|
كتب الكاتب الفاتح جبرا المتوفرة بمعرض الدوحة
|
|
 Re: 🌹🌹🌹🌹🖊️🖊️ 👳🏼ﻳﺎﺑﺎ كلمات : كلما� (Re: مصطفى نور)
|
عـــافــي مـنـك
==
كلمات : علاء الدين عبدالرحيم
==
عـــافــيـــة مــنــك وراضــيــة عنــك سـو رضايـا
ومـــا بـيــخــــيــــب الـرضــا والـدتــو يـا جــنـايـا
أنت مـن يـا دوب صـغــيــر مـن زمان دايماً مـعايا
أنــت ديـمـه أمـامـي سـايــر مـا بخـليـك بـي قـفايـا
ما بتغيب من عيني لحـظـة ولا حصـل سبتك ورايا
لا من الله يشيـل أمانتوا أنا بـبقي خاصاك بالرعـاية
ليَ يــرعــاك الـبـيــرعـي لـيَ بـيــك يبـــرد حشايـا
أصــلـك أنــت هـديـه مـنـو والله بـيـك أجزل عطايا
جيـتــنـي واحـد مالـي تــانى رحمـه في آخر صبايا
قـبــل مــا أفــقـد قــدرتـي وقـبــل مـا تنـهـار قـوايـا
جيـتـنـي ذي بـدر منـور وفجـأة طلـيــت فـي سمـايا
انـت لــمـا خـلاص كـبـرتـا دار تسيبني أعيش برايا
دار تفـارقـني وتسـافـر والحـزن يصـبح جـزايا
كيـف يهـون لك تحـزن أمك شان تحقق ليك غاية
كان مسـافر شـان عـلاجي بلقي في شوفـتك دوايـا
وكان عشـان تسقـينا نهلك نحن بي حنك روايا
كان عشـان كـرعيـنا راحـل نحـن بي بعـدك حفايا
كان مهاجر شان تعرس خير أبوك مالي التكايا
خيرو وافر أبوك يحمدوا مراحو مليان بالسعايا
وبالقروش الجيب مجكن ولسه برضو الجايا جايا
برضـي منـك مـا بقـصـر بحـفـر أديـك المعـايا
كان ده كلـو كمـان شُـويّ بتلقـي في دهـبي الكفايا
أصـلـي مـن سـويـتـو نـاذرا إبـقـي لـي أيـام قـسـايـا
خـاتـا للـزمـن البعـانـد لي سعـادتك يا عشـايا
أنـت مـن شبـيـت صغـير راسي ما بتحتاج وصايا
ما حصل خيبتا ظني ولا فشل فيك زين غنـايا
لا تسـيـب أمــك تـهـاجــر يـمـه محـتـــاجــي الحـمايا
لا تسـيـبـني وراك تـرحـل إنـت يـاك ضُـلـي وضرايا
أنـت فـوق الـحـوبــة مـقـنــع إنـت للـمـكشـوف غطايا
دايري مـنـك تـبــقـي جنـبي . جنبي في فـرحي وبلايا
دايـري كـان قحـيـت اتـبـنـك ارفـع اقـســمـلـك غـتـايا
أنت سـاعـة تـبـقي جنـبـي تـبـقـي ضُـلـي وتـوب قفايا
ومـا بخــاف ظـلـم الـلــيـالي وأنـت يــاك عـكاز عمايا
دايـري أقـضـي عـمـيـري جنـبـك أصـلو قارب للنهايا
خـايـفـي كـان ســافرتـا ترجع تلقي فـاضي البيت بلايا
حـيـنــا مـا بتـنـفـع قـروشـك وما تجـيــب لك أم سـوايا
مـاني عــارفـي سـبــب رحـيلك يـا وليدي شنو الحكاية
إلا تبـقي بـــراك شــايـف فـي فــــراق الــوالــدة غـايـه
ما بعاتبك وما بلومك لو رحلت بلـقي في الأمثال عذايا
عـلـي حـجــر دايـمـاً قليـبـك وقليـبـي كـله عليـك جنـايا
| |
 
|
|
|
|
|
|
|
 Re: 🌹🌹🌹🌹🖊️🖊️ 👳🏼ﻳﺎﺑﺎ كلمات : كلما� (Re: مصطفى نور)
|
حاجة نفيسة .. قصة للاطفال
حاجه عجيبة
قصة طويلة يااطفال
نهايته كان نهاية غريبة
حاجة نفيسة كلها طيبة
تشهد بي حنانه الحلة
بي كل طيبتة وتهذيبة
كان حِبيْبه
حبوها الكبار والجهلة
كان يحترموا فيها الشيبة
كانت عيبه
أنو دموعه دايماً سايله
في الفال والحزن صِبّيبة
إلا غريبة
ديمة كمال معاند ليها
كايس دمعته وتعذيبه
دون أخوانو منصاع ليها
روحو الماقدر تهذيبه
ديمه يصيبه
بي اسهم لسانو السامه
بي اهماله ليهو يعيبه
كان يوم داك ينهّر فيها
لمن زاد عليها نحيبه
خافت إنو تدعو عليهو
دعوى الأم من الله قريبه
دخلت جوة تبكي براها
ديمه جناها كاسرو قليبه
