الأرقام/الأعداد في العامية الوسطسودانية .. أو دهشة الحساب:
الأعداد من واحد إلى أتنين عندهم تصريف براهم.. ومن تلاتة لعشرة عندهم تصريف براهم.. والأعداد من 11 إلى ديشليون عندهم تصريف براهم.
واحد وإتنين:
بقرة واحدة عجل واحد.. بقرتين/راجلين (والرقم يذكر ويؤنث والرقم يتأخر ويأتي بعد المعدود في حالة 1 و2 بس).
من تلاتة إلى عشرة.. الرقم يتقدم المعدود ويأتي المعدود دوماً جمع ولا يتأثر بالمعدود من حيث التذكير والتأنيث:
تلاتة بقرات .. تلاتة رجال أربعة، خمسة، ستة، سبعة، تمانية، تسعة، عشرة بقرات/رجال.
ومن 11 وإلى ما لا نهاية من الأرقام.. يأتي المعدود دوماً مفرد:
حداشر بقرة/راجل/مرا.. مليون بقرة/ راجل/ مرا.. وهكذا.
وإزا ذلك عندنا مشكلة مع كلمة زول في الحساب إذ هي غير قابلة للجمع في العامية الوسطسودانية لأنها لم تأتي من اللغة العربية مباشرة (لاحظ أقول لم تأتي مباشرة لذا لا نعهد تصريفها الكلاسيكي القاموسي البالي) بل جاءت من التركية (زفالي) وتعني االمسكين والفقير إلى ربه حرفت إلى زول في المغرب الكبير والسودان على وجه الخصوص.. وأخذت عبر الزمن معنى إنسان سوداني مطلقاً في السودان (رأي خاص، إن أختلفت معه دعك منه فقط نتفق أن زول لا تجمع في العامية وهذا هو الأهم).
تابع هذه المحادثة المتخيلة في تصريف زول حين العدد:
يا زول العربية دي بتشيل كم زول؟: زول (واحد) قدام، ما بتشيل (زولين) لأن الكرسي القدام بايظ.. وورا بتشيل (تلاتة أنفار) يعني كلها (اربعة ناس) بس.. بس عربية أحمد أخوي بتشيل (11 زول).
ملاحظات: كلمة زول لا تجمع ولكن تثني إذن لغاية هنا لا مشكلة من 1 إلى 2.. زول واحد، زولين. لكن عندما نمشي ل: تلاتة لغاية عشرة لا زم نهرب إلى إستخدام كلمة نفر/أنفار وعندما نصل 11 نرجع إلى زول إلى ما لا نهاية من الأعداد (مليون زول).
ولهذا قد نضحك عندما نسمع الحبشي مثلاً (له مخيال لغة ذات تراكيب مختلفة) يقول: إتنين زول وواحد زول وعشرين نفرات. لأننا نشعر بالقواعد لكن لا نعيها كل الوقت!
--- تلك مجرد مذكرة لحلقة مقبلة من قواعد العامية الوسطسودانية: @العامية الوسطسودانية وقواعدها .. سلسلة حلقات.. الرابط يتكون من صفحتين بعد تنتهي الاولى بتلقى الرقم 2 في اخر الصفحة المنبرية لتتم بقية الحلقات (16 حتى الان) دا الرابط👇 لمن عنده الصبر الجميل
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد جمال الدين
فيس بوك
تويتر
انستقرام
يوتيوب
بنتيريست