قمّة الملل والقرف ...

Quote: ثم مشتاقين ياخ .. يا اظهر علينا يا تعال سوق جقود دا من كهوف اليمن كان يضربه هواء كندا وراسه يستعدل

Quote: سلام للجميع- تحياتى أخ معاوية المدير ضد الإحباط الما بيداوى … برجع ليك بكلام كثييير أشرح وجهة نظرى

Quote: شوف يا اصلع انا عن نفسي متفائل جدا السبب بعاين للشباب و النساء اللي في الشارع ناس حلوين و فاهمين و بحبو البلد بي صورة ما عادية ناس واعين و عارفين عدوهم كويس و عارفين كيف يتعاملو معاه مبدعين في اساليب نضالهم تقعد تباري لي اللايفات و الخبراء الاستراتيجيين بجيك ضغط و سكري إحباط و مرض حامد و كوليرا و كوفيد ٢١ كمان .... شوف التفائل في عيون الاطفال اللي طلعو في المظاهرات شوف اجتهاد الشباب و هم بترسو شوف شجاعة بناتنا السمحات و هن بواجهن عساكر السجم بي اسلحتهم ياخ ناس السودان ديل سمحين شديد مشكلتك عيونك المعمشات ديل ...

Quote: أها يا أخ ود المدير الراجينا كثير وأتمنى المستقبل يكون أفضل للأجيال الجاية|

Quote: معاوية يا خوي .... الديمقراطية طريقها طويل محفوف بي مخاطر... العدو ما ح يستسلم بي سهولة زي الغول عندو ستين ألف روح ... أي روح يأس و احباط بحاول يفكها فينا و في الثوار عشان يقلل همتهم ... و بيتسلل من الحيطة القصيرة .... الناس ال نفسهم قصير هم من يركز عليهم العدو عشان يبث اليأس .... محمد المكي ابراهيم قال سندق الصخر حتى يخرج الصخر لنا زرعاً وخضرا ونرود والمجد حتى يحفظ الدهر لنا إسماً وذكرى... اها ... البدقو الصخر ديل ما بعرفوا اليأس ابو حسين قال ليك عيونك معمشات ...اها خم و صر

Quote: ياود المدير زى ماقال مصطفى سيد احمد ان ا صبر اصبر حتى امتلانا صبرا وماحن زمان التساقط فياخى حاشاك الإحباط

Quote: حبيبنا ود المدير مرحبتين حبابك يا زول عندي ليك مقال جميل عساه يخرجك من حالة الملل والقرف. شوف بالله جلبير الأشقر دا، مع أنو ما سوداني، لكن المسألة واقعة ليهو بصورة عجيبة.

Quote: ده صراع النفس الطويل والملاحم الثورية المستمرة يا صديقي. وفي هذا المقام غنى ثنائي العاصمة "نحنا في بداية طريقنا, ليه تقول لي مستحيل" دي يادوبها مناظر الثورة, ويادوب داخلين على الثورة.. ننجزها أولا قبل ان تبدأ الثورة العميقة .. الثورة العميقة دي انت والعجايز القدرك لن تدركوا خواتيمها الوليدات الصغار زينا انا وجلال وحيدر الزين احتمال ندرك واحتمال لا :)

Quote: الزول ده يظهر سقط براري كندا جمّد احاسيسو أمّا المشاعر راحت مع الشعر و كلامو بقا طربقة ساكت و ان مرقت جملة واحدة فهمتها ياها بتاعت اللوايفة بس

Quote: بقى راجل أطلع برا الحوش

Quote: ما عارف الناس بكونوا كتبوا ليك شنو، لكن وحات الله، عندي ليك حاجة تمرقك من الملل وتندم على كل حياتك السابقة؛ تشرب السجارة الأمريكية والحمد لله من قبل ومن بعد بقت قانونية، يا أخي، ورب المجرات، بهجة بهجة زي تكون بتتونس مع ساندرا بلوك أيام شبابها وقاعدين في مسطبة في الشارع وهي لابسة رداء وفردة سفنجتها مقلوبة في الواطة، تقوم انت من البهجة تمشي تشتري من بتاع العربية المدفورة اتنين داندرمة الطويلة واحدة بنفسجية وواحدة حمرا لما تصل ساندرا تقول ليها؛ دايرة ياتو لون تقول ليك أي واحدة وانت السجارة تكون ربطتت معاك تقول ليها لازم تختاري تقول ليك أي واحدة من الاتنين وتردد أي واحدة من الاتنين الاتنين تقوم انت كعبقري تمشي تجيب واحدة تالتة صفرا وتجيها تقول ليها أها بقن تلاتة لازم تختاري تقول ليك سمح أديني الخضرا تقول ليها ودي أطلعها ليك من راسي كيف؟ تقوم هي تضحك لحدي ما عيونها الصغار ديك يختفن نهائي تقوم انت تصحى من النوم تلقى روحك بكندا والتلج بتاع النفسيات داك محاوط الدنيا تسب دين لعبد العال ساتي وناس الري وناس الموية

Quote: يا برهان دا شعب عال ما بنطلع مهو صيدا سهل ضبع دا سبع دا مرا ما بتبلع احسن يا برهان تنقرع دا تربية جدود ما عدوها اكل ضلع دا تربية اصل وفرع احسن يا برهان تنقرع دا صاحب ثروة وسلاح وضرع وزرع دا تربى على الكتاب والسنة والشرع ما بنتبه لكلام ود المدير الزى دخان النطع جدو صلاة الوتر والشفع ما عندو علاقة بالفجر كان طلع خلوهو كدى فى كندا يمرح ويرتع

Quote: يا ود حلتنا نحن بنشوف في نهاية هذا النفق المظلم نور يشع من بعيد ... وفي النهاية لا يصح الا الصحيح... القاتل البرهان واعوانه والقاتل حميدتي ومليشياته الجنجويدية مصيرهم في النهاية مزبلة التاريخ.. ....وللصبر حدود ...بس انت اصبر شوية وحتشوف الاجمل .... شعب السودان لا يمكن ان ينكسر ابدا ...

Quote: اهلين ودالمدير هل سياتي يوم نطلع فيهو من الاحباط والمرض والقرف البقى علينا دا؟ المهم الاحداث ابدت للشعب ما كان خافيا

Quote: معاوية آآخوى الفوف بيتاقا ، بس كعب النزيل.. ناس جلال ديل إن وصلت 20f بأجزولون 🤣 فى الأيام العصيبة دى زيفة الشارع اخف وطأة من تضربك سخافات توم موز ، ولزوجة فكى جبرين.. ابقى دافى..

Quote: مسكت البوست من تحت لفوق اقرأ واقول ده بكون فلان ، ده ياهو المهم ح افكر اقرأ زي الانجليزي وارجع اكلمك يا ود المدير قال زهج !!!!انت شفت حاجة

Quote: ود المدير انزيك أين تم عقد القمة 😂😂

Quote: انت يا ود المدير، مشوطن زينا عليك الله، جربها والله، ما بتندم أقفل الواتساب نهائي أو أطلع من كل المجموعات الفيسبوك شوف بس صفحة دينا خالد وتيسير عووضة ما ترد على رقم ما بتعرفو كل يوم صلي العشاء بدري وأضرب السجارة

Quote: لكن مع ساندرا بتاعت الباظ دي علي الطلآق كُليقة كاملة أبخبِخا ...

Quote: علي الطلاق وقت انت آخر فرمتتة ليك من زمن ساندرا باص البلوبيرد صبرصة ما تشفطها .. :) :) يارجل .. لا حولااااا ..افلام الجمهورية زمن حيدر حنين بيواسي الصفوف .. المهم اوعععععك منها المستنير داير يضيعك . بنصحك بالعرس .. تجديد وحيوية وصبغة ونشاط وبرنامج ومباهاة للأمم :) الصورة للواء خلاء اسمه عادل الشيخ جاء في الجزيرة باعتباره قيادي في كوم من كيمان الحركة الشعبية .. برجع ارفعها تاني