البنك الدولي عرّف الفساد بانه:- شكل من أشكال خيانة الأمانة أو الجريمة يرتكبها شخص أو منظمة يُعهد إليها بمركز سلطة؛ وذلك من أجل الحصول على مزايا غير مشروعة أو إساءة استخدام تلك السلطة لصالح الفرد. يمكن للفساد أن يشمل العديد من الأنشطة التي تتضمن الرشوة والاختلاس، ويتضمن أيضًا ممارسات تُعد قانونية في العديد من البلدان.. المتتبع لاشكال فساد حكومة المؤتمر الوطني يجد انه ازكم الانوف واورد البلاد موارد الهلاك.. كثيرون اغتنوا علي حساب البلاد والعباد ،لعل ما تتناقله الاخبار والوسائط والمجتمعات من اخبار فساد الحاكمين جعلت ان كل شئ بات مكشوفا.. فنمازج فسادهم كثيرة وحيل استيلائهم علي المال العام كانت ضمن تخصصاتهم المهنية. بسم الله نبدأ: احد النافذين جاهو واحد من اولاد (كارُه) شكي له المسغبة وضيق ذات اليد. اطرق المسئول مليّاً ثم رفع رأسه قال ليه: شيل القروش دى .. امشي اشتري بوهية لون اخضر اي كمية في السوق..قفِّل عليها. بعد فترة تم اصدار قرار اي باب يفتح في شارع رئيسي شارع فرعي يتم طلاؤه باللون الاخضر او يتعرض صاحب العقار لفرض غرامة مالية..والناس قعدت تتطاقش.. زول المسغبة القبيل اصبح المسيطر علي الموقف.. وحدس ما حدس. * احدهم قال : جيت من الاغتراب ايد ورا وايد قدام .. بعد نقاش مع ناس بيتو قالو ليه فلان جارنا ده زول واصل وشغلو الحكومي كويس امشي ليه.. قال مشيت مكتبه قابلتو طرحت مشكلتي قال لي محتاج كم قلت ليه مليار.. قال ليه بس؟ بلع ريقو وقال ليه ببسسس. قال ليه شيل الخطاب ده امشي البنك الفلاني اديه فلان.. بديك مليار جيبو وتعال.. فووو البنك جوة.. سلّم واستلم في زمن استصعب علي المُوْدِع استخراج نذرا يسيرا من وديعته لعلاج بنته حتى يتم علاجها. جاب المليار وجا.. قال ليه تشيل القروش دى وتمشي الحتة الفلانية تلقي مبني مكتوب فيه المنظمة الفلتكانية لرعاية الاسموشنوداك. تقبل جماعة تتبرع بالمليار وتقول ليهم انه المنظمة (سيْ بت السرور). فووو مشي وتم استقباله وتحدث عن انه مغترب ولما المنظمة من دور استباقي في فعل الخيرات اتبرع لكم بالمليار ده.. ختاهو تم اكرامه علي خفيف. صاحب الفكرة مشي المنظمة جلس علي كرسيه الوثير حكوا له شهامة صاحب المليار.. قال ليهم وجب علينا ان نكرمه طالما هو مغترب علي امل الاستفاده منه مستقبلا (حنك) 😂 بعد كم يوم عمك عرض علي المكتب التنفيذي ان يردوا الجميل لصاحب (المنيار) قال ليهم نطلع ليه اعفاء جمركي بعلاقتنا مع الجهة ذات الصلة لعدد من العربات.. اتصلوا عليه تم تكريمه وسلموه الخطاب..عمك قال ليه تجيني في المكتب الرئيسي هههههه مشي قعد معاه قال ليه تشيل الخطاب ده توديهو ل فلان.. بسلمك ٣ مليار جيبا وتعال.. مشي سلم واستلم.. خت القروش قدام المنتج والمنفذ والمخرج وصاحب الرعاية اللهو عمك 😁😆 قال ليه رجع للبنك قروشو (نزاهة جد) ههههه شيل مليارك.. وخلي المليار التالت هنا.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة