|
|
|
 Re: #أؤيد حكم التكنوقراط For Ever# (Re: Salah Zubeir)
|
واحدة من الخوازيق الكبيرة (الاتركبت) في الشعب السوداني
دا مجانا وأحيانا كتيره بي رغبتو ... هي التحزب ... وخصوصا
التحزب العقائدي ...
الصين ٢ مليار نسمة حزبهم ودينهم اسمو العمل ... الشغل ...
ولا صوت يعلو فوق صوت العمل والإنجاز والابتكار ...
المجتمع الصيني (٢ مليار نسمة) موحدين تماما في هذه
الرؤيا والهدف ... ومنهم اخذت الشعوب التي من حولهم ...
اليابان اشتهرت بي الإخلاص الشديد لهذه الرؤيا ...
الناس ديل بيفتكرو الله الخلقم ودينم ودنياهم هو العمل ...
ماليزيا سنغافورة اندونيسيا الفلبين تايلاند وأخيرا الهند ...
ديل عقيدتهم الأولى والأخيرة هي العمل والإنجاز والابتكار ...
لذلك (((أؤيد حكم التكنوقراط for ever))) في البلد دي ...
البلد دي وما تملكه من موارد طبيعية وبشرية غير متوفرة
في كل بلاد العالم في غنى تماما عن السياسة والسياسيين
وتنظيماتهم الحزبية خصوصا الأحزاب العقائدية ...
التكنوقراطي المتميز جدا عبدالله حمدوك والذي (كان) يقود
البلاد نحو التكنوقراطية الحقيقية تسلط عليه أولاد الحرام
من كل حدب وصوب وأطاحو به ...
نواصل ....
| |
 
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
حبابك اخونا حيدر وربنا يحقق كل أمانيك ...
نحن شعب لازلنا في قاع السلم الديمقراطي ...
أولويتنا هي (to stand up) بدل نباري خرابيط
السياسة والسياسيين ... لننهض ونتطور يلزمنا
تكنوقراط متخصصين في الأعمال والعمل ولسنا
في حوجة لحجوة ام ضبيبينة الشغاله دي ...
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
لا علاقة للحزب الشيوعي الصيني بما يحققه الشعب الصيني
من تطور ونماء ... لو في فائدة واحدة بكون قدما الحزب
الشيوعي الصيني للشعب الصيني بكون كرهم وطلع دينم
في السياسة والتسيس لذلك ابتعدوا منها وركزو في العمل ...
😂😂😂😂😂
الصين ما فيها أحزاب ولا سياسيين ولا سلطة وثروة الناس
تجري وراها ... الناس الفوق ديل (الشيوعيين) ممكن شغالين
إدارة ممتازة بس ... لكن المجتمع الصيني مجتمع رأسمالي بامتياز ...
في الواقع الصين حاليا يحكمها تكنوقراط وليبراليون جدد.
النظام الاقتصادي في الصين هو نظام رأسمالي علي راسه الحزب
الشيوعي الصيني الذي لا يحمل شيء من الشيوعيه غير الاسم ...
تقريبا النظام مزيج بين الاقتصاد الحر والنظام الاشتراكي حيث
لا زالت الدولة تتحكم في جزء مهم من الاقتصاد ... اهم عوامل
النهضة الحالية والتطور في الصين هو الانفتاح علي العالم بخطوات
محسوبة ... والأهم هو محاربة الفساد والمحسوبية ... المسؤول
الذي يسرق في الصين يتم اعدامه ... وهنا الفرق ... لا يمكن لدولة
ان تنهض في ظل الفساد ... يعني لو جبنا بايدن وبوتن وميركل
يحكمونا لن نتقدم في ظل ثقافة الفساد الذي ضرب كل مناحي
الحياة ... حتى في سعينا للسلطة والثروة ...
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: محمد البشرى الخضر)
|
| Quote: بديلا عن اللولوة المقصودة في عنوان البوست. |
مولانا ومولى من لا مولى له ...
زارنا النبي ...
ههههههه ... يقول من قدس سره الرفيق اب سن احد
مواليك نواحي كوستي ربنا يديهو الصحة والعافية ...
يقول ههات الضحكة لو أقل من ٥ زي كده (هههه)
فهي قلهدا باينه بينونه كبرى ... فطب نفسن ...
هل لولوة عنوان البوست من ناحية grammar ول
إعراب العربية ... والنجاح دايما تكنوقراطي ...
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: محمد البشرى الخضر)
|
حبابك حبابك هادم البوستات ...
ربنا يحقق أمانيك ويحفظ أسرتك والبلد ...
اللهم لك الحمد والشكر على هذه النعمه النادرة جدا ...
| Quote: بالمناسبة التكنوقراط ما وظيفته انو يحكم أو ياخذ قرار سياسي |
دا منو القال كدا ... عارف يا باش دي مصيبة البلد دي ...
المسلمات بتاعت تقديس سياسيين الأحزاب في البلد دي نتجت
لنعرات دينية صوفية واستفادت من هذه النظرة الأحزاب
العقائدية ... وأهو كلهم سايقننا بالخلا ... لي متين الله أعلم ...
شيخ زايد الله يبشبش الطينه المتوسده تحت راسو عندو
تعريف بسيط جدا كبساطته وحكيم جدا كأحد حكماء العالم
أجمع ... يكفي أنه بنى دولة عظيمة في الربع الخالي احد
أسوء مناطق العالم لمعيشة البشر والشجر والحشر والحجر ...
يقول الشيخ الحكم هو ان يعرف الحاكم كيف يخدم وطنه
ويخدم مواطن هذا الوطن ... فل استوب يا قول الهمباتي ...
ويقول الشيخ محمد بن راشد آل مكتوم وهو تلميذ زايد :-
Quote: علمتني الحياة.. أن لا تشغلني الحياة بمعاركها
الجانبية عن معركتنا الكبرى الحقيقية… معركة البناء والتنمية..
بناء الوطن معركة.. بناء الإنسان ملحمة.. بناء حياة لأجيال
جديدة هو أكبر وأعظم وأنبل هدف لحياتنا.. وما سوى ذلك
تفاهات تشغلنا عن معركتنا الحقيقية". |
اذا كان هدف وتعريف الحكم هو بناء الوطن وخدمة
مواطن البلد ... فما أظن هنالك فرق في ال job
Description بتاع السياسي الحاكم أو التكنوقراطي
الذي سوف يحكم ... وأظن الكفة ترجح لصالح
التكنوقراطي بحكم علمه وخبرته ... ما لم تكن هناك
أجندة أهم من بناء الوطن وخدمة المواطن ...
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
سلام ود الزبير وعيدك سعيد
ياخ نضميك سمح والله لكن السؤال البيطرح نفسه:
هل الشعب السوداني بموروثاته ومعتقداته واثنياته وكل مكوناته
يصلح لتطبيق مفهوم التكنوقراطية في شئون الدولة
والسؤال دا من منطلق ما يحدث في أضابير الخدمة المدنية المسؤولة
عن طرح المفهوم دا في أرض الواقع والمواطن بما له وما عليه لطبيق مفهوم التكنوقراطية
بمعنى (قدسية العمل والاخلاص فيما تقوم به)
يعني البسووا فيه الصينيين ديل أو اليابان هل مواطننا الغلبان دا قادر على ذلك
ودا ما إنقاص في حق أهلنا لكن هي ثقافة ومكتسبات فهل هي موجودة عندنا ولا ما هل ؟؟
وأنا أذكر أنه صادفني في مرة تروح تسأل عن موظف يقولوا ليك والله الليلة ما جاء عندهم سماية
وعلى مستوى مصنع أو شركة أو محل في سوق الله وأكبر يقولوا ليك مافيشين راحوا لعزاء مين كدا
تحياتي
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: عمر أبوعاقلة)
|
#أؤيد حكم التكنوقراط For Ever#
حبابك عمر وكل عام وانت وأهلك بي خير وصحة وعافية ...
تفعيل الإدارة يا عمر هي علاج لكل عاداتنا الغير مسؤوله ..
إنتا كحزب وصلتا للسلطة هل مهمتك تخدم هذا المواطن في
تفاصيل حياته ومعيشته وسكنه وبنيته التحتية وتدعم تعليمه
وتوفر له الوظيفة المناسبة ام مهمتك تدمير هذا المواطن في
تعليمه وصحته وماكله ومشربه وهدفك الأساسي تعمل ليهو
غسيل مخ لأدلجته بي خرابيطك الجايبا من المصريين دي ...
أظن السودانيين سوف يكونو بخير إذا اختفت هذه الأحزاب
الانتهازية التي وضح ضررها اكثر من نفعها ...
ربنا سلط علينا منذ بداية تسعينيات القرن الماضي الكيزان
ومشروعهم الحضاري المدمر وداخل هذا المشروع بالتحديد
ما يسمى بالتأصيل ومعه ما يسمى بثورة التعليم العالي ...
التأصيل كان سبب في تعريب التعليم الجامعي وانحدار
مستواهو إلى اسفل سافلين وثورة التعليم العالي كان همها
كلو quantities rather than quality ... دا كان سبب
في دمار أجيال وأجيال من الخريجين إلى يومنا هذا ...
اعمل في مصنع لتكسير (Fractionation) الغاز المصاحب للبترول ...
بحكم وجودي في قسم الصيانة جابو لي واحد اتوسط ليهو وهو
خريج جامعة السودان مهندس ميكانك ... اتفقت مع رئيس القسم
لمقابلته والبحث في توظيفه ... بعد المقابلة أشار رئيس القسم لي
بأن الزول لا يفقه شي في اللغة الإنجليزية (من ناحية أمن وسلامة
الزول دا بكون خطر حقيقي داخل مصنع الغاز لو لم يتم التواصل
معه في لحظات الطواريء (تسريب الغازات السامه جدا) في مكان
فيهو ٢٠٠٠ شخص عماله ٦٠% منهم لا يفقهون العربية) ... المهم
الزول دا اديناهو النصيحة بأن يتعلم لغة التواصل بالانجليزي في
احد معاهد أبوظبي لمدة ٦ أشهر وبعد ٦ أشهر تم استيعابه في
الشركة واليوم على رأس عمله ...
خريجين جامعة الخرطوم نادرا يدخلو اختبارات المعاينات ولو
صوريا لغاية بداية التسعينات ويتم تعينهم فورا للمعرفة المسبقة
بمستواهو ... واليوم عادي جدا يرفضو تعينيهم لضعف مستواهم ...
تفتكر السبب شنو ...
دي هي المعركة الحقيقية ... خدمة المواطن بتأهيله للقيام
بما هو مطلوب منه وليس تأهيله للقيام بقتل أخيه في الوطن
لمجرد أدلجته في تنظيمك ...
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: ABUHUSSEIN)
|
اوووو حاج العوض ... كل سنة إنتا وأهلك وناسك
وشعبك في أتم صحة وعافية والسنة الجاية إن
شاءالله نتقابل في مسجد نمرة يوم عرفة ويكون
إمامنا وخطيبنا مولانا حافظ قدس الله سره ...
قول آميييين وما تنبذو ...
#أؤيد حكم التكنوقراط For Ever#
في الديمقراطيات الجد جد الناخب أو أفراد الشعب
الذين يحق لهم التصويت هم الأسياد ويتذلل لهم
المرشح لكسب أصواتهم وفي المجتمعات الفقيرة
الديمقراطية زي الهند وباكستان يقوم المرشح بإنجاز
متطلبات هذه المجتمعات من خدمات قبل الانتخابات
لكسب اصواتهم ... والتنافس بين المرشحين دايما
بكون في تنفيذ ما يطلبه الناخب عكس ما يحصل
عندنا تماما ... فلا وجود لي فهم خدمة الناخب ...
والمرشح للانتخابات قبل ما يفوز تلقاهو دخل في
ثوب السيد منتفخ الأوداج ... وصار حاكم بأمره ...
والتفت حوله بطانة ال مع رص ين والانتهازيين
المستفيدين من وضعه إذا فاز ... هذا جانب ...
في الجانب الآخر نوعية الأحزاب زاتا الموجودة
على الساحة السودانية ليست هي تلك الأحزاب
التي لها برامج واضحة لخدمة الوطن والمواطن ...
كل حزب من احزابنا يا دوك يحمل رسالة .. الله
اعلم جايبنها من وين ... هل هي رسالة من السماء
الفاضي دا ول من احد الافلاك الحايمة في الفضاء
الخارجي ... هذه الرسالة المقدسة وجب على
الحزب أن يبلغها للشعب السوداني ... وعلى الشعب
السوداني أن يأتمر بأمرها شاء من شاء وأبى من أبى ...
دي بالذات هي المهمة المقدسة الأولى والأخيرة لهذه
الأحزاب ... أحزابنا ليست هي الأحزاب المتعارف عليها
في كل العالم ... أحزابنا جاهلة ولا تعرف مهمتها
الأساسية في خدمة الوطن والمواطن ... أحزابنا لا
تستحق أن يطلق عليها كلمة أحزاب لأنها لا تعرف
ال definition بتاع كلمة حزب ولا الهدف من
تكوين حزب في مجتمع ديمقراطي ... احزابنا
جات من السماء الفاضي دا بي رسائل سماوية ولسان
حالها يقول لبعضهم البعض (لكم دينكم ولي دين) ...
وتقول لشعبها ترون ما أرى فقط ... وعليكم الإلتزام
بذلك ...
وماشين في السكة نمد ... (اية شيوعية)
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
عاش ابو هاشم
مشكلة السودان الخمسة ديل
الشيوعيين والبعثيين والناصريين والكيزان والسلفيين مشكلة نفسية
القال ليك الحزب الشيوعي الصيني خلي الشيوعية منو
الشيوعية الصينية ما رفست الكنفوشية والبوذية وايضا ركزت الفدرالية في الصين
والشيوعي السوداني السكران الحيران رفس الختمية والانصار والقناعات الدينية والسياسية للناس وعمل فراغ روحي
اتمددو فيه الاخوان المسلمين والسلفيين
وكمان عرروبين الهوا شوهو العلم والشعار والتعليم في انقلاب 1969 و تموها الكيزان ملاعين والديهم 1989
التكنو قراط السوداني الاصلي هم البنو السو دان مع الانجليز 1938-1856 قبل يجو عملاء مصر الرخيسين يدمرو
الدولة المدنية الكانت احسن من الصين واليابان وكوريا في ذلك الزمن والصور لا تكذب
انت داير ضبط مصنع
اخر تكنو قراط ماتو مع الثورة
منصور خالد الفقه الدستوري ومهندس اتفاقتين مع ابيل الير
ابراهيم منعم منصور خبير اقتصادي وفضح مصر الناهبة للسودان
علي محمود حسنين خبير سياسي ودستوري ايضا وسلم الشباب مشروع ثورة كامل علم ورؤية ودستور
وحمدوك بارا سفهاء المزرعة السعيدة بدل يعملهم مستشارين وضيع الشباب والثورة
اي كوز ندوسو دوس
اي شيوعي نخلي يعوعي
الترابي وبابكر عوض الله كانو تكنوقراط ومجرمين في نفس الوقت
تاني تكنو قراط نعمل بيه شنو
https://www.0zz0.com
| |
|
|
|
|
|
|
|
|
Re: #أؤيد حكم التكنوقراط For Ever# (Re: adil amin)
|
سلمات يا ود الزبير وكل عام وانت واسرتك بالف خير وعافية يا حبيب
بالنسبة للحزب الشيوعي الصيني هذا الحزب واكب العصر وصار مصدر الهام لكثير
من الاحزاب الشيوعية وغيرها من الاحزاب حول العالم .
حيث نجح الحزب في دمج الماركسية في بناء المجتمع والرأسمالية فى الاقتصاد ( الاقتصاد الرأسمالي - اقتصاد السوق الحر )
ما فتح أبواب سور الصين العظيم واجوائها أمام تدفق الاستثمارات الاجنبية بمليارات الدولارات الامريكية على الصين .
وبالنسبة لحكم التكنوقراط :
اصلاً ما فى اي مشكلة فى انّ التكنوقراط احق من غيرهم فى الاستوزار وذلك للتخصص فى الوزارة التى يراد لهم ان يستوزروها
وفى عهد حمدوك كانوا سينجحون لولا انّ العساكر قفلوا عليهم البلف وصادروا منهم كثير من الصلاحيات .
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: ABUHUSSEIN)
|
حباب عادل امين وعيدك مبارك ...
#أؤيد حكم التكنوقراط For Ever#
اللافت للنظر بأن الأحزاب كانت ولازلت في كل بلدان العالم
تمثل عامل وحدة وتماسك وصمام أمان ضد التفتت وذهاب
الريح بحكم الممارسة الديمقراطية التي ترتضيها الأمة إلا
عندنا هنا في السودان الذي ابتلاهو ربنا بالأحزاب العقائدية
الأممية التي تعمل لأهداف لا تمت للممارسة الديمقراطية بصلة
وتهدف للانتصار لأفكار ما عندها علاقة بالشعب السوداني
وغايتها يا أمة إسلامية واحدة يتمدد فيها الإسلام السياسي
سلما ام حربا وتلغى فيها كل معتقدات الاخرين أو أمة
شيوعية تتمدد فيها الشيوعية الأممية سلما ام حربا
وتسود المعتقدات الشيوعية من الحاد واشتراكية وعلمانية ...إلخ
وتبقى قضايا الوطن والمواطن هدف بعيد المنال ...
ربنا لا تعاقبنا بما فعل السفهاء منا ...
هي لله لا للسلطة ولا للجاه ... (اية كيزانية)
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
Quote: واحدة من الخوازيق الكبيرة (الاتركبت) في الشعب السوداني
دا مجانا وأحيانا كتيره بي رغبتو ... هي التحزب |
Quote: نحن شعب لازلنا في قاع السلم الديمقراطي ...
أولويتنا هي (to stand up) بدل نباري خرابيط السياسة والسياسيين |
خطاب إنقلاب نميري وخطاب إنقلاب عمر البشير إحتوا على نفس الفكرة دي.
سيكثر الترويج لأفكار مماثلة لأفكارك دي في الأيام القادمة تمهيداً للوأد الكامل لأي محاولة للتحول الديمقراطي.
المهم اللولوة المقصودة هي التستر وراء تأييد التكنوقراط للترويج لموقف ضد الديمقراطية والاحزاب كأوعية تُمارس من خلالها ديمقراطية الحكم.
ونحن اللولوة بنشمها من ريحة عنوان البوست.
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: علاء سيداحمد)
|
حباب علاء .. كل سنة إنتا وأسرتك ووطنك تنعمو
بالأمن والأمان والسلام وربنا يحقق أمانيك جت ...
جدنا الباشمهندس أحمد بكري جلي زار الصين وكتب
الآتي بعد زيارته لها :-
Quote: طابت أيامك ابننا احمد الصين دولة
شيوعية اسما ولكنها رأسمالية فعلا
زرتها وتجولت في أسواقها ومصانعها
الدولار يباع في صرافاتها، الأب الروحي لنهضة الصين وحامل رأية
البروستريكا والاصلاح هو دينج هسياو ينج هذا الرجل حول اقتصاد
الصين من الاقتصاد الموجه الى الاقتصاد الرأسمالي واجه معارضة
من زمرة الخمسة بقيادة زوجة ماو
وتغلب عليهم أشرعت الصين أسواقها
للاستثمارات الخارجية كما سمحت
لشركاتها بالاستثمار في الخارج مثل
شركة صينوبك العاملة في مجال البتروكمكل وحفر البترول وتشييد
معامل ومصافي البترول في العالم
شركة صينوبك هي التي شيدت خط
البترول السوداني من الجنوب الى البحر الاحمر بطول1600كيلومتر
كما أن الشركة الصينية للبترول هي
التي استخرجت البترول السوداني
وشيدت مصفاة الجيلي شراكة
مع الحكومة السودانية المدن
الصينية مكتظة بالسيارات الفخمة
مثل المرسيدس شركة علي بابا للاكترونيات والبرمجيات لها شراكات
مع شركات عديدة في العالم وكذلك
عملاق الاتصالات هواوي الذي حير
الغرب وامريكا اكثر الدارسين في
امريكا هم من الصين قابلت الكثير
من شبابهم الخريجين يتكلمون
الانجليزية وكأنها لغة أمهم. |
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
Quote: المهم اللولوة المقصودة هي التستر وراء تأييد التكنوقراط
للترويج لموقف ضد الديمقراطية والاحزاب كأوعية تُمارس
من خلالها ديمقراطية الحكم. |
خخخخخخخخخخ
اتكنك فاكر صلاح دا جنرال جيش وعايز يقلبا
بكرة القريبة دي ... ياخي صادف مرة او مرتين
بس القعدتا فيهم مع جنرالات في صالون ...
ما كويس كدا ... اخير منك دينق المصر إنو أنا كوز ...
هههه ... بعدين وينا هي الديمقراطية التي سوف
تقودنا إلى النعيم ... يكنش فاكر احزابنا دي تسعى
إلى الديمقراطية وبتاعت ديمقراطية ... صلي على
النبي يا مولانا ... زكرتني البرهان ... ههههههه
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
| Quote: اتكنك فاكر صلاح دا جنرال جيش وعايز يقلبا بكرة القريبة دي |
التكنك فاكر إنو الإنقلابيين نميري وعمر البشير أنتجوا الفكرة والكلام دا من دقنوساتم الكبار ديلاك.
الفكرة تعيد إنتاجها الجهة المستفيدة من وأد الديمقراطية ووأد أي مشروع ممكن يفضي إليها، ثم تتلغفها هوام المنابر السايبرية واللاسايبرية وتقوم بنشرها والترويج لها.
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Hafiz Bashir)
|
Quote: التكنك فاكر إنو الإنقلابيين نميري وعمر البشير أنتجوا الفكرة
والكلام دا من دقنوساتم الكبار ديلاك. |
اتكنك فاكر نميري والبشير قلبوها بي شورتن ول رأين ...
ديل كان وراهم مواعين الديمقراطية زااااااااتا يا سعادتك ...
تاني برددا ليك ... يكنش فاكر الأحزاب البتسميها مواعين
الديمقراطية ساعيه أصلا للديمقراطية ول هي بتاعت
ديمقراطية ... ديل قانصين بي نسخة جديدة من
نميري اخر أو بشير اخر ليفترسو الغنيمة الما
عندها سيد دي ... كلامك دا ممكن نظريا صحيح
وممكن تدرسو لطلبة العلوم السياسية ... لكن الواقع
في السودان ضد النظري والطبيعي للبشر ... وهنا
التاريخ القريب جدا حاضر وكابس كبس ...
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
الأحزاب العقائدية الأحزاب العقائدية الأحزاب العقائدية ...
يا صلاح زبير
ما هي العقائدية
ماذا تعني بحزب عقائدي أو أحزاب عقائدية
؟؟
للإجابة على الأسئلة أعلاه يمكنك الاستعانة بصديق وبقوقل نفسه وبكبار المفكرين والفلاسفة في العالم وبالجن الكلكي ذاتو!.
Quote: لا علاقة للحزب الشيوعي الصيني بما يحققه الشعب الصيني
من تطور ونماء ... لو في فائدة واحدة بكون قدما الحزب
الشيوعي الصيني للشعب الصيني بكون كرهم وطلع دينم
في السياسة والتسيس لذلك ابتعدوا منها وركزو في العمل ...
|
يا النبي نوح
يا زول إنت جادي ؟
طيب لو كلامك ده صاح، ليه عساكرك الذين تدعمهم في السودان، والذين حكموا 57 سنة منذ الاستقلال فشلوا في تحقيق ما حققته الصين، بل لماذا فشلت كل الأحزاب اليمينية التي حكمت منذ الاستقلال في تحقيق ما حققته الصين، بل لماذا فشلت كل الدول التي تتبنى النظام الرأسمالي في دول الثالث بما في ذلك مصر القريبة في تحقيق ما حققته الصين ؟
في زول ماسك الجماعة ديل كلهم من كرعينهم ؟
Quote: الصين ما فيها أحزاب ولا سياسيين ولا سلطة وثروة الناس
تجري وراها ... الناس الفوق ديل (الشيوعيين) ممكن شغالين
إدارة ممتازة بس ... لكن المجتمع الصيني مجتمع رأسمالي بامتياز ...
في الواقع الصين حاليا يحكمها تكنوقراط وليبراليون جدد.
النظام الاقتصادي في الصين هو نظام رأسمالي علي راسه الحزب
الشيوعي الصيني الذي لا يحمل شيء من الشيوعيه غير الاسم ...
تقريبا النظام مزيج بين الاقتصاد الحر والنظام الاشتراكي حيث
لا زالت الدولة تتحكم في جزء مهم من الاقتصاد ... اهم عوامل
النهضة الحالية والتطور في الصين هو الانفتاح علي العالم بخطوات
محسوبة ... والأهم هو محاربة الفساد والمحسوبية ... المسؤول
الذي يسرق في الصين يتم اعدامه ... وهنا الفرق ... لا يمكن لدولة
ان تنهض في ظل الفساد ... يعني لو جبنا بايدن وبوتن وميركل
يحكمونا لن نتقدم في ظل ثقافة الفساد الذي ضرب كل مناحي
الحياة ... حتى في سعينا للسلطة والثروة ...
|
لقد رديت على نفس طرحك هذا في بوست سابق ...
الصين بقيادة الحزب الشيوعي الصيني تتبنى ما اصطلحوا على تسميته بـ " اقتصاد السوق الاشتراكي "، وهي مرحلة انتقالية إلى الاشتراكية، تقوم على نظام اقتصادي مختلط، وتم اقتراح وتبني هذه " المرحلة "، لأن الرأسمالية أو نمط الإنتاج الرأسمالي في الصين في طور بدائي، بما في ذلك تخلف قوى الإنتاج " عمال + آلات "، وصلتها بعلاقات الإنتاج، وبالتالي كان اقتراح هذه المرحلة التي تمر بها الصين حالياً لتطوير أدوات الإنتاج الرأسمالي، وبالتالي تطوير نمط الإنتاج إلى مرحلة متقدمة تحقق الإنتاج الوفير، وهى لحظة تاريخية ضرورية للانتقال إلى الاشتراكية حسب الماركسية، وهذه المرحلة الانتقالية أي " اقتصاد السوق الاشتراكي " تشبه إلى حد ما " مرحلة الثورة الوطنية الديمقراطية " التي يطرحها الحزب الشيوعي السوداني.
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
سلام أستاذنا كمال عباس ...
كل عام وإنتا بألف خير وربنا يديك الصحة والعافية ...
واضح مداخلتك مداخلة زول زعلان ومعصب وبفتش
لي إنتصار ولو بي اسلوب امتحان الشهادة السودانية
تخصص رياضيات ... الموضوع ما شخصي كمال ضد
صلاح .. ولا حا يكون .. دي مصيبة بلد في مفترق طرق
وما عندو خرطه للمسار الصحيح ... دا منبر رأي
وليس قاعة من قاعات النيابة العامة ... مطلوب
منك تقول رأيك فيما كتب صلاح بدون الاستجواب
والتحري العايز تفرضو علي ... فا شنو ... عايز تقول
رأي حبابك عشرة ... استجواب وتحري ... تمشي
تفتح بلاغ في النيابة وحاضرين للإجابة على كل
ما ذكرته ...
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
سلام
اخ صلاح وكل عام وانتم بخير
ابدا ما زعلان اللي بزعلني شنو ؟
بالعكس مبسوط جدا
والغريبة انا لم ادخل مدافعا عن التجارب الديموقراطية واللا النظام الحزب
ولم اهاجم طرحك ولم اجرمه
بل قمت وبكل موضوعية
فحينما تطرح حكم تكنوقراط
توقعت طبعا ان تكون بطبيعة مفهوم
التكنوقراط
علي المستوي النظري وعلي مستوي التجارب وانك مدرك لابعاده ومايعجبه
عشان كدة سالنا
من يختار هولاء ؟
وعبر اي كيفية ؟
في نظام برلمان واللا ومهمته شنو؟
واللا الاختيار عبر النقابات والمهنيين ؟
ماهو موقع الدستور والجيش والجنجويد ؟
نظام فصل السلطات
والحريات العامة
والاسئلة دي كلها فنية وتكنوقراطية
طرحها مشروع
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: كمال عباس)
|
فيا عزيزنا
صلاح. الشغلانية
دي. مافيها زعل وشخصنة
كل زول حر في خيارته وطرح ما يري انو سليم ويخدم الوطن والمواطن
وطالما انو طرح. بديل سياسي - واسماه وراهن عليه وختاه للنقاش والحوار والاختلاف والاتفاق
يبقي من حق الاخر ان يستفسر ويضع ملاحظاته ويتوقع اجابات وايضاحات
لانو المسالة. علي ما اظن - ما مجرد شعار فضفاض ولا محبة واعجاب بمصطلح التكنوقراط بقدر ما هي رهان علي جدواه وفعاليته وصلاحيته للواقع
وعشان كدة انا شخصيا ركزت علي. عصب الطرح ً سعيا لمعرفة مدي. تقديمه لحلول واجابات لواقعنا
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: كمال عباس)
|
لا خير في عساكر و لا خير في أحزاب
الإتنين دمرو البلد و عطلوها و وصلونا لي مصاف الدول المتخلفة
الإتنين سرقو و نهبو خيرات البلد
تحكم الأحزاب يسرحو و يمرحو في الفساد و المحسوبية
يقلبوها العسكريين بعد ما الشعب يتذمر من عمايل الأحزاب
يقومو العساكر يحكمو بالبندقية و تخويف الناس و يبدأو في السرقة و المحسوبية
يتذمر الشعب و يقوم بالثورة و يجوك تااااااااااااااااني ناس الأحزاب بي نفس الأشكال و نفس الأفعال
العساكر و الأحزاب وجهان لعملة واحدة
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: ABUHUSSEIN)
|
| Quote: إن شاءالله نتقابل في مسجد نمرة يوم عرفة ويكون إمامنا وخطيبنا مولانا حافظ قدس الله سره |
حقق الله امانيكم
لكن ما تستبعد إني في نص الصلاة اقول ليهو "قوم لف" او ربما ادخره لرمي جمرة العقبة الكبرى.
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Hafiz Bashir)
|
عندي مشكلة في التكويت ...
صعب جدا تعمل highlight to copy ...
دايما ال highlight شايت في الكشافات ...
صعب تعمل لي جزء محدد ...
اذا في حد عندو حلول ينورنا ...
انتو موضوع الأسئلة التعسفية لزوما شنو ...
عايزين تثبتو شنو ... فاهمين أوي يعني ...
الشطارة والفلاحة دي مباريانا من الثانوي ...
اتذكرو إنو دا منبر رأي مش فصل مدرسة عايزين تعملو
فيها أساتذة أو قاعة محكمة عاملين فيها محققين ...
إنا عارف ما اكتبه موجع ... وموجع جدا وما عندكم حل
غير تكتبو رأي مخالف أو تلوكو القرض بعيد بعيد من بوستاتي ...
الشطارة والفلاحة والأستاذية اسلوب العاجز والهروب إلى الأمام ...
نرجع لي سؤالك ... طبعا حا أجاوب لفائدة القراء من ناحية
ومن ناحية تانية لتنويرك بي مفهومي الشخصي للعقائدية ...
علميا الحزب العقائدي هو الحزب الذي يتحكم تفكيره
وسلوكه السياسي بمبدأ أيدلوجي محدد وواضح ...
بالنسبة لي المبدأ الايدولوجي يعادل العقيدة الدينية...
بالنسبة لي المبدأ الايدولوجي زي قطعة الجلد التي
تركب للحصان وتسمى Blinkers توضع على
جانبي عيني الحصان لتحد من الرؤية الجانبية له
وذلك بهدف حمايته من الخوف ومنعه من التشتت ...
ونزولن لرغبتك الاستعانة بي قوقل هاك دا :-
Quote: تقول التجربة الحزبية إن اغلب الأحزاب العقائدية تميل إلى فكرة (التنظيم) والتعبئة، ومن حيث أنها أحادية النظرة فإنها لا تتصور نفسها إلا أحادية البنية والتكوين. هذه البنية تقوم على أساس المركزية الشديدة. ومنع ظهور التيارات والكتل داخل الحزب باعتبار أنها تهدد وحدته وتحد من فاعليته (تعبير جيب داخلي تعبير أثير لدى بعضهم)، الحزب يصبح هنـا مثل الجيش النظامي.. ولن تدهش حين تسمع عن أشياء أشد في صرامتها من الجيش تتعلق بالحياة الشخصية والنشاط الفكري والاجتماعي.
وتمتينا للانضباط بين الصفوف تطبق هذه الأحزاب (أساليب طقوسية) في العمل، مثل التمييز بين الأعضاء بدرجات توثيق متعددة.. وهو الأسلوب الذى يلقى الرهبة في نفوس الأعضاء، ويجعلهم أكثر طواعية بين يدي القيادة. |
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
مع قوقل لن تغمض عينيك :-
Quote:
2- أهم الأفكار والمعتقدات الشيوعية :-
- إنكار وجود الله تعالى وكل الغيبيات ، والقول بأن المادة هي أساس كل شيء .
- فسروا تاريخ البشرية بالصراع بين البرجوازية ، والبروليتاريا ، ( الرأسماليين والفقراء )
وينتهي هذا الصراع حسب زعمهم بدكتاتورية البروليتاريا .
- يحاربون الأديان ، ويعتبرونها وسيلة لتخدير الشعوب ، وخادماً للرأسمالية
والإمبريالية والاستغلال .
- يحاربون الملكية الفردية ، ويقولون بشيوعية الأموال وإلغاء الوراثة .
- إن كل تغيير في العالم في نظرهم إنما هو نتيجة حتمية لتغيّر وسائل الإنتاج
وإن الفكر والحضارة والثقافة هي وليدة التطور الاقتصادي .
- يقولون بأن الأخلاق نسبية ، وهي انعكاس لآلة الإنتاج .
- يعتقدون بأنه لا آخرة ولا عقاب ولا ثواب في غير هذه الحياة الدنيا .
- الغاية عندهم تبرر الوسيلة .
يقول لينين : " إن هلاك ثلاثة أرباع العالم ليس بشيء ، إنما الشيء الهام
هو أن يصبح الربع الباقي شيوعيًّا " . |
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
كتب صلاح زبير
...... Quote: تذكرو إنو دا منبر رأي مش فصل مدرسة عايزين تعملو
فيها أساتذة أو قاعة محكمة عاملين فيها محققين ...
إنا عارف ما اكتبه موجع ... وموجع جدا وما عندكم حل
غير تكتبو رأي مخالف أو تلوكو القرض بعيد بعيد من بوستاتي ...
الشطارة والفلاحة والأستاذية اسلوب العاجز والهروب إلى الأمام ... |
الحقيقة الواضحة والجليلة أنك أنت من لم يملك أي رؤية أو إجابات
ـ أكتفيت بطرح شعار ـ إسمه تكنوقراط ـ طرحته كبديل من دون أن تبين
ملامحه وفواصله وكيفية إدارة الدولة والمؤسسات بناء عليه
ولم تبين كيف يجيب مفهوم التنكوقراط خاصتك علي قضية
ـ نظام فصل السلطات
- الحريات العامة والحقوق الأساسية
من يختار التكنوقراط ووفق إي الية ومن يحاسبهم؟
- البرلمان ومؤسسة التشريع ـ كيف تختار وتنتخب وماهي صلاحياتها ؟ أم أن تصورك يتجاوزها
--
ليست هناك أستاذية ـ ولم يطرح أحدا منا إطروحة أخري نظرية بديلة وإنما ناقشنا في حدود ماهو مطروح من قبل شخصك الكريم
أنت من طرح من نفسه أستاذا ومعلما يملك البدائل ونحن جلسنا في القاعة
نحاور ونسأل بغية التعرف علي ملامح البديل ومدي إستجابته لتعقيدات الواقع
--
وبالمناسبة دي أبجديات الحوار وأسسه
ثانيا
الأحزاب العقائدية
إي حزب له ثوابت ومرتكزات ـ فكرية ومبادئ لايمكن المساومة فيها فهو
حزب عقائدي وإيدلوجي بل أن محاربة الإيدلوجيا والحزبية هي ذاتها إيدلوجيا
-- الأحزاب اليمنية والإسلامية هي أحزاب مؤدلجة وعقائدية
والأحزاب اليسارية مؤدلجة والليبرالي مؤدلج ـ ومن يري أن مفهوم التكنوقراط ويملك إجابات
وحلول بحيث يفسر كل شئ ويجيب علي شئ هو أيضا مؤدلج
ومن يراهن علي العسكرتاريا مؤدلج ومن يراهن علي الشمولية مؤدلج
*
والحقيقة أن المبادئ والإيدلوجيا لايمكن شطبها والإستغناء عنها
ماهو الضار فيها ؟
- هو الجمود الإيدلوجي والتزمت والإنغلاق العقائدي
والمطلوب قدر من التفتح والتنوير ـ وقدرا من المرونة التكتيكية والتعامل العقلاني مع معطيات ومستجدات الواقع
**
شخصيا أري أن الطائفية مضرة في العملية السياسية
ولكني لا أدعو لالغاء وأقصاء القوي الطائفية والتقليدية ولا أدعو لحظر أحزاب اليمين أو إعدام اليسار
وإنما أراهن علي التنوير والتحديث ـ والوعي والتوعية وعدم القفز علي المراحل
- فمن خلال التجارب والتمايز والمقارنة والوعي التراكمي ومدي إستجابة
الأحزاب لإحتياجات يمكن تجاوز أحزاب عبر إختيار الناخب ويمكن أن تندثر أحزاب ـ إذا لم تتطور ولم تخاطب قضايا العصر ـوضرورات الحياة
ـ و سيكون البقاء للأصلح
* ليس هناك مشكلة إطلاقا في وجود بديل تكنوقراطي ـ كقوة سياسية صاعدة ينتقد القديم ويقدم جديده وينافس غيره من التيارات والأحزاب عبر التوعية واليات التغيير ـ ويتجاوز الموجود عبر الإقناع ينافس
غيره وليكن الخيار للشعب ـ مفاضلة ومقاربة ـ ومقارنة وإختيارا
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: كمال عباس)
|
Quote: أكتفيت بطرح شعار ـ إسمه تكنوقراط ـ طرحته كبديل من دون أن تبين
ملامحه وفواصله وكيفية إدارة الدولة والمؤسسات بناء عليه
ولم تبين كيف يجيب مفهوم التنكوقراط خاصتك علي قضية
ـ نظام فصل السلطات
- الحريات العامة والحقوق الأساسية
من يختار التكنوقراط ووفق إي الية ومن يحاسبهم؟
- البرلمان ومؤسسة التشريع ـ كيف تختار وتنتخب وماهي صلاحياتها ؟ أم أن تصورك يتجاوزها |
تعرف يا أستاذنا كمال ليس بالضرورة أن يظل السودانيين في
اللت والعجن ومقفولين في تصور عام (صندوق مقفول) اسمو
الحكم ومن وراءه الجاه والمال ... الدولة وادارتها شأن يهم كل
السودانيين ويجب اختيار الأكفاء فقط لملء وظائفها ابتداءا
من رئيس الوزراء لاصغر مسؤول فيها ... وقياس الكفاءة يترك
للمختصين من لجان الاختيار التي يجب التقدم لها كما تقدم
لأي وظيفة في كل بلاد الدنيا ... (طلب + CV موضح فيهو
شهاداتك وتاريخ وأماكن خبرتك) وعلى لجنة الوظائف التأكد
من صحة شهاداتك وخبرتك من مصادرها قبل المعاينات
الشخصية منعا لأي تزوير وهذا هو المتبع لنيل الوظائف في
السنوات الأخيرة في العالم ... وبعد المعاينة الشخصية يتم
اختيار الأكفاء ... من ضمن شروط التقدم للوظائف تحريم
الانتماء لأي فصيل سياسي ويضمن ذلك حين يؤدي القسم
من يتم اختياره ... وتطبق قواعد ال Code of Conduct
ويتم ابعاده فورا عند إخلاله بهذه القواعد وتتم محاكمته
حسب القانون ..
بالنسبة لخطة العمل لإدارة الدولة تطبق القواعد العالمية في
اختيار الرؤيا (خدمة الوطن والمواطن) ثم تحديد الأهداف
للسنة الأولى في وجود مواقيت محددة لتحقيق هذه الأهداف
لكل الوزارات والمصالح وتتم محاسبة أعضاء الحكومة على
ضوء ذلك ... دي ممكن تكون خطوط عامة لكيفية إختيار من
يديرون الدولة وكيفية إدارة الدولة ... وفي وضعنا المعقد دا
وفي ظل حضور كلاب كرشان الفاتحين خشمن لنهش الوطن
دا يظل مستر فولكر وما يمثله من مجتمع دولي هو رابطة
العقد بين الفرقاء وعليه تقع مسؤولية إختيار رئيس الوزراء
ومن ثم يتعاون الاثنان لتكملة إجراءات قيام الحكومة ...
بالنسبة للقضاء والنيابة تطبق نفس المباديء للاختيار ...
بالنسبة للجيش والشرطة والقوات الأمنية تطبق التراتيبية
حتى لو بي أبعاد اخر ٣ دفع ويجب أن تبعد تماما من
المسرح السياسي ويجب على قائد الجيش وقادة القوات
الأمنية الأخرى أن يأتمرو بأمر رئيس الوزراء ويجب أن تتطبق
قانون القواعد السلوكية وقسم عدم الانتماء الحزبي للكل ...
نجي لي سجم ووسخ السياسة ...
يتبع ...
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
طبعا يا كمال في مشكلة كبيرة جدا في فهم
السودانيين وعدم تفريقهم بين الحكم والدولة ...
ما ذكرته في المداخلة الأخيرة يمثل الخطوط
العامة وفهم قيام الدولة ... الحكومة مؤسسة
دولة يجب إختيار أكفأ السودانيين لإدارتها دون
محاباة حزبية أو جهوية ...
تظل مسألة من يحكم جمهوريا كان أو برلمانيا ليست
ذات أهمية ما ظلت مؤسسة الدولة (حكومة التكنوقراط)
معروف كيف يتم اختيارها وما ظلت رؤية هذه الحكومة
واضحة (خدمة الوطن والمواطن) وما ظل تحديد أهداف
تحقيق هذه الرؤيا يقوم بها المختصين الحقيقين في مختلف
الوزارات والمصالح ... أهداف تحقيق هذه الرؤيا يمكن أن
تحدد سنويا (زي الميزانية العامة السنوية للدولة) وتجمع
من كل الوزارات والمصالح بنفس طريقة الميزانية ...
بالتأكيد حكومة التكنوقراط (for ever) سوف تقفل الطريق
تماما أمام زلنطحية الأحزاب (التوم هجو قال داير يبقى وزير
تربية وتعليم ... ٢٠١٣ أو ٢٠١٤ كان وزير الصناعة احد كوادر
حركة السيسي الزول دا بعد ما اتخرج (والله ما عارف اتخرج
من وين) مشى لبس الكدمول لمدة ٨ سنوات وبعد اتفاقية
الدوحة جابوهو وزير دولة للصناعة ...
الفهم بتاع الوزير يكون سياسي دي ما موجودة في كل العالم
إلا عندنا في السودان ... في كل بلاد الدنيا الوزير لازم يكون
تكنوقراط ويجب فلفلته في مجال وزارته جيدا قبل تعيينه وزيرا ...
يبقى مسألة الهلولة بتاعت الأحزاب دي سوف تختفي إلى
الأبد وما حا يلقو ليهم كده في ثروة الشعب السوداني
التي تدار من وزير مالية متخصص ومن فوق منو رئيس
وزراء مهمته الأساسية هي خدمة الوطن والمواطن ...
رئيس الوزراء فوق منو رئيس منتخب من قبل الشعب
السوداني أو مجلس سيادة منتخب أيضا يترك لهم
المهام السيادية وليس لهم حق التدخل في أعمال
الحكومة أو الجهاز التنفيذي ... وجود البرلمان المنتخب
من قبل الشعب السوداني مهمته زي مهمة مجلس
الشيوخ والنواب الأمريكي ... فلفلة الوزراء فنيا
ومن ثم مراقبة أداء الحكومة ...
دي يا كمال مداخلتك المعدلة ... الأولى كانت شينه شديد ...
Quote: كلامك دا معناه إنك داير حكومة غير حزبية ..
.. فالتكنوقراط ممكن يكونوا برضو حزبيين !وكل حزب عندو تكنقراطوا المتخصصين في كل الحقول
تكنوقراطـ ! أها قولو عاوز ـ تكنوقراط الحا يختارهم منو؟ تكنوقراط عشان يعملو شنو؟ بس تكنوقراط والسلام ؟ الحكومة عندها برنامج وسياسات عامة و خط عام تلتزم به كافة كافة الوزازات ـ ماهو البرنامج وماهو الخط العام لها؟---
وبعدين ـ الجمهورية دي طبيعتها شنو؟ جمهورية ولا رئاسية ؟ فيها برلمان واللا لا ؟ منتخب واللا ومعين؟يتم الإختيار والإنتخابات ليهو علي أي أساس وعلي أي كيفية؟ حاتبعد المجزبيين من دخول البرلمان؟وحكومتك دي ـ مش حايختارها البرلمان
عبر الية الأغلبية؟
واللا حاتختارها النقابات والقوي المهنية والحديثة؟
** دستورتك طبيعتو شنو برضو تكنوقراطي ؟ ـ وين نظام فصل السلطات ـ واللا ماعندكم؟ وين نظام الحريات العامة ؟ واللا دا مافيش؟ماهو موقع الجيش والجنجويد في نظامك المقترح دا؟
سؤال أنت قبل كدة مش قلت إنو السودان ماب ينفع معاهغير العسكر ـ وإنك مؤيد لحكم العسكر ؟ قلت واللا ما قلت؟ |
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
Quote: سؤال أنت قبل كدة مش قلت إنو السودان ماب ينفع معاه غير العسكر ـ
وإنك مؤيد لحكم العسكر ؟ قلت واللا ما قلت؟ |
طبعا بغض النظر عن السياق الأنا قتا فيهو السودان دا
ماب ينفع معاه غير العسكر (مؤيد لحكم العسكر دي تطفيف
ومريسه كابي فيها جك مويه) المشكلة وين ... ما إنتا تراكا
شايل عكازك وحايم في البوستات دفاعا مستميتا عن الحزب
الشيوعي وناكر حطب إنك شيوعي ... المشكلة وين يعني ...
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
بسبب الأيدولوجيا تدمر التعليم وتدمرت أجيال وأجيال يا كمال ...
الكيزان ولتنفيذ مشروعهم الحضاري كان لابد من أدلجة
كل الشعب السوداني وضمهم كأخوان مسلمين وفي سبيل
ذلك تم تغيير مناهج التعليم لخدمة هذا الغرض وتبعهم في
ذلك قبيلة اليسار حينما أتتها الفرصة بعد ثورة ديسمبر وما
معركة القراي ووزير تربيته الشيوعي ببعيدة عن الأذهان ...
لتنتشر الايدولوجيا عليك بتغيير التعليم لمصلحة أيدولوجتك
يمينا ام يسارا دون مراعاة لمصلحة المواطن في تلقي العلم
والتأهيل المناسب لجعله مواطن عاملا منتجا يخدم نفسو ووطنه ...
خريجي الدعوه لدين حسن البنا في عهد الإنقاذ مئات الالاف
في حين الحصيلة زيرو في تخريج (فنيين) كهرباء وميكانك
وحتى خريجين ال IT يلزمهم كورسات متخصصة غير متوفرة
في السودان بعد التخرج لممارسة مهنتهم ...
في الهند طالب الثانوية بعد ما يستلم شهادتو الممكن تدخلو
كلية الطب بمشي معهد بتاع IT بكل تخصصاتها (كمية من
التخصصات تم ابتكارها في ال ١٠ سنوات الأخيرة) ...
مثلن طالب الثانوي الهندي يدخل معهد ال IT كطالب عايز
يتخصص في الشبكات الرقمية ( IT Networking Engineer ) ...
في خلال 5 إلى 6 أشهر يتحصل على شهادة CCNA* ...
هذه الشهادة تتيح ليهو العمل داخل الهند كمهندس شبكات
ولازال يواصل دراسته في نفس المعهد بس المرة دي اونلاين ...
وفي خلال 16 الي 18 شهر يستطيع الحصول على شهادة CCNP* ...
بعد ما يستلم الشهادة دي ولازال على رأس عمله بخش اونلاين
وبقدم لي شغل في دبي وابوظبي وقطر والكويت والسعودية ...
وفي خلال أسبوع بيستلم عروض العمل من كل هذه البلاد لأنو
مرغوب جدا وله القرار والاختيار للأعلى راتب ول الأحسن بيئة عمل ...
في الخليج وامريكا وأستراليا سوق العمل يمتلكها الهنود والفلبينيين
بفضل التخصصات الفنية من IT وميكانك وكهرباء ...إلخ ...
الأيدولوجيا سرطان يا كمال وسوف تهلك الأمة السودانية ...
CCNA = CISCO Certified Networking Associate Engineer*
CCNP = CISCO Certified Networking Professional Engineer*
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
Quote: انتو موضوع الأسئلة التعسفية لزوما شنو ...
عايزين تثبتو شنو ... فاهمين أوي يعني ...
الشطارة والفلاحة دي مباريانا من الثانوي ...
اتذكرو إنو دا منبر رأي مش فصل مدرسة عايزين تعملو
فيها أساتذة أو قاعة محكمة عاملين فيها محققين ...
إنا عارف ما اكتبه موجع ... وموجع جدا وما عندكم حل
غير تكتبو رأي مخالف أو تلوكو القرض بعيد بعيد من بوستاتي ...
