∆ محلات أخو البنات البطبق البوخات و يبنشر المكنات∆

خلونا مع العنوان بس؛ و جايي قريب منكم.

[} حبابك ال الله جابك ود مهدينا تتابع العلوان
علا المرة دي جزلانا فاضي من ساس يسوس البغال
و الحنين لتركبوها و زينة. لكن بالجد في محلات لطبقان
«البوخة» هناك جيهة أم بدات جوة حوش الجنا داك
أخو البنات البنشر ي البفور المكنات مقابل حفنة
من الضحاكات 500 جنيها للغملة الواحدة!!

∆ طبعن بما إنو دا مصدر رزق حلال و لا غبار عليه,
و برضو نظام بزينيس مربح جدن فسمعنا قالو الراجل
قاعد يوسع في نطاق أعماله من مجرد زريبة حطبه القديمة
و الكائنة بمحلية أمبدة كرور و يتجه الٱن لفتح فروع له جيهة
غندهار سوق الناقة و أسواق ستة بالحاج يوسف مايو و
صابرين ، مع وجود طموح جاد لإدخال بعض التقنيات
الحديثة لحمامات البخار وتدليك الرجال!!

أنا يا فردة هسي متل العود الفقد
ضلو ورافع لربي أكف الضراعة بس
يحلنا الحل بلة من الخامين البلد من
أم صفقن عوراض و لجيهة رفاعة.
وأهلنا العرب قالو: " الجوع بسو
طرومة و الشبع بسو بعباعة"

¶و بما إنو وحش التگنولوجيا مصر يعني
يكسر كل الحواجز الطبيعية فلا يترك بيتا
إلا يقتحمه من أوسع أبوابه و شبابيكه؛ جاني
أمس وطساب فيه محتوى ترةيجي لتطبيق
عامل دعاية لٱخر صرعة في عالم"حفر الدخان"
الاكترونية، ظنيت مصنعة قالو من معدن التيتانوم
جايبنو قالو من كوكب لالاند قريب مننا بجاي فركة
كراع ، حوالي تمانية سنين ضوئية ، و كمان قالو
بتعمل بشعاع الليزر المنبعث من ألياف الرماد
الذري . فيا ريت الناس الشفوت ينزلو لينا
الصور ليكون البيان بالعمل، وكدي!!

كدي النشيل الفاتحة يا عصمان على روح عمنا
شهيد البوخة. يلا بمناسبة تمساح جزاير الكرد البقضي الغرد
هاك تخريمة سريعة كدا و نقطة نظام بالله، دا طرف عشرة
مناقرة مع أخونا ود التهامي . قلنالو كدي يا قشير و لا تسحسح
لنا تبقالي متل الجاك الكضاب علا إتا اللخو ، تحين قوت لي لامن
كنتو في المرحلة المتوسطة مو گدي؟ يا زول ما تخاف الله وقوم لف
يا عمگ ما تشبحا شديد گدي ، يقوم ينگطع فيگ طايوق، و لا تنزلق
صابونة مخروقة. ياخي المتوسطة دي نحنا ظاطنا اللانا قدرك و لانا
لحم سدرك ما رجيناها.حاضرين السانوي العام ، و گان ليگ إتا آبو
ضراع ، عاد تگون من الوسطى و زات الراسين و لي غادي بعد
شبعت سرح. لازم إبليس.و لا عاد گان گدي أخير نجيب
لك بزازة و نرجعگ مرحلة الأساس راسو عدييل!!

© عارف يا بشة ، طريتتي عمگ الجاگ الگضاب.
مرة في لمة فراش بگا ماسگ لگ المجلس مگطع
الناس النفس. بس الدورابة و را الدورابة. فگان جنبو
ود عمن ليو، قاللو إتا آالجاگ گلو ما تگبر الگضبة أنا
بديگ قرصة و بقولگ الجاگ ، أنبهگ و گدي،
عشان تباقصا شوية. قاللو سمح أتفقنا.

∆ و يلا قبل علي اللمة ، و بدا يحگي في
مغامرة مطر أخدر و كان بطلا هو مع تمساحن
عشاري ، قال صدناه في دميرة بحر أزرق جيهة
الصعيد. قال ضنبو دا برايو بجيبلو خمسطاشر متر؛
أها و د عمو بدا يقارص فيه و هو بدا يباقص في
طول الضنب ، لحدت ما وصلو نص متر بس . و
داگ لسة يقارص فيه لامن گطع جلدو تگطع ،
و يسويلو : الجاگ ، الجاگ كدي لسة أبقصا
شوية فلامن خلاس زهج منو ، قاللو
تطير عيشتو الجاك أها عاد علا گان
أخليه ليگ أملط ، برا ضنب؟!

