|
كتب الكاتب الفاتح جبرا المتوفرة بمعرض الدوحة
|
|
 Re: تحذير وحيطة بعد ظهور تماسيح شرسة في النيل (Re: امتثال عبدالله)
|
السلام عليكم
الله يكفينا شر التماسيح البشريه اولا التى ابتعلت كل خير السودان وتماسيح النيل والله ارحم من بنى كوز والحراميه الفى المسرح الان لعنهم الله
واهديكم قصيده الرائع هاشم صديق عندما فاض النيل وجات قرنتيه من فى النيل جات من جنوب السودان وقتلت فى الخرطوم فكتب القصيده الحزينه التى تبكى والله
قرنتية ... ماغواصة روسية
شعر : هاشم صديق
( تنشر إستجابة لبعض أصدقاء الصفحة )
قرنتية
لادبابة برمائية
لاجاسوسة
مدسوسة
لا غواصه روسيه .
لاجندية في(حركة).
لامختلسة
مال شركة.
لاقصفت
حدود " فشلا.
لا كسرت
صريف كسلا.
ولامعروفة ( ختمية ).
..........
قرنتية
لا####################ة
لبست ( شورت)
لابْتَعرف
شنو (البظبورت).
لامحتاجة
( جنسية ) .
هي قايلة النيل
سَقف بيتها
وقايله ضفافو
( محمية )
جات منسابة
عزّالصيف
قايلة الناس
بكرمو الضيف
وقايلة النيل
أمان والقيف
وقايلة(الحاضرة)(١)
عصرية .
..........
قرنتية
جات بصغارا
دايرة الخير.
لاشافت
يفَط تحذير.
لانزحت
تكوس توزير.
لاجاطت
حركة السير.
لادارت
وسام تقدير.
لامستلفة
عشرين وش
ولابْتَعرف
تعيش بالغش.
كان محتاجة
بس للقش
وجات أحلامها
دوغرية.
.........
قرنتية
لابلعت عديل
السوق.
لانضمت
بدون طايوق.
لاكَنَزَت
دهب أو ماس.
لاظلمت
بدون إحساس.
لاعصرت
شباب الناس.
لاكتمت
على الأنفاس.
لاقطعت
عشم بي فاس
لاداستنا
زندية.
........
قرنتية
لا دسّت
سلع في الخيش
لا شربت
مريسة العيش.
لاضبطوها
في التفتيش.
لاسجنوها
شالو ( الفيش)
لا خانت
قسم أو ديش
لا إجتمعت
( بمستر جون )
لاأكلت
مؤنة ( العون )
لاسدّت
علينا الكون.
لاسبّت كتاب
أو دين.
لاسامتنا
حمرة عين.
ولاباعتنا
ضُهرية
........
قرنتية
جات مشتاقة
للخرطوم
تزور أحبابها
خايفة اللوم.
تصيح وتنادي
بالحلقوم:-
(جنينة النزهة ) (2)
وين يازول؟!
- جنينة النزهة
وين يازول؟!
........
لقت حال
الجنينة خَلاَ
حليل زمنها
( وحليل أهلها )
لاقرنتية
لاأصلة.
لاصوت ككّو
لابَغلَة.
لاحلوف
لاأسداً
مهاب بالخوف.
لانمراً
يشد الشوف.
لاضُل فيل
لاتيتل
جريهو جميل.
ولاغزلان
ولاطاؤوس
يباهي النيل.
لازفّة
طيور ونعام.
لانمراً دفَر
قدام.
كل الشُلة
ياقرنتية
-غمضة عين-
أحالوهم
لصالح عام
تقول
( الدنيا مهدية )
.........
قرنتية
جات زي ضيفة
ما غارة.
لامحتاجة
لي ( فيزا )
ولا تصديق
على زيارة.
جات والشوق
دموع حارة
تجدد في العيون
الشوف
بين ( توتي)
( وعلالي ابروف)
قايلة الدنيا
لسة سلام
ماخيّم
زمان الخوف.
لسة هناك
ضفاف حُرة
ما ( مطمورة )
للمُرة .
قايلة الناس
بعزّو الضيف.
ما بيسوقوهو
لي حُفرة
و جوار القيف.
و مابياكلوهو
في ( السفرة)
و مصيرو مخيف.
قايلة ( الحاضْرة )
ماغابة
و قايله
حقوقها محمية.
.........
قرنتية
لا قدَلَت
في شارع القصر
لا حامت
في وقت الحظر.
لا خشّت
علي المأمور.
و لا نطّت سلك
أوسور.
لا دخلت
علي أمدرمان
و لا كسرت
قفل دكان.
لا دَفَرت
علي (التلفاز)
لا عضّت
كراع فنان
لا ذاعت
بيان للناس
لا إحتلت
كمان ( حيشان).
و لا نصبت
شبك للحش.
جات بصغارا
كايسة القش
تلاقي القوت
صبح محظور
وخير ( البقعة )
جوه السور.
سماحة الدنيا
منسية.
........
قرنتية
لا بْتَعرف
عجن أو لخ
جات أحلامها
دوغرية.
عجب...
ساقوها
جوه الفخ
عجب...
من طولها
وقعت تخ
عجب ...
سلخوها صبحية
عجب..
و نحنا
( بنسلخ ) الإنسان
كيف ما نغدر
الحيوان
عجب...
و الدنيا ( عصرية )؟!
......
قرنتية
لا دبابة برمائية
لا جاسوسة
مدسوسة
لا غواصة روسية
لا جندية في ( حركة )
لا مختلسة
مال شركة
لا حزبية بعثية
.....
قرنتية!!!
| |
 
|
|
|
|
|
| |
Osman Musa
هدى ميرغنى
مصطفى نور
Abureesh
فيس بوك
تويتر
انستقرام
يوتيوب
بنتيريست