|
|
|
 Re: رجعنالك عشان تاه الفرح من دارنا . يا بشير � (Re: Osman Musa)
|
ولد بشير عباس في حي حلفاية الملوك بالخرطوم بحري بالسودان قبل أن ينتقل مع اسرته إلى أم درمان [1] تعلم العزف على الآلة الموسيقية منذ صباه بالمدرسة الأولية. يقول بشير في إحدى المقابلات الصحفية التي اجريت معه إن أول آلة موسيقية تعلم عليها العزف كانت صفارة أهداها إليه والده كمكافأة لنجاحه في أمتحان الالتحاق بمدارس المرحلة الابتدائية، وكانت صفَّارة مصنوعة من عود الأبنوس. ثم تعلم العزف على آلة العود في مسقط رأسه بالخرطوم بحري.
| |
  
|
|
|
|
|
|
|
|
Re: رجعنالك عشان تاه الفرح من دارنا . يا بشير � (Re: Osman Musa)
|
عوالم الموسيقى والأوركسترا الفنية، نجد فيها ومنذ ظهور الغناء والموسيقى السودانية العديد من الموسيقيين السودانيين والذين نظن أن من أبرزهم كل من محمدية ، محمد عبد الله عربي، عبد الفتاح الله جابو، خميس مقدم، عبد اللطيف ود الحاوي، برعي دفع الله ، كمال يوسف، هؤلاء كأمثلة فقط وليس حصراً، وضمنهم برز أيضاً مبدعنا، وهكذا ومنذ عام 1959 خلال انضمامه للأوركسترا الفنية التابعة لإذاعة أم درمان وحتى اليوم الماثل، ظل يرفد المكتبة الغنائية السودانية بعشرات الألحان والمؤلفات الموسيقية التي ساهمت في ترقية الحس الموسيقي لدى المستمع السوداني، وهكذا ظل يبدع ويبدع ويبدع ،، حتى ظل يتوهج إبداعاً ،، فأصبح رقماً في سماء اللحن السوداني ،، وهكذا أضحى الموسيقار بشير عباس ولوحده مقطوعة من الحان الزمن الجميل ،، نلتقيه في هذه السانحة بمنزله الجميل ووسط دفء أسرته في مدينته الآخاذة سانت كاثرين بمنطقة أونتاريو بكندا لنقضي معه وقتاً طيباً نقلب فيه معه بعض من أوراقه ودفاتره وكذا ذكرياته ،، وهكذا أيها القارئ العزيز تابعنا مشواراً فنياً باذخاً قاسمنا فيه الصديق دكتور مصطفى مدثر مع مبدع منح لقاءنا به دفئاً في مدينة تحيطنا فيها ثلوجها وبلدا يحاصرنا فيها صقيعها!.)
+ الملاحظة اللي رصدتها في أسرتكم إنو المرتبطين بالفن عندكم كلهم متأثرين بآلة العود تحديداً، وأصبحوا عوادين، خلافاً لأي آلة موسيقية تانية، آمنة وأسماء وسامي المك وأحمد المك وإنت ،، الحكاية شنو؟
= الحكاية فيها قصة طريفة، كانت أسماء بت عمي حمزة بشير نصر، تتعتع في الكلام وهي صغيرة، وكانت معجبة بالفنان عثمان حسين، ربنا منحها صوتا جميلا جداً بي صفارة الخشم، فكانت من عاداتها تدندن أحياناً وهي شغالة في حاجة في البيت بألحان عثمان الغنائية وبعد مرات تنطق جملاً صحيحة من أبيات الأغنيات، قام عمي لاحظ ليها ورصد إنها بتصفر، قام حلف عليها إنها تبطل العادة دي، لمن قبضا للمرة التانية وهي بتصفر، قالت ليهو يا أبوي إنت عارفني بتعتع في الكلام والصفارة بي خشمي بتساعدني وتريحني شوية، فاقتنع بي تبريرا، في مرة حكى القصة لصديقو الأميرلاي عبد الرحيم محمد خير شنان، " قائد الانقلاب المشهور الفاشل ضد الرئيس عبود وحوكم وطرد من الجيش" وكان عندو عود جميل جداً فأصر إنو يهديهو لأسماء عشان يساعدا في النطق بدلاً عن صفارة الخشم، وبالفعل استطاعت أسماء أن تتحول إلى عازفة وملحنة جيدة، والعود دا كل واحد في الأسرة تدرب عليهو العزف.
