|
Re: الهجرة إلى الغرب (Re: مصطفى نور)
|
سلام اخ مصطفي يجدك ومن تحب بكل خير وسعادة اكيد اضفت الكتير للمنبر نشاط وحيوية ومواضع شيقة وجميلة ومعلومات مفيدة جدا. الف مرحب متاخرة شوية لكن مواضعيك متابعة ومستفاد منها
Quote: (وقد يوصل الحال حتي تبديل الاسم والديانه لبعض ضعاف النفوس وانا اعرف بعض الحالات فى امريكا (وكندا من تنصروا
( اقل الخسائر لم يكون فيهم بنت والحمدلله)
|
لدي ملاحظة بسيطة او تساؤل في شكل ملاحظة: الاقتباس الاول اليست قضية حرية شخصية ؟ الاقتباس التاني السبب شنو اقل خسائر لم تكن معهم بنت ؟ ودوورود
| |
|
|
|
|
|
|
Re: الهجرة إلى الغرب (Re: حامد عبدالله)
|
حامد عبدالله اخي الغالي الف تحيه طيبه لشخصك الغالي والله انا قلت ان البعض قد دخل فى النصرانيه وقلت من ضعاغ النفوس من افتكروا ان الغرب هو الملاذ لهم ولو كانوا فى بلادهم او فى السودان ما اظن كان ده يحصل وعلى العموم انا لا اقول دي حريه شخصيه ولكن اقول لو حصل الكلام ده وفى قانون اسلامي ففي الحاله دى الحكم معروف ولكن ليس عناك حكم اسلامي الان الناس تتغيير والنفوس تتغير والانسان يتغير ولكن تظل الشريعه والاسلام صالح لكل زمان ومكان اما الشطر الثاني فى الموضوع انو طلعت باقل الخسائر ولدين وانا كنت فى امريكا وكندا وشفت مشاكل تربيه البنات ممكن تتربي احسن تربيه فى البيت ولكن المجتمع مجتمع حضاري ومجتمع فيه الكثير من المشاكل فى تربيه الابناء والبنات وانت لو فى امريكا ما اظن تنكر المشاكل التى تعود على بعض الاسر فى تربيه البنات والعيال عامه المهم انا كان عندي تخوف من انجاب بنت فى الغرب وخاصه من اجنبيه ممكن اكون متخلف وومكن اكون محافظ ووممكن اكون غير حضاري وممكن تتطلق على ماتشاء من العبارات ولكن انا عشت 35 سنه فى امريكا وكندا ووالصين وعارف بقول فى شنو وبكتب فى شنو وعندي الاف القصص التى حصلت لجنسيات مختلفه فى تربيه البنات والاولاد معا
مع تحياتي
مصطفي نور
| |
|
|
|
|
|
|
Re: الهجرة إلى الغرب (Re: مصطفى نور)
|
تحياتي اخونا مصطفى وشكرًا على مواضيعك الشيقة. بحاول الخص كم نقطة عن الموضوع بناءً على وجهة نظري الخاصة:
- أساس المشكلة ان السودان بلد طارد ومؤخرا زادت وتيرة التدهور بشكل سريع جدا جدا وأصبح الهاجس امنيا وديموغرافيا بالاضافة للمشكل الاقتصادي باختصار أصبحت مسألة وجود، وبالتالي تكون بين نارين اما البقاء ومحاولة التغيير من الداخل وهذا طريق غير مضمون العاقبة خاصة لمن تخطوا مرحلة الشباب الاولى واصبحوا مسؤولين عن اسر، واما الخروج والكفاح من اجل حياة افضل مع زيادة مخاطر خسارة الروابط مع السودان او ضعفها على اقل تقدير.، ولمعظم الناس الخيار الثاني افضل - المحنة والترابط الاجتماعي واللذان هما زاد السودانيين الحقيقي وما يجعل الحياة الصعبة محتملة على وشك الاندثار، خاصة مع غياب جيل الحبوبات والجدود وانسحاق الآباء والامهات في دوامة الحياة وصعود اجيال العولمة (دي حاجة طبيعية بالمناسبة)، وبالتالي يصعب إقناع من عاش بالغرب ان يرجع للسودان سواءً من المهاجرين الأصليين او ابناؤهم خاصة مع صعوبة الحياة كما ذكرت - اتفق معك ان الحياة في الغرب سلاح ذو حدين لكن للأسف لاتوجد خيارات اخرى للسودانيين تحديدًا خاصة مع التضييق المستمر في الخليج، كما ان طريقة تفكير الشباب السوداني وبالذات المتعلم اختلفت كثيرا من الطريقة القديمة واصب المعيار الاساسي هو الكواليتي اوف لايف والمساواة وليس جمع المال وهذه يوفرها الغرب - تأسيس حياة جديدة في الغرب يستهلك الانسان فكريًا وماديًا حتى يصل لمرحلة الاستقرار علاوة على ان ايجابياتها لا