¶ لا وقسمبلاي ود مهدينا عزيز دنياي يا أعز عزيز
ما قصدو و لا حتى خكر ليالي إني أقدح ولا أجرح ولا
أطعن في ظهر رجل توفاه الله و تغمده بشٱبيب رحمته
و شملنا بواسع غفرانه ،ناهيك عن كونه رمزا وطنيا، شاء
من شاء و أبى من أبى, كان له ما له و عليه ما عليه في
سيرة و مسيرة بلدي يا حبوبه أبو جلابية و توب.
∆ عمومن لك العتبى حتى ترضى و إذا رضيت بس
تناولتي هامتك الغليدة دي أطبع ليك فوقا قبلة الحياة
و التحية و التجلة ، موصولة عبرك إلى كل من قد
يتنامى إلى روعه مثلك مجرد إحساس بانني
ألمحت إلى زعيم بقامة والد المتصورة.

∆ و عليكم بسنة الإسلام التحية بمثلها و أحسن منها.
لكن بالعكس بل هي "غملة" و بي "شملة" كمانلزوم صببان
"عرق النسا"من السداغات و لأخمص القدمين حاجة كدا
تقول لحمامات الساونا و المغربية شن بتعرفن؟!
¶بس حت إحنا محرحرلنا سؤال وقح و محرج و لكن
لابد منه: ليه نساوين الجن بحرصن يطبقن البوخة مع
المرقات و ليس في خدورهن "حيمنا تخفت الأنوار" ,
بالعكس ديل بيجن" تفلات"و كريعاتن مغبشات
طبعن إلا من رحم ربك، عشان ما نعمم!!

∆ ليس أبحرت و لا تنكبا للكعوب العالية و لكن,
هاكم: دي بس لمحة خاطفة فاحصة من جوة سرادق
منصوب لأداء فروض العزاء . و على فكرة, الناس ممكن
يقومو صوف لبيت البكا و لا هم عارفين زاتو يسوو شنو!.
بالذات خبر الهجعة، طبعاً الناس بتجي اللعمى خامي
المكسر مفجوعين و بكون شمار مولع نار .
يعني بالذات النساوين« بيت قصبدنا و مربك فرينا هنا»
ما يصدقن يسمعن الواحدة تلفح توبا و يلا طيران ؛ ويلا
أول ما تخش لا جوا تكرف أرياحن طابقات بوخات المرقة
ديلك عاد الميهن خمج شئ خُمَر و شئ دِلَك و شئ دخاخين
البسووها عند أخو التومات داك القالو في أمبدة كرور و أبو
نيران داك البفور الگفرات ؛ و شيتن تاني عاد ما فيش
داعي بس نفنتو .. نخلو ساه حمدو في بطنو.
¶ يلا داك كلو كوم براهو و لا البجن شاكات غوايشن
يكشكشن للطيش من قمقمة راسا و لي كيعانا. بالله
الواحدة "تسمع للحٌلي وشاواشاً إذا انصرفت ..كما
استبان بريحٍ عشرج زجِلٌ"و أهم شي بعد القشرة
والانطقامة دي كلها تقوم تجي بتوب ساري ربط
و سفنجة متعمدة كدي عشان نظام يوقلو عليها:
الزولة جاية مخلوعة من فاجعة النبأ الأليم.
*****(((((+)))))*****
● ياخي مرة كدا في واحده قال ليك خالِعاها
الفاجعة بلحيل أها جات بي وش بعاتي قايم من
الترب. جات فتشت ليك ست البكا من جديد و من
لمت فوقا نطت ليها في رقبتا، جهجهت بااكتا زاتو
وعااااااك و عييييك و عووووكهاك يا قلدي و نياص.
و هي تذرف ليها دمعة حزن التماسيح ..تعصر
فا عصر عشان.. تسكبها فوق ذراعيها!!