+ حسع العود ده وين؟.
= موجود وفي حالة جيدة جداً، بتذكر مرة حكيت القصة دي في التلفزيون وتم عرضو للمشاهدين.
+ من أشهر الأعواد اللي اتقدمت ليك كهدايا بنلقى عود حفيدتك نبتة بت دكتورة الحان بتك ،، بتتذكر تاني ياتو أعواد إتقدمت ليك كهدايا؟.
= عود من الرئيس السابق صدام حسين ووصلني عن طريق الراحل مصطفى أبو العزائم مدير الاذاعة الأسبق، ومن الطرائف بتذكر وأنا شايل العود ومارق من الاذاعة قابلني الفنان الراحل صلاح محمد عيسى، ولمن عرف إنو العود الشايلو هدية من صدام قام علق بطريقة ظرفو ودمو الخفيف المعروف عنو ،، فقال لي إنت "صدام" ده أخو "دقش"؟!.
+ عودة لاستخدام صفارة الفم بالنسبة لأسماء البشير بت عمك ،، إنت في عزفك للعود بتلجأ لاستخدام صفارة الفم كموال أو صولو ،، هل هو تمومة لنغمة ناقصة أم بلوغ لأعلى درجات التطريب الجواك؟.
= تقدر تقول هي تكملة وإضافة لنغمة، أول مرة سمعتها عند الكابلي بس الفرق إنو كابلي بيستخدما كعملية تطريبية، وأنا أخدتها كشكل رئيسي في الآداء الموسيقي إلى جانب تطريب للذات مع الأداء.
+ وبمناسبة الأعواد دي معروف عنك إنك ما بتعزف إلا بأعوادك إنت ولاحظت إنك بتميل للعود اللي أهدتو ليك حفيدتك "نبتة" وإسمها منحوت على العود كمان!.
= أيوة صاح وطبعاً ده ارتباط وجداني، أنا حصل عملت ليها مقطوعة اسمها "نبتة حفيدتي" والمقطوعة دي شاركت بيها في مهرجان موسيقي في تونس للاذاعات العربية وكان المشاركون زي 25 دولة وفزنا بالمقطوعة دي وأحرزت الدرجة التانية.
+ عندك نبتة حفيدتي ،، وهاشم صديق عندو مسرحيتو الشهيرة "نبتة حبيبتي" هل توجد أي علاقة أو تأثرات أو إسقاطات في الاسم؟
= والله أبداً ما أعتقد، فقط ربما توارد خواطر.
+ قدمت أعمال موسيقية فخمة باسم الزوجة والأخت والابنة والحفيدة، ومجدت مدن سودانية بتسمية بعض أعمالك الموسيقية بها ( مريدي ، أنزارا، نهر الجور، سنار، حلفاية الملوك ،، الخ) هل ده كان ضمن مشروع مسبق خططت ليهو، ولا جا كده عفو الخاطر متماهياً مع الوحي الابداعي عندك؟.
= القصد هو التخليد، أنا أول مقطوعة عملتها بعنوان "أمي" بعدها "نهر الجور" وهو نهر في الجنوب والمقطوعة دي كانت بمناسبة افتتاح خط السكة الحديد بالجنوب، و"أحاسيس" ودي كانت بالصفارة بالخشم وكانت تأليف، بعد داك قدمت "آسيا" لزوجتي و"الحان" لبتي و"نبتة" لحفيدتي، وبعدينك "أيام في أنزارا".
+ مقطوعة الحان فيها نظم شعري!
= أيوة لأنو مرة وردي الله يرحمو كان مقيل معاي في البيت، فقمت سمعتو مقطوعة ألحان، أُعجب بيها جداً، واقترح علي إدخال كلمات فيها عشان نمسك بيها اللحن، وطوالي مسك العود وبدا يألف في الكلمات "ياترى ،، حجبوك من عيني ليه يا ترى"، فراقت لي الفكرة.
+ المقطوعة دي عملتها لبتك وصديقتنا ألحان، بس الاشارة للكلمات المتعلقة فيها ب "حجبوك من عيني ليه يا ترى" بتخلي المستمع يتساءل: منو ديل الحجبو الحان بتك عنك؟.
= "ضاحكاً" لا أبداً ،، زي ما وضحت ليك وردي اختار الكلمات عشوائياً بس عشان نمسك بيها اللحن عشان ما يتنسي، وكان ممكن تكون أي كلمات غير دي!. مثلاً عندك في أغنية "مشينا" أنا وضعت اللحن في البداية وعشان ما أنساهو "ختينا ليهو كلمة "مشينا مشينا مشينا" وبعد داك بنينا الكلمات جوه اللحن فظهرت أغنية "مشينا!.
+ ،،،،،،،،،!
= وأفتكر أحسن زول بمسك الألحان بي الكلمات هو جعفر فضل المولى رحمة الله عليهو، راجل كان فنان أي لحن تديهو ليهو كان بملا جواهو كلمات مناسبة ليهو.
+ هل دي نوع مقطوعات معروفة سلفاً وتم تقديما في العزف قبل كده، أم من أشراقاتك وجعفر فضل المولى ووردي؟.
= أبداً ده شكل موجود في التلحين، لأنو الفنان المصري محمد عبد الوهاب عندو تجارب وألحان زي دي، مدخل فيها شطرات من الكلمات مجاراة للحن.
+ يعني نقدر نقول إنو إنت أول من أضاف شغل زي ده في المزيكة السودانية؟.
= تقريباً، وبتذكر إنو برضو استفدت من ريشة فريد الأطرش في عزفو على العود، الجمهور كان بطالبو في بداية حفلاتو إنو يعزف ليهم عزف منفرد، فأنا أدخلت الريشة دي في السلم الخماسي وأصبح العزف سوداني بحت ومستقل وما فيهو استلاف وكان فيهو تطوير.
+ مدرسة العود السودانية زي ما سماها الصحفي معاوية يس ضمتك مع كل من برعي محمد دفع الله ، في رايك ممكن تضم منو برضو من العوادين السودانيين؟
.= والله بصراحة ما شايف، لأنو للأسف وزي ما وضحت كتير، مافي اهتمام بالتأليف الموسيقي، مع إنو عندنا الفرص للتطوير.
+ الموسيقار المصري محمد عبد الوهاب مجد الموسيقى السودانية وقال إنو السبب مش في السلم الخماسي، إنما لأنها متميزة ومختلفة في المنطقة نتيجة للرونق الخاص الفيها حسب ما عبر، رغم كده سألوك في حوار ليك مع قناة البي بي سي عن سبب عدم انتشار الأغنية السودانية، وكان ردك مفحم تجاه السؤال لمن أشرت ليهم إنو عندهم تسجيلات متعددة ليك ولمطربين سودانيين تانين ورغم كده لا يتم بثها، فالقمتهم حجراً زي ما بقولوا!.
= نعم محمد عبد الوهاب بيرى إنو موسيقى البلدان العربية التانية متشابهة من ناحية السلم السباعي الفيها، وده البيميز الموسيقى السودانية عنهم بالسلم الخماسي بتاعا.
انقر هنا لقراءة الخبر من مصدره.
| |
|
|
|
|
|
|
|
|
|
Re: رجعنالك عشان تاه الفرح من دارنا . يا بشير � (Re: Osman Musa)
|
هي سلسلة من المقالات في محاولة لتكريم شخصيات أو جمعيات أو أي نشاط يُعنى بالفن في كافة مجالاته للأحياء منهم فنحن بطبعنا لا نكرم إلا الأموات و المحاولة دي طبعاً قوامها الأول و الأخير العم قوقل فالناس تحاول تدعمني بمعلومات لو عارفة اي حاجة زيادة و يمكن دي بداية عشان نزيد المحتوى الثقافي للسودان على شبكة الانترنت..
