Quote: الأستاذ محمود محمد طه يطلب من شعب أكتوبر أن يهب مرة تانية، يواصل مسيرته ليغير.. يهدم الفساد .. ويبني الصلاح
(اكتوبر موجودة.. الحاجة ال أنا واثق منها كل الثقة أنه اكتوبر جمرها موجود بس مغطى بي رماد.. نحن عايزين الرماد دا ينفض منها، يهب شعب اكتوبر مرة تانية، يواصل مسيرته ليغير.. يهدم الفساد .. ويبني الصلاح.. ودا الإنسان الرشيد دايما.. إنت عندك قطعة أرض هنا ، انا بضرب ليكم (المثل) بقطع الأرض بالصورة دي، لأنها قريبة، ولأنه أنا عندي طرف من العمل فيها برضو، إذا عندك قطعة أرض هنا فيها أنقاض، الإنسان الرشيد بيكون حضر خرطته، جاهزة.. بعدين بشيل الأنقاض ويبتدي يبني.. فهنا نحن ما كان عندنا الرشاد دا في ثورة اكتوبر.. هدمنا الأنقاض لكن الخرطة ما كانت جاهزة.. أنا بفتكر الحاجة اللي تتعمل هسع أنه شعب اكتوبر يجهز خرطته ويغير ويعرف كيف يبني.. وأنا متأكد أنه المسألة دي ما تجي الا بثورة من القاعدة.. الشعب ما يصلحه الا قيادة تنبع منه.. الناس البعيشوا معيشتك هم البيعرفوا مشاكلك.. في استحالة مادية إنه الإنسان الما بيعيش معيشتك يفهم مشكلتك.. يعني مثلا واحد بيعيش في الخرطوم تحت المراوح ومكيفات الهواء ويشرب من التلاجة ويستحم زي ما عايز (ويتقلب) زي ما عايز، لايمكن أن يتصور أنه في الغرب في ناس بيموتوا بالعطش.. ما بيتصورها.. إنت ما تتهمه لإنه ما تاصورها إنه دا عجز فيهو متعمد.. في استحالة مادية أن تعرف إنت المشاكل الما بتعيشها.. يقول ليك مثلا من حكمة الصيام أنه الإنسان يضوق الجوع.. موش بتدرسوا كدة في المدارس الأولية؟!! الإنسان بصوم عشان يضوق الجوع عشان يعطف على الفقير، ودا طرف من الحق.. إذا إنت بتعيش شبعان لغاية ما تبقى شيخ.. كيف بتعرف الجائع؟!! الناس البعيشوا في القصور كيف يعرفوا البؤس بتاع الناس البعيشوا في قرى الكرتون مثلا.. نحن عندنا المثل السوداني يقول (الراكب ما بجيب خبر اللقروب) .. ما ممكن.. لذلك ما يمكن يكون في صلاح للوضع دا الا إذا كانت الثورة من القاعدة نبعت منها القيادات.. القيادات المتولية الأمر في الوقت الحاضر موش قيادات الشعب ولا بتعيش في سودان الشعب .. عندها سودانا من صنعها براها..
محاضرة "الحقوق الأساسية في الدستور الدائم" مدينة الأبيض - 1969 الأستاذ محمود محمد طه)
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة