|
|
|
 Re: كَرير مَرِي ودوخ الفحل (Re: عبيد الطيب)
|
ربنا يحلل سواجيرنا
في الوطا حكّام يتقنّطوا بلا بصيرة
وفي الوسائط شعراء يتقنّطوا بلا موهبة
قالوا:(شعراء) وكمان يتقنّطوا في الإعلام
وعلي قول شاعر مفوّه لأحدهم قام يتقوفط في حلبة غنا الجراري بعد ان سمع العذارى يغنين بطرب ويمدحن:
(محل الدم مفنّط
ومكان المات مااتحنّط
جُر كرسيك واتصنّط
ساكت ماتتقنّط )
عارف يا استاذنا شعراء الدوبيت الماعندهم موهبة ولاعاطفة
ولاخيال ولا
ديل " حوّصوا" ذائقتنا
زي الحكّام الجُدد ناس ابوانْدُلك و تِريلُّو
وامراء المليشيات والحرب ناس وددرب الشنكيت
ياخ أتّالبو الوطن في ام سمبوك
وبِقولو في حلِوَتُو
البلد الله يسترها من البقت علي كباسة
الوطن يواجه صراعا غريبا وقريبا
صراع العروش ورجال الظلام
البلاد هاملة هَمَلة كَرد
واللّي اللّيلي غايبها ماجَمع
وودالنميرها مع السافورة مارَجع
وكمان وددردب الشنكيت زاحف علي جعبتو وطالب الميس
عشان يبقى رئيس
وضياب بعد ماعِرف أبوزيد أكل صحن الدِّلكة
داكو بعاين ب الطوّالة وميسو رئيس البلد الهاملي
والمهوّلني جماعة الإصلاح ،ماني شايف نَعَمهم مع الحاروك
سمعت المفتش مور سمحلهم يدخلوا ب الشريط اللّحمر
(بِلّي رماها جادول عِند زريدة البردي
ولّا تكاها من كنتوش وعاني التُّردي)
ياخوفي علي البلد من القيمان
| |
 
|
|
|
|
|
|
|
|
Re: كَرير مَرِي ودوخ الفحل (Re: عبيد الطيب)
|
مابين ودالطاهر وناقته والثوّار وثورتهم وكلاهما(عصايةعِز):
(ميلك والبخالتو بفسلن قُو قلبي
ابشري بتشفي منُّو وغالبه مابتنغلبي
مقنيه وعصاية عِز وما بتنجلبي
قُنبار النطِح دوحيهو زين وانقلبي)
للمتذوق النابه ربط الحِس الشعوري للشاعر مابين الثورة والناقة،والحِس الوطني للثوار وثورتهم
مَيل الناقة من المحول والجرب،ومصارعة صاحبها للجرب وأمله أن يناطر بها مزاهي المراعي الخصبة
وأشواق الثوار للوصول لأهداف الثورة،وعقبات الثورة الكؤود .
شوف ودالطاهر هنا ولك ان تقرنه مع همّة الثوار واشواقهم:
(تردح وتنسنِد وتفِر مسامح راسّه
مكهكرها اللكب واتعارضن بلاسّه
الحو المنقي الحاج سلالة ساسّه
بكره فلاها في سحايةً مريه انفاسّه)
لاحظ الربط هنا والتوافق
(اهلك فوق دروبِك للوكر دقّاشه
شيّالِلوا شين يومآ وقعِتو فتاشه
بلدآ برقو يقدح وحجّرو الدياشه
بتلاعبيهو يويو ضحيوه ياهبّاشه)
رحمة ربي تغشاك وشأبيب غفرانه ورضاء الرحمن لك ياالطيب الطيب
ولك وقفة اكيد في الحويل والقش العاول وربطه مع مايعيق الثورةوعزم الثوار علي التعافي:
(نذره مجوزره غدّاره وشديده بخالتِك
جارده البنك ربيعتك بت ابوكي وخالتك
تجْزّم مِناكره سهوب حويلك وخالتك
بتعرفيني لي الشر البجيك وبخالتك)
| |
|
|
|
|
|
|
|
|
|
Re: كَرير مَرِي ودوخ الفحل (Re: عبيد الطيب)
|
ناقة ودالطاهر تشاشي للبرق والثوار يشومون برق الحرية والسلام والعدالة والشباب والرّق بطر العز:
((ديِّعي هولبي رُديهن معالق الباجه
ياالرِقِّك بزيل دقر الفقُر والحاجه
البرق البسوط نيلة المزر فجاجه
شامشتيلو شــرفِك وبرِّد الوجّاجه)
| |
|
|
|
|
|
|
|
|
|
Re: كَرير مَرِي ودوخ الفحل (Re: عبيد الطيب)
|
ألْمِي
..........
