مخرجات الاجتماع المشترك للجنة السياسية والاعلامية للمؤتمر الوطني والدعم السريع وجبهه الميثاق ب ،اردول عسكوري مخرجات الاجتماع المشترك للجنه السياسيه والاعلاميه للمؤتمر الوطني والدعم السريع وجبهه الميثاق ب ،اردول عسكوري،، وتم اعتذار التوم هجو
🔴مقتطفات من اللقاء:
⭕مندوب الدعم السريع : اها افرجنا ليكم بتوجيهات من القائد حميدتي للمحكمه بالافراج فورا عن غندور ومن معه في قضيه عقوبتها الاعدام واتحدينا فيها القضاء والجيش وطلعناهم بره السجن وعلي حسب الاتفاق حيشتغلو معانا يعني بالعربي الواضح المؤتمر الوطني بقي جزء من الدعم السريع اكرر الدعم السريع فماتتكلمو في جرائد ولا تلفزيون كلامكم الكتير البغطس حجركم تاني !نحن البنقول تعملو شنو ومتين.
براكم لاحظتو التغيير في وسائل التواصل لانو نحن دفعنا قروش وبعلاقاتنا جبنا خبراء روس بتاعين اعلام وشغالين وسط الاعلاميين وشغلم واضح ليكم. لانو لولا شغلهم ده ما كان الناس اتقبلت مرقتكم دي من السجن من دون محاكمه علشان كده الفريق الاعلامي ده هو البرتب الاحداث وردة الفعل فما تعملو حاجه من راسكم وتعقدو لينا الامور لانو اترتب بعد صعوبات والشباب الفي الشارع ديل الشغل معاهم صعب وانتو عارفين لانهم سقطوكم بالكواريك ساي :: اسي الدول الواقفه معانا بقت تزيد لانو مصالحا في السودان ما بتتم الا عن طريقنا: ماعاوز اطول عليكم وكلامي واضح علي ما اظن وحنتلاقي مره كل اسبوع في نفس المكان :ده واحد لابس عميد في الدعم السريع ::::
⭕اردول بدأ بالسلام وشكر الدعم السريع افراد وقياده على الافراج عن متعلمين ومثقفين وقاده الموتمر الوطني الاجلاء وانو الوطن منتظر كل الناس تبنيهو وعلى رأسهم المؤتمر الوطني لأنه عضو مهم بس يبعد اشخاص معينين لانهم مكروهين من الشارع السوداني ::: واشكر روسيا الصامدة في حربها ضد الغرب لانو زي ما ذكر اخونا العميد انو لولا دعم روسيا ما كان قدرنا نعمل الحركه التصحيحية دي في ٢٥ اكتوبر ونشكر الدعم الاتقدم عبر خبراء اعلاميين روس اشتغلو شغل موفق شديد في السوشال ميديا ودفعو قروش كتيره لدعمنا من بدايه الاعتصام في القصر الى ان تم التحرر من اربعه طويله والثوار المغيبين عن الحقيقه والناس الخارشين وسكرانيين :
ونحن كشركه سودانية حنرد الجميل لروسيا عبر الشركتين الاسهمو معانا ماديا ومعنويا في اعتصامنا وتصحيح المسار شركه كوش وميروقولد ونقول ليهم جميلكم محفوظ في تحرير البلد من اربعه طويله *
واقول لاخوانا في الموتمر الوطني انو نشتغل في تناغم علشان ننهض بالبلد دي وشكرا ليكم على الاستماع ::
⭕عسكوري اخد الفرصه وقال : الشعب السوداني ما حيسكت على خروج اعضاء المؤتمر الوطني بالسهوله دي من السجون والناس تجهز للهبه القادمة من بدري لانو الثوار ديل نفسهم طويل ولازم نستعد ليهم بكل الخطط .. انا عن نفسي اول مره اعرف انو روسيا دفعت قروش الاعتصام عبر شركات التعدين بتاعتها في السودان وبرضو اول مره اعرف انو في خبراء اعلام روس ماسكين دفه الاعلام واحسن الناس ماتجيب سيرة “ميروقولد” شركه الدهب دي لانو بتفتح علينا ابواب عالميه لشغل “فاغنر” ونحن ماناقصين مشاكل وما حاطول عليكم واقول نتلاقي اكتر من مره في الاسبوع لانو الاحداث سريعه بقت ::::
⭕جاء دور مندوب الموتمر الوطني لابس كمامه ورفض يقلعها ولابس نظاره كبيره وقال الحمد لله على اطلاق سراح جزء من المسجونين ظلما وفي انتظار اطلاق سراح كل الاخوان البقيه ::