فات لا جوَّة حسَّ الحمى
بين أوصالو ساري لهيبة
في غير وعيو صاح وينادي
يمه تعالي مني قريبه
حسَّ بإيده ماسكه جبينو
شان الحمى بالي تويبة
أصلو الأم حكاية عجيبة
لمَّ تشوف وليدة يعاني
ديمه تعيش وسط تعذيبة
مابيرتاح دقيقة قليبة
فوقو تقيف تشيل الليل
وتبكي من الصباح للغيبة
زاد تعذيبه
انآت الوليد والآمو
ما قدر إحتمالو قليبه
يوم شافوها جاري تويبه
تبكي وراها كل الحِلة
لملموا في الايادي دري
باكيه كئيبة
همها كان كمال يتداوى
ما خلت طبيب وطبيبة
عالي نحيبه
ودعت الأهل تتباكى
قالت مابتطول الغيبة
سفرة قريبة
يمكن تلقى فيها الدايره
يتعالج وليده حبيبه
قالت أسيبه
كل الدنيا ماندمانه
والروح لي جنايا أفديبة
طالتَ الغيبة
شهرين من قيامه اليوم
وماكان ترضى ساعة تغيبة
حالة صعيبة
والناس في الصلاة بيدعوله
راجين لي وليده الطيبه
لحظة عصيبة
لمن عاد وليده براه
رجعت بس معاهو حقيقة
رجعه مريبة
حزن الدنيا في عينى
ويجرجر في زيول الخيبة
غلبو يجيبه
أسئلة من كبار الحله
وين أمك قدرت تسيبة
الشفع كمان يتباكو يأمروا فيه
زي ما سقتها إنت تجيبة
صدمة رهيبة
لمن قال وسط دمعاتو ماتت أمي
وأخدت من حياته نصيبه
مقلو صبيبة
ردد كم جمل مطموسة
كلمات ماقدر ترتيبة
وديك اللحظة عرف الدنيا
من غير والده
خاوية ومابتساوي سبيبه
فات وينادي دنيا عجيبة
دنيا رهيبة دنيا غريبة
طافش فيها بين أهوالة
كايس للجراح تطبيبه
جاري وراهو حاج التوم
الجنى عقلو صار مو طيبة
قام رشاهو بي كوز موية
علو يفيق من الغيبيبة
فعلاً حسَّ – ( حس هناك مكان الحمى)
حلمة عجيبة
حلمة عجيبة
منها قام كمال مهجوم
ويحمد في الله كان هضريبه
دخل الأوضة كابس أمو
روحو تزيدو في تأنيبة
قالد أمو فوق مصلاته
يبكي زي العملو مصيبه
دايرو عفوكي بس يايمة
روحي فداكي لو ترضيبه
قالت في فزع مهجومة
سم اسم الله علك طيبة
بين إيديها
ضامه عليها
قالت باكية
كيف الأم تجافي حبيبه؟؟؟
علاء ابوسير الرياض
10/5/2001م
| |
|
|
|
|
|
|
|
|
|
Re: 🌹🌹🌹🌹🖊️🖊️ 👳🏼ﻳﺎﺑﺎ كلمات : كلما� (Re: مصطفى نور)
|
قصــــــة زواج عــــرفــــي
ابكينى ياعينى دمعاتى لاتجفى
وأرثينى ياالحان جيدن فنون وصفى
انا مانى ضايعه براى ضايعات معاى الفى
بحكيلكم الحاصل كان تلقوا لى صرفى
قرويه ايوه انا... بدويه معترفى
جواى تقاليد ريف مابيشرحن وصفى
لابسه الفضيله وشاح ملفوفه بالعفى
وربيانه بين والدين اطلالتم تكفى
جيت اقرأ فى البندر احلامى مصطفى
اخدونى طب خرطوم وشروطى مستوفى
بس لو اساعد ابوى لى دينو كان اوفى
لميت بنات جايات من بيئه مختلفى
لابسات بناطلين جينز والمشيه بى خفى
وانا لابسه توب جارات والشنطه فوق كتفى
راكبات سماح عربات وانا ماشيه متخفى
والمافى فى الخرطوم بينات رفوفن فى
ياكلن صنوف واشكال مابعرفن عرفى
وانا شان اسد الجوع يوماتى مستلفى
آكل تلات وجبات مصروفى مابكفى
وحتى الضروريات والله مابيوفى
انا عارفه ابوى شقيان فى داب مصاريفى
دا تمن شواويل دوم وربطات حبال حلفى
قاومت اغراءات استهدفن شرفى
انا بت رجال واصيله وتعجب اوصافى
دخلوا لى من ابواب كانت نقاط ضعفى
اول شئ يتضاعف فى ايدى مصروفى
وطلباتى تتنفذ قبال يرد طرفى
يوماتى اتفسح شق الديار عرفى
واضمن مصاريف طب مهما تزيد كلفى
الطب هدف ياناس كان منيتى وشغفى
وايه يعنى لو زليت يوم فى سبيل هدفى
انا قلت يابت هوى لى نار شقاك اطفى
