♧ إخوانيات و مشاكسات من خارج الأسوار£

[١٧/‏١٠ ٠٥:٠١]
●خالد فكي بلة:
بسم الله الرحمن الرحيم، سلام ليكم،وبعد،
∆ من عباس الأول إلى هارون الثاني عشر ،
إذا وصلك كتابي فأعلم أنني أقف في صف بنزين
عرمرم أوله في بلاد الروم و آخره على تخوم بلاد
فارس..جاهزون بكامل الزاد و العتاد من ماء و موز
و لالوب ..و تسالي لزوم مضيعة الوقت و طق الحنك
و كسر جدار الملل.. وعددنا و عتادنا و خيلنا و رجلنا
يكفي لفتح القسطنطينية وعمورية و سمرقند..وبيننا إخوةٌ
أشاوس يرابطون على ثغرٍ من ثغور الجاز .. صامدون
صُبُراً في ساحات الفداء و صُدُقاً في ميادين الوغى..فلا
يبرحون مواقعهم حتى يفتحون الطرمبة حمرة عين
و عنوتن و اقتدارن..أو يهلكو دونها شُهَداءَ!!
.... انتهى.. يلا .. حول.....!!
............

١٧/‏١٠ ٠٦:٠٤]
دفع الله ود الأصيل
__________''
● من هارون الثاني عشر إلى سليمان
الغانوني ، الملقب بخالد فكي بلة ، ياخ
يحلنا الحل بلة من الخيت و المسلة،
أما بعد،،،،
∆لقد بلعنا خبر صفوفكم..و إننا نعلم يقيناً
قوة بأسكم و شدة شكيمتكم.. وأنكم لا تخافون
في التفويل لومة لائم و لا لطمة لاطم.. سوى الله
ربكم و المرفعين على غنمكم القاصية ، و نحن هنا
مرابطون في صفين كما بين شاخصبن، ألا و هما:
لافتة رغيف العيش و غاز التباخة،.. ننتظرهم حتى
يخمّرون عجين المدعوم.. وأنتم تعلمون ما بنا من
شدة بأس و صعوبة مراس.. نقف شبحةرجل واحدٍ
..تمامن كالبنيان المرصوص ..نود ذات الشوكة وإننا
متحرفون لخوض غمار معارك ذات الرغيفة حتى
لا نمرق ملوص من كلتا العجنتين.. وكان خلاس
الكوع حما مرحبتين حباب الشر محل ما بتق
و تنقد الرغيفة.. إن شاءالله ما تترتق!
انتهى.. يلا حول
١٧

يعافيك و تسلم لي من كل سوء
حبيبو محمد نور عودو ، طمنونا عنكم حيثما
أنتم مرابطون على ثوركم بغرب قارتنا السمراء.

38/‏١٠ ٠٦:٠٤] دفع الله ود الأصيل:
🤪👺😎🙈🧐😄👇
●و أما هذه فمن المتجبجب الودكي عبر وزيره
جاغوم بن بلَّاع ، إلى عاملنا ببلاد الشام ، المتشعلق
بن المنبرش؛ عبر وزير غفلتنا المتجهجه الأممي،و بهذا
نفيدكم علماً بأننا هنا متشعلقون فوق سيخ دفار توزيع
الغاز على ناس أم شانقات، قوز اللحامدة و الشرفات الفواقة
و ناس البح ومجهجهون طجهجهة باكات من يدافع الأخبثين
رأو بالأحرى كزول بالع ليو موس حلاقة سنينة تضبح الجدادة
على حدين ؛ أو إن شئتم الألعن و(أظرط)، قلنا لكم إننا
نخشى بعد دا كولو أنو نرجع سافين التراب بكلتا
خُفَي حُنين انتهى البيان ،
∆ يلا، حول يا معفن. و لا نامت أعين
الجبناء فلول زواحف بني كوزان

♧ الحاجُ يُريدُ تفريحَ ثمَّ تسريحَ المَدام؟!

Quote: كيفن الگلام دا ، يازول إت روحك مجعرة براها! بالله تمسح الأكشن دا فورن، برانا ما ناقصين هبوب!! صاحبكم في الله اللدود الودود عبد العظيم ، أمين سر نقابة رافعي الراية البيضاء من«ليلة القبض على فاطنة»

♧ امسك عندك و قول واحد من إياهم.
∆اسمعني نا عبدولي يا عظمة يا سايق العظمة سافر
خلاني وين، أوعك تبقالي متل واحد أخونا جوة القفص ،
ما نفصلو عليك: قال لا بقدر يطقع و لا بجيب الحجار .
∆فقلنالو: أنت بالذات مافيش داعي أصلن تتعب روحك
تجيب أي حجار، ليه؟ لأنو براهن بجنك في محلك
يفلعنك فوق صنقورك الغليد دا و مقودس ، ترا
عامل متل سرح عجلة عدولي الرايحة منو!!
قال إيه !؟" اذهب يا زول أنت و رهطك
فگافحوا ، و إننا هاهنا منبطحون"
● فلامن رفع كثافتي قلت لو : ياخى
تنبطح فيك حيطة جالوص مايلة في
سيولنا الهادرة دي؛ و بي موناصبة اللا-
موناصبة إغاسات برة شمارن شنو؟

♤ و قبال ما نغرِّق لا جوة "تسريح " دي بالله
ما تقرطو عليها و تحكوها شديد لامن تجيب الدم لا تحملوها
أكثر مما تطيق مغازي التوريات البعيدة ، لوجود قارئنَ دالَّةٍ و
مانعةٍ من إرادة المعاني الواقعة في مرمى نيران الدولة العميلكة
فهي بمعنى" تفرييييخ" ، أن إذا تفريييييغ من (بعض) م، و ليست
كل المهام و موش الزوجية بمعناها الواسع عشان يفوت (جمل)
بما حمل. وحيث كونو مسلن على قولت عمنا علي اللحو
" حليل العشرة ما بتهون على الناس البعزوها"
● و طبعن بعض الموحدين ناس "لا مساسَ" ديلك الفيهم
أصلن معروفة تب، سوف يتوجسون خيفتن و يقومو ينطولك
متل الشرشة في لهاتك يقولولك: لاء، يا زول هوي الكلام دخل
الحوش. ياخ ما يدخل الراكوبة ظاطو و تنقد الرغيفة إن شاء
الله ما تترتق .. و مرحبتين حبابو الشر محل ما بتق } .
▪ بالموناصبة دا رابط بوست هزلي قديم، كاتبو كان في الراكوبة ،
رد الله غربتها وأقا عثرتها ، و باسمي هناك / ابن البادية كما يحلو
لأحمد ياسين، و قبليها كان فيمنديات الغريبة غادي من أتبرة ؛
تقريباً بنفس الفكرة. لكن لعواملَ لوجستيةٍ قاهرةٍ لطفناها
شوية لي بدل ما الحاجيريد تبديل خليناها تفريح
و من ثم منح تصريح شامل لجنابو المُدام"
● و قد أثار الموضوع ردودَ فعلٍٍ متضاربةً ما بين
موالٍ و(باسم) بالعَشرة ، و بين مناهضٍ واقفٍ ألفاً أحمرَ؛
و لكن في هناك صنفٌ تالت دا بالزات متعب جدن ، حيث
إنهم لا إلى هؤلاء و لا إلى أولئك، ماسكين العصاية من
النص. و من يشوفو كوع الوطيس حِما يفكوها و يتلحسون
فيتبخرون؛ ياخي ديل عاملين متل الجماعة ديلك الممكن
تغريهم بالقروش عشان يجو يصلو في الجامع ويجو فعلن
لكن وكتين ما يقبضو الاجرة يقولولك: طوطين نحن كنا
عارفين حركاتك عشان كدا جينا بدون وضو!
فبالله عليك ، جنس دي أمة يشفعو ليها؟!

♧« تزوجتُ الثانيةَ ظُهرًا. »
- لك في إعراب "الثانيةَ" وجهان:
الوجه الأول: إن كنت خائفا أعربت "الثانية"
ظرف زمان؛ أي: في الساعة الثانية.
الوجه الثاني:إن كنت بطلًا شجاعًا أعربت
" الثانية " مفعولًا به، وظهرًا: ظرف.
- واعلم أخي المعرب أن دفع المضار مقدم على جلب
المنافع، وأن الإعراب الأول ينفعك والثاني قد يضرك.
والسلامة لا يعدلها شيء.
فرفشة لغوية 😅
∆منقول و أنا بريء منه براءة الذئب£
____________________________
∆أم أول وجهي الإعراب يا حميدي، ففي حال تكون رافعين ليك المفراكة و سايقنك بالخلا و قايلين ليك «عليك بس تستمخ لمناظر الطريق، ثم دع عجلة القيادة لنا». و أما نحنو فكلا بل تكذبون بالدين. ويظل شعارنا الانتحاري بيرقا خفاقا حتى يبلغ الهدي محله أو نسقط دونه شهداء رغم أنفنا: ألا وهو»»»»»»
♧ الحاجُ يُريدُ تفريحَ ثمَّ تسريحَ المَدام. £

♤ و قبال ما نغرِّق لا جوة "تسريح " دي بالله ما تحكوها شديد لامن تجيب الدم و لا تحملوها أكثر مما يطيق المقصد. فهي بمعنى تفريغ من (بعض) ،ما كل المهام و موش الزوجية بمعناها الواسعأي:(الجمل) بما حمل. حيث إنو برضو على قولت عمنا علي اللحو " حليل العشرة ما بتهون على الناس البعزوها"
● و طبعن بعض الموحدين ناس «لا مساس» و غض قلبي ديلك حيكشو منك زي صندوق أسود ينطو ليك في لهاتك يقولو ليك: لااا، الكلام دخل الحوش. وما يدخل ياخي {تنقد الرغيفة إن شاء
ما تترتق .. و مرحبتين حبابو الشر محل ما بتق } .

▪ بموناصبة اللا~موناصبة، دا رابط بوست هزلي قديم، كتبتو كان في الراكوبة باسمي هناك/ ابن البادية ، و قبليها كان في منديات الغريبة شمال أتبرة ؛ تقريباً بنفس الفكرة .لكن لعواملَ لوجستيةٍ قاهرةٍ مع غلاء المعايش لطفنا الجو شوية لبدل ما الحاج يريد «تبديل» خليناها تفريح و من ثم تميناها تسريح للمدام" وي ما مرة كتبنا عن المرة النكظية ولامن عصروتا جبنا الزيت و قلبنا«الكندية»
∆ أيوة ، ما هي في النهاية لعبة حروف، ليس كلا! خسوسن الكنديات حنينات تعرس واحدة بلصقو ليك معاها أختا برضها شقراء و بت خالتا برونزية و أمها زاتا دعجاء و خبوبتا في عمر الزهور عفراء، و كولهن كدا ود عرض خاص، فوق البيعة.
● و قد أثار الموضوع ردود فعل متضاربة ما بين موالٍ(باسم) بالعَشرة ، و بين مناهضٍ و لكن هناك صنفٌ تالت دا متعب جدن ، حيث إنهم لا إلى هؤلاء و لا إلى أولئك ، ماسكين العصاية من النص. عشان لو شافو كوع الوطيس حِمى يفكوها و يتبخر ون مع أقرب قولت هعععع!!!
♧ برضو قبال نغرق ، و على طاري سيرة
أخوانَّا في الله الموحدين، بالمناسبة بما أنو زي ما قالو: الطلاق أبغضٌ الحلال ، فكذلك التوحيد بي مرية فرد واحدة كدي نقرها من نقرك و بوزا في وشك سداح مداح و صباح مطاح ، هو أبغض أنواع التوحيد إلى بنات اللزينة. هذه فتوى ساي من عندياتي براي، و العلم عند الله .
▪ يعني إيه المانع الواحد يقتنيهن واحدة تكون أم للشُّفع من الحرس القديم دي بقى ست الكل ؛ و تانية زولة كسرة و ملاح سااه، و تالتة مختوتة بس(سبير بارت) و تنفع برضو لرميان الطلاقات الفشنك في الهوا الطلق ديك.و الرابعة دي بقى ياهي السمحة يا ست العجن أنا زي جمالكلاقي وين.. لا في القراب لا في البعاد ما شفت زي عنيكي عين

● فمرة واحد منهم، أخونا شيخ الموحدين/ عبد الحي الشبلي.قال لينا: الحاجَّة بت خالو الكل يوم معاهو دي براها بتساوي في نظرو براها أربعاً في أربعٍ. قلنالو :يا رااجل، يعني إلا تكون
(4in1).

● أها تراهو جنس الرِّمَم المخذِّلين ديل ياهم المتملصين بأضان القفة و قادين لينا برميل الزفت من تحت. ممسكنو ضنب التور للأسف.بالله دي أمة يشفعو ليها؟!

∆علا لاكين ، أفففو أنا أخوك الراسية!! نحنا و نحنا مفطومين بي عجينٍ مُرٍّ، و مكحلين بي شطة قبانيت كافرة مرة واحدة.نان تجي برضو تقوللي منو و تقوللي شنو! قوم لف بالله.