تظهر الا بعد سنين طويلة يشكل عامل ضغط على المهاجر لخوفه من خسارة تعبه خاصة وان السودان لا يوفر ضمانات من اي نوع ولا مجال للتجربة والخطأ مع تقدم العمر وتغير الأولويات - السودان الدولة والمجتمع عمومًا غير معني ولا مهتم بالاستفادة من طاقات ابناءه المهاجرين بخلاف دول مثل الفلبين والهند وغيرها ولاتوجد قنوات لتعريفهم وربطهم ببلدهم الاصلي والاستفادة من طاقتهم وخبراتهم بحيث يفيدوا ويستفيدوا وان كانوا بالخارج وهذا يمثل عنصر إحباط لهم وضغط اضافي على الوالدين الذين يحاولان ربط اولادهم بجذورهم والجميع خاسر هنا
خلاصة الكلام لو اخذنا الموضوع من مبدأ أخف الضررين ارى ان الهجرة شر لابد منه واتمنى ان تكون اجيال السودان المقبلة اسعد حظًا
| |
|
|
|
|
|
|
Re: الهجرة إلى الغرب (Re: طارق عبد الله)
|
طارق عبد الله اخوي الغالي الف شكر ليك وعلى الكلام الطيب والكلمات الدرر منك ونسال الله ان يمن علس سوداننا الامن والاستقرار وتعود كل الناس المهاجره يارب واهديك اجمل ما كتب الشاعر صلاح احمد ابراهيم وغني المبدع وردي غريب .. وحيد في غربتو حيران .. يكفكف دمعتو حزنان.. يغالب لوعتو ويتمنى بس لي أوبتو طال بيه الحنين فاض بيه الشجن واقف يردد .. من زمن زمن الخريف تطير باسراع ماتضيع زمن أوعك تقيف وتواصل الليلة للصباح تحت المطر وسط الرياح وكان تعب منك جناح في السرعة زيد في بلادنا ترتاح ضل الدليب أريح سكن فوت بلاد وسيب بلاد وإن جيت بلاد وتلقى فيها النيل بيلمع في الظلام بالنجوم من غير نظام تنزل هناك وتحيي ياطير باحترام وتقول سلام وتعيد سلام على .. نيل بلادنا وشباب بلادنا ونخيل بلادنا بالله يا طير قبل ما تشرب تمر على بيت صغير من بابه ومن شباكه بلمع الف نور وتلقى الحبيبة بتشتغل منديل حرير لحبيب بعيد تقيف لديها وتبوس إيديها وانقل إليها وفاي ليها وحبي الأكيد وان جيت بلاد تلقى فيها النيل بلمع فى الظلام زى سيف مجوهر بالنجوم من غير نظام تنزل هناك وتحى يا طير باحترام تقول سلام وتعيد سلام على نيل بلادنا سلام وشباب بلادنا ونخيل بلادنا
| |
|
|
|
|
|
|
Re: الهجرة إلى الغرب (Re: walid taha)
|
Quote: كما قال الكابلي غريب و الغربة أقسى نضال غريب و الغربة سترة حال قريب و بعيد حضور و زوال دا روم الاصلو ما بنقال تراقب في المجرة زوال عيونك ما عيون أجيال وليعلم الاخوه فى المنتدي العام باننا نحن معشر السودانين البلد الوحيد في العالم الذي اضطر فيه المطربون الى الهجرة طلبا للرزق، وكان من بينهم مطربنا العملاق عبد الكريم الكابلي (هل تعرف أن جده من أفغانستان ولقب الكابلي نسبة الى كابُل عاصمة أفغانستان) ، وبعد ان ذاق اوجاع فراق الاهل كتب أغنية “غريب والغربة اقسى نضال”، ثم استدرك: والغربة سترة حال |
سلامات اخ مصطفى نور ..
بعد التحية ..
اردت لفت النظر لقصيدة الكابلي زمان الناس و التوضيح ان كابلي كتبها قبل ان يغترب .. و الصدفة وحدها هي التي عرفتني بهذه المعلومة .. و كانت في اتصال هاتفي مني للكابلي رحمه الله حينما ذهب اول مره للعلاج في ميشجان .. تاركا فيرجينيا ...فاتصلت للاطمئنان على صحته .. و حينما رد على المكالمة بادرته بقولي: قسمتك يا رقيق الحال .. مكتوب ليك تعيش رحال .. فضحك ثم قال لي .. هل تعرف قصتها ؟ فقلت له .. اعتقد انك كتبتها و انت في السعوديه ؟ فقال ابدا .. كتبتها قبل الاغتراب بسنوات ،، و قال لي .. تعرف .. الغربه دي انواع .. غربة الانسان خارج وطنه زي غربتنا دي .. و اصعب منها غربة الانسان داخل وطنه .. و أسوأها و اصعبها غربة الانسان داخل بيته .. و تلك هي الغربة التي دفعتني لكتابة زمان الناس ..
