب والادمن طوالي رسل موجهاته . طبعا اخوكم ما عارف من حسن حظي ولا من سوء حظي يعني أنا ما زول مشهور عشان كل ما اصحي الصباح القي نفسي قاشطني في قروب .. قروبات اشكال والوان سحنات مختلفة و توجهات متضادة ↔️ يعني ما ممكن القي نفسي في قروب ( احباب الله) وبعد دقيقتين القي نفسي مضاف في قروب ( ماركسيون ونفتخر ) ثم تمت اضافتك في قروب ( المريخ مفخرة ومقدرة ) وبعد لحظات يضيفوني في ( الهلال سيد البلد ) غير قروبات البوليس وكل قروب عنده رأى في التاني واحدين مع المك واحدين ضد المك وانا في الاتنين محشور واحدين مع الصندوق وواحدين خارج الصندوق وبرضو العبد لله فيهم الاتنين تبقي خاتف لونين وما عارف انت شايت وين ههههههههه والأغرب من ده كله انه قبل فترة لقيت نفسي مضاف في قروب لا ايدي لا كراعي دون استشارة قلت ارجع اشوف ده قروب شنو ؟ انشغلت يومين وما فتحت القروب ده لما فتحته لقيت رسالة الادمن ازال نزار .....😡 ورسالة فوق هذه الإزالة :- نحن ما اطفال 👶🏼👶🏼👶🏼 والظاهر نحن ما قدر المقام عشان كده السيد نزار ما عمل مداخلة . انتهي ضحكت 🤣 وقلت دي مصيبة شنو الوقعت فيها دي لكن بي أمانة اجمل قروب ومستمتع فيه ودخلوني فيه جماعة أعتقد أنهم ديل حتي مداخلاتهم لا تتجمل بمساحيق البلاغة والادعاءت الكذوبة اضافني فيه أحد غسالي العربات يدعي (بيتر) وهو من يقوم بغسل عربتي كل جمعة حيث اذهب لميدان عقرب واجلس لتناول القهوة ☕ ويقوم الشاب الوديع بيتر (بجلخ )العربة 🚘 كما يقول واسرح بخيالي في ميدان عقرب اجتر صباي وانا اركض خلف الكرة ⚽ في هذا الميدان الذي طاله تشويه غير ملامحه للاسوء ونمت بيني وبين بيتر علاقة ود حيث أصبحت اتصل عليه قبل حضوري حتي اضمن أنه ليس هنالك مايشغله حتي لا يطول انتظاري حتي فوجئت بقروب جديد يحتضنه واتساب جوالي (غسالي ميدان عقرب) ودخلت ووجدت ترحيب بنصاعة رغوة صابون فاب بي ( نرحب بجنابو 👮🏽♂️ بالقروب ) وتوالت المداخلات تحمل عفوية وبساطة ونقاء هذه الشريحة واستمتع بمثل تلك المداخلة * يا فارة بتغسل بي تيري ونحن بنجلخا بي بشري واللستك 🛞 لو ما اديتو صابون سوداء ( بالسين وليس الصاد) ما بجيب اللمعة. * اوعه من العربات الهكر بتكمل صابونك وبتجهج عيونك * فوطة القزاز بنختها في الجيب الوراء يا معلم. * الرغوة لازم تكون زبادي . وانا في نص هذه الجركانات🪣🪣 ما عارف اسوي شنو واتخارج منها كيف؟ قابلت بيتر سالتوا ليه دخلتوني معاكم في القروب وانا فوطة ما عندي رد ببساطة لانك اصلللللللللي يا جنابو. واصحابي كلهم متكيفين منك عشان بتشاغلهم . قلت ليه خلاص شوف لي جركانة 🪣 خلينا نجلخ معاك البابور ده ههههههههههه نزار الحميدي✋😅
03-19-2023, 09:34 AM
مصطفى نور مصطفى نور
تاريخ التسجيل: 05-13-2022
مجموع المشاركات: 4975
Nizar Alhameedi 8 نوفمبر 2022 · احتفائية تابين الشاعرالكوني محمدالفيتوري الخرطوم السودان المركزي العظيم وطن شامخ لاحرار الانسانية والابداع الشعراء والمبدعون والافذاذ لايموتون هكذا التاريخ شرف الكلمة شرف المنشأ وانت عشقنا ايها الانسان تدشين مجموعة الصافية الموسيقية ❤️🌹💚🌹❤️ احتفي نادي مدينة الصافية الثقافي الاجتماعي الرياضي بالخرطوم بحري بتدشين حفل موسيقي عالي الجودة والاداء الابداعي بكوكبة متميزة من الفنانين المطربين والموسيقيين المتفردين المتقنين لفن الالات النغمية في اوركسترا متكاملة الاركان من وتريات (كمان.عود .جيتار.بيزجيتار واكورديون وطبل وبنقز واورغ وفلوت وهندسة صوت) كان اولئك الرهط الجميل في وحشة المدينة التي تعاني من الالام جسيرة غيرت ملامح التواقيت ونشيج الانفاس في زمن مرهص بالتوتر والجذب والشد مخيم في سماء الوطن العظيم وطن الحب والجمال والابداع كان الموسيقار الشاعر الاستاذ صاحب السعادة نزار الحميدي المشرف المؤسس لصناعه الجمال والحب والابداع منظومة اخوية متكاتفة عزيزة التزامن الفرح البسيل من صناع النغم والجمال موسي حربي مديرا لشئون الفرقة ومجموعة الصافية الموسيقية ومجلس الاشراف والتنسيق العام الاستاذ الاخ صديق احمد واركان حربه الاخوان ماهر الحاج علي والاستاذ ياسر كمال ومحمد سعد وارتولي ومبارك مصطفي وأمام مصطفي وسعيد صبار والشاب انور وبمعية الاساتذة المجيدين الاخوة الاكارم حسن كديس علي البيز وحسن عمر علي الجيتار والاستاذ قدورة وفواز وشعار وحربي وعبدالله ليببا والروى والعم الاصيل زروق عمر محمد والاشبال اكرم وفاطمة ولقاء علي ٱلة الكمان وعلي آلة الاكورديون محمد حسين وأمجد ومحمد على الاورغ وعلي آلة الفلوت احمد و الشاب الدولي علي الدرامز ورمضان ترمبيت و مجاهد علي الايقاع وبدر الدين علي الطبلة والشاب الفنان طمطم الاشراف العام علي هندسة الصوت والذي وجد إشادة من الجميع بحضور وتمكن بهي ومن الاصوات الصيدحية وبتقديم أكثر من رائع من الأستاذة الشاعرة رغد تبن و المذيعة القادمة بقوة وسام زهير جمل الفنانون المتألقون دوما تلك الليلة ا/صابر جميل . عبدالله زيدان هشام درماس . صفوت الجيلي وبحضور الفنان الجميل عادل مسلم وخالد امام واخرون من فئة كل النجوم التي تزين الحركة الغنائية والموسيقية الملتزمة بتاريخ ومسيرة اعمدة الغناء والتطريب السوداني الاصيل الموقر الانيق الذي صاغ وجدان الانسان السوداني عبر مراحل تاريخ وذاكرة الغناء السوداني الوقور من اعلامنا المعروفون للعمرية الجميعيه الجيلية الذين ارتحل جلهم واورثوا كما وفيرا من الحب والادب والجمال والعفاف وعذرية الاخلاق كانت مجموعة الصافية الموسيقية حقا وصدقا لا مراء البتة تحيط به كما يصنف المختصون خمسة نجوم كما يقولون بل كان كل النجوم التي في فضاء السماء لان عبر النغم نجمل الاشياء ونعيد صياغة الانسان واصلاح ما اتلفه الزمن ويتلفه الاخرون ممن لايعي رسالة الموسيقي والطرب في حياة الكائن الانسان المحب للحياة والخير والجمال كان الاستاذ كامل عبدالماجد (. سيد الاسم ) الشاعرالمجيد و الموسوعي العتيد حضورا علي شرف الجمال المحيط والسيدة الماجدة حرمه والباشمهندس والشاعر الفخيم محمد الخليفةتاج السر وسكرتير النادي السيد محجوب محمد محجوب والسيد موسي عضو الادارة ومن علي البعد الريس محسن وعلي أبو النجا الذان تابعا التدشين علي الهواء نسبة لتواجدهما خارج البلاد والسيد اللواء شرطة علي نديم ومن ضمن اعيان ووجهاء مدينة الصافية الاستاذ عبد اللطيف الهلالي والاستاذ عادل محمد عبدالحميد والاخ ابراهيم عمر كروم شيخ العرب والاخ الكريم عاطف قناوي والاخ اسامة حسن سالم والاخ معتز خليفة الزعيم والفنانة والشاعرة المأتلقة عفراء علي ومديرة منتدي المها الثقافي بالخرطوم السيدة مها بشير(ام فتحية) صاحبة منتديات المها ولفيف من الحضور والمشاركين علي التوالي حسب ما اتسع له الزمن ولاننسي جنودا خلف الكواليس في مقدمتهم السيدة اخلاص في الضيافة والخدمات وكل من حضر من منسوبي نادي الصافية الثقافي والاجتماعي والرياضي من كافة المرافق والاسر الكريمة وشباب الغد حملة المشاعل وتراتيل النصر وصناعة وطن شامخ لاحرار الانسانية والابداع والسلام والحب والحرية والعدالة والكرامة والقصاص كان مسيرة التاريخ العظيم ترفرف عبر انغام وموسيقي وإزمار مجموعة الصافية الموسيقية لايسع الجميع الا ازجاء الثناء ويقولون تهانينا القلبية لكم جميعا والنجاح والفلاح حتما رفيقكم لان الابداع الانساني مستمر وانتم له اهل ويليق بكم ودي وتقديري لهذا الانطلاق المتكامل القويم .