علي قول جبرين ودحامد....
الكان بالو في عُمْرة الغبوق .....
وددرب الشنكيت كضومو اتصفطن ...
قبيل قلنّا قاقّاه .....
ام قِرف بتبول في وجهها ....
والعيفة بقول: ( دمّاع ام قرف)
ياخي كنت قايلك صقر جديان
اتاريك ابوالرّهيو بتسرق الكلجة عشان عيفة....
دعوة لقراءة تاريخنا الاجتماعي بصورة عميقة
والنظر للمستقبل بوعي مفارق....
(أم قِرْف) دي حيوان من المحاريات بتبول وبذنبها بتبل وجهها وعيونها ،والناس يقولون:(دمّاع أم قرف)
برق الثورة يومض متراكِن
وشعارتها هاجرت مابين خريف الثوّار وصيف السياسيين وشتاء العسكر
ومازال الثوّار في همّة الدليل أمحمدودصالح العدوسي الكباشي
لكنهم يفتدقون "الهاقنيب":
(خَلفت ظنّنا أم كونيب
شافت البِرعد الشايل نهارو صبيب
بَطحت راسها سِمْعت نهرت اللّنقيب
أخدت صَنْفِي وإتخنَّقلها الهاقنيب)
(ديمي مهاجري ب النّاس الخريف والصيف
دايري تحدّدي اللّرض ولّا رايك كيف!!؟
داك البِرْعِد المَدّالك أم ماحنيف
كَديه قايسيهو ياجبّادة العلّيف؟)
• المدّالِك أم ماحنيف وبرواية إندمدّالك أم ماحنيف
| |
|
|
|
|
|
|
|
|
|
Re: كَرير مَرِي ودوخ الفحل (Re: عبيد الطيب)
|
البدويُّ يقول:(أنّ المفتش غرقان في الروحانيات...
وفي إنتظار نبوءة والده، ورئيس الوزراء الدرب دخلُّو في ألمي والبلد بتحرق....
لكن العرّافة قالت:(ممسوكين من بِيضهم)
وود درب الشنكيت الكتّل رفاقتو في التنقرارة.....
واللّ ل الليلي لا عِرف كتيل أخوه ولا شاف قبرو....
دي كمان مُخلايتو وجرابو في بلد وتايتُو في بلد.....
الراجي منو خير الترابة دي في خشمو!!!
ووشرة داك قَبُل ماينصِّبوه شيخ حلّة....
قال يتفولح ( حلتو تفتح حدودها ل كل البلود)
ياخ الإتفاقية قالت:شيخ حلّة...
البسوّيك ناظر شنو!!!؟
غايتو الله يبارك في ناس معاهد التربية الدّرسونا "صعوبات التَّعَلُم" وعرفنا طريقة معالجتها للصغار.....
ولكن عند الكبار دي تتجاوز قدراتنا كمعلمين ،لأنها تدخل في حيز الإضطراب النفسي المتكامل للشخصية
وتدخل في الغريق.........
ماعلينا.........
المهم المواطن داير "إنجاجا" والضُّل حسّي ومعنوي والقراية ل بزّورو.
وقديما قالت شاعرة الزعيم المُر:
(وسِّع لَهم البيوت
وكتِّرْ لَهُم المقوت
الب.............
والبتخلّي هْ أجرك مسبوت)
وقديما قالت بت مازن:
(ياجبَل تيقة الخريف خرّف
والمرقوب طلع فوق راسا بتشرّف
الكنْدَو ياجليس الحزّهن سرَّف
عان ها الن....الفوقي بتحرَّف)
| |
|
|
|
|
|
|
|
|
|
Re: كَرير مَرِي ودوخ الفحل (Re: عبيد الطيب)
|
كتابة حمدها في بطنها ....
(وكأنّك يا أبوزيد ماغَزيت)
كضّابة يامَرة الهلالي، لا خريفَن عقب ولاخيرا عَم....
(بيت القشْ المَبْني علي الغَشْ)
أها أوكت عارفو الودّاك تسايل وتطايب شنو!!!
الله يجازي مِحنَك يا "ضياب"......
طالع فوق في شجرة بانت....
وبتعاين للحكومة ب الطُوّالة!!!
الزول لصيص لصيص.....
شاف ضُلَّك وعِرفك تب...
غايتو أبوزيد أكل صحن الدِّلكة.........
من الإمور التي أربكتني جدا وهولتني هولة عديل...
ود درب الشنكيت البقالنا فكي ....
والناس بسلّمولو فوق إيدو وبتبركو في توبو!!!
وكمان االأيّام الهَمْدة ماسمحة وخاصة من الدّليل وعلي قول
عمنا شيخ جامع علي التوم:
(كرموش ماهَمَد همدة قرين قبّال "قاف معطشة ومفتوحة
ولاوز قلبو من جاعور أبوشلّال)
ومن غنا البطانة :
(المِفتِّش هَمْبولُو
شِن عُرضو وشِن طُولو
كان حجَّر حَلّولُو!!!
شرق الله البارِد هولو ؟؟)
ومن غنا البادية الغربية:
(عسَاكر مور يا أم فرعة
بقولك شربة وجرعة
الحنَّت مابية القرعة
فوق مُدَّاغتك ترعى)
والمِفتش أياه المفتش كان "مور" وكان ودالبلد......
تجدني مفتونا بمثل هذا الغنا وتجلياته، لأنه يحمل روابطنا الإجتماعية
وثوريتنا وحريتنا،لابمعناه الأفندي"التربيزة والمكتب"....
ومازلت وإلي تاريخه لايعجبني رجل الإدارة الأهلية الذي حوّلته الإنقاذ بقدرة قادر إلي ضابط إداري،يحوم حول دواوين الحكومة والإداريات و القرى والحلال والمدن.
أوقاضي قاعة ،يضرب "طربيزته"
أوسياسي منتفع ،يشهق كلما كشكش العلوق!.
مثل هذا الغنا وغنا الشاشاي،اضاعوه الأفندية بتوثيقهم،وكذا أضاعوا غنا
(المهاجرية أو الهمبة) الثوري ووثقوا غنا همباتة "الأنداية" أو همباتة (الترف) كمايقول صديقي العلّامة الموسوعي.
# حواشي
( الهلالي/ مرة الهلالي/ دياب/ضرّة مرة الهلالي/ الشجرة بانت .......الخ )
ديل يقابلهم بدون ترتيب
( الثوار/ المجلس العسكري/ الحرية والتغيير/ الحركات الموقعة/.الحكومة .....الخ
| |
|
|
|
|
|
|
|
|
|
Re: كَرير مَرِي ودوخ الفحل (Re: عبيد الطيب)
|
عُدت من إجازة ،وكُلّي يقين أن أقرأ تاريخنا الإجتماعي بعمق أكثر
وأن أتفحّص حاضر الوطن وقادمه بوعي مفارق
وأن لا أصدق مايجري بالوطن إلا شيئين
الآذان والموت! فقط...
منذ سنوات أتخوف من رجوع عهد "القيمان"
ومن متابعتي للتغيير الإجتماعي والإقتصادي والسياسي و الجغرافي والتضاريس.
اصبحت كل يوم أزداد يقينا بعودته "عهد الهمج والقيمان " .
نفس البيئة والإنسان
| |
|
|
|
|
|
|
|
|
|
Re: كَرير مَرِي ودوخ الفحل (Re: عبيد الطيب)
|
أيّام إعتصام القصر
الناس الضاربين المكان العَضِي وجزيوة المفتش
والقُوطة الدَّرعة
باقي نقول :"مقيمين" ولاّ راحلين!!؟
تداعت بذاكرتي صور كثيرة،وأني أعاين ب الطوّالة
لجادول "المغزغزات" اللّا هوّد ولاجوّد ،رحمة مولانا
السخّر ناس ودرب الشنكيت
قبّال سخر عمنا ريقن كارب زندو
وأهل البادية ايضا إحتاروا وإتهوّلوا في خير ريقن وكثرته
لأنه مجهول عندهم ،لذابعد أن غطّاهم خير مولانا وعمّاهم المطر،بعض عذاراهم مع المدح يتندرن:
(عيشك مو من قرفة
ولبنك مو من خلفة
جِنْسَك ما بِنعَرْفه
نعلّك ماك ودغَلْفه)
(ريقن الحنين
جاب لينا عيش تومين
أكلو الموظفين
وسمّونا النازحين)
ولشرح (مقيمين) بقاف معطشة أي ماكثين يوما أويومين
شاعرة كباشية شفيفة
وشاعرات غنا الجراري لهن بديهة حاضرة جدا،مع جمال روح
أحد البدو وذات نشوغ،وهو في المخارف، مرضت زوجته،مما أضطرّه أن "يقيم" بالقاف المعطشة.