نحن كموتمر وطني كنا شغالين ومتواصلين كل الفتره الفاتت دي وبنجهز في السيناريوهات الممكن يحصل شنو والما ممكن شنو … لانو الاعلام بقي يلعب دور اكتر من البندقيه نحن استنفرنا عضويتنا في الاحياء لمهاجمه شباب الاحزاب ديل وانو نشكل هجمات اعلاميه في القروبات وفي الاحياء والجوامع علشان نرجع نمسك كل اللجان الشعبيه والرياضيه والحمد لله مازلنا الى الآن ماسكين الجوامع لانها بيوتنا نحن المسلمين وكل الأئمه واقفين معانا وطالبناهم ما يتكلمو في البيحصل لحدي ما تتم كل الامور المتفق عليها لانو العمل علشان ينجح لازم تسيطر على اللجنه الشعبيه واي خدمات في الحي من غاز لزكاه لرغيف لكيس صايم وافطار صايم ونركز على سلعتي والرياضه ::
بالعربي الواضح الامور تحت السيطره في الاحياء والله اكبر وحننتقم من كل الشباب الفاسدين ديل وحنرفع الرايه تاني وما حتنزل الا نموت .. الله اكبر ياجماعه يعني السياسيين والاعلاميين الروس اجتمعوا معانا وناقشنا كل تواريخ اطلاق سراح اخواننا الفي السجون علشان ننتهي من التواريخ بتاعت الاعداء ونقيف مع روسيا في خندق واحد ضد الامريكان والغرب الفاجر ::
انا شايف نكوِّن لجان تلتقي كل يوم وتنظم العمل لانو المرحله حساسه شديد ما حاطول عليكم لانو مواعيد الافطار قربت ونتلاقي في اقرب موعد يتحدد::
⭕مسك المكرفون العميد بتاع الدعم السريع وقال ياجماعه كل ماتسمعه هنا او تراه هنا تتركه هنا ما عاوزين اي كلام يطلع وشغلنا ده الهدف منو انو السودان ينهض ونساعد المواطن المسكين ده ضد عملاء السفارات والغرب وامريكا وسلام عليكم ورحمه الله وبركاته …….،،،،،،……،،،….
🔴الخطوط العريضه للكلام الخطير ده !!!! 📌١/ اردول وعسكوري من اول يوم للثوره تم شراءهم من الدعم السريع وكانو غواصات للدعم وللموتمر الوطني.
📌٢/ الروس عبر شركه ميرو قولد وكوش رسلو اعلاميين والبعشوم اتكلم كتير عنهم وانهم جايين يجهضوا الثوره السودانية لانها ضد مصالح بوتين في السودان وافريقيا وده حنكشفو ليكم بالمستندات والصور.
نجلاء سيد احمد – فيسبوك
اعتصام الموزالدعم السريعالذهبالسودانالمؤتمر الوطنيالمصالح الروسية في السودانبوتينروسيافاغنركوشميروقولد فيسبوك تويتر مشاركة عبر البريد طباعة محررو الراكوبة 1 5 تعليقات
يقولجميل بثينة: 9 أبريل، 2022 الساعة 4:50 م والله الظاهر الكلام دا كلو صحيح والايام دى بنسمعفى اصوات الكيزان فى كل مكان بعد ان كانوا فى جحور وللاسف هناك خيانة كبيرة من بعض السياسيين وخصوصا الحركات المسلحة وبعض ضعاف النفوس والله المستعان رد يقولمحمد الكامل عبد الحليم: 9 أبريل، 2022 الساعة 4:54 م وا رد يقولشاهد عيان: 9 أبريل، 2022 الساعة 5:40 م يا بتنا نجلاء نصيحة ليك الحلومر البايت بره الثلاجة ما كويس … دفقيه ما تشربيه رد يقولالعوض: 9 أبريل، 2022 الساعة 5:53 م تأليف ونجر اخدر ههههههه غايتو يا يساريين انتم مبدعين في الكذب رد يقولالمختصر المفيد: 9 أبريل، 2022 الساعة 6:10 م كيزان المؤتمر الوطني ما حيمشوا على توجيهاتكم، حيعملوا حاجات من راسهم وحتتعقد عليكم الامور وتضربون بعضكم ……… استقواء البرهان والدعم السريع بالكيزان هو في حقيقته تخالف وليس تحالف، تحالف مرحلي لأنهم الاثنين في موقف ضعف فالبرهان كرسيه قد اهتز من تحته، والمؤتمر الوطني حية غير مأمونة يمكن ان تفعل الشيء وعكسه، وسبق ان صرحت بان حكم البرهان قد انتهى، بكرة يشتد ضغط الشارع عليكم حتنكروا بعضكم، اتلموا لينا كلكم كوم واحد عشان يتكنس الوسخ مع بعض بضربة واحدة، اللعب بقى على المكشوف
04-09-2022, 06:14 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Hassan Farah
محمد البشرى الخضر
فيس بوك
تويتر
انستقرام
يوتيوب
بنتيريست