|
|
|
 Re: صالحة وصابرة.. الشاعر أزهري محمد علي (Re: Yasir Elsharif)
|
سلام الأخ دكتور ياسر~
*خريف الدم*
ازهري محمد علي
واتلاقينا في شارع القيادة العامة
من كل فجه وفرقة
فجينا الارض ووقفنا
دي الوقفة التشوفها قيامة
ماراحت شمار في مرقة
بتزيدنا ونزيدا وسامة
يوم جرد الحساب بالورقة
حاسب نفسك اللوامة
حاسب والمتاريس درقة
والشجر البيمشي يمامة
عينو علي الرغيف والطرقة
وانت علي المعاك يتامي
بينك والمشارع فرقة
والبحر الكبير دوامة
قول لحسين هناك في الشرفة
حمدالله الوصلنا سلامة
زي يوم الوقوف بي عرفة
والنَّاس الهناك أياما
شاهرين الهتاف سلمية
رافعين الأيادي علامة
أتنين بالكتير في المية
والباقي بنتمو شهامة
لو تصبر علينا شوية
والصبر إن كمل نتسامي
فوق كل الجراح الحية
والنار التذكي ضراما
ما بتعرف كلمة أحيا
والنضم الوراهو ملامة
والعمر البروح إيدية
هدر في مسخرة دعامة
ما بناخد فداهو الدية
ما بنقبل قصادو غرامة
نحنا علي الفداء إتواعدنا
وإتعاهدنا حب وكرامة
زي سرب القماري صعدنا
في لحظة وقوع الطامة
إتوسمنا خير وقعدنا
في جحر الأفاعي السامه
شن طعم القيادة بعدنا
شن معناهو طولة القامة
في القلعة المشيد سورا
قايلين الوراها نشامه
في ذاكرة شعوب محفورة
في صدر المعارك شامة
تبت دوشكتا المأجورة
تاكل من حلالا حراما
تتلامع سماحة صوره
وأولادنا بتموت قداما
يا عار القيادة العامه
الاعتصام رفه جناح اللهفه
في روح عبد السلام
روعة جساره عظمه
و الشهداء الكرام
عزم المتاريس العصية
و دقه اوتاد الخيام
الاعتصام
انفض في شارع القيادة العامة
لكن نبت في كل قطرة دم و قام
في كل بيت في كل قصة ثورة قدام
في كل شهقة و زفره في صدورنا اعتصام
في كل شهيد صعد
عند الله محمود المقام
الليالي المالحة يا ليل المناحات
الدروب الفاتحة شريان البراحات
كانو في صدر القيادة
كما السنابل و الرياحين
احلامن اجنحة الفراشات
ارواحن انفاس البساتين
متوسدين تعب السواعد الخضرا
و الاحلام قمم
هذه الارض لنا
فليعش سوداننا علما بين الامم
واا حسرة الاولاد
علي حسرة نشيدك يا علم
انحل توب السترة
و نهدت عروض
في الساحه و اتباعت ذمم
تبت ايادي القتله
و العسس الرمم
ياللآم
ياللمصاب
من كل فج طلعت ذئاب
طلعت خبائث الارض من تحت التراب
طلعت كتائب الظل و الالهة العذاب
طلعت نفوس متناسيه ويلات السؤال
عند الله في يوم الحساب
عتمة في عز الشروق
و كتمة في دم الشفق
و فجة يا رب الخلوق
و صرخة في اعلى النفق
و طعنة في ضهر البشاشات و الوسامة
و فطرة القلب السليم
و طعنه في الاذان و في صوت الاقامه و حرمة الشهر الكريم
و طعنه لي يوم القيامه
بتحيا في غضب الحليم
و طعنه لا يلقاها الا الذين صبرو
ولا يلقاها الا ذو حظ عظيم
فيا درب الرجوع هيهات
ما فضل الا القليل
و لسه في خطرنا كلمات
من صباحات المواويل
لو بتغشى السدره غنوات
كان عرج بي عازة الخليل
و كان بننسج للحبيبات
من خيوط الضوء مناديل
المعاني بتخبؤ مرات
و تشتعل زي ايه في الليل
و نحن شلنا عمرنا رايات
جيل يسلم رايه لي جيل
ما استكان ليأس وسواس
و ما استجاب لسؤال البديل
همو في الحرية و الناس
و التزام الصبر الجميل
عندك خت ما عندك شيل
البعبؤ الروح سماحات
و يمشو بين الناس قناديل
و ناس بزيدو الهم مناحات
ارخبيل الدم و قابيل
الببادلوك العناق
و يرجموك في الليل ابابيل
ضحكه تحت اللحيه القناع
و كم غريق في لجة النيل
يبكو بدموع التماسيح
و يمشو في جنازة القتيل
و نحن عبرنا يا درب الخلاص وصّلنا
باقي من الغناء التلميح
و باقي من المعارك سِنه
و نان باقيلك اتبوهمنا و لا مِحنا
نحن برانا من كترت سُكتنا خجلنا
يوم لاقينا مجنون ليلى
في شارع القياده نصيح
و يا محبوبه ما فيك إنه
فيك سماحه الزمن الوسيم و مليح
و لا كانت مشاعرك مِنه
يوم رسلنا لي حضرة جنابو اجنا
اسرع من كلاب الريح
و انتي متلنا
ما شفتينا لما كتلنا
و اتفرقنا ما بين شهيد و جريح
و ما جيناك لي خت حِنه
جابتنا المآتم و النحاس الربه
آنات الهوا التبريح جينا محبه
صبينا المتاريس صبه
و تعافينا من قُرح السرير القيح
كانت ذكرى
احلام المدينة الفاضلة
سودان بكره
اطياف الخيال و الفكره
و الحب الكبير و صريح
سودان المعاني البِكره
متعافي و سليم الفطره
صارم و بالهداوه مريح
رنه الاجراس و نقرشه المديح
الرسومات الكمنجات المزازيك
لمه الاطفال على ضخب المراجيح
همهمات الباعه
و الشعراء المطاليق
و الشيوخ المارقه من عبق الضريح
البجردو السبحه من اهل الطريق
التراتيل التسابيح
النِبال يا عازه الجبال
سلسبيل العدو و الصليح
الزنوج الدم الحار
و اللسان العربي الفصيح
في المآذن سطع الهلال
و الظلال في الجمعة صلبان المسيح
من اريج نسمات الشمال
قدله في الوطن الفسيح
السجود في ارض المطار
الوداعات التلاويح
الحديد يا عطبرة النار
التزاكر و التصاريح
و العجب يوم وقف القطار
و اشتعلنا مع المصابيح
النضال و مواقف الرجال
السِجال و الساسه الجُداد
المعايش و سترة الحال
الغناوي و عقد الجلاد
الجدال في الجد و الهظار
التهجد و التراويح
بكرة يصبح كلو قول قال
و ما بصح الا الصحيح
المواجع و الدم السال
و كم سؤال في قبضه الريح
كم صباح في الافق البعيد
الواحدة ميقات التجلي
ميقات صعود الثورة
في هرم المواعيد
زغرودة والشارع يقوم
وتبدا الملاحم بالزغاريد
من وين بنبداها الحكايات
يا حرفنا المختصر المفيد
أنفض حيل الكلمة
وإنفضت ملمات
يا دمنا المسفوح قبائل العيد
نتلاقي في وهج البشارات
والمعاني الخالده في بيت القصيد
دقت النوبات ودندنة الأناشيد
للولاد المارقة حوبات
الشهيد تلو الشهيد
وَيَا خريف الدم سلامات
نحنا بي موتنا بنزيد
والبموت شان وطنو ما مات
بتولد من أول جديد
جينا من رحم البسالات
جونا من بره الأجاويد
خلينا بالنا علي البلاد
ختولنا في الجرح المراويد
جات كلاكلات إيد علي إيد
بري شمبات المسيد
جبره وأمدر
والحشود المارقة من كبري الحديد
إنت بتكيد والشعب يفعل ما يريد
يحيا الكفاح وينبغي
وتسقط كتائب الجنجويد
تسقط كتائب الجنجويد
| |
  
|
|
|
|
|
| |
Yasir Elsharif
هدى ميرغنى
فيس بوك
تويتر
انستقرام
يوتيوب
بنتيريست