قصه حقيقيه اخرى قمه الابداع في واحدة جارتنا حلوة حلا شديييييييدة لمن غلط.مافي زول عاجبها ولا مالي عينها . وبالذات انا عبدالواحد ده كانت لما تشوفني تغير الشارع ..وفي الحقيقة عندي شوية شنا غايتو مقبولة.. المهم سافرته اغتربته وبعد ٣ سنة جيت نازل اجازة من ابوظبي وانا جايي من المطار والشنط فوووق وقاشر يازول بدلة وكرفته ونظارات بريسون والوجه ناير والجضيمات بارزة شعبان رز و(دياي ) دجاج. منفخ المهم وانا بتلفت يمين وشمال اشوف ليك زولتي الما بتغباني زاتا ماشة تتقدل ساكت وبراحة طق طرق طق طرق. في الحقيقة انا عرفتها لكن هي ما عرفتني قلت لبتاع الاجرة اقيف شيل جارتنا دي معاك ووقف جمبها فسلمت عليها وعينها وقعت علي ابوظبي مكتوبة في الشنط قالت عليكم السلام قلت ليها اتفضلي نقدمك معانا طوالي ركبت بدون مقدمات ..علي حس ابوظبي طبعا.. القصة اني عرفتها وهي ما عرفتني المهم ماشين وقمت اتكلمت معاها قالت لي انا مغترب بأبوظبي قالت لي ايوااا تمام والله مرتاحين الجابك البلد الحارة دي شنو؟؟ قلته في قرارة نفسي الفرصة جاتك في ملعبك.شوووووت يا معلم .المهم قلت ليها والله البلد حلوة بي ناسا...وانا جايي اعرس وفي الحقيقة جايب معاي كل الشيلة . ماعدا الاحذية والجزم ليه قلت ليها لاني ماعارف مقاس رجل العروس المامعروفة بالنسبة لي كم.... قامت ضحكت وعلقت قالت معقولة بس جاي نازى وعايز تعرس وجاهز وماعارف مقاس الارجل كم ولا عارف العروس منو...!!طيب المواصفات الدايرها شنو لشريكة حياتك قلت ليها اذا لقيت نفس مواصفاتك دي يكون عز الطلب لكن اكون بحلم لو لقيتك انتي .وشكلك متزوجة او مخطوبة او في ٥٠٠ واحد مكسرين فيك .. قامت فجاءة كدا قالت لي الخطاب ١٠٠ لكن صاحب الحظ عبد الواحد .اقصد واحد. انا هنا اعصابي باظت وصاحبك بتاع الاجرة شدة ما متكيف للحوار ده وقف جاب لينا بارد يا سلام انا قلت البت دي عارفاني لكن عايزة تختبرني او متغابية فيني العرفة او تغييرات الزمن فيني الشحم غطي علي شوية الشنا ديك واللون بقي فاتح والجضيات نايرات فشكلها ماعرفتني .فاتخذت قرار اني اعمل فيها رايح . واستمريت ابرمج عليها والتف حولها حتي وصلنا الي قريب شارع بيتهم قالت لي انا وصلت ونزلوني جمب الكشك بتاع الجرائد داك. وقالت لي عندي اخواني وابوي بيأكلو الظلط .نزلوني واتوكلو. بس عايزين ننزلا ونمشي ونجي مع الاهل عديل بي خشم الباب كان نشوف زول واقف جمب الكشك وشايل ليهو عكاز مضبب هي كان ما تنزل جمب بيتكم لكن هي كانت تقصد اعرف بيتهم وانا عارف وفاهم اي شئ.المهم نزلت جمب الكشك ابوها جأ مقلع رافع عكازو فووووق قامت هي عاملة فيها مفتحة قالت لبتاع الاجرة حسابك كم ؟ كتموية لابوها عشان يشك فيها ابوها طوالي جا للسواق بطل العربية وقاليهو انزل..السواق نزل.وانا اعصابي باطت .وافكاري جاطت. سمعت ابوها بسأل في السواق رفعت البت دي من ووين .أنطق.قاليهو من الشارع والراكب ده ركب معاها والله كيف الوضع.قاليهو لا .قاليهو ايوااا لا كويس والله انتظرني هنا .بس عمك جاني ليك بدون السلام عليكم .قلتليهو وعليكم السلام قال لي انت اطرش انا اقول بدون السلام عليكم تقوم ترد علي قلت ليهو معليش ياحاج بعد شويتين كدا عمك اخذ ليهو صنة كدا وقام غير النغمة بسرعة ١٨٠ درجة.وقال لي يا ود مريم كيف حالك وحمدالله علي السلامة والله ما عرفتك في البداية بالبدلة والكرفته اتفضل .اتفضل قلت ليهو الله يسلمك ماعرفتك لزوم حركات يعني قال لي انا جاركم عمك حسن ابو قمر الانت موصلها معاك دي نسيتنا والله شنو .لا بس لانو الفترة طالت وكدا وبنتو صبت فيها مطرة لكبريائها السابق وما كانت بتريد تشوفني في الشارع ومرة قالت وشك ده يقطع الخميرة من البيت ..اها الموضوع بقي واضح عمك عينو علي الشنط وقمر عينا علي .