سؤال في النص كدا ... يا ربي الرئيس المدني دا واحد بس ... حا يحاصصوهو كيف؟ ... 😃😃😃😃😃 غايتو بنعرف خاتف لونين ... لكن ١٠+ لون ... بري ... ما سمعنا بيها ... النشيف ...
10-04-2021, 07:32 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
بحكم تربية العساكر الناس ديل انا عارفم بعد ١٨ شهر بالظبط حا يفتحوا صناديق الإنتخابات عشان يعرفو من الرئيس ... ومن له الحق بتشكيل الحيكومة ... والعساكر في الحتة دي ما حا يقدمو أي تنازلات ولو إعتصمت أحزاب الفكه بي بايدن هيمسلف ...
10-04-2021, 07:40 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
البرهان وجماعتو حا يدخلو الثكنات ... وفي الغالب الأعم سوف يتقاعد كل من في القيادة الآن من الجنرالات ... ليفسحو لقيادة جديدة للجيش في عهد الرئيس المدني الجديد ... كما هو متبع في الإحلال والإبدال منذ قيام الجيش في عشرينيات القرن الماضي ...
أحزاب الفكه في فتيل أبو توله واحده بس ... شيوعي .. مؤتمر سوداني ... تجمع إتحادي ... أحزاب الإسهال (مويه بس) في فتيل نص توله ... بعثي ال ٤ وناصري ال ٣ وجمهوري وما عارف شنو كدة عزة السودان و.... السودان إلخ ...
10-04-2021, 08:15 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
Quote: على حسب الوثيقة الدستورية ... واحد وعشرين شهر بتم في نوفمبر ...
حسب الوثيقة يا معلم الواحد وعشرين شهر انتهت في مايو الفات, و كان حسب من توقيع جوبا و اضفت الفترة الاضافية كلها للعسكر معناها ح تنتهي فترتهم في يونيو 22 نوفمبر دا حنك قالوا اتفاق غير مكتوب بقسمة الفترة الاضافية سبعة شهور للعسكر و ست للمدنيين كدا تنتهي الفترة في نوفمبر طبعا اذا اتفاق مكتوب الله اعلم يتنفذ مع اطماع البرهان و حميدتي خليك من يكون ما مكتوب اساسا و انت عارف الغلاط السوداني!
عن نفسي افضل و اتمنى ترشيح مالك عقار, لكن شايف الشباب عاملين وسم مرشحين الفكي
10-04-2021, 08:27 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
Quote: و اضفت الفترة الاضافية كلها للعسكر معناها ح تنتهي فترتهم في يونيو 22
ليييييه الفترة الإضافية (ما بين ١٨ أغسطس ٢٠١٩ توقيع الوثيقة و٣ أكتوبر ٢٠٢٠ توقيع جوبا) هي ١٣ شهر المفروض مناصفة ٦ ونص لكلن ... مش الثورة جات عشان العدالة ... نعم فترة برهان تنتهي في مايو وبعد جوبا المفروض تنتهي في نوفمبر ٢٠٢١ ... بطلو اللكلكه ... برهان جاهز لتسليم العهدة ... بس (حددو) زولكم ...
10-04-2021, 08:45 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
السياسة هي فن الممكن ... هي ليست بطولات زائفة (الفكي ووجدي) ... عضو مجلس سيادي من المفروض تتحلى بالحكمة والسياسة والسيادة ... والمحافظة على الإستقرار السياسي للبلد مش لشخصك المنتفخ زورا وبهتانا بحكم ترؤسك لي لجنة حكومية تتبع لرئيس مجلس الوزراء ... الوحيد الذي إنبرى للدفاع عن القوى السياسية التي طالبها البرهان (بحكم موقعه) في خطاب المدرعات بالتوحد للعبور بالفترة الإنتقالية ... من الذي وكلك للحديث نيابة عن الطبقة السياسية الحاكمة ... مش ياها النفخة الكضابة بتاعت ناشطين اللايفات والمكرفونات ... لا أظن بأنك تعلم ماهي السياسة ... وما أظنك تعرف متين تتكلم ومتين تلزم السكوت والهدوء ... عدم الإستقرار الذي جاء عقب تصريحاتك التلفزيونية وما أعقبها من تحركات تتربص بالثورة منذ قيامها تتحمل مسؤوليته وحدك ... اقرأ قليلا في تاريخ أعضاء مجلس السيادة السوداني في ستينيات القرن الماضي وهم :- التشكيلة الأولى: ١٩٦٤ إسماعيل الأزهري خضر حمد عبد الله الفاضل المهدي عبد الحليم محمد لوبجي أدوك التشكيلة الثانية، ١٩٦٥ جاءت بعد تعديل على أعضاءه، حيث خرج منه كل عبد الله الفاضل المهدي وعبد الحليم محمد وحل محلهما كل من عبد الرحمن عابدون وداود الخليفة عبد الله، حيث أصبح المجلس مكونًا من:[1] فيلمون ماجوك عبد الرحمن عابدون إسماعيل الأزهري خضر حمد داود الخليفة عبد الله وشتان ما بين شخصيات الستينيات وشخصيات مجلس سيادة القرن ٢١ ... أيا من هؤلاء له تاريخ ناصع في السياسة وهذا التاريخ هو الذي يدافع عنه ... ولا يحتاج لي (الجوخ) لاستدراجه في برنامج تلفزيوني للدفاع عن كسبه السياسي الغير موجود أصلا ...
10-04-2021, 09:50 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
Quote: يا عم الحاج انت بتغالط في شنو! هو انت حسابك كرور ساي عايز سلفقة توصلها نوفمبر انا قعّدت ليك الكلام ووريتك نوفمبر جا كيف!
أنا عمك الحاج يغالطك ... أفااااا قالولك أنا جديد هنا ... ولا قالولك أنا حاتم ود المصرية ... إنتا ومولانا شخصيا لكم السمع والطاعة ... واجلطا لينا فوق رويسنا دا ... بس ما تنفعل ... 😅😅😅😅😅
10-04-2021, 09:59 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
Quote: حسب معرفتي بعساكر السودان ما ح يسلموها مين يشترط يا Salah Zuber
وآلله يا إخلاص حسب معرفتي بالبرهان (العساكر التانين ما بعرفم) ... ما عندو مانع يسلما في عقاب النهار دا ... بس جماعتك ديل يجهزو ويحددو من هو الرئيس المدني القادم الذي سوف يعبر بنا إلى الإنتخابات ...
10-04-2021, 10:28 AM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 8024
نفترض سلموها السؤال المهم هو هل سيتم تحجيم الدور الذي يلعبه البرهان في الأحداث السياسية بعد أن يُبعد من رئاسة المجلس السيادي؟
خلال الفترة التي مضت من الفترة الإنتقالية كانت للبرهان تحركات وسلطات أكبر من ما تتيحه له الوثيقة الدستورية لمنصبه. فمجلس السيادة بكامله هو مجلس شرفي يمثل رمزاً للسيادة الوطنية وليست له أي سلطات تنفيذية. ورئيس المجلس السيادي هو من يرأس إجتماعات المجلس ولكنه ليست له أي مميزات متعلقة بتمثيله للدولة مختلفة من تلك الممنوحة لبقية الأعضاء.
هل كانت فاعلية البرهان خلال الفترة الماضية مستمدة من موقعه كرئيس لمجلس السيادة أم من كونه يمثل الشريك العسكري في الحكومة القائمة بالشراكة بين العسكر والمدنيين؟ هل سيتراجع البرهان إلى المقاعد الخلفية بعد إبعاده من رئاسة السيادي ويصبح عضواً عادياً مثله مثل رجاء نيقولا عبد المسيح؟
10-04-2021, 10:54 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
والله يا مولانا حسب اجتهادي براي كدا ... سوف يظل البرهان هو القائد العام كما هو معلوم ... بالتأكيد فترة جديدة من تطور الثورة السودانية تكون قد بدأت برئيس لمجلس السيادة مدني ورئيس وزراء مدني مما يعزز الإستقرار السياسي ويفتح الطريق لإتمام مطلوبات الفترة الإنتقالية وصولا لانتخابات عامة تجرى بعد ١٨ أشهر من تقلد الرئيس المدني ... (خرخره مافي) ... من المفترض الفترة السابقة والتي ترأس فيها البرهان والفترة القادمة التي سوف يرأسها رئيس مدني تكون محكومة بالوثيقة الدستورية ... ما كان يقوم به البرهان خارج الوثيقة تم برضا الشريك الموقع على الوثيقة ... غالبا في فترة الرئيس المدني سوف يتمسك الشريك العسكري بتطبيق ما جاء في الوثيقة by book ولن يسمحوا بأي تجاوزات ولك أن تعلم بأنهم جميعا يرنون للذهاب للتقاعد (جنرالات السيادي والقيادة جلهم وصل الستين) عشان كدا عايزين يصلوا محطة الإنتخابات في موعدها وهذا ما سوف يركزون ويعملون عليه ...
10-04-2021, 10:33 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
Quote: الوحيد الذي إنبرى للدفاع عن القوى السياسية التي طالبها البرهان (بحكم موقعه) في خطاب المدرعات بالتوحد للعبور بالفترة الإنتقالية ...
لا يا ابو صلاح شكلك ما تابعت كويس, في خطاب المدرعات البرهان بادر بالهجوم و بالواضح كدا قال تقولوا هبوا! هبوا على منو علينا احنا الحمينا الثورة وبتاع! شغل كتحتني في الموية, راعي الضان في الخلا - خليه الراعي - حميدتي بكون فهم انو هبوا دي مقصود بيها شنو! لكن الكلام واضح ومقروء مع الشكلة مع سلك قبل كم يوم, واضح انه الفكي ما سكت على العرقلة البتحصل داخل المجلس و مسرحية البرهان دي قاصد يوصل بيها لاجتماع القاعة واعلان قحت 2 عشان يجوط المسألة دستوريا لكن وين مع المبعوث الامريكي هههه
10-04-2021, 10:49 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18426
Quote: والشعب يا أبو صلاح الشعب ما ختيتو في القوسين ديل لشنو ؟؟ مبالغة ياخ .
