|
Re: مشكلة شراحبيل (Re: أبوذر بابكر)
|
شراحبيل احمد او شرحبيل احمد زي ما بنقولا في نضمينا السوداني العادي
ولا يعرف المعرف كما تقول العرب
ف شرحبيل في غنى تام وكامل عن ومن التعريف الزول الفنان التشكيلي والفنان الموسيقي والفنان المغني والفنان الأكاديمي والفنان الرياضي الرياضي دي يمكن ناس كتار ما عارفنها، وانه شرحبيل بطل موهوب من أبطال الجمباز
شرحبيل المبدع والمبتكر ل شخصية كرتونية ما أظنها تقل قيمة ومعنى من شخصية ميكي او بطوط او عم دهب وهي شخصية عمك تنقو، عمنا وعم كل الناس القرو وشافو مجلة الصبيان والاتربو عليها ونحن في الأولية والابتدائية وبعد ما باصرنا واتبصرنا من لدن آ أسد و وا ولد وحسن ولد العرب وفكينا ساجور القراية والكتابة، دخلنا في قراية الصبيان وميكي وسمير وسوبرمان والرجل الوطواط ولو هسي قالو لي ادي ليك زول جائزة أوسكار الابتكار وإبداع وابتداع الشخصيات المتخيلة والمؤثرة، يمين بالله بديها شرحبيل ومعاه كمان مكتب النشر التربوي التابع ل بخت الرضاء والبتماثل برضها كمان في نظري ال penguin و ال Longman في مجال النشر والتعليم والتثقيف
ثم شرحبيل الموسيقار الذواق والموقف والمعارف هو بعمل في شنو ونقلته العجيبة والمؤثرة والفاعلة من نهاية الخمسينات لغاية بداية الستينات لما خرت ايدو وتمرد علي المدرسة الوترية الاولى زي ما بسميها استاذنا البروف الفاتح الطاهر، ودخل في عالم تاني، الناس سموها فن الجاز ومؤكد طبعا ما عنده اي علاقة ب جاز ناس لوي ارمسترونغ المن نواحي نيو اورليانز، يمكن يكون قريب من أسلوب وطريقة موسيقى البوب لكن قطعا ما عنده اي طلة ب الجاز
شرحبيل وعثمان الامو والمعاهم وبعدهم بشويه زي ناس عمنا عمر عبدو ناس جاز الديوم وناس بدر الدين هاشم من فرقة اضواء بحري وبقية الناس الفنانين، ديل اتاثرو بالتيارات الموسيقية الكانت ظاهره في وقتها وبايقاعات المامبو والسامبا و روك اند زول الفيس بريسلي، كلهم تاثرو بي ب الشي دا وقدموا اسهاماتهم واجتهاداتهم البنشكرهم عليها بالتاكيد
داير اقول وأثبت انه شرحبيل زول فنان ومبدع بالفطرة والموهبة وبالابداع، الإبداع بالمعنى العمومي المعروف والمعنى اللغوي البعني الاتيان ب الجديد
لكن عنده مشكلة ومشكلة كبيرة جدا
اللي هي شنو ؟
شرحبيل ركز علي الشق الموسيقى وعلي تدعيم وإبراز ويمكن تأكيد او ربما محاولة تبرير انه ليه انسلخ من التيار الغنائي البدأ بيهو ومشى فيه كويس جدا، يعني تيار المدرسة الوترية الغنائية الاولى، وعنده طبعا أعمال مسجلة مع اوركسترا الإذاعة زيو وزي الناس الكانو معاهو ومن دفعته ناس رمضان حسن ومحجوب عثمان وصباح محمد عيسى وعبد المنعم حسيب الخ الخ
ركز علي ترسيخ الجانب الموسيقي واهمل جانب الكلمة الشعرية
عشان كدا معظم أغنيات شرحبيل ضعيفة جدا جدا جدا من ناحية النص الشعري وتحس انه الكلام في اغنية شرحبيل مجرد تمامة عدد وبس
نصوص ضعيفة وركيكة وما فيها عمق ولا تجويد
والمصيبة الأكبر كمان انه اعتمد علي مؤلف اغاني، ما عايز اقول شاعر، اسمه بشير محسن يمكن تسعين في الميه من أغنيات شرحبيل من تأليف بشير محسن وحتى في الحتة دي شرحبيل غلط والله و "دقس" يعني لو كان استعان بشعراء غنائيين تانين، وما اكثرهم، كان ممكن يخلق تنوع سمح جدا يساهم في الارتقاء بمفرداته الغنائية
نفس الشي دا حصل مع ثنائي العاصمة ودا موضوع تاني برضو محزن والله بنجيهو في وقت تاني
في رأي الشخصي البسيط والمتواضع انه الأغنية الحقيقية الوحيدة والفيها تكاملت كل عناصر العمل الغنائي الفني هي اغنية
تحرمني نورك
ليه ؟ بكل بساطة لأنها من شعر البديع الوديع
عوض احمد خليفة
يا ريت يا شراحبيل بن أحمد
لو كان لحنت ليك دستة أغنيات من سعادة اللواء
كنت ارتقيت ل مراق وذرى شاهقة
| |
|
|
|
|
|
|
Re: مشكلة شراحبيل (Re: أبوذر بابكر)
|
نسأل الله الرحمة الشاملة والمغفرة الماهلة ل الموسيقار كامل حسين
كامل حسين هو عازف الساكسفون (التو) الساكسفون الحجمو صغير في فرقة شرحبيل أحمد
اللافت في كامل حسين انه وعلي حسب علمي، اطلاقا ما عزف ولا شارك مع اي فنان او فرقة غير مع شرحبيل وغير كده كمان هو رفيق وصديق وفردة شرحبيل من ايام الصبا والبدايات الأولى
وكامل حسين موسيقار وعازف مميز وكل اعمال شرحبيل واغنياته عمادها واساسها هو عزف واداء كامل حسين
ملحوظة: سمعت بخبر وفاة كامل حسين مجرد سماع عبر وسائط فقط من غير تأكيد
يا ريت المتابعين يؤكدو لينا الخبر باليقين
واكيد موسيقارنا احمد ياسين عنده الأكيدة
| |
|
|
|
|
|
|
Re: مشكلة شراحبيل (Re: أبوذر بابكر)
|
تأكدت فعلا من وفاة الموسيقار كامل حسين
رفيق وصديق ودعامة شرحبيل احمد على طول المسيرة الثنائية الباهرة
لقيت الخبر، القديم/الجديد في موقع نقابة المهن الموسيقية الرسمي، كما يلي:
رحم الله الموسيقار الأستاذ/ كامل حسين، العازف العريق لآلة الالطو ساكسفون بفرقة الأستاذ/ شرحبيل احمد وشريكه الفني في رحلة فنية طويلة، امتدت لسنوات وسنوات. رحمه الله وأحسن واليه واكرمه بالجنة في هذه الأيام الطيبات. حار العزاء لأسرته وأهله وعارفي فضله ولزملاء رحلته الفنية الطويلة الأستاذ/ شرحبيل احمد والدكتور/ علي نور الجليل والأستاذ/ علي يعقوب ولجميع الزملاء الموسيقيين. لا حول ولا قوة إلا بالله انا لله وانا إليه راجعون وانا لفراقك يا أستاذ كامل حسين لمحزونون....
