من يقيل إدارة دار المايقوما. (منقول)

Quote: *مخلفات الكيزان* #فصل_مجموعة_إدارة_دار_المايقوما بقلم :شاهيناز محمد أنا كزولة اترددت على الدار دي كتييير جداً بقدر اقول بكل قناعة إنو مشكلة (مستنقع) المايقوما ما في التبرعات ولا الدعم المادي أو العيني مشكلة دار المايقوما في المجموعة القائمة على إدارة الدار من المديرة لغاية الغفير مرورا بالأمهات و الموظفات و العاملات و و و المجموعة دي ما عندها ذرة رحمة في قلوبها ولا رأفة بالأطفال و بيعتبروا الأطفال ديل حاجة كعبة المفروض تتجدع لأنهم نتاج علاقات غير شرعية ااي والله العظيم دا تفكيرهم كدا أنا دخلت الدار دي عشرات المرات و لأسباب مختلفة مع مجموعات شباب و شابات متطوعين و في كل مرة كنت بطلع منها و انا متأزمة نفسياً و مدمرة لدرجة إني وصلت لقناعة إني ما أمشيها تاني و بلغت الشباب الكنت بمشي معاهم بي قراري دا و من وقتها تاني ما مشيت هل تصدق يا إنسان إنو مجموعة إدارة الدار دي بيتقسموا الدعومات البتجي للدار بيناتهم و الما بيقدروا يتقسموه أو ما محتاجين ليه بيخزنوه ان شاءالله يبوظ و مدتو تنتهي لكن ما يتقسم للأطفال ديل يستفيدوا منو ؟ هل تتخيل يا إنسان النسوان الشغالات في الدار ديل بياكلوا الفطور بي صحانة قدر طشاتة الغسيل مليانة بكل أصناف الأكل و سايبين الأطفال المساكين ديل جعانين و بيبكوا من الجوع و قرصة البطن ؟ هل تصدق انو الشاي بي لبن البودرة و البسكويت اشكال و اصناف مدور من الصباح للمساء و في نفس الدار دي الأطفال ما بيشربوا ولا حتى شاي سادة بينما اللبن دة أصلاً جاء تبرعات لأجل الأطفال ديل ؟ و هل تصدق انو الأطفال ديل بيكونوا بيبكوا من المغص الناتج عن الجوع و في الغرفة الجنبهم بيكون في تلاتة ولا أربعة موظفات قاعدات في صينية بتأكل جيش ؟ هل تصدق إنو الأطفال ديل بيلبسوهم قطع قماش ممزقة و قديمة و وسخانة بينما مئات كراتين البامبرز بتجي تبرعات ما بيستخدموها ليهم ؟ هل تصدق الطفل لمن يوسخ بيقعد بالساعات حتى يلقى زول يحن عليهو ينظفو و يغسلو ؟ حصل يا إنسان اتخيلت شكل الغرف و المراتب و السراير البيرقدوا فيها الأطفال ديل ؟ لو ما اتخيلتو بس شوف اقرب مراح بهايم جنبك مهما كان مقرف بأكد ليك انو نظيف و منظم و محترم اكتر من المراتب و السراير البيرقدوا فيها الأطفال ديل و الغرف القاعدين فيها باختصار المجموعة القائمة على إدارة الدار ما بشر ولا بني آدمين ولا عندهم أي علاقة بالإنسانية و المفروض يتشالوا كلهم و كمان يتحاسبوا و تجي مجموعة غيرهم يكون في قلوبهم رحمة و إنسانية بالأطفال ديل أطفال المايقوما أطفال ضعفاء اتظلموا من الوالد و الوالدة ابتداءً و بيتظلموا لما يطلعوا للمجتمع انتهاءً يا ريت في نص رحلة حياتهم (داخل الدار) يلقوا المحبة و الحنية و الإنصاف و الإحترام و يا ريت يلقوا القبول من المجتمع في النهاية هم ما ليهم ذنب في جرائم ارتكبوها أمهات طايشات و آباء جبانين الفورة الإعلامية الحاصلة دي حتنتهي بي تبرعات تتقسم او تتخزن و كل زول حيمشي بيتو ينوم مرتاح الضمير معتقد انو عمل الواجب و زيادة وحدهم اطفال المايقوما حيرجعوا لنفس المعاناة الكانت سبب الفورة