طبعا الاغبى من حميدتى والبرهان والعساكر الجماعة العاملين فيها سياسيين وخطيرين وكميه (من) الصحفيين التافهين العاملين فيها محايدين او داعمين للانقلاب والناس الكانوا بيدفعوا تجاه الانقلاب والان بيظنوا المشكلة بدت بعد 25 اكتوبر وان العساكر والمعاهم من حركات ما احكموا السيطرة وفقدوا البوصلة.. دا غبي جدا لانه بيظن كان فى طريقه اخرى لانجاح الانقلاب.. هو ما قادر يفهم ان الانقلاب هو فى ذاتو المشكله ما الاجراءات البعدو.. الانقلاب فى ذاتو هو الفشل نفسه ما الاجراءات البعده الانقلاب فى ذاتو الازمه لان الواقع السياسي والاقتصادى السودانى الكان موجود هو نتيجة اتفاقات (للانتقال الديمقراطى) الاتفاقات دى اتبنت عليها حزمة الاجراءات الاقتصادية اعفاءات الديون (الفرنسيين كمثال) والمساعدات الانسانية والاقتصادية والمفاهمات مع المانحين وصندوق النقد الدولى وبرنامج ثمرات.. دا الخلا اجراءات تعويم الجنيه الاولى مسنودة بحزمة اجراءات اقتصادية ادت للسيطرة على سعر الصرف لشهور طويله وتجفيف السوق الموازى وعشم المواطنين والمغتربين الاسهم بصورة جبارة فى خلق احتياطى نقدى وبقى التحويل فى البنوك افضل من السوق الاسود.. ودى الخطوات الاولى لاستقرار الاقتصاد قبل التحرك للامام وبداية خلق مناخات الاستثمار.. عشان يجوا اغبياء وعديمي اخلاق وطنية وعديمى وعي سياسي يعملوا انقلاب وبيظنوا الامور ح تمشى مع المجتمع الدولى كما هى والمعونات والدعم والمساعدة فى بناء الاقتصاد الوطنى ح تستمر.. هم عارفين انقلاب 25 اكتوبر اول ما منع كان مبلغ 700 مليون دولار من المساعدات والمعونات مفترض تدخل شهر نوفمبر ووقف اكثر من 400 الف طن من معونات القمح الامريكى كان بتساهم كتير جدا فى سد فجوة المطلوب وتخفف الضغط على النقد الاجنبي عشان يجو وببلاهة يحتفلوا ب 60 الف طن من روسيا.. ناس بغباء بيسألوا عن مشكلة ميناء بورتسودان شنو وهم وقفوا الميناء والطريق القومى فى مؤامرة ضد الوطن كله ويجى ترك (المغيب والمستخدم بسذاجه) يقول (يلا يا ناس البواخر اشحنوا واملوا) كأنهم افراد فى قبيلته منتظرين اذنه وليست شركات عندها سياسات وتأمينات ونسب مخاطرة واعادة جدولة والحصل للميناء وبورتسودان نتاج افعاله الخرقاء ما ح يستعدل خلال سنوات. وزير مالية يسأل الحاصل شنو وماعارف نفسو منع ياتو مبالغ مفترض تخش الميزانية وتساعد فى تجاوز المرحلة.. الاشكال انهم بيتسائلوا بكامل البلاهة ليه الامور جاطت بعد الانقلاب؟؟ انقلاب اغبي غبي ما مفترض ينفذه لانه نتايجه واضحه جدا قبل القيام بيه… الفشل حقو واضح جدا قبل التفكير فيه.. الانسداد حقو وااااضح قبل التحرك نحوه.. الجنرالات الطيور والهبنقات والمستشارين الكانوا بينفخوا تجاه الانقلاب والان بكامل البلاهة بيفتشوا عن مخارجات سياسيه مستحيله بعد ان ساطوا اي حاجه.. مافى حل بيجى تانى من شراكة وانما زى ما ناس الانقاذ عملوا انقلاب وبدت محاكماتم ديل برضو يتحاكموا بالخيانه العظماء عساكر ومدنيين ومستشارين وصحفيين وصحفيات محرضين وحميدتى والبرهان وكباشى وياسر العطا وبرطم وترك واردول ومناوى وجبريل والتوم هجو وكل من تأمر فى صنع الخراب دا. والجيش يطلع خارج العمل السياسي وللابد وتعاد هيكلتو والجنجويد يتحل. وسلموها باختياركم لانها والله ح تتسلم غصبا عنكم وبمحاسبات صعبة جدا.. //////////////////////
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير ابو الزهراء
فيس بوك
تويتر
انستقرام
يوتيوب
بنتيريست