دفع الله ود الأصيل
《 الحاج يضرب تعظبم سلام سلام للمُدام》
○صباح الخير بالليل يا فردات أي والله سهي جيتي من النجاض
انسدحت نجيض ،فرد نومة لامن يا دوبك هدي صحية. لقيت الخبرية دي:
《 لأول مرة : زواج يستمر لمدة ستين عاماً بدون أيتها مشاكل ، اوعدنا با رب》
♧ سمعت صحيفة واسعة الانتشار بالتجربة غير المسبوقة التي دامت لستين عاماً حسومٍ،
و زادت وتيرة الاندهاش في زمان اللا~اندهاش بعد تلقي إفادات من الجيران تُجمع على أن
حياة الزوجين كانت مثالية للغاية ، و لم تُسجَل ملاحظات أبداً على بيت هذين الزوجين؛ بدليل إنو
بالغلت ما انسمعت كواريك و لا جا زيت حار و لا برطوش نعال طاير بفوق الحيطة ولا يخزنون؟!.
♤ فأرسلت الصحيفة أشفت محرريها الاستقصائيين ليخبط سبقاً صحفياً مع هاذيت(الدايناصورين
البشر بين منقرضي السلالة) ، المحرر قرر أن يقابل كلا الزوجين على منفرداً على حدةٍ ، حتى
يتسم الحديث بالشفافية بالموضوعية اللازمة ؛ منعاً للمؤثرات الخارجية لأي طرف على الآخر.
☆و بدأ بالزوج:سيدي ، هل صحيح أنكما عشتما طوال ثلثَي قرنٍ في سباتٍ و
سكرنبات و مخلفبن صببان و بنات، و بدون أية منغصات (ZeroTroubles)؟
~ أيوة نعم يا بني؛ ببساطة لعدم وجود مثيرٍ للشغب ( Zero Trouble Shouter )
♤ إذن حدثني بصراحة ؛و إلى من فيكما يعود الفضل في ذلك الوفاق الخرافي!!؟
♡ يعود ذلك إلى رحلة شهر العسل.فقد سافرنا لقضائها بأحدى المناطق الجبلية
الساحرة في الهنلايا، و هناك ، نسبة لوعورة الطريق استأجرنا بغلين لنتسلق
بهما الجبال في جوٍ غايةٌ في الرومانسية.
∆في الأثناء، و بعد أن قطعنا شوطاًطويلاً, توقف البغل الذي تمتطي صهوته
( بعلتي ) المصون"في العقبة و رفض ان يتحرك . غضبت زوجتي و قالت له :
هذه الأولى؛ ثم استطاعت بدهاء نون النسوة استمالة البغل بأن مدت إليه جزرةً أكلها
و واصل المسير .ثم بعد مسافة ربما استحلى البغل الجزر فتوقف بها مرة ثانية معصلج
.مما أثار حفيظة(بغلتي) و صاحت قائلةً : هذه الثانية ثم استطاعت بطريقة ما إقناع البغل
لاستئناف الرحلة ثم بعد مسافة أخرر ،أعلن بغل (بغلتي ) عصياناً مدنياً نهائياً بالنظر و رفضاً
باتاً للشغل لا رجعةً فيه( Tool Down Strike ) و ليس كما في النوبتين السابقتين ، فنال الحنق
من بغلتي حتى لامست الروح الحنجرة و و بلع السبل الزبى لامن بقى وشها بنعل قفاها.فترجلتْ
من على ظهره قائلة له بآخر قومة نفس: و هذه الثالثة .ثم بهدوء أعصاب مووووبالغة سحبت
مسدساً من حقيبة يدها ، وصوبت ثلاثة أعيرة نارية على رأس البغل لترديه قتيلاً في الحال
و بدمٍ باردٍ رافسةً معه كل تمشدقها بشعارات فضفاضة بحقوق الحيوان( ياخ
قوم لف، برا حيوان برا لمة) هو في حقوق إنسان اصلن؟!
● هنا ثارت ثائرتي حتى خرجتً من طوري و انفجرت موبخاً و معنفاً:
ماذا فعلتِ يا عبيطة يا مجنونة¿!كيف سنعود الآن ؟و كيف سندفع ثمن البغل؟
تنهدت بغلتي وأمهلتني إلى أن أكملت وصلتي من الرغي.ثم حدجتني بآخر و ليست
ك"أول نظرة؛ لحظة أن:" رشقتني عيونو و فزَّعتني ظنونو و بقيت معجونو" و
بنفس الهدوء قالت تخاطبني: هذه المرة: و حت إتا بروطس ، هذه الأولى!!
● يلا و من ديك و عيك، أنا طبعن عرفت الطفى النور منو ؛ و ليوم الليلة و لي
يوم باكر ، هدا ماسك خشمي عنديّ الخمسة فوق الاتنين ، و دي بي طينة و دي بي
عجبنة . و بصراحة أقول ليك حاجة يا ابني؛ أنا لو كنت عارف إنو معاها (حديدة عفنة)
في شنطة الخمرة و الدلكة و اللزي منو، ما كان أصلن من أهلي عتبت مشيت معاها
شهر بصل من أساسه. بس "ما كُنتاعارف..يا ريت يا ريتني كُنتا عارف شخصك
عني صارف..سليت الناس عشانك..و آمل فيك توالف..و ما كنت متصور في
يوم خداع.. في هواك أصادف.. يا ريت يا ربتتي كنتا عارف"
ود الحيشان التلاتة
مؤذن محجور منزليا بجزيرة مالطا