∆ طبعن نحن قصدناك نعمل فوكس على
سرادق العزاء لكونها بؤرة هامة لتجمع ماكان النحل.
دايرين نقول إنو البوست دا كأنو سهم برأسين .
بمعنى إنو الميت فاقد روحو في الحالتين ، أو الأحرى
بين لافتتَي شاخصين، أي: مطرقة شباب يُسبِّلون روحه
بترك أيقونة (Like) على قبره المندثر، من جهةٍ ، و من
جهةٍ أخرى نسوة يُغالين في مظاهر (الحفاوة) بالوفاة.

¶ بيت العزاء بقى مظهر اجتماعي و حلبة ضراع ثيران
لاستعراض عضلات الإمكانيات المادية منها و الجسدية .
يجن ليك قاشرات فيه قشرة بالطريقة الصاح .. و« محينات»
بدموع التماسيح .و خليك طبعاً ، من حكاية الأم لو عندها بنوتة
عاجباها عروسة أمورة كدا لامن ترمي في الشوك القبيل مشيت ليهو،
خسوسن لو كانت «حفلة البكاء» بي حنان سكيب و لا عوضية ردحي.
تلقاها جايبة بتها معاها استعراض بمكياج كامل و تدورها علي كل الحريم
و بالذات كبارات سيدات الأعمال(نظام ترويج و كدا) : يلا عزي خالتك دي
و عزي فلانة دي وعزي عمة المرحوم دي و تكون البنية مجهجهة و ما ناقشة
تعزي كيف و لا تقول شنو.و هسي في الكوفيرات في بوخة و حنة ٱخر
صرعة مصممة خصيصا لبيوتات البكا دي بنقشوها على شكل من
جوا الكراع لحيث أنو لامن الواحدة لمن تنتكي و (ترفع )
أولما ترفع كراعا ، كول الناس يشوفوها بكل أريحية.
*****(((((ود ال ح ي ش ا ن ال ت ل ا ت ة)))))****
«مؤذن محجور منزليا و قرفان في جزيرة مالطا»

(1)
لو سمح لينا ود مهدينا بتعريجعة خاطفةٍ مكرها أخاك
لا بطل على ساس يسوس الحميروالبغال لتركبوها وزينة
[} حشدٌ مقدر من أقطاب گيانات عريقة (من عرق النساء ،
و العراقة منهم براء) جايبين خيمتم ، قال دايرين ينصبوها هناك
عشان «يتدخنو» هنا جنب الثوار .فوروهم إنو خلاس انفض السامر
الاعتصام وتحولت بوابة الغيادة العامة للغوات المشلخة "كعبة مضيوم"
إلى سرادق للعزاء؛ فقامو مشو يتمو «البوخة» هناك جيهة أم بدات جوة
حوش الجنا داك أخو البنات الببنشر المكنات، و بيدي الضحاكات!!
(2)
مع احترامنا لشاعرنا العبقري ود الرضي وهو يتفنن بوصف محبوبه
بأنه «نايم من شدة الدوخة.. وإيدو عاقباهو مملوخة » و طبعاً سينام من
الدوخة حتى إنه لا يدري يا نعسان أين وضع يده. لأنه « طابق البوخة».

# وكما يقول عمنا ا لبروف حساس محمد حساس، لا بد لدنا من موقف علمي من
ذلك النمط الذي عناه ود الضي فأبدع و تغني به أبو دواوود فأطرب و لكن هذا
يعني أنه قد استنشق من الدخان مرتين كمية من غاز ثاني أكسيد الكربون الذي ذاب
في سوائل الرئة وتحول إلي حامض الكربونيك CARBONIC ACID و الذذي
يفوق في تاثيره حامض أوكسيد اللعوتيك. وهو ينتقل مع الدم إلى المخ و بضعف
منأنسياب الأكسديني الدم فيصاب الشخص بالدوخة وفي هذه الحالة هو لا يدري
أين وضع يده فربما تكون «عاقباهو». و تلك حالة أشار لها الشاعر في قصيدته
التي أصبحت «رمية» تتقدم أغاني الحقيبة. والشاعر طبعاً لا يدري سبب
تلك الدوخة ويظنها عافية و«نصاح»..
# و ربما في القصيدة مجاراة على عكس تلك القصيدة التي يصف
بها جاريةً يافعة بعمرالزهور عمر الغرام عمرالمنىة خرجت عليهم
تنادي ذات يوم والشعراء مجتمعون فرجعت إلى داخل المنزل خجلى
بينما «تبوم » الشعراء أمثال العبادي وعبيد عبد الرحمن وأبو صلاح
والعمرابي و سيد عبد العزيز ووجموا وهنا قال شاعرنا ود الرضي :
نادت ونادي قلوبنا صـاح
واتبكم الناس الفصــــــاح
الجن نصح وجنو النصاح
الجاهلة مي جاهلة نصاح