—
ضيفنا في هذه المساحة اليوم هو الموسيقار بشير عباس أحد قمم التلحين في السودان فلنطالع سوياً هذه السيرة الحافلة بالعطاء..
بشير عباس
أسم يحتشد بالعبقرية الموسيقية،نحت بأنامله الوسيمة علي قلوب كل السودانيين حتي أصبح ظاهرة في دنيا التلحين و التأليف الموسيقي..
ومن يصغي السمع لأغنيات مثل رجعنالك وكنوز محبة وطائر الهوي يعرف تماماً إنه أمام مبدع مغاير ومختلف له طابعه وأسلوبه اللحني والتأليفي..
رجل بتلك المواصفات من البديهي أن يعتلي قمة الوجدان ويتربع عليها وحيداً..قدم بشير عباس للموسيقي والغناء الكثير من خلال تاريخ طويل وممتد..
وذلك حقق له سيرة ذاتية مليئة بالروعة والأناقة..فمن هو بشير عباس؟
سيرته الذاتية:
بشير عباس بشير نصر من مواليد 5/8/1938 م بحلفاية الملوك وفي نفس يوم مولده تخرج عمه اللواء حسن بشير نصر من الكلية الحربية ,,, تنقل بالعديد من أقاليم السودان وذلك بحكم عمل والده حيث بدأ دراسته بالكتاب بمدينة الرصيرص والوسطى بمدينة ود مدني..
في العام 1955 م عمل بفترة مؤقتة موظفا بالنقل الميكانيكي ببحري وانتقل للعمل بالري السوداني بسنار ثم بمشروع الجزيرة بركات ثم بعد ذلك عمل برئاسة السكة حديد بالجزيرة في ود الشافعي ..
إقترابه من دنيا الفن:
في 3/7/1959 م التحق بالعمل بالإذاعة السودانية بوظيفة سكرتير أوكسترا والتي كان يرأسها علاء الدين حمزة وطبيعة عمله تتطلب تواجده منذ الصباح لمتابعة البروفات والتسجيلات وواصل العمل بهذه الوظيفة ثم تركها ليعمل محاسبا بوزارة المالية وهذه الوظيفة جعلت وضعه المادي أفضل بالإضافة إلى انها اتاحت له تسجيل مقطوعاته الموسيقية في الإذاعة لانه سابقا كان لايستطيع تسجيل اي مقطوعة بالرغم من أنه المسئول عن التسجيل خوفا من كلام الناس ..
في العام 1967 م تم تعيين برعي محمد دفع الله رئيسا لقسم الموسيقى بالإذاعة السودانية وعين مكي سيد أحمد نائبا له ولاحقا تم إبتعاث مكي سيد أحمد لبلغاريا فطلب من برعي محمد دفع الله أن يختار نائبا له في القسم فاختار بشير عباس وفي بداية العهد المايوي نقل إلى قسم التنسيخ .. قي العام 1972 م عمل بهئية الطيران وأستمر به حتى العام 1988 م .. في العام 1989 م هاجر للعمل بدولة الإمارات العربية المتحدة ومنها شد الرحال إلى كندا في العام 1996 م .
نأي من الأبنوس:
لاحظ والده إهتمامات إبنه بشير وولعه وشغفه بالموسيقى منذ الصغر فقام بإهدائه ( نأي من الابنوس ) عندما أكمل مرحلة الكتاب وتهيأ للدراسة بمدرسة مدني الأهلية الوسطى .. تعلم بعد ذلك بشير عباس أسرار عزف العود على يد إبنة عمه أسماء حمزة وهي أول ملحنة سودانية وإلى الأن لازال يحتفظ بذلك العود والذي كان هدية من الجنرال عبد الرحيم محمد خير والذي يرتبط بصداقة مع أعمامه حسن وحمزة بشير ..