وزى عاشه وسط السوق ماظنى تتعرفى
اترفهى وعيشى بس اوعى تنحرفى
اصلو المعيشه نضال ومدابره وصرفى
افضل زواج مشروط لابيت ولاخلفى
احسن من الباقيات فى الهاويه تنجرفى
وانا خايفه ليه مادام صاحباتى فى صفى
وافقت بى عمار واعضايا مرتجفى
حسيتو زول مسئول مابيستغل ظرفى
عيشنى فى راحات غير حوجه مستكفى
لاكين ملكنى احساس جواى حزين وخفى
وانا عايشه فى دى الحال حومى السنين لفى
الخايفه منو حصل والمنو كان خوفى
الشايله فى احشاى بدا يربى فى جوفى
طبعا بدا التعليق قدامى مو خلفى
اصبحت زى منبوذ من الوجود منفى
فتشت لى عمار فى الجامعه كان مافى
قالوا اسمو ماعمار كل الخلوق عارفى
كانت شهادة زور متفبركه وزايفى
دا الكت مسما حبيب اصبح معاى جافى
وطردنى من البيت واتغابا فى العرفى
وجيت راجعه جاره اساى ندمى وزيول اسفى
غرقانه فى الآهات فى حزنى معتكفى
وورقة زواجنا كمان ضاعت مع لفى
طالباكا ياالله عجلى يوم حتفى
وابلينى بى سرطان او بى شلل نصفى
دا لأنى ماستاهل اتهنى بالعافى
يايمه وآ اسفاى بالبيا ماك عارفى
انا دايره اقابل ابوى انا منى كان يعفى
دا انا كنت مخطوبه لى زول حنين ووفى
وانا كونى اخون عهدو قطعا سبب كافى
كيفن اكون انا ام لى اسره متعافى
وكيف ينجح اى طفل يتربى فى كنفى
معترفه بى ايدى لى ذنبى مغترفى
وزى مابراى سويتو علاجو فى كفى
سيان اموت او اعيش ماغايه مختلفى
انا ضعت بين امواج كسرت مقاديفى
وانا لحظة التخريج كانت حدود شوفى
وملعون ابو العوزه الكسرت شموخ انفى
دا بس اعترافى انا ولسه الكتير مخفى
كانت دى ياسامعين قصة زواج عرفى
لا من روائى قدير لا حتى تأليفى
واقع حقيقى مرير ما من خيال صحفى
تلقوها فوق قبرى مدفونه فى شرفى
علاء اب سير الدمام
31/3/2008م
| |
|
|
|
|
|
|
|
|
|
Re: 🌹🌹🌹🌹🖊️🖊️ 👳🏼ﻳﺎﺑﺎ كلمات : كلما� (Re: مصطفى نور)
|
رســــــاله من الاخــــره
ساره من الآخره برسل ليك تحيه
من حبيب مات يوم فراقك الا نارك جوه حيه
من جهنم ليكى بكتب رغم الآمي العلَّى
قالب الأحزان مباهج كان يخف حزنك شويه
عارف إني أنا في قليبك وعارفو قلبك لسة ليَّ
وعارفو باب سكة فرحنا سدَّتو الايد القويه
أهلك القايلين سعادتك تبقي في العيشه الثريه
شالوا فرح الدنيا خلوك تبكي بالدمعه السخيه
رغم أفكارن بريدك ريده ظاهره وماخفيه
وإختلاف الفكر عمرو مافسد للود قضيه
حالتي من غيرك تمحن عيشة في نار سرمديه
مافي زول أحكيلو حالي وإنتي ماك عارفه العلىَّ
سارَّه مابقدر ألومك إنتي ما إتلومتي فيَّ
والبِزِح في الواطه قاعد ما بتطول قدمو الثريا
سارَّه أمسحي سيل دموعك وعيشي لحظاتك هنيه
والفرح فد مره قالوا عندو في أعمارنا جيه
أوعي تحزني يوم زفافك إنتي ماشبه الآسيه
إلا أغدارك معاندة وإنتى ليها دوام ضحية
إفتقدتك في إحتضاري يوم أحاطت بي المنيه
وقالوا في الليل المضلم يفتقد قمر العشيه
ساره طاريك مانسيتك وكيفن أنساك يابنيه
كل يوم سهران وحاتك بين قوامك والمحيا
لو مرادي أقوم وأجيكي شان أوصيك كم وصيه
إلا خايف تتفتق تنزف جراحاً لسه نيه
سّلمي لي على قليبك ومنِّي أغريهو التحيه
وخَّلي يطرأ البينا دائماً منَّو كان فضلت بقيه
ساره خاب فيك التمنى فىحيانا الدنيويه
الا يبقى اقدارنا تسمح ونبقى فىالفردوس سويه
علاء ابوسير
ارقى 1995م
| |
|
|
|
|
|
|
| |
مصطفى نور
فيس بوك
تويتر
انستقرام
يوتيوب
بنتيريست