تحياتي يا حبيب ..
| |
|
|
|
|
|
|
Re: الهجرة إلى الغرب (Re: walid taha)
|
Quote: يا سلاام يا قباني ياخ |
تسلم اخوي وليد ..
لكن .. وين سيد البوست ..؟
فكرة البوست لطيفة .. لكنه بناها على معلومة خاطئه .. امكن عشان كده فات ؟
خطورة الكتابة الزي دي لو لم يتم التنبيه للمعلومة الخطأ .. يمر الموضوع و يتم تداوله في السوشيال ميديا
و يصدقه الناس و ترسخ المعلومة الخطأ في اذهان الناس..
و كلنا يصيب و يخطئ .. بس قليل منا من يقول اخطأت ..
عموما ...😏
| |
|
|
|
|
|
|
Re: الهجرة إلى الغرب (Re: يحي قباني)
|
وليعلم الاخوه فى المنتدي العام باننا نحن معشر السودانين البلد الوحيد في العالم الذي اضطر فيه المطربون الى الهجرة طلبا للرزق، وكان من بينهم مطربنا العملاق عبد الكريم الكابلي (هل تعرف أن جده من أفغانستان ولقب الكابلي نسبة الى كابُل عاصمة أفغانستان)، وبعد ان ذاق اوجاع فراق الاهل كتب أغنية “غريب والغربة اقسى نضال”، ثم استدرك: والغربة سترة حال الا خ الغالي يحيي قباني شكرا على التوضيح اخي الغالي لوقرات البوست بتمعن ممكن انا اكون قصدت انو الغربه اقسي نضال لان اجداد كابلي جاوا من افغنستان وتذكر الاهل والاجداد وانا لم اذكر انو الكابلي كتب الاغننيه بعد غربته فى السعوديه ووامريكا ولو رجعنا لتاريخ الاغنننيه انا متاكد انو كابلي كتب الاغننيه ايام غربنه فى السعوديه وانا بجيب ليك الخبر اليقين وانت هل عارف انو كابلي كان مغترب فتره فى السعوديه وانا لم ازوغ من البوست لانو انا لست ملك انا انسان ممكن اخطي واغلط ووممكن اكون غلط وانت صاح وربنا قال ( ولو كنت فظا غليظ القلب لانفضوا من حولك ) مع احتراتمي ليك اخى القباني
مع تحياتي مصطفي نور
| |
|
|
|
|
|
|
Re: الهجرة إلى الغرب (Re: مصطفى نور)
|
لحين عوده يا مصطفى ..
كابلي رحمه الله كما اسلفت .. ذكر لي المعلومه بنفسه .. فكيف انت متأكد ان الكابلي كتبها و هو في غربته .. ام تعتقد اني ( مؤلف) ..
اما سؤالك عن ان الكابلي كان في السعودية .. لو قرأت مداخلتي انا في المكالمة قلت له:
Quote: فضحك ثم قال لي .. هل تعرف قصتها ؟ فقلت له .. اعتقد انك كتبتها و انت في السعوديه ؟ فقال ابدا .. كتبتها قبل الاغتراب بسنوات ،، و قال لي .. تعرف .. الغربه دي انواع .. |
و انت تسألني هل اعلم ان الكابلي كان مغتربا في السعودية !!
بقى شي اخير ..
كابلي تربطنا به علاقة ممتدة من ستينات القرن الماضي .. في صداقته الحميمة بنا ( انا مواليد بورتسودان) .. و بعدها عند زواجه بعوضية الجزلي و هي في الحسبة عمتي ابنة خالة والدي رحمه الله ..
اضف الى ذلك ان الكابلي كان يحيي حفل سنوي في منزلنا لمدة فاقت ال 20 عاما .. حتى خرجنا من السودان ..
عموما ساعود الى الرد فيما بعد على نقاطك الاخرى ..
| |
|
|
|
|
|
|
الاخ يحيي القباني (Re: مصطفى نور)
|
يحي قباني اخي الغالي الف شكر على المعلومه الصاح وانتا لم اقل انك بتالف لا وحاشا وكلا فانا لم اكذبك القول وواقول الف شكر على المعلومات وانا غلطان فى المعلومه وانا اخطات وشكرا على تصحيح المعلومه والف شكر ليك والله وكابلي انسان فنان وشاعر ومفكر لايشق له غبار الف تحيه لكل ال قباني فى الشهداء والعرضه وتعويضات بيت المال والثوره وحي الازهري وناس اولاد العم عبداللطيف القباني والعم اسماعيل القباني والعم صديق القباني والعم الريح القباني والاخ منصور عبداللطيف القباني والاخ يالم صديق القباني والاخ دكتور عطيه القباني والاخ هاشم القباني وكل ال قباني
مع تحياتي
مصطفي نور
| |
|
|
|
|
|
|
|