اخوانا الدارفوريين...بمن فيهم حميدتي. انتو الان المركز. وانتو الحكومة في الهامش. فما في داعي تختطفوا لسان المعارضة. وتتشكو كانكم نسخة خامسة من قحت. لا داعي للاسف.لا تاسو علي عهد مضي.انتو النميري وانتو البشير.انتو اسياد الجلد والراس. تقرروا وتنفذوا قراراتكم.الكلام الكتير لا يليق بكم. ولا الشكية. عجزكم عن حماية المدنيين في كرينيك والجنينة ،مخجل والله. وكذلك عجزكم عن مواجهة حقيقة فشلكم في ادارة البلاد،بعد انقلاب 25 اكتوبر، واحتواء ازماتها الامنية والاقتصادية،خاصة،باعتراف عبدالوهاب شخصيا.وهو اعتراف يحتم عليكم التنحي عن السلطة طوعا واختيارا.لانه لم يعد هناك مايمكنكم عمله.الا اذا كان الاستمرار في قتل المحتجين السلميين يمثل مهمة مقدسة في نظركم،لضمان استمرار بقائكم العبثي في قمة الحكم. انتو المسؤولين عن عدم تنفيذ ما توافقتم عليه في جوبا.فوق وتحت الطربيزة.بما في ذلك الترتيبات الامنية. انتو المسؤولين من الفلتان الامني،خاصة في دارفور والعاصمة.اغلب ضبطيات 9 طويلة كشفت عن وجود ناس تابعين ليكم في تكوين تلك العصابات.فما 9طويلة غير طقس اجرامي مما خلفته ممارسات الملبشيات في دارفور،بالذات. اتصارعوا.اتماوتو.اتحاسبو كتجار،بعد ما اتقاسمتم الفيها النصيب،في جوبا وغيرها،كاخوان ..بس بعيد من المدنيين في كرينيك والجنينة. وبعيد من الخرطوم. اخرجوا المليشيات من المدن. الناقص شنو؟ عشان الذخيرة توري وشها؟! قبال كدا ختيتو رئيس الوزراء الشرعي في الاقامة الجبرية.لا ايدو لا كراعو.واعتقلت وزرا وعضو سيادي واعضاء مختارين من لجنة التفكيك. بعد حليتو مجلسي السيادة والوزرا وخرقتو الوثيقة الدستورية... لايمكن اعفاءكم من المسؤولية عن المجمجة الحاصلة في البلد. لانكم كسلطة،بحكم الامر الواقع،واقع التغلب،يتوجب عليكم انو اي زول ما مالي قاشو ترسلوهو الاستيداع. واي زول عندو علاقة مباشرة بالمجمجة،9 طويلة واخواتها، تختوهو في الايقاف الشديد،لحد ما يعرف حاجة... عايزين تسمعو شنو؟ من يوم 25 اكتوبر الناس بطلعو في الشارع عشان يسمعوكم صوتهم ،انتو بتقابلوهم بالجبخانة. لحد ماوصلت حصيلة اعمالكم اكثر من 90 شهيد وبضعة الاف من الجرحي والمعوقين... كلام الناس واضح،وبسيط:... القصاص للشهداء والضحايا... الجيش للثكنات.والجنجويد ينحل. لا تفاوض. لا شراكة. لا شرعية للانقلاب.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة