لك الله ياوطن …. السودان البلد الجميل الوطن الام الوطن الحبيب ( الان مكسور الجناح ) سوداننا والكل يتربص به من كل انحاء العالم من امريكان ومن يهود ومن عجمان وحفاه عراه كانهم من سطروا استقلالنا وكانهم هم وراث ارضنا … وكانهم هم الذين قام بتربيه اهلنا والاباء والجدود كل غريب يقاتل من اجل ان يكون له نصيب الاسد من التورته الكبيره التى حتى الان لم نذق طعمها نحن اسياد البلد الكل فاتح عينيه علي بلادنا الطيبه الشرق اتي والغرب اتي .لكن سوداننا بلد عازه والخليل وترهاقا صامد رغم الالم والنزيف والجراح سودانا الذي حملناه نحن عربا ونوبه وعبر التاريخ من المهديه الي الان مرت علينا اسماء فى حياتنا ستظل راسخه فى الذكراه حتى قيام الساعه شخصيات كرمها الله بنيل الشهاده من اجل الوطن والحريه والاستقلال من المستعمر البغيض والسلام يالمهدي الامام ونم غرير العين البطل ابودقنه وتحيه وتعظيم لعبدالفضيل الماظ وغيرهم من الكثيرين الذين يستحقوا منا الاحترام ..والانحناء والمغفره لمن قضاء نحبه والانتصار لمن حتى الان يكابد ويقتل ويدهس ويجرح ويسحل من الثوار الابرار الشرفاء وهناك الكثيرين من نالوا شرف الشهاده وسجلوا فى التاريخ ولكن يبقى الوطن ووطن لم يمنح الفاسدين والقتله والماجورين وسارقي قوت الشعب لم يبخل عليكم بكل شي سوي ان اعطاهم كل شي التعليم والحب وشربتم من نيله شربه يَحْسَبُهُا الظَّمْآنُ منكم ان تجلعه شريف نظيف بيض السرائر ورغم هذا كان جزاء المواطن ووالوطن ان يسقي المر وان يسد رمقه من طعام لايغني ولا يسمن من جوع لانكم سرقتم قوت الشعب وكان الجزاء ان سقيت الارض الطاهره بدماء الابناء فلذات اكبادنا التى هي مستقبل الوطن الجريح .انا فى حيره من امري اليس فيكم رجلا رشيد اليس فيكم رجلا اوتي الحكمه لكل يسد الدين الذي فى الرقاب السودان الذي غني فيه الخليل وغنت مهيره فى عز الهجير ….. غني فيه (الجاغريو ) و( وابوبكر سيداحمد ) وجاء ( مصطفي سيداحمد ) وقال فيه طوريتك فى الطين مرمية وكوريتك يابسة ومجدوعة لا غيبتك كانت مرضية ولا فوتك كانت مبلوعة والتعب المد ضراع النيل سجادة فقرا مزاورية راقصة ( الخالدي ) و ( ونادر خضر ) ….وقال يباركوا ليك غرد به ( عثمان حسين ) أَنتَ يا نَيل يا سَليل الفَراديس نَبيل مُوَفق في مَسابك ملء أَوفاضك الجَلال فَمَرحى بِالجَلال المَفيض مِن أَنسابك حَضَنتك الأَملاك في جَنة الخُلد ) ووابدع ثم ابدع ( الجابري ) عندي شوق لي نيلنا و الاهل و الطيبة الجريف و اللوبيا فوقو روعة عجيبة يا سواقي بلدنا وينو صوتك مالو … . ابدع فيه العاقب محمد الحسن ( ياحبيي ظمت روحي حنت للتلاقي ) وصدح ( ابراهيم حسين ) …وغني وابدع وقال ( قالوا الزمن دوار يابسمه النوار عشقه ( العميري ) لو أعيش زول ليهو قيمة اسعد الناس بوجودي زي نضارة غصن طيب كل يوم يخضر عودي ابقي دار لكل لاجئ او حنان جوه الملاجئ ابقي للأطفال حكاية حلوة ضمن الأحاجي الغلابه وهام فيه) وغني فيه و له ( الكابلي ) و من اجمل ماقال … بحبك يا وطني.. بعزك يا وطني.. شمس الصباح والصباح رباح شمسك ياوطني طعم النجاح الزانو كفاح.. طعمك ويا وطني حتى الجراح الزمانن... راح مهرك يا وطني …!! … …ناجي فيه ابوقطاطي وقال ( بكره ياقلبي الحزين تلقي السعاده ) وقال فيه عوض احمد خليفه وكانه يتكلم بلسان السودان و السارقين والفاسدين ويقول لهم (لو كُنت ناكِر للهوي زيك كُنت غفرت ليك.. كل العذاب العِشتهُ فى حُبك وكُنت حبيت عليك.. لكنى عايش للهوي وكُل يوم بترجي فيك.. ورينى كيف اغفر وإنت شقاي سببتهُ بإيديك.. ( ما اروعك يا عركي ) وسودانا الذي قال فيه الدوش ( بناديها وبعْزِم كُلّ زول يرتاح على ضحكَة عيون فيهَا وأحْلم اني في أكوان بتْرحَل من مراسيها وغني فيه احمد المصطفي وقال ( نحن فى السودان نهوي اوطانا وان رحلنا بعيد نطري خلانا ) ابدع فيه سيف الدسوقي احب مكان وطني السودان اعز مكان عندي السودان لانو حسانو اعف حسان طيرو صوادح ..