المهم قلت ليهو خلاص اتزكرتك بس اصل البيت واسلم وبكرة بجيب اهلي وبنجيكم طوالي وعيني في عين قمر ومعاها ابتسامة رقيقة كدا لزوم الطلب والخجل وكل حاجة حلوة تتوقعها قمر وبقي امر واقع .قال لي اتفضلو .اتفضلوا طوالي البيت بيتكم .مشي عمك يحاسب الاجرة وحلف طلاق الا يدفع واعتزر للسواق وقال لي بتكون شايل دولارات ماعندك سوداني قلت ليهو والله معاي بدلت في المطار قال لي لا حرم انت ضيفنا.في اللحظة الهو بدفع اخذت رقم قمر سريع ومشينا طوالي اشتريت شريحة ودقيت لي قمر بالليل ونسة ونقة تقيلة وقالت لي والله قبيل ماعرفتك سمنته وبالبدلة دي حاجة تانية لكن شناتك الكانت كتيرة ديك وديتها وين وضحكنا واتسامرنا وفي النهاية قلت ليها اها يا السمحة انا جاييك عريس بي فتح الكتاب يا السمحة مهرك ما رخيص...قالت لي هو انا حاالقي احسن واحلي واجمل منك ..حسيت بتغيير عجيب وسريع .في الاسلوب ..قلت ليها مايكون زواج مصلحة .قالت لي لا والله لا مصلحة لا وزارة انت عارف انا وافقت بيك ليه ؟؟؟؟؟؟لانك الوحيد الماكنت بتشاغلني في الشارع رقم انك شين لكن محترم ماتنسوا تجيبوا معاكم المأذون .عرس طوالي ومقاس الاحذية ٣٩ تمام معاك بس عندي شرط .قلت ليها اتفضلي قالت لي ما نجيب اولاد .قلت ليها ليه قالت لي ممكن نربي قرود ما مشكة بس اولاد لا . الدنيا دايرة تديني ضهرها تاني والله بعد ما اطمأنيت وقلت الجضيمات غطتن الشنا وزيادة الوزن صاح زمان كنت بشبه الفنان منتصر الهلاليةههههه بس انا طويل شوية.طيب الحل شنو في الشرط ده .قلت ياولد انت وافق واقبض قسيمتك وبعد داك الله كريم . المهم وافقت علي شرطها وقفلت الخط ونمتا نومة عميقة وتاني يوم المساء اتلمينا كل اهلي الكبار ومشينا نتقدم لقمر . بس وصلنا كدا جات امها من هناك مسرعة هيا ياولدي اتاخرت مالك ماجيت بدري عشان تغني لينا كتير ما ادوك قروشك كلها .يا منتصر يا ولدي .قلت ليها لا لا ياحجة انا ما الفنان بشبهو ساكت طيب انت منو قلت انا جاركم وكنت مغترب وجيت اجازة وجايي هسه اتقدم لي بنتك قمر .قالت وقمر موافقة قلت ليها ايوااا وابوها كمان .قالت لي مخير الله الفلوس تعمي النفوس يا ولدي ..المهم اتضح انه الحجة مفهمنها غلط قالو ليها جايي عريس لبنتك قمر وما وروها انوالموضوع تعارف وقولة خير وكدا وشافت الناس داخلة ومارقة مافهمت حاجة هي شوية كبيرة ومخرفة ام قمر والغريبة بتحب تسمع منتصر هلالية وقامت افتكرت انو الليلة عرس قمر حسب طلقانة ولما شافتني قالت لي اتاخرت مالك . المهم دخلنا واتفقنا علي كل النقاط الا موضوع الخلفة دا قلت اكلم ابوها اب عكاز داك والله انا اتصرف براي بعد الزواج. فما كلمتو واتزوجنا وهسه عندنا ستة كداريك يشبهوني جنس شبة والستة اولاد.. ابوها بقي صاحبي وقال لي غايتو يا ولدي اولادك ديل الا تسجلهم في نادي المريخ . وعشنا كلنا في امن وامان بس قمر ماكانت بتطلع معانا في الشارع ماعارف ليه ؟؟؟؟؟؟؟.
10-31-2022, 10:02 AM
Hassan Farah Hassan Farah
تاريخ التسجيل: 08-29-2016
مجموع المشاركات: 9139
الاخ مصطفى سلام بعض الدارسين قالوا انواع الناس اربعة اها كيف رأيك؟ start=3" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen>
start at 0:03
10-31-2022, 11:15 AM
مصطفى نور مصطفى نور
تاريخ التسجيل: 05-13-2022
مجموع المشاركات: 4975
Hassan Farah تحيه طيبه نعم الناس انواع وانواع واكثر كمان من اربعه ما هي أنواع الناس؟ توجد أنواع عديدة من الناس في الحياة ولكل منهم شخصية تميزه عن الآخر وطريقة مختلفة في التعامل معه عن الأشخاص الآخرين ومن هذه الأنواع. 1- الأشخاص الهادئون 2- الأشخاص القساة 3- الأشخاص المترددين 4- الأشخاص الباردون 5- الأشخاص المعارضين
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مصطفى نور
Hassan Farah
فيس بوك
تويتر
انستقرام
يوتيوب
بنتيريست