الشطارة والفلاحة والأستاذية اسلوب العاجز والهروب إلى الأمام ...
|
الأسئلة أسئلة موضوعية، وما عايزين نثبت أي شيء مما ذكرته، فقط الهدف الوحيد هو توضيح الحقائق من وجهة نظري، ومحاولة ضبط المصطلحات، ونقد ما له صلة منها بالحزب الشيوعي، وخصوصاً سؤال " الأحزاب العقائدية " وهو مصطلح وهمي في شكل وردة وعندو وِردة، نجره بعض الكتاب العرب، وردده في السودان منصور خالد وبعض من أفراد النخبة السودانية، ومن خلفهم ردده بغبغائياً طيف واسع من الكتاب السودانيين دون مسائلة أو فحص، وهو من أكثر المصطلحات الفارغة المحتوى الشائعة الاستخدام لدرجة لا يعني أي شيء، وأن أكثر من يرددونه لا يعرفون معناه، ومنهم كتاب ذو شنة ورنة ويُحسبون من الكبار، وهم معذورون لأن المصطلح نفسه ليس له تعريف مضبوط، وأن القليلون الذين يعتقدون أنهم يعرفون معناه، يخلطون بينه وبين مصطلح " إيديولوجيا بشكل مريع، " ومنها تعريفك الذي بذلته هنا، بالإضافة لتعريف قوقل المضحك الذي يخلط بين المركزية والديكتاتورية والتنظيم الحديدي والعقائدية، وبالتالي فإما أن جميع الأحزاب في العالم هي أحزاب " عقائدية "، أو أنها كلها غير " عقائدية "، وينطبق الأمر أيضاً على مصطلح " إيديولوجيا "، حيث أن جميع الأحزاب الموجودة على كوكب الأرض وداخل التاريخ البشري، هي أحزاب إيديولوجية، فقط الواهمين العائشون في أحلام خيالهم هم الذين يعتقدون أنهم مطهرون ونظيفين غسيل ومكوى من (سوء ووسخ ورجس ونجاسة ) الإيديولوجيا، وأنهم يصدرون عن الحقيقة المطلقة في العالم، الحقيقة الموضوعية المجردة، مثل العلوم الطبيعية من أحياء وكيمياء وفيزياء ورياضيات وغيرها من العلوم الدقيقة، وأنهم مجردون عن أي هوى أو مصلحة طبقية أو شخصية، وأنهم مثل النجوم العالقة في السماء، حكم محايد من خارج التاريخ البشري وخارج الواقع الاجتماعي، لا تطالهم شبهة انتماء أو انحياز أو ميل، وأن القليل من نخبة النخبة تدرك ذلك، لكنها تعمل على تمويه إيديولوجيتها وتصوير كل ما تقوم به كأنه الحقيقة الموضوعية المجردة من أي مصلحة، وبالتالي تمرير مصالحها الطبقية أو الشخصية تحت غطاء " الموضوعية المجردة و " عدم الإيدلوجية " وإشاعة أن الإيديولوجية هي فقط إيديولوجيا الآخر، ولكنهم على العموم في الغرب بمختلف توجهاتهم السياسية والفكرية والثقافية، يقولون بوجود الإيديولوجية ويؤكدون حتى أن بعض ما يطرحونه هم أنفسهم هو إيديولوجية، مثل إيديولوجية " المحافظين الجدد" و " الريغانية والتاتشرية " و " الليبرالية " و" الليبرالية الجديدة "، وغيرها، لكن المشكلة المزمنة هي عندنا نحن في السودان، وهي أن أي مفهوم أو مصطلح نزيدوا براميل مويه، حتى يمسخ وينمسخ ويصير بلا هوية، ويصبح بلا طعم أو لون أو رائحة، وهذا يقودني إلى اتفاق تام مع كمال عباس بخصوص " الأحزاب العقائدية ".
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: كمال عباس)
|
Quote: الواقع. ان العداء الايدلوجيا هو نفسه ايدولوجيا بل وايدلوحيا متزمتة
واقصاء للاحزاب كلها بقرار سلطوي - او القول. نحو حياة سياسية بلا احزاب.
هو ذاته. جمود ايدلوجي والرهان علي التكنوقراطية وحدها باعتبارها تجيب
علي كل شي وتفسر كل شي |
الواقع ... الواقع ... الواقع ...
الواقع اليوم يا مثقفين ... يا المنعمين بالعيشه الهنيه
خارج قراكم وحلالكم ومدنكم وبلدكم الاتولدتو ونشأتو
فيهو ... الواقع لا علم لكم به ... البلد على شفا سقر ...
وإنتو لازلتم في غيكم القديم من فلسفة وتنظيرات
فارغه لا تغني من جوع (٩٠% من الشعب السوداني
في حالة مجاعة حقيقية) ... البلد تعاني في كل
المجالات ... هي مش معاناة مقدور عليها ... لا
ثم لا ... ثم لا ... البلد في حالة إنهيار تام وسوف
يذهب ريحها وانتم تدافعون عن نظريات فلاسفة
وأنبياء كذبة ممكن إنتو اللتنين بتفكرو أحسن منهم ...
البلد يا سادة محتاجه لي (short cut) ينجيها من
الجحيم الذي تعيش فيهو اليوم وبكرة إلى ما لا نهاية ...
الأيدولوجيا والأحزاب العقائدية مسؤوله مما يعاني منه
البلد بنسبة ٩٩% رضيتم ام أبيتم ... ولا أمل في اتفاق
بين هؤلاء العقائديين وعبدة الأيدولوجيا حتى لو كسر
أحدهم عنق الآخر ... البلد يا سادة محتاجة لي حلول
لخروج هذا الوطن من مصيبتو دي وليس لي حلول
فلسفية لتبيان صحة مواقفكم ... البلد محتاجه لي
مثقفيها وفلاسفتها لإنتاج حلول تحافظ عليه ومن
ثم بناءه وبناء التعايش السلمي بين مواطنيه...
| |
|
|
|
|
|
|
|
|
|
Re: #أؤيد حكم التكنوقراط For Ever# (Re: Salah Zubeir)
|
Quote: واقصاء للاحزاب كلها بقرار سلطوي - او القول.
نحو حياة سياسية بلا احزاب |
شنو يعني حياة سياسية يا كمال ... وينن هم السياسيين ديل ...
نعلهم كهنة الاحزاب وشيوخهم وناس هجو وعسكوري وأردول ...
كدي اول حاجه أخلق ليك مجتمع سياسي يعرف ويفهم إنو
السياسة دي فن الممكن وهي آلية لحلول المشاكل وفض
النزاعات بالتي هي احسن ... وليست آلية لخلق المشاكل
والنزاعات الدامية من العدم ...
التكنوقراطية لا تقصي الأحزاب ولكن تحجم دورها في
الأجهزة الحكومية حيث لا تمكين ولا محابا فقط الكفاءة ..
ويترك للأحزاب الأجهزة التشريعية لمراقبة أداء الحكومة
ولابد من سن قوانين للمرشحين من كافة الأحزاب للبرلمان
من حيث التأهيل والخبرة عشان نتجنب حميدتي والتوم هجو ...
| |
|
|
|
|
|
|
| |
Salah Zubeir
حيدر حسن ميرغني
Hafiz Bashir
محمد البشرى الخضر
عمر أبوعاقلة
ABUHUSSEIN
adil amin
علاء سيداحمد
كمال عباس
فيس بوك
تويتر
انستقرام
يوتيوب
بنتيريست