وهذه الإقامة قد تأخره من الوصول للعشب "العضي" الذي لم تطأه أرجل نعم ،وحتما يسبقه عليه آخرون.
فبدأت علي ملامح وجهه القلق
و"بمضرايته" إلا هو وزوجته وإبنهم الصغير،،ولأنه تأخر من الرحيل قليلا،
كلما يتفيأوا ظلا، ويفرش لها الفرش ،ويصنع لها الظل بخيمة أو طاق دمورية أو شِمال صوف ،نجده يردد موالسا:
(تأخرنا من الرحيل )
وأحيانا "يقنت" بزهجٍ ،فقالت زوجته مداعبه وهي طريحة الفراش:
(مرودع البننَّت
دليل جاليقة الحنَّت
خبار نافلتو إتشنَّت
إن غَزَّ الضُّل بتقنَّت)
| |
|
|
|
|
|
|
|
|
|
Re: كَرير مَرِي ودوخ الفحل (Re: عبيد الطيب)
|
سلام
أستاذ عبيد الطيب صاحب الأسلوب الفريد،
يسلم القلم على الشعر و الحِكْم و اللغة الجميلة.
سأستعين بقرايب لفهم كثير مما صَعُب علي.
الشعر أخذني لأشعار سمعتها في طفولتي و كلمات
باعد الزمان و المكان بيني و بين سماعها. شكراً لك.
واصل بالمزيد من الروعة.
| |
|
|
|
|
|
|
|
|
|
Re: كَرير مَرِي ودوخ الفحل (Re: muntasir)
|
تحياتي ومعزتي الأستاذ منتصر وسلام سمح
دوختنا والسبابة والسوّامة والجلّابة ودوخ الفحل
( السبابة)
علاقتها بتجارة البهائم وخاصة الصغار و ديل الناس البكجروا البهائم قبل التجار أو البلقطوا البهائم وببيعوها للتجار.
( السبابة) اقل من التجار وهم لايستطيعون شراء الابل وتصديرها(للريف) مصر.
( السوّامة)
الناس الذين يجلبون الخضار التبش والحب و...الخ
الي القرى والفرقان اهل البادية الغربية يسمونهم( السوّامة).
( الجلابة)
من جلب البهائم يقولون:( ناس فلان جلبوا لسوق ام بادر/ ام درمان) ثم تحولت الي التجار الذين يحملون بضاعتهم وينشغون مع البادية .
اها الحكومة دي خلطة عجيبة.....
( سبّابة/ سوّامة/ جلّابة)
بالمناسبة الحكومة دي ملولوة لولوة عجيبة
قالوا:( مدنية) كضابة كوووولو في...
المكذب يدقها فتاشة......
المخابرات بتلقوها ...
و الدفاع الشعبي فيها.....
وود درب الشنكيت .....
لكن كان خطّتنا "فول ناس" الشرطة ولهمتنا كباب الربيقي حبابها.....
مرة واحد من اهلنا الربيقات اتخاتنوا عليه جماعة ظلما ادخلوه "الحراصة"....
اها رئيس الشرطة ارسل يجيبولو فطور
( فول مدنكل) ....
زولنا شاف الفول ضحك وخاطبهم:
( اني مسجون وكمان آكل فول....
لا والله عيل كباب)!!!!
وياحنفي زولك التاجر القال:
( عشر سنوات اكل فول...
باقي عمرك كوووولو اكل كباب )
دي مابنقدر عليها...
غايتو الداير منها فزع لمكتولة شوقو طال
٢٥ فزعك يامواطن.....
اكثرهم اقاريب والباقي زاملتهن عارية....
اها هم مراح لكن فحلهن دوخ.....
بدوي من اهل البادية عندو حاشي دوخ
جلبو للسوق وباعو لزول ساعيلو ابل جديد
اها بعد سنين بقى جمل نايب وهدّاهو في ابلو
اها كل ماباصرو مالقّح ابلو...
يوم بالصدفة جاهن ضيف بات عليهن....