وروضو جنان احب مكان عندي السودان الانسام بالطيب تغشاهو .. والاقمار حفت بسماهو .. والازهار تبسم في ربااااااااهو... فيها رقة وفيها حنان احب مكان وطني السودان فيه النيل النيل الخالد..فيهالخال والعم والوالد ) وواتذكر الزول الطيب الفنان ابوعبيده حسن الذي كانه يغني بلسان حال السودان الان والحاصل ويقول ( يا ناس شوفو لي حلل ) ويتواصل الابداع فى بلد المبدعين ولاننسي السر قدور وكانه يبكي حاله فى الغربه ويناجي السودان ( وتلقي الريد معايا لحظة مانسيتك ولانساني لابنساك ولابقدر ولاعارف بعد حبك احب تاني واهرب من خيال طيفك في عينيا بلاقيهو اعيش ايامي بالذكري الم وافراح سوداننا تعددت فيه القبائل واللهجات والالوان ولكن الاصل واحد وفي كلها تحمل رائحه الدعاش والخريف واللوبيا هل ستسرقون وطن و بلد من اصحابه وبني جلدته لا اظن ان ذلك سوف يكون ولن يكون فالسودان للسودانين فقط ايها الاوباش ..!!؟ ابناء الوطن اعلموا ان بناء الأوطان من الايمان و هناك بيان وتضحيات حتي يتحقق المجد ونبني ونسطر اسمك ياسودان ….. خلق الله الارياف والمدن والقري لتجد كل انسان على سجيته وطبيته …. بعيدا عن كل ربيه وخداع وزيف ونحن نقسم بالله لن نفرط فى ترابك ياوطني ولن ندع اي سارق ان يسرق قوت وطننا ويغيير هوايتنا ولن يعيش من يسرق امنيات وطموحات الشباب ويجثم على صدورنا العاريه التى تواجه الرصاص الان بكل بساله وشجاعه لقد اقسم كل الشباب وكل الرجال والنساء انه لاعوده للطغيان وهتفوا كان في صدورنا غضب بركان وكنا بنقسم بالاوطان نسطر اسمك يا سودانا بدمانا السالت راوية الساحة حلفنا نسير ما نضوق الراحة…. نحن اقسمنا وقلنا لا لن نحيد ويشدو العطبرواي ويردد مع الثوار لهب من الشهوات يجتاز المعالم و السدود هل يسمعون ؟ صخب الرعود ؟ صخب الملايين الجياع يشق أسماع الوجود ؟ لا يسمعون !!! في اللاشعور حياتهم فكأنهم صم الصخور وغدا ًنعود حتماً نعود للقرية الغناء للكوخ الموشح بالورود ونسير فوق جماجم الأسياد مرفوعي البنود سوداننا اعطانا كل شيئ ولم يبخل علينا باي شي وكان رد الجميل من الفاسدين السارقين الجاحدين الذين جثموا على انفاسنا ثلاث عقود سوي القتل والسحل والسجن … شكرا أيها السودان الرائع الجميل العظيم ملهم الثورات والشعوب ونحن الطيور المهاجره خارج أسوار الوطن ولكن مع كل طائر مرتحل عبر البحر قاصد الاهل نحمل اشواقنا وكل الحب وقريبا قريبا ستخرج امدرمان و الخرطوم وكل مدن وقري السودان وتزغرد فرحاً لتنطوي صفحه العسكر من الوجود ولنفتح صفحه البناء وليس ذلك على الله ببعيد ….. اخيرا لكل من سولت له نفسه ان يحكم السودان غير الشرفاء والديمقراطيه نقول له
هذهِ الآرضُ لَنا. الزّرعُ فوقَها لَنا والنِّفطُ تحتَها لَنا وكُلُّ ما فيها بماضيها وآتيها لنا .
ونقول لكل من هو ليس منا وليس بسوداني
ياغريب يلا لي بلدك … يلا يلا لي بلدك يلا لي بلدك سوق معاك ولدك لملم عددك انتهت مددك وعلم السودان يكفي لي سندك الحروب زالو فازو من صمدو والشباب اليوم للجهاد نهضو
أفلا تسمعون …!!! مع تحياتي مصطفي نور
(عدل بواسطة مصطفى نور on 06-12-2022, 07:36 AM) (عدل بواسطة مصطفى نور on 06-12-2022, 07:51 AM)
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مصطفى نور
فيس بوك
تويتر
انستقرام
يوتيوب
بنتيريست