خلف كل فنان عظيم أسرة داعمة:
شق بشير عباس طريقه الفني بالتأليف الموسيقي وتأثر في ذلك بالموسيقار برعي محمد دفع الله وأول مقطوعاته الموسيقية هي شروق وكانت في العام 1955 م و تلاها بمقطوعات مثل أمي وبامبو سنار .. استتبع ذلك بأول لحن غنائي له وهو لحن أغنية أشوفك في عيني للفنان عبد العزيز محمد داؤود في العام 1960 م وتلاها أغنيات يا سهارا للفنان محمد حسنين ثم الشال قلبي وسلا لثنائي الجزيرة .. وأول فنان شارك بالعزف معه هو عبد العزيز محمد داؤود في العام 1957 م عندما جاء إلى مدينة سنار بفرقته الموسيقية وكان ينقصها برعي محمد دفع الله وطلب منه أن يعزف مع الفرقة .. وأول أغنية عزفها هي سمير الروح مع عبد العزيز محمد داؤود وبالطبع في نفس الحفل . . أول من قدم موسيقى الأغاني بالصفارة عن طريق الفم مصاحبة بالعود .. نذكر منها أغنيات حاول يخفي نفسه ( حقيبة ) وعشت ياسوداني وسفري ( لأحمد المصطفى ) والمقرن في الصباح ( لإبراهيم الكاشف ) ولاقيته باسم زهر المواسم ( لفاطمة الحاج ) وقريبة وبعيدة ( لصلاح مصطفى ) ..
بشير عباس و البلابل قصة غرام و ريد:
ارتبط إسم بشير عباس بالبلابل ويرجع ذلك لما قدمه لهن من الحان شجية كانت سبب في شهرتهن , والترحاب والإستقبال الحافل للبلابل بعد عودتهن للساحة الفنية بعد غياب دام لأكثر من خمسة وعشرون عاما لهو دليل على رسوخ تلك الألحان في وجدان الشعب السوداني..
قصة التلاقي:
إلتقى مع البلابل عن طريق اللواء المرحوم جعفر فضل المولى مدير الفرقة القومية للفنون الشعبية , حيث لعب دورا كبيرا في لقائهم عندما طلب منه أن يستعين في بعض الأعمال الفنية بأصوات نسائية وكن أربعة وليس ثلاثة واعتذرت شقيقتهن شادية عن الحضور لصداع وجئن البلابل للعمل معه وبعد أيام حدث إنقلاب 19 يوليو وبعد فشل الإنقلاب كتب جعفر فضل المولى أغنية آب عاج أخوي في نميري وقمت بتلحينها وكان من المفترض تقديمها بواسطة ثنائي النغم ولكنهم كانوا يعتذرون عن الحضور للبروفات والبلابل كن منتظمات في الحضور , لذا اقترح العقيد عثمان محمد أحمد أن تعطى الأغنية للبلابل وبالفعل تغنوا بها ولقب البلابل أطلقه عليهن البروفسير الراحل علي المك .. ومن وجهة نظره ان تجربة البلابل لن تتكرر..
ألحانه الخالدة :
عمل الموسيقار مع العديد من الفنانين في العديد من الأغنيات و لكن نبرز هنا أشهرهم:
البلابل : نحييك , مشوار , نور بيتنا , الأسمراني , ود القبائل , زهر الريحان , لون المنقة , مشينا مشينا , عشه صغيرة , البنريدو تائه , رجعنالك , حبايبنا , البيسأل مابتوه , طير الجنة , قطار الشوق , حلوين حلاوة , موجة , تتبارك , نسيتني انا وخلاص يعني , على نياتنا , نجوم الليل , سكة مدرستنا , رياح الشوق , حب وأمل ( الليلة مسافر للدار مغادر ) , سلافة الفن , آب عاج أخوي , متعالي علينا..
عبد العزيز محمد داؤود : أشوفك في عيني , بلادي ياسنا الفجر..
عبد الكريم الكابلي : طائر الهوى..
حسن عطية : حبو زي النيل..
زيدان إبراهيم : كنوز محبة..
عبد العزيز المبارك : لاتدعني..
محمد حسنين : يا سهارا..
ثنائي الجزيرة : الشال قلبي وسلا..
ثنائي النغم : أمير الناس..
علي السقيد: ازيك مع الايام , انا يابلد..
مها عبد العزيز : سودانا ياسودان الهناء..
مقطوعات موسيقية من تأليفه :
أحاسيس , دموع الفرح , نهر الجور , ليالي مدني , القاش , أمسيات , وداد , ليالي واشنطن , آسيا , أيام في أنزارا , فارس النيل , مريدي , شروق , ليالي عطبرة , لوحه , الرياض , أمي , أفراح السودان , وداع , ريدتي , بامبو سنار , من حنانك , الحان , القمر في كنانة , العسل في كنانة ..
:-مقطوعات موسيقية جديدة لبشير عباس
العودة إلى الوطن , الجميل في كنانة وهي إمتداد لمقطوعات القمر في كنانة والعسل في كنانة..
نال بشير عباس الجائزة الثالثة في مهرجان أقامته الإذاعة الالمانية وذلك بعزفه أغنية أحمد المصطفى ( عشت يا سوداني ) وهي جائزة عالمية ستطبع في ( c.d ) مع الحان عالمية فازت في ذلك المهرجان .
تلك كانت إضاءات من مسيرة الموسيقار بشير عباس والذي وضع بصمته الكبيرة والتي لاتخطئها عين على خارطة الموسيقى السودانية وامنياتنا له بوافر الصحة والعافية ويطول عمره إن شاء الله..
| |
|
|
|
|
|
|
|
|
|
Re: رجعنالك عشان تاه الفرح من دارنا . يا بشير � (Re: Ahmed Yassin)
|
اخينا الكريم الفنان أحمد
سلامات
بعد رحيل المبدع الكبير بشير عباس بشوية
لمتني الصدف بالأستاذ الشاعر والاديب الكبير عبدالباسط سبدرات
الصدفة كانت مناسبة خطوبة إبن أخينا د. عبدالرحمن على بنت اخ سبدرات .
سالتو عن شعر سبدرات الشاب ولحن بشير الشاب وغناء العملاقات البلابل في
بداية السبعينات.
اتكلم بحزن شديد عن بشير .
وسالتو عن كيف نزلت عليه ديك الكلمات الرقيقة والجديدة في ديك الأيام المستفة بالسماحة
والحلاوة .
رجعنالك . عشان . تاه . الفرح . من . دارنا .
التحية مطبوقة للبلابل الجميلات حد الجمال .
والرحمة للعملاق بشير عباس .
والصحة وطول العمر لشاعرنا سبدرات.
| |
|
|
|
|
|
|
|
|
|
Re: رجعنالك عشان تاه الفرح من دارنا . يا بشير � (Re: Osman Musa)
|
بشير عباس يا عثمان
مع كل هذا الجمال كان اول من ادخل الغناء في المقطوعات الموسيقية
واول من باعادة الجملة الموسيقية بصفارة الفم مع انها جملة موسيقية معقدة
سمعت ياعثمان "المقرن في الصباح"
يا حبيبى قوماك ننسرق -- علي مقرن النيل في الصباح -- 'الروض بسم
و الطير غرد و الطقس لا حر لا برد
| |
|
|
|
|
|
|
|
|
|
Re: رجعنالك عشان تاه الفرح من دارنا . يا بشير � (Re: Ahmed Yassin)
|
ادوار العود المميزة في الاوركسترا السودانية كان لبشير عباس
دور ليس بالساهل في هذا التميز....مع انه كان متاثر الى حد كبير
بالموسيقى الشرقية.. والمقامات الشرقية ولكن ( سودنة) العود الشرقي
وفكر بشير عباس الموسيقي السوداني الخالص كان هو الاساس في تجاوز
ذاك التاثر...
سمعت يا عثمان اغنية( كفاية ) لابوداؤد ولحنها موسى محمد ابراهيم عراب"الملحمة" و"ماضي الذكريات"
صوت العود .. دي انامل بشير وهي ذات الانامل في"الطير المهاجر"
| |
|
|
|
|
|
|
| |
Osman Musa
Ahmed Yassin
فيس بوك
تويتر
انستقرام
يوتيوب
بنتيريست