( ب
ِتْ يا محاسن تعالي ولِّعي الحُفرة)
الحكاية و مافيها
👇👇👇👇👇(1)👇👇👇👇👇.
صاحبي عبدالحميد.. راجل طيبان كده وعلي نياتو....شغال سواق عندو
شاحنه بيشحنها بضائع بيسافر بيها الغرب... (يعني حياتو كلها سفر في سفر)
يوم لاقاني يضحك قلت ليهو خبارك يا ابوعابده الليله مبسوط تضحك يقول قررر
لآخر ضُرُس كده.... قال لي والله يا ود العرضي الوقعت عليا أمس ما اظنها قبال كده
حصلت لزول... قلت ليهو سويت شنو الشقي...قال لي انت عارف طبعا انو انا عندي
الرطوبه ومكرهاني العيشه ومكسره كرعيني وحامياني المشي؟؟ قلت ليهو انا ماقلت
ليك امشي لي دكتور وانت ما سمعت كلامي.اها الرطوبه مالها؟..
+ قال لي طبعا ياودالعرضي انا من ما جاتني الرطوبه دي اي زول يشوفني
ماشي اتكعكع كده يسألني مالك يازول ماشي تتكعكع كده.؟ اقول ليه والله عندي
رطوبه مزمنه ياها المخلياني ماشي كده...يقول لي بس اقع الدُّخان..أي زول
يلاقيني يقوللي الرطوبه علاجا الدخانوأنا طبعا حكايه أصنقر أدخن دي ما
عاجباني وباقيه لي تقيتن بلحيل متل القابضني السارق لي مِح جنا جِداد.
.

بِتْ سا محاسن ، تعالي عِرِّبي الحُفرة)
(2)
∆اها ..امس وصلت من السفر عصير ، شمشن حيةوقفت عربيتي في المنطقه
عند الميكانيكي، فيها حبة صيانه قلت اشتغلها وامشي البيت... لما لحد المغرب ما
اتصلحت قلت اخليها بايته عند الميكنيكي و اخلي المساعدي يبيت فيها والصباح اجيها.
صليت العشاء في المنطقه و ركبت ليك مواصلات جبرونا جيت البيت..اها جيت البيت
=الرطوبة ماكناني مكنة شينة ،سفايفي حالجات تب و ركبينين سايحات...والوجع حماني
القعاد..اتزكرت موضوع الدخان البيعالج الرطوبه....وحسب الوجع العليقلت في نفسي
(ياود يا عبد الحميد جرب الدَّخاخين احتمال فيهن شفاء.. و كل حركة زمعاا بركة
و الدنيا ليل..وزول شايفك مافي الليل غطي الجبال) .
∆ ناديت المُدام.. قلت ليها يا ولية بعد الشفع ديل ينومو ولعي لينا حفرة دُخانك دي
وأنا وأنتي الليلة الشافنا نطاقش فوق الحفرة مغمولين الشملات ونطبف في البوخات
أصلو ما كضب... اها بعد ما الشفع نامو الوليه ولعت حفرة الدخان اخدت ليها قعيده كدي
وقامت منها ونادتني قالت لي اقوم ادخن... مشت دخلت غرفة "السواقة بالخل"راجياني حتّْ
إنا كمان أتبخبخ بالفيها النصيل ثم انضم ليها لاحقن..وانا طوالي ولا كضبت ملصت العراقي
وحليت تكة سروالي جدعتو هنووك متل الشي الكعب و ملصت حجباتي و كل متعلقاتي ،
و يلا اتفرجخت لك فوق الحفرة بلبوص ملط حُرَّاً تمامن كما ولدني أمي واتكفلتَ
بشملة الصوف تب علا بس مرقت روييس دا المقودس متل سرج العلجة.