| |
|
|
|
|
|
|
Re: مشكلة شراحبيل (Re: walid taha)
|
ازيك يا وليد
مشكور ياخ عشان ما حرمتنا من نورك المعطر والملون
فعلا دي انا بعتبرها ال Masterpiece عند شرحبيل
عارف ليه ؟
لأنه تكاملت فيها كل عناصر الخلق والابداع العالي كلام ولحن واداء
| |
|
|
|
|
|
|
Re: مشكلة شراحبيل (Re: أبوذر بابكر)
|
شرحبيل الفنان الشامل نهديك وكل معجبي الاستاذ شرحبيل لو تعرف الشوق انت يا المريود كنت مابتروح وتنسانى شلت ليك الشوق الشوق لو بى اييدك كانت الاحلام مابنسيبها حرام نهجر الريدة ياحبيبى تعال ليه بتنسانى دى اصلها الريده فى القلوب بتروق تفعل الجميل قالو اهل الريد
| |
|
|
|
|
|
|
Re: مشكلة شراحبيل (Re: أبوذر بابكر)
|
سلام أبا ذر وضيوفه.. دخلت بسرعة عشان اعرف مشكلة شرحبيل أحمد شنو..فإذا بى امام مشكلة الشاعر وليس شرحبيل.. لوقمت بتجريــد أغنيـة فى الليل الهادى من اللحن وقرأتها كنص فقط، فسوف تجدها عادية جدا.. ثم استمع لها.. الموضوع تغير 180 درجة.. فناننــا نفخ فيها الروح. وسبحان من يحيى العظام وهى رميــم. إذا هذه مشكلة الشاعر..ولو اعطيت النص لأى ملحن او مغنى اخر لما اقترب من أداء شرحبيل ..
| |
|
|
|
|
|
|
Re: مشكلة شراحبيل (Re: Abureesh)
|
تحياتي يا أبا الريش أخانا محمد عثمان
كلامك صحيح تماما فيما يخص "مشكلة" الشاعر
لكن مشكلة شرحبيل برضو هو انه ركز فقط و "عصر" علي نفس الشاعر في غالبية اغنياته
وفن وعبقرية شرحبيل زي ما انت قلت هي النفخت الروح في النصوص الشعرية وخلقت منها أغنيات شهيرة غير كدا النصوص ضعيفة جدا وعادية وما اعتقد فيها نفس شعري حقيقي
لكن زي ما تعرف، حب الناس مذاهب واكيد في ناس كتار جدا عاجباهم النصوص دي
شكرا لحضورك ومشاركتك معانا
| |
|
|
|
|
|
|
Re: مشكلة شراحبيل (Re: Ahmed Yassin)
|
جيتار شرحبيل مدوزن على نغمات السودان. وايقاعات السودان نمط غناء غربي والات غربية ... واسمو ملك الجاز....ادخل الدلوكة والرقي والنوبة والتم تم اسمعوا التم تم في" يا ابو شعور رقيقة"
| |
|
|
|
|
|
|
Re: مشكلة شراحبيل (Re: Ahmed Yassin)
|
واسمع كمان النوبة يا احمد في
قلبي دق
ومرات تحس انه الايقاع فيها بشبه واحد من ايقاعات الزار "الدساتير"
أكيد شرحبيل بكون حضرها وسمعها في العباسية وبانت وهو طفل في حضرة الأسياد والانجذاب
| |
|
|
|
|
|
|
Re: مشكلة شراحبيل (Re: Ahmed Yassin)
|
حبيبنا احمد ياسين
لو لاحظت معاي كمان انه معظم اغنيات شرحبيل ساكسفون كامل حسين بكون ماسك فيها مساحات شاسعة جدا من اللحن
من الاستهلال مرورا ب اللزمات بين الكوبليهات ووصلا لغاية ترديد المقطع اللحني الأساسي لأي اغنية
والعزف بتم بطريقة عذبة وجميلة وبتمكن عالي من الساكس الألطو
عليه الف رحمة ونور
| |
|
|
|
|
|
|
Re: مشكلة شراحبيل (Re: محمد عبد الله الحسين)
|
تحياتي محمد ع. الحسين
نص اغنية تحرمني نورك نص سمح ومجود وعميق
ولازم يكون كدا بالتأكيد
لأنه طالع من عوض أحمد خليفة
وما ادراك ما عوض أحمد خليفة
عشان كدا أنا شايف انه دي اجمل اغنية عند شرحبيل
مشكور علي تجميلنا بحضورك معاانا يا محمد
| |
|
|
|
|
|
|
|