والي الامام ومزيدا من الابداع المؤسس . كانت هذه كلمة لابد منها لمن لم يحالف الحظ وفره والرضا يخص من حضرا .. تاج الدين الفيتوري 🌹🌹🌹🌹🌹
03-19-2023, 09:36 AM
مصطفى نور مصطفى نور
تاريخ التسجيل: 05-13-2022
مجموع المشاركات: 4975
14 يوليو 2021 · .مذكرات ضابط شرطة طبعا النظام البائد بعد 89 ادخل في موظفي الدولة ومنهم بعض ضباط الشرطة هلع وخيفة من حاجة اسمها كشوفات الصالح العام وبعدما كانوا يوفرون الأمن للمواطن أصبحوا غير آمنين في انفسهم فيأتون مكاتبهم كل صباح وهم يتوقعون خطاب بالاحالة للصالح العام فأصبحوا يتوجسون خيفة من قطع ارزاقهم وتشتيت اسرهم فأطلق بعضهم اللحي وقصر آخرون بناطيلهم وعلت هامات بعضهم علامات الصلاة ورفع بعضهم سباباتهم وعقيرتهم تكبيرا وتهليلا في اي مناسبة (هي لله هي لله ) بعد أن كنا نشاهد بعضهم قبل الإنقاذ يصدحون باغنية (الندامي) رأيناهم يتغنون ( لا لدنيا قد عملنا) ركبت مع أحدهم عربته التي يقودها له جندي فادخل سعادته شريط مديح للبرعي ليصدح ب(مصر المؤمنة) و تهتز لحيتة في تناغم روحي ووجداني عميق مع المدحة وارتسمت علي محياه تقطيبة كأنه يسبح في ملكوت سماوي روحاني ولما كان السائق خط سيره مختلف توقف في موقف الحاج يوسف لينزل ويقود العربة زميلي الضابط وفور تحرك العربة أخرج الشريط بعنف وأدخل شريط آخر اخرجه من تحت المقعد والقمه فاه المسجل لترتج العربة بتم تم خطير وترفع عقيرة المغنية بي اغنية ومعها كورس بنات يرددون معها بأصوات نشاز (عزاز علينا شالو نوم عينينا) وخيل لي انني لمحت اهتزاز تلك النجوم في كتف زميلي كأنها تستدعي زمن سحيق دثرته مساحيق دينية زائفة التفت إليه وسألته شنو القلبة دي ياسعادتك؟ قال لي السواق ده انا شاكي فيهو كوز جابوه لينا من الامنية وبرفع تقارير عن الضباط قدامو بشغل مديح وطارق السويدان والشعراوي وتحت مقعدي ده وأشار باصبعه ناسنا الزمان ههههههه وطبعا بقي كل واحد خايف من التاني يرفع فيه تقرير و كان احد الضابط خاتي في رأسه اني من الجماعة مع انو انا زول موسيقي وكورة (وعمري ما عرفت السياسة ولا خضت دروبها لقناعة ذاتية ان مهنة الشرطة لا تأدلج تحت أي تيار كان ولازلت انادي بتلك القناعة. وابعد ما اكون من تلك الادلجة الشائهة التي أودت باعظم مهنة الي التهلكة .) عندما يراني ذلك الضابط يتصنع الوقار رغم أننا تقابلنا كثيرا في جلسات الانس قبل الإنقاذ . ولسوء الحظ تمت إحالته بعد فترة وجيزة ضمن مجموعة للصالح العام لم التقيه إلا بعد عدة أشهر يقف أمام عربة تاكسي بسوق سعد قشرة والظاهر انه شغال بها فهرولت للسلام عليه ازيك يا سعادتك؟ فتجهم وجهه ورمقني بنظرة غاضبة قائلا عليك الله امشي ارفع فيني تقرير لي نقابة التاكسي قول ليهم الزول ده بتاع شربة . هههههههه فلعنت الإنقاذ التي أحالت صفاء نفوسنا وحبنا لبعض لتوجس وريبة وشك نزار الحميدي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مصطفى نور
Nasr
فيس بوك
تويتر
انستقرام
يوتيوب
بنتيريست