"بِتْ يا محاسن ، تعالََي وليع الحُفرة"
(3)
∆ أها بقيت اتقحقح من غمتة الشملة واتلفت خايف يشوفني زول
من الجيران تبقي فضيحه( لانو حفرة الدخان في الحوش).. واللا واحد من الشفع
يصحي يشوفني ادخن يشيل حالي بالقري والفرقان ويقول للناس امس ابوي ادخن مع
امي وتبقي ام الفضايح بجلاجل... اها شويتين كده اشوف ليك زول دفر باب الشارع
وجاء عانيني عدييييل.. قلبي من الخوف وقع في أم بوالتي... دققت في الزول ابن الحرام
الجايني ده جان وال أنسان، قلت دا أكان شفتو بتاع تيلة و نمرة (9) طويلة ، بخليه يملأ
بقجتو تب بكل ما يخفَّ له وزنه و يغلى ثمنه، و بقوم بشيلو ، لكن لو شفتو هوين في
نظري ، بعكمو ليك أكمدلو رويسو تححتي في الحفرة دي لامن يعرف حاجة ظاطو!
∆أها القاها ليك جارتنا محاسن البيتها لصقنا طوالي ..غملت وشي بالشملة خليت
بس عيوني المارقات عشانالمرة الشمشاشرة دي ما تنقشني..وأنتي يامحاسن السرور
تعالي تِنْقِش تِنْقشش و ترترب اقعدي في بنبر ما بعيد مني وابدي أتمولصيمن هدومك
حتة حتة.(اتاريها محاسن متعوده لما انا اكون مسافر بتجي تتدخن مع المدام... وشافت
الدخان طالع من بيتنا قايلها دي بعلتي هي البتدخن..وقايلاني انا لسة في السفر بحسبان
انها ما شافت عربيتي واقفه في الشارع.. فجات دافرة الباب بي قريناتا وداخلهتوشك
تاخد ليها دخنة).وانا منبهط أعاين أأشوفها ليك قدامي عبارة عن سمكة بلبوصة مولاها
متلما خلقها وشالت ليها باغت زيت وبقت تجلبغ وتتمسح استعداداً منها لتسخينة في ليلة
أصلو ما منظور مسيلاً. وما فضل علا بس تجيني تنكمد معاي الخحجل بالرجل
∆أنا هنا عاد الفيني كملت... خفت اقح ساكت محاسن تفرز حسِّي
طبعن الواطة مضلمه ومحاسن قايلة الببتدخن دي مرتي.) بقت توجه لي في
الكلام و تتشمر منخبورات ناس الحلة على أساس أني فالنة..انا قطعت موية
ونور(عاد ياود العرضي ارد عليها كيفن.) دخلت راسي تحت الشملة وبقت
أغرق أغرق تحت الدخان كاتم منافسي وعيوني سالن دموع دموع..
ونخريني ولعن نار والحفرة تحتي سخنت سخانة رهيبة بقت بالله
تقول ماسكا نافخ كير... قعدت افكر اسوي شنو!؟

يت~ سا محاين ، تعالَي ولعي الحُفرة/
(4)
∆قلت في نفسي يازول الدخان دا بفطسني عديل لو فضلت متدمدم
بالشملة دي كدا كتير فأنا لازم اتصرف في جزس من الثانية، جاتني خطة
نمبر (1) قلت أحسن حاجة أقوم جاري بي شملتي دي وأدخل العوضة بتاعت
المدام..ارمي الشملة فوق المدام...والمدام تتلفح بيها وتجي مارقة لزولاتا تقول ليها
إنا قامت جارية عشان نست اللبن فوق النار خفتو يفور يتكشح.. و لا تقولليها الشافع
وقع من العنقريب مشيت رفعتو ولا تقول ليها أينصيبة زمان ياخي تبرربيها الجرية
المفاجئة دي..وانا ألزم العوضه لامن محاسن تتمبوختا وتجيب لي معاا سروالي!
∆ يا كمان ألجاً ل خطة نمبر(2) أنا اطلع راسي واقوم من الحفرة واشيل الشملة
دي مني و اقوم مبرطع أمشي ألبس هدومي قدام ا لزولة دي عينك عينك كدي
والبتبقى التبى وا لرهيقة تنقد، يعين أختنق لامنأوح فيها "فطيساً" ولا كيفن يعني!!
.(الرجال يموتو في الاعتصامات اختناقا بدخان البمبان وانا أموت فطسان معتصماً
فوق حفرة دخان..أفففو..أنا أخوك آ الراسية ست البنات لي حدهن!ثم تاني حاجة هي
محاسن دي زاتا لو شافتني عريان ملط ما تشوفني يعنيما أنا وهي حنكون مشااوفين
متل يوم الحشر العظيم مش حيوقفوخلق الله ديل نساوين وعلى رجاجيل من أبونا آدم
ولآخر شافع حُفاة عُراتن وكما غُلاًغلفاتم مدلادلات في الصقيعة)، ولا فالفضيحه ولاهم
يحزنون و لا في زولن فاضي ظاطو يتفحص في الناس (دا كم طويل ولا دا مكفكف)
∆ شافتني اتدخن وانا شفتها عريانا ملط... لو فضحتني بفضحها..ولو نضمت
بالشافتو ما حتِّ أنا بنضم أقـــــول:
" يا أخوانا كان رقتو انا بوصف الشفتو:
شفت الشعر جار لي حنتــــــو التحتــــــو
الزي فريع البـــــــــــان في الرقصة تتنــي
وزي ســـــواد الليل في إيديها دي الحنــــأء
خطوة بي خطوة ا بي روقـــــــة تتــأنــــي
والنهــــــــــــــود تهتز ياهو ده المجننا"
.

