المكان: زنزانة الدرجة الاولى بسجن كوبر الزمان: يوم الخامس من اكتوبر ٢٠٢١
يسمع الجميع صيحات ابتهاج من اللمبي: قلبوها يا ريس، وذاعوا البيان… بشة: بتتكلم جد يا فردة؟ اللمبي: آي، البرهان قلبها واستلم البلد. بشة (وفي صوته نبرة عتاب): انا ما قلت ليك برهان زولنا؟ تقول لي: ده جبان وانتهازي وما عارف شنو؟ طمرت فيهو الترقيات والله. اللمبي (متعذراً): لكن يا ريس انت نسيت قصة انقلاب رمضان؟ الزول ده قالوا كان مع الانقلابين. بشة (بخبث): برهان انا بعرفو كويس، ما يقلب كرت كوشتينة. كويس انكم ما اعدمتوه مع الجماعة، كنا عشنا هنا من غير أي امل في الرجوع. اللمبي: بمناسبة الرجوع، تفتكر الجماعة ديل حيسلموها لينا ولا حيعملوا رايحين؟ بشة (بغضب): يعملوا رايحين كيف؟ (يفكر قليلاً، ثم يقول): البرهان لو فكر يعمل رايح شمس الدين ما حيسكت. الزول ده انا مربيوه من ما كان ضابط صغير ووصلتو لرتبة فريق عشان عارفه مخلص. اللمبي: أها وأول شيئ حتعملوا شنو يا ريس؟ بشة (بسرور بالغ): عايز ارجع وارقص واعرض قدام الجماهير، الواحد ركبه صدت من عدم الهجيج. وبعدين عايز اخطب زي زمان، وأقول للناس حاجات زمان، بتاعة هي لله… هي لله… ما لدنيا قد عملنا … (ينسى بشة نفسه فيعلو صوته) الله اكبر… الزارعنا يجي يقلعنا… يهرول فلول الكيزان لمصدر الصياح ويجدوا اللمبي قد احتضن بشة وقد سالت دموع الاثنين من الفرح… احمد هارون (متعجباً): الحاصل شنو يا لمبي؟ اللمبي (بإستياء): ما حاقول ليك يا حيوان، مصمم تقول الكلمة دي؟ بشة (محاولاً التهدئة): هارون بهزر معاك يا فردة. اللمبي (غاضباً): ما يهزر معاي، الزول ده انا بريده… هارون (بإستخفاف): وانت البريدك من يا ابو ريالة؟ بشة (بحدة): بطل النبذ يا هارونة… هارون: انت ما سمعته قال لي يا حيوان؟ بشة (بقرف): دي حرية شخصية، الزول ده رأيو فيك كده، وانت رأيك فيهو انو عبيط. يطرق اللمبي وهارون رأسيهما وقد احرجهم كلام بشة… يدخل فار الفحم متعجباً لهذه الجلبة: الحصل شنو يا جماعة؟ حاسي بحركة ما عادية… بشة (بابتهاج): قلبوها يا مولانا… قلبوها عديل. فار الفحم (بسرور غامر): انا ما قلت ليكم حميدتي ما بخليهم يبوظوا ليهو شغلو؟ وجبريل ده تربية شيخ حسن ما ممكن يحيد عن مشروعنا. انا عرفته من الاول بمجرد ما وقع اتفاقية مع الجماعة ديل انو حيتبع معاهم اسلوبنا القديم "أدخل وخرّب من الداخل". العريبى الضار (رافعاً يديه إلى السماء): الله يرحمك يا شيخ حسن، كان عندك بصيرة نافذة… عوض الجاز (مقاطعاً): خلونا من شيخ حسن وحاج احمد، عرفتوا الجماعة ديل حيسلمونا ولا حيتغابوا فينا العرفة؟ بشة (بغضب): ما يسلموها لينا كيف؟ دي أمانة، خلاص الوفاء عدم في الدنيا؟ عوض الجاز (بخبث): ما في واحد عملها قبل كده، وأبى يسلم الامانة. اللمبي (معترضاً): قصدك منو يا الجاز؟ بشة (محاولاً تغيير الموضوع): الناس ديل ما يقدروا يستغنوا عننا ومابيقدروا يمشوها من غيرنا. والبلد محتاجة رئيس شجاع وعندو كاريزما يضبط الامور… العريبي الضار (متسائلاً بخبث): وده نلقاهو وين ابو كاريزما ده؟ ان شاء الله ما تكون قاصد نفسك. انت نسيت الذلة قدام العالم وانت بتتزاوغ من الجنائية الدولية؟ عوض الجاز (مكملاً باستهزاء): ولا الوقفة قدام بوتين زي التلميذ البيشتكى الاولاد الدقوهوه في حوش المدرسة… غندور (باستخفاف): ولا ذلة مؤتمر القمة، لما قاموا الخليجيين وخلوك واقف في المنصة ووقفوا يتنوسوا جنب الباب… هارون (مكملاً بنفس التهكم): ولا الشافع القعدوك معاهو ناس الامارات… بشة يصرخ وقد استشاط غضباً: كفاية…كفاية… وانتوا كنتوا وين لما ذليت نفسى؟ في زول منكم اعترض؟ الفاتح عزالدين (محاولاً الادلاء برأية): انا يا ريس… بشة (منتهراً بغضب): انت تنطم وتسكت يا أمي… الفاتح عزالدين (متمتماً بحزن وصوت لا يكاد يسمع): قال عايز يرجع تاني الرقاص الاعرج… برهان وحميدتي يقلبوها ويدوها ليك وانت قاعد هنا بتلبع وتنوم يا أشعب؟
-يتبع-
10-29-2021, 10:43 AM
أمير قناوي أمير قناوي
تاريخ التسجيل: 01-24-2009
مجموع المشاركات: 618
قريباً سأكتب الحلقة الأخيرة بمشاركة كوكبة جديدة من الخونة، برهان، حميدتي، جبريل، مناوي، ترك،… الثورة منتصرة بإذن الله وارادة الشعب التى لا تقهر وعزيمة الأحرار لا تلين. دعواتنا لشرفاء قوات الشعب المسلحة ان ينحازوا لشعبهم حتى لا يسقط المزيد من الشهداء.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أمير قناوي
فيس بوك
تويتر
انستقرام
يوتيوب
بنتيريست