والضيف سولو ناعم والنار متعلبة وبتونس مع سيد الابل ....
والفحل بهدر وسط اماتو.....
سمع حس الضيف خلّى الخلفات
ومرق يخُب طالب الضيف....
برك قدّامو وقعد يحن!!!!
شفتو الثورة العظيمة دى ....
محنتها في دوخ( كل الحاضنة الجديدة والقديمة )
(دي دوخ ودوخ عمرو مابقى فحل)
الحرية والتغيير دوخ
والمجلس الانتقالي دوخ
والحركات المسلحة دوخ
السؤال
هل مازال حمدوك دليل دوختنا " الثورة"!!!؟
القلب يتمنى والعقل بدأ يلاوذ....
القلب يقول:
ليتك تتمثل بقول الشاعرةلكباشية :
( مردوع البننّت
دليل الدوخة الحنّت
بشوف شوشتها اتشنّت
دايرة النّع يتقنّت)
والعقل يقول:
( ياعيّالة ماتنطرّى
ياعيّافة فوق شق اللمان انصرّي
جادول رسّف الكبّر سناب العرّي
عيل تراعاه دوخة ودبشير البرّي)
# مابين دوخ والدليل ارى دوختنا" الثورة" هالعت ....
والله يستر من الغِداد
غايتو" الدوخة" اتوسقت ضحى اللعم
همباتة السياسة وحتي ناس ابوحبيل ...
*تريلّو دي يامنتصرصقر دني ويأكل حتي المفرغات البشرية
# ابواندلك طائر اشبه ب (صقر )قوفاط ويكذب بصوته بالليل لكي يقنع نفسه انه مخيف وتجده احيانا بتعقب المضاري التي ذهب اهلها للسروح ويتكبس التوايا
| |
|
|
|
|
|
|
|
|
|
Re: كَرير مَرِي ودوخ الفحل (Re: نعمات عماد)
|
تحياتنا ومعزتنا دكتور نعمات
نعم صدقت بعض الغنا لحبوبتك الشاعرة المفوهة بت مازن "السلطنة الزرقاء"
أحيانا نحاول الربط مابين تضاريس البادية وتضاريس المدينة وكل يبحث عن الحرية والسلام والعدالة
حرية البادية في الإنعتاق من رهق المدامر والمحل وجدب الصيف ونشل الآبار إلي فضاء النشوغ وبطر الخريف ورخاء المراعي
وحرية الثورة في السلام والعدالة والإنعتاق من الظلم والشمولية
قالت شاعرة بدوية تخاطب ناقة عزيزة عندها وكلاهما يشاشي لحرية المخارف والنشوغ وعدالة الخريف:
(سيدك بدّر نجع
ودورك جق مارجع
أم ضروة البرق ماهجع
سغيرا حاس بالوجع)
ومابين برق أم ضروة وبرق الثورة عقبات ومحول!!!
"سغيرا" صغيرا
لاحظي تشبيهها للبرق (صغيرا حاس بالوجع) مع قراءتي المتواضعة للشعر دارجه وفصيحة لم أجد مثل هذه الجزالة
| |
|
|
|
|
|
|
|
|
|
Re: كَرير مَرِي ودوخ الفحل (Re: عبيد الطيب)
|
ديِّعي هولبي رُديهن معالق الباجه
ياالرِقِّك بزيل دقر الفقُر والحاجه
البرق البسوط نيلة المزر فجاجه
شامشتيلو شــرفِك وبرِّد الوجّاجه)
....
هيع
دا الكلام يا استاذ العبيد .
تحياتي
| |
|
|
|
|
|
|
|
|
Re: كَرير مَرِي ودوخ الفحل (Re: Osman Musa)
|
تحياتي ومعزتي الأستاذ عثمان موسى
زمان شاعر بدوي قح كباشي حمدودحاج عبدالله "السغيِّر"وكان دليل وريّافي في الخمسينات وكان زهجان من الحكّام ولم يعجبه بيع حلفا للمصريين:
(حكمهن ذل خيانة وب المهانة برازو
ياريت كان قبيل في اللنتخاب مافازو
عبود انتقل وخليل جماعتو اتعازو
أصادفو الجلّة والولع الهبر قمّازو)
| |
|
|
|
|
|
|
| |
عبيد الطيب
نعمات عماد
Osman Musa
فيس بوك
تويتر
انستقرام
يوتيوب
بنتيريست