∆بِت يا محاسِن .. تعالَي عرِّبي الحفة "
∆ وانا في عز معمعة صراعي مع الافكار دي سمعت لي كركيش
كرعين.. طلعت راسي من الشمة برااااحة ومن بين الدموع شفت محاسن لفحت
توبا انسترت بيهو وماشة علي الحمام... وما صدقت حمدت الله... خليتها ليك دخلت
الحمام وترترب قمزت جدعت الشملة مني متل جلد الأصلة و شلت سروالي والعراقي
وفللي عريان جري وتوش دخلت علي الولية في العوضه ( الوليه لما انهجمت )..قلت
ليها يازولة اجري محاسن جارتك جاتني ولقتني جوة" ححفرة النحاس"وقايلاني انتي
اتمولصت من هدومها وكل متعلقاتا وقعدت قدامي بطلية بس "جاهزة للشوي" وهسي
هديك ياها في الحمام.. امشي سريع اقعدي في الحفره عشان تقول الكان قاعد دا
إنتي وما تقولي ليها الراجل جاء من السفر...
∆الوليه قالت لي وووب علي!! محاسن ما نسيتها اصلها متعوة دايمن لما انت
تكون مافي بتجيني تاخد معاي غمله غملتين...اوعه تكون عرفتك ؟..قلت ليها ماعرفتني
قايله الزول القاعد في حفرة الدخان دي انتي قالت لي ما نضمت معاك.؟. قلت ليها غايتو
نضمت معاي .. قالت لي كر علي اوعة تكون رديت عليها؟ . قلت ليها يا ولية قولي بسم
اللهأرد عليها كيفن؟.. لو رديت عليها ماكان عرفتني..كدي هسي سيبي النقة الفارغةدي
وأمرقي على زولتك دي أتريها. .المدام مرقت علي محاسن .. حتين .شوية كدة سمعتهن
ليك طاقات حنك يتونسن ويتشمشرن ..وأنا بجا تنفستُ الصُّعَدا و قلت معناتا محاسن ما
نقشت حاجة.. وقعت فوق السرير حيلي ما شايلني من الخوف ولساني شغال أشتت في
البركاوي للرطوبة ومحاسن والدخان والزول النصحني بيهو... ثم وجه عبدالحميد
كلامو لي و قال لي في زمتك لاقتك زنقه زي دي يا ودالعرضي..قلت ليو :
وأنا غرقان من الضحك طلاق تلاته زنقه زي زنقتك دي علا بس
يكون ضاقا كلب قرش القرقوش في طابونة فلاتة!!
😂😂😂😂😂😂😂

👇👇👇👇👇👇(5)👇👇👇👇👇👇
تخريمة..بعد شهقة لون وتكية خط:
+ ها ياناس الحلة، تيس الحَلَبة اليومين ديل طلاق تلاتة
مزنوق جنس زنقة من أمها..مالص قاشاتو و مرخرخ صليباتو
و منغمل بي شملة الانغلاب من أخمص قدميه لي صوف عضيناتو
وزانقاه دخاخين البمبان ومسخنة بيه الحفرة بجاي من ضغوطات
الدولةالعميكة و شبح زواحف بين وكوزان، وبغادي تحشر فولكر
وإملاءات العمركان، لامن بقي لا قادر يتحمل يفضل منكمد
في شملتو ديلاكتر من كدا،ولاهو قادر يمرق ياكل نارو
و" يا حافر حُفَر السوء.. وسع مراقدك فيهن"