خخخخخخخخخ مبالغة دي نعتبرا حتيتت إنفعال ما دام ما جات معاها خخخخخخخخ المعتاده ... أنا هنا يا عزيزنا طلحه بتكلم عن السياسيين وتعريف السياسة ... نعم ضربتا مثال بي الفكي ووجدي لأنو البيعملوا فيهو دا ممكن يبقيهم نجوم شباك في أي حاجة إلا السياسة ...
Quote: السياسة هي فن الممكن ... هي ليست بطولات زائفة (الفكي ووجدي) ...
10-04-2021, 11:25 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
Quote: من الذي وكلك للحديث نيابة عن الطبقة السياسية الحاكمة .
يا زول الهجوم والشتيمة التي يتعرض له الجيش منذ إعتصام القيادة (سمع أضاني دي) ويوميا طوال أكتر من سنتين في الأسافير والتلفزيونات وفي سودانيز دي لغاية اليوم ... تصم منها الأضان ... كلام برهان كان كلام عام لي اتهام مفتوح كان ممكن يناقش في اجتماع مشترك ... والبودي الفكي يعتبرو هجوم شخصي يعمل degrade لتاريخو السياسي شنو ... هو وينو تاريخ ود الفكي السياسي ... بعدين ما تجيب الكوت كلو عشان تديني سبب واحد يخلي ود الفكي يتكلم نيابة عن سياسي الطبقة الحاكمة ...
Quote: في خطاب المدرعات البرهان بادر بالهجوم و بالواضح كدا قال تقولوا هبوا! هبوا على منو علينا احنا الحمينا الثورة وبتاع! شغل كتحتني في الموية, راعي الضان في الخلا - خليه الراعي - حميدتي بكون فهم انو هبوا دي مقصود بيها شنو!
هسي عليك الله دا كلام ذات أهمية عشان يوصل البلد دي للوصلنا ليهو في خلال ال ٨ يوم الفاتو ... الآن البلد في عدم إستقرارا سياسي (دا العنوان العريض داخليا وخارجيا ... وخارجيا دي الأخطر) ... والبلد انقسمت وقحت انقسمت ... وألفرصة اتيحت لي ديناصورات أحزاب المؤتمر الوطني ... كلو بسبب الكلام الما عندو قيمة أو وزن يساوي ما حدث ... هنا تظهر فطنة السياسي وعولاق الناشطين ...
10-04-2021, 11:29 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
يا ابو صلاح خليك فير شوية ما ممكن تبرر للبرهان كدا على طول الخط اسي غض النظر عن كل شي قرار سحب الحراسة عن عضو مجلس سيادي و عن مقرات لجنة دستورية دي علية شافع بعملها خلي ضابط عظيم شغال اربعين سنة زي ما قال
10-04-2021, 12:08 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18426
يا صلاح والله ما في أي انفعال ولا حاجة كعبة المهم عايز أقول ليك أصلا صناديد لجنة التفكيك ود الفكي، وجدي، مناع، وبقية أسنان الليث البارزة ما عايزين يكونوا نجوم سياسة ( حسب ما أرى ) عايزين يكونوا نجوم الشعب وخدامو ونجحوا في ذلك نجاح منقطع النظير حتى الآن . قلت في بوست مجاور بتاعي انو لجنة التفكيك خطفت الأبصار وأدارت الرؤوس والدليل الترندات والهاشتقات المالية مواقع التواصل ودا دليل على أنهم نجوم شعب وليس سياسة ياخ ديل نجوم أكتر من حمدو ........... (خخخخخخخخ)
10-05-2021, 06:27 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
Quote: نوفمبر دا حنك قالوا اتفاق غير مكتوب بقسمة الفترة الاضافية سبعة شهور للعسكر و ست للمدنيين كدا تنتهي الفترة في نوفمبرطبعا اذا اتفاق مكتوب الله اعلم يتنفذ مع اطماع البرهان و حميدتي خليك من يكون ما مكتوب اساسا و انت عارف الغلاط السوداني!
كدي يا حاج نبدأ من هنا وبعدين نمشي نشوف تبريرات البرهان دي ... الإتفاق على الوثيقة الدستورية قايم على الشراكة بعد مجهود ودماء ودموع ... لأنو اصلا الشراكة كانت مرفوضة او أن يقتصر تمثيل العسكر على اتنين تلاته والغالبية والريادة تكون للشق المدني ... ثم من بعد ذلك تم الاتفاق بتاع ٢١/١٨ شهر مع أفضلية ٣ شهور للعسكر ... المستغرب ليهو لماذا تضاف أفضلية جديدة بزيادة فترة العسكر تاني والمرة دي الزيادة ١٣ شهر؟ هل (طالب) العسكر بإضافة ال ١٣ شهر دي لفترتهم ول الموضوع سركنه وجعلية ساي من الشق المدني؟ ... شكلو الشق المدني غير راغب أو غير مهتم بالمطالبة بحق من حقوقهم ... حكاية تبريري لفعايل البرهان كنت أتمنى تديني مثال او أمثلة (على وزن :- تبرر على طول الخط) عشان نعرف عدم الفير هل في تبريري للبرهان أم هي فوبيا كراهية العسكر الماسكه القحاته إن جنرال ... مؤكد قرار سحب الحراسة من اللجنة بي رئيسها خطأ ... وكتير جدا من القرارات الخطأ صدرت من الحكومة المدنية دي منذ تكوينها قبل سنتين وبعض القرارات صدرت وبعد ساعتين صدر قرار تعديلها ... منو الحاسب الحكومة أو منو الطالب بي محاسبتها ... هنا ما تشيف وهناك تفنقل عيونك كبار لأي خطأ ... بي فير بليس ... بعدين ود الفكي يحرسو لي شنو ... خخخخخخخ
Quote: هل (طالب) العسكر بإضافة ال ١٣ شهر دي لفترتهم ول الموضوع سركنه وجعلية ساي من الشق المدني؟ ...
الزيادة طبعا بسبب اتفاق جوبا الاعاد حسابة الفترة الانتقالية من تاريخ توقيع الاتفاقية و للاسف التعديل اغفل النص الصريح على كيفية التعامل في الفترة الزائدة دي, نبيل اديب قال طالما لايوجد نص يبقى يعاد احتساب فترة العسكر من جديد بالتالي الانتقال في يونيو 2022, طلع فيصل محمد صالح باعتباره اقرب منه قال لا تم النقاش داخل المجلس و الحرية و التغيير و تم الاتفاق على قسمتها بين المكونين 7+6 هذا الاتفاق الخلى ناس الفكي و الاصم و القراب من الكابنت يتكلموا عن نوفمبر لكن للامانة نحن ما شفنا شي مكتوب فا سؤالك اعتقد اجابته انه القسمة دي جات نتيجة نقاش دار, و طبعا العسكر واضح لكل من يقرا انهم ما عايزين يفكوها نهائي ما واقعة ليهم قصة التخلي عن الصلاحيات و التمدد العجيب المخالف للمنصوص عليه في الوثيقة, حاليا البرهان يتصرف كأنه رئيس جمهورية! دا كلو بحجة رئاسة المجلس لو رجع عضو عادي - ودا ما ح يحصل - سيفقد هذه السطوة و واذا حاول استغلالها لاعتباره قائد عام للجيش فا من الممكن ان يعفيه مجلس السيادة الذي يعتبر القائد الاعلى حسب الوثيقة - طبعا دا كلام نظري لأن آلية اغلبية الثلثين في القرارات لا تسمح لمكون ان يفرض ارادته, لكن ما تنسى في مجلس تشريعي بل في بيع عديل وممكن لو نجحت في تعشيم العطا او هناي انه ح يمسك المنصب مثلا يحصل بيع للبرهان عادي! المهم.. الواضح انو البرهان ما ح يفكها باخوي و اخوك و في نفس الوقت ما عنده طريقة يتمسك بها مع الضغط الشعبي و الدولي الا يسوق البلد لمصيبة كبيرة تتيح اعلان الطوارئ و تجميد العمل بالوثيقة وما الى ذلك واهو انت شايف الاشارات براك
بالنسبة للتبرير على طول الخط فا قصدت لومك للمدنيين في الازمة الاخيرة, نسحب طول الخط عادي ما مشكلة!
10-05-2021, 09:21 AM
Hatim Alhwary Hatim Alhwary
تاريخ التسجيل: 01-23-2013
مجموع المشاركات: 2418
ابرهة رب الفور يقابل السفراء ابرهة رب الفور يهنئ مكافحة الارهاب علي الشهداء( ضحايا وقرابين لام الدنيا التي رفع لها ابرهة تعظيم سلام) ابرهة رب الفور يفعل ويفعل يا زول انت صدقت ولا شنو.
خوازيق البلد زادت وكلو من ابراهيم الشيخ
10-05-2021, 09:43 AM
اخلاص عبدالرحمن المشرف اخلاص عبدالرحمن المشرف
تاريخ التسجيل: 03-04-2014
مجموع المشاركات: 10314
Quote: المهم.. الواضح انو البرهان ما ح يفكها باخوي و اخوك و في نفس الوقت ما عنده طريقة يتمسك بها مع الضغط الشعبي و الدولي الا يسوق البلد لمصيبة كبيرة تتيح اعلان الطوارئ و تجميد العمل بالوثيقة وما الى ذلك واهو انت شايف الاشارات براك
يا باش ... تعرف البضحكني شديد إنك اليومين دي ضيقتا المسافة بينك وبين الهادي ... أنا بتكلم عن الإشارات ... ههههه قطع الإشارة غرامتا ١٠٠٠ درهم ... يا باش إتا قايل ناس جهاز الأمن بتاعننا ديل عندهم المقدرات لترصد هيك خلايا ... خرطومك دي مليانه أجهزة مخابرات من الشرق والغرب والجيران ... فإذا برهان عايز يدقس القحاته ما بقدر يدقس شفوت المخابرات الخارجية ... العالم الخارجي مفتح لي البيحصل داخل الخرطوم عندو أمل في القحاته ... نجي لي البلأحمر ... أول شي حكاية ما بفكها بي اخوي وأخوك .. كدي جهزو زولكم وقولو ميعاد تسليم الرئيس المدني قد حان ... ما عندي مانع نتشارط يا قول بت المشرف علي ردة فعل البرهان ... ثم إن الضغط الشعبي وهو الفعال اكتر من الدولي حا تجيبو من وين ... أوع تقول الشارع الانقسم بعد يوم السبت ٢ أكتوبر ... وأخيرا الكرسي الذي سوف يغادره البرهان لن تستطيع قحت بي كوادرها الموجوده على المسرح الآن ملء فراغه ... وربك يستر للقادم ...
10-05-2021, 05:41 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
في اسئلة كتيرة- لكن بامانه في حاجات ما مفهومة: 1- هل سيعاد تشكيل مجلس السيادة بعد انتهاء فترة العسكر في الرئاسة؟ 2- هل سيتم تعيين الممثل المدني مباشرة من قوى الحرية والتغيير- ام سيكون هناك تصويت من داخل المجلس؟؟ 3- السؤال الأهم يا ابوصلاح - هل قوى الحرية والتغيير تتمتع بذات الزخم داخل المجلس السيادي والشارع السياسي؟؟
الحقيقة الوضع ما واضح خالص.
10-05-2021, 06:08 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18426
Quote: فإذا برهان عايز يدقس القحاته ما بقدر يدقس شفوت المخابرات الخارجية ... العالم الخارجي مفتح لي البيحصل داخل الخرطوم عندو أمل في القحاته ... نجي لي البلأحمر ... أول شي حكاية ما بفكها بي اخوي وأخوك .. كدي جهزو زولكم وقولو ميعاد تسليم الرئيس المدني قد حان ... ما عندي مانع نتشارط يا قول بت المشرف علي ردة فعل البرهان ... ثم إن الضغط الشعبي وهو الفعال اكتر من الدولي حا تجيبو من وين ... أوع تقول الشارع الانقسم بعد يوم السبت ٢ أكتوبر ... وأخيرا الكرسي الذي سوف يغادره البرهان لن تستطيع قحت بي كوادرها الموجوده على المسرح الآن ملء فراغه ... وربك يستر للقادم ...
غايتو يا أبو صلاح وبناء على المقتبس الفوق دا لو ما خايفك تزعل كان قلت ليك اتا عمر التاج الكان داسيها داك خخخخخخخخ ع العموم ما تشيل هم الشارع ما منقسم وح يفرض ارادتو لما تجي حوبتا والبمسك الحكومة من القوى الثورية قاعد واحتمال يكون بقرأ في كلامنا دا اتا بس قول خير واتفاءل اذا بتريد خخخخخخخخ
10-06-2021, 08:05 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
Quote: البرهان دا عنده فرصتو انو يدخل كتاب التاريخ السوداني من اوسع صفحاتو او كمان يدخل السجن من اضيق ابوابو ولهم في البشير عبرة لو يعتبرون
حباب الهواري وزارتنا البركه ... الفرق بين برهان والبشير هي إنو البشير رضع من الكوزنة لامن شبع قبل ٨٩ ... وبرهان رضع من العسكرية لامن شبع قبل أبريل ٢٠١٩ ... يعني البرهان ما عندو علاقة بالسياسة والسياسيين إلا بعد ما لقى رقبتو مورط بعد إنسحاب بن عوف وعبد المعروف ... برهان ولاءه للجيش دون المجلس السيادي ... وعادي جدا يتخلى عن المجلس في أقرب لفه ... وحتى العسكرية أداها شبابو وعمرو وما قصر في حقها ... ما عندو ولاء لأي أيديولوجيا داسيها تحت كسكتة الجيش (دقنوسو) ... وذهابه للتقاعد خدمة له لا تقدر بثمن ... هكذا يفكر كل من وصل مرحلة البرهان في الجيش ...
10-06-2021, 08:11 AM
Hatim Alhwary Hatim Alhwary
تاريخ التسجيل: 01-23-2013
مجموع المشاركات: 2418
وعشان كده يا ود الزبير انا بقول يا ريت فعلا البرهان يكون مايقول ويلتزم بالوثيقة الدستورية ويسلم العهدة وفق تعبيرك بعنوان البوست فإن فعل فقد سطر اسمه بالنور في تاريخ العسكرية والسودان وإن مكر وأدبر فقد اختار نهاية أسيفة في النهاية النصر لمولانا الاسمر شعب السودان
10-06-2021, 08:24 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
Quote: انت البرهان دا من البسابير ولا شنو مراهن عليه كدي
هو نعم من نفس المنطقة ... ودي ما المشكلة ... المشكلة أنا براهن علي طريقة تفكير برهان بي حيادية تامة ..ّ. وبي معرفة توفرت لي بحكم مخالطتي لقادة البرهان في الفترة الأخيرة ... المحيرني إنتا زماااان كان شعارك في المنبر دا :- أعرف الحق تعرف أهله .... أكيد بعد ديسمبر ٢٠١٩ غادرتا المحطة دي من غير رجعة وباريت المناضلين ... يعني نسويلك شنو ... طلع نضارة الولاء بتاعت قحت دي وسوف ترى ما أرى ...
10-06-2021, 08:29 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
يا الشيخ اسئلتك دي المفروض يجاوب عليها ناس قحت ... أو بالأصح (ناس قلوبهم شتى) ... أو بالأصح (حاضنة الأربعة أرجوزات) ... شوفتا يوم ١٢ أبريل ٢٠١٩ وكان يوم جمعة ... طلع الأمين السياسي للمجلس العسكري (خلينا نقول اللجنة الأمنية للبشير إحتفاءا بالمناضلين) وقال كلام واضح وصريح لتجمع الحرية والتغيير (قحت) قال ليهم :- يا إخواننا نحنا عساكر (نكرات) ساي ... أمس القريبة دي ما كان في زول بيعرفنا ... تعالو أول شي علمونا السياسة وتعالو كونو حكومتكم المدنية ونحنا بنحرسا ليكم ... تعرف يا الشيخ في اليوم دا الجمعة ١٢ أبريل ناس (قلوبهم شتى) ديل لو أعلنوا تعيين رئيس وزراء مدني بس ... كنا إجتزنا مطبات ضخمة جدا حدثت بعد ذلك وكنا حفظنا أرواح عزيزة جدا ... هسع اسئلتك دي إجابتها حا تكون بعد ١٨ شهر من اليوم الذي من المفترض يسلم فيهو البرهان العهدة لرئيس مدني ... الشيخ ود الشعبية جنوب ... ياخي ربنا يمتعك دنيا وآخرة ... والرحمة والمغفرة للمرحوم عزالدين الصبابي ووالدته حاجه أمنه ... هاك اللقطة دي ...
Quote: ياحاجة أمي قالت ليك أدينا فسيخ بي "ريال" إنت ياولد ده وكت فسيخ هسه أنا قالوا لي جيبوا وبس إنت أمك دي قايله أبوك بلقى القروش دي في الواطه..كل يومين جايين دايرين فسيخ يا حاجه عليك الله أدينا لانو مستعجل أنا مستعجل لاحق شنو ماشي الكوره الكورة التكسر كرعينكم دي..كان إنت كان "عزالدين" يا حاجه قولي "تاج الدين" عزالدين ده أكبر مني كلكم سجم في سجم كان إنت كان هم..إنت هسه فطرت ولا لسه يا حاجه فطور شنو الوقت بدري لسه..أنا يادوب شربت الشاي أقعد أول حاجه أفطر يا حاجه أنا ما داير فطور..إنت ما عندك فسيخ ولا شنو
يظهر "نجم الدين" خارجآ من الغرفه يا نجم الدين عليك الله قول لي أمك تدينا الفسيخ..عندنا مباراة مع ناس التيمان وقرجه في ميدان الجهاد يرد نجم الدين..تصدق أمبارح أنا ومعاي "وحيد" الصيني إتعشينا في "مارلبورو" وما قال لي يا نجم الدين عليك الله يكلموا ليك شنو ياخي..ما حاتجي تقضيها لينا كواريك ساي والله يالشيخ انا ما بكورك إلا لمن زول يغلط في الباص خلاص خلاص ..كلم أمك خليها تدينا الفسيخ ده عشان نمشي
تظهر الحاجه مع إبريق الشاي قائله: يا ولدي الشيخ كان ما شربت الشاي ده ما بتطلع من هنا..إنت داير أمك تقول علي بخيله خلاص أنا بشيل الشاي معاي يشيلك النمل..شاي شنو البتشيلو ده..إنت ما نصيح ..أقعد بس ..جيب البنبر ده رشفه كبيره من الشاي..ولسعه حاره لان الشاي ساخن جدآ يا حاجه ياخي الشاي ده حار
10-06-2021, 11:19 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
هههه سحار انا! والله نقرتها ساي المهم انا ولائي المطلق للثورة و لدماء الشهداء و للتحول الديمقراطي, قحت مجرد تحالف مرحلي ينتهي بنهاية الغرض منه, ويجمع احزاب و جماعات قلوبهم وولاءاتهم وفهمهم في الدنيا دي شتى, فا دا خطأ مفاهيمي ان تتعامل مع قحت كأنها على قلب وولاء رجل واحد. البرهان ولو كان مبرا من كل عيب فا كونه القائد و الحاكم المسؤول عن كل ارواح واعراض السودانيين وقت وقوع المجزرة - لاحظ لم اقل تورده فيها بل المسؤولية عن الرعية - يكفي لانتقاده و ذهابه! انت بتديه كردت على شنو ما عارف وقد بان كذبه و ضعفه و نفاقه في أكثر من موضع.
10-06-2021, 11:50 AM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2735
Quote: الشيخ ود الشعبية جنوب ... ياخي ربنا يمتعك دنيا وآخرة ... والرحمة والمغفرة للمرحوم عزالدين الصبابي ووالدته حاجه أمنه ... هاك اللقطة دي ...
😃😃😃
يا سلام يا صلاح...ذكريات الطفولة. حبيبنا (عماد) اورد الخاطرة في (بحري وطن الأصالة)- بدون ما ننسى حبيبنا (الحاج حمد) و منبر الشعبية في سودانيزاونلاين- لانها اول منصة تم التوثيق فيها.
الا رحم الله الحاجه (آمنه ابوالريش) والاخ الكريم (عزالدين الصبابي).
10-06-2021, 11:52 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
بقيت صحفي؟ يا باش ... انا هنا بتكلم عن توقعاتي لردة فعل البرهان حين إنقضاء أجله كرئيس مجلس السيادة ... الكرديت الوحيد حا يكون لي أنا إذا صدقت وليكم إذا عنقد ... بالتأكيد الكوت الجبتو ما فيهو حبة كرديت للبرهان ... كدي جيب من جوا وبلاش الطرف أمكن تصدق ...
10-06-2021, 02:05 PM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
Quote: غايتو يا أبو صلاح وبناء على المقتبس الفوق دا لو ما خايفك تزعل كان قلت ليك اتا عمر التاج الكان داسيها داك خخخخخخخخ
ياخي بالغتا فوكا ... شن جاب لي جاب ... عمر زول كتااااب وعاشق للكتابة وممكن يدور كتابة من الصباح للعشية ... ياخي أنا زول عنقالي ساي ... أنا إذا كتبتا صفحة واحدة في اليوم تلقاني مطلش عديييل اليوم كلو ... بعدين عمر خبرتو كبيرة جدا في دروب السياسة (داسيها) ... أنا علي الحلال علاقتي بالسياسة والكتابة فيها بدأت ساعة قتا سلام في سودانيز دي ٢٠١٥ ... وبي راحتك تعتبرني كوز ولا مق ...
Quote: ع العموم ما تشيل هم الشارع ما منقسم وح يفرض ارادتو لما تجي حوبتا
قال ليك حا يلبس الجلابية والقميص نص كم ... دا قبل يوم السبت ٢/١٠ ... الله يعلم الشوارع القادمة شكلها حا يكون كيف ...
Quote: والبمسك الحكومة من القوى الثورية قاعد واحتمال يكون بقرأ في كلامنا دا اتا بس قول خير واتفاءل اذا بتريد خخخخخخخخ
يا زول نقول خير ونريد واي حاجة بس ما تخذلونا ...
10-06-2021, 03:09 PM
بسمات الشيخ بسمات الشيخ
تاريخ التسجيل: 05-22-2021
مجموع المشاركات: 834
مستحيل العساكر يسلموا السلطة للمدنيين بعد ما ضاقوا شهوة السلطة .. ولكن احتمال ده يحصل بعد ٣٠ سنة اخرى... ونحيا ونشوف .... ما تخليكم متفائلين اكثر من اللزوم ....وما تنسوا فريق الخلا المدسي بورا ومتحين الفرصة...
10-06-2021, 05:15 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
سلم العهدة زي كأنه. سلم نفسك من يظن أن العسكر حيسلموا ويلتزموا بالاتفاقية والدستور فهو واهم أثبتوا ..قلة عقل وقلة أو انعدام ذكاء بصورة غريبة المهم في خطة جهنمية حمراء آتية من المطبخ الشمالي وقاعدة تستوي في فرن جبرة يا جماعة.. العدو راقد شمال...لايمكن أن يحكم السودان عاقل أو ناس مثقفين ومتعلمين مواكبين التطور وقلوبهم على البلد ... وحيطوروا البلد...عشان كدة السودان لازم يحكموه العسكر ..لأن فيهم بلادة وضعف نظر وهو المطلوب..في نظرهم....بالله في اغبى من نميري والبشير وعبود. والبرهان ..ما اظن
10-07-2021, 07:00 AM
Hatim Alhwary Hatim Alhwary
تاريخ التسجيل: 01-23-2013
مجموع المشاركات: 2418
حباب بسمات وأحمد ... مروركم بي هني مافي شك مفرح ... الهواري إزيك ... شكرا على رفد البوست بي كلام الزول دا ... هي في النهاية وجهة نظر تصيب وتخيب ... الزول دا بعد اطلاعو الواسع وتخصصه في تحليل المواقف السياسية حول العالم ... إلا أنه تنقصه الواقعية بسبب عدم معرفته بخصائص المجتمعات التي يدس أنفه داخلها ... الود مفقود تماما بيننا منذ عشرات السنين ...
نمشي phase 2
10-07-2021, 10:14 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
الكوت دا من بروفايل المدعو صلاح الزبير الكلام دا أنا كتبتو داخل مستشفى أحمد قاسم الأسبوع الثالث من أغسطس ٢٠١٥ وأنا في إجازة طارئة بجوار الوالدة ربنا يتولاها برحمته ويسكنها الفردوس ... كنت على قناعة تامة بأن البلد دي ليست في حوجة لي سياسيين او عساكر لحكمها بقدر حوجتها لي سواقين مهرة يسوقو هذا الشعب للإيمان بقيمة العمل والعمل فقط لينهض هذا البلد ونلقى لينا مكان وسط الأمم ...
عشت تجربة قيام ٣ مدن داخل مدينة أبوظبي ... المدينة الجزيرة التي بدأت بمساحة محدودة ومباني دورين تلاتة بحد أعلى ٤ أدوار (أرضي وتلاتة طوابق) ... شهدت في خلال ال ٢٠ سنة الأولي المشاريع الضخمة لقيام مدينة عالمية بحق وحقيقة ... شهدت كيف الناس ديل ردمو البحر لزيادة المساحة الكلية للجزيرة لتستوعب آلاف المباني وملايين الناس ... شهدت كيف تم تغير نمط المباني من ٤ أدوار حين وصولنا أبوظبي مطلع الثمانينات لي ٨-١٢ دور ابتداء من ١٩٨٦ ثم من ١٢ - ١٨ دور واكثر بعد النصف الثاني من التسعينيات ... بحكم عيشتنا خارج أبوظبي اكتر من ٣ عقود (ضهاري أبوظبي) كنا نلاحظ هذا التغيير اكتر من ساكني أبوظبي ... عادي عمارة ٨ أدوار بي حالة ممتازة يتم إزالتها لقيام عمارة ١٨+ دور ... شهدنا أيضا كيف تم تغيير كافة شوارع أبوظبي ... هي نفس الشوارع بس تم توسعتها بإزالة الأشجار من وسط الشارع (الجزيرة) الفي النص .. كما تم إزالة الصواني (الدوارات) واستبدالها بي نظام الإشارات المرورية في كل الشوارع .. الكورنيش - خليفة - حمدان - الكترا ... إلخ شهدنا قيام شبكة الصرف الصحي الضخمة بين شوارع أبوظبي حتي محطتها النهائية قبل جسر المقطع ... شهدنا مشروع إنارة كل شوارع أبوظبي وتجهيزها بشبكة CCTV وشهدنا ... وشهدنا ... لي بكرة ممكن أحكي ... الموضوع ليس بالمال وحده يحيا الإنسان ... بلدنا دي لا ينقصها المال ... مشكلتا مالا ممحوق لأن من يدير هذا المال (عبيد الأيدولوجيا) ما عندهم فكر لي نهضة ونماء هذا البلد ...
10-07-2021, 11:44 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
الشيخ زايد بن سلطان آل نهيان هو حاكم أبوظبي ... رجل قائد بالوراثة وقائد حقيقي بالفطرة فهو شبه أمي ولا يحمل شهادات عليا أو سفلى ولا يزين كتفه نجوم او صقور او سيوف ... بي ذكاؤه الفطري إستطاع أن يجمع الكثير جدا من التكنوقراط من حول العالم بأعداد مقدرة من التكنوقراط السودانيين في جميع التخصصات وخاصة في التي تشكل الرافعة الأساسية للنهضة مثل دائرة التنظيم والإدارة والأشغال العامة والبلدية وأسس جيدا شركة بترول أبوظبي الوطنية (أدنوك) وهي الرافعة المالية لهذه النهضة ... شيخ العرب الأمي لم يكن لديه طموحات ماركس وحسن البنا وعفلق وناصر ومحمود بتغيير دين الناس أو تجيير الناس عن طريق تغيير افكارهم لبقاءه حاكما ... كان همه الوحيد على حسب فطرته النهوض بالمواطن وعيشته وراحته وبالتالي النهوض بوطنه ....
سوف تظل ما يسمى بالأحزاب الأيديولوجية الحفار الذي يغتس هذه البلاد إلى أسفل سافلين ما ظلت على قيد الحياة ...
10-07-2021, 11:56 AM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18426
يا أبو الصلح اعتبرك شنو ياخ ؟ هو انا عمر التاج الما باقي ليهو إلا يقول هي لله لا للسلطة ولا للجاه ما اعتبرتو اعتبرك انت يا خوي أنا حريص على اخرى ما بفكو أبدا بالاعتبارات الساي دي خخخخخ بس مق دي ما فهمتها ياها الكلمة كدا واللا عندها باقي ؟؟ من جهة اخرى بالغت أنت في حكاية عمر كتاب دي قصد جواط أكيد خخخخخخخخ
10-07-2021, 12:11 PM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
في شنو ... البتاع دا ناقص كم حاجه ... هل زارتكم الكراكه أمس عصرا ... شكلو التشلت والتقفل (أكسر التاءات) كان مدور هنا ... بركه البوست الشين داك مشى الخور ... غايتو حاج العوض وحوارو عارف التقول قاموا ونشأو في أرض الحيوان (حي في بحري) ... شكلو قريبي دخل الرج مرة أخرى ... أحسن ... فكوهو بعد الإنتخابات ... إذا ...
10-08-2021, 07:22 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
غالبية الشعب السوداني غير مهتمة بالأحزاب الموجودة على الساحة ... وتصل العلاقة حد الكراهية ... دا من ناحية ... من ناحية أخرى نجد حمدوك تلألأ نجمه بفضل كسبه كرئيس وزراء الفترة السابقة وبفضل العواسة الرديئة لكافة سياسي الفترة الإنتقالية ... غايتو حمدوك ممكن يكون بول كغامي (الرئيس الحالي لرواندا) إذا تمكن من المحافظة على المسافة الحالية بينه وبين الأحزاب الموجودة على الساحة وخاصة" حزبه السابق ... وكذلك تمكن من تأسيس حزب هدفه الأول والأخير هو بناء ونهضة السودان ... أنا متأكد جماهير ثورة ديسمبر وخاصة الشباب سوف يتبعونه وسوف يضعونه في مقدمة كل الأحزاب ...
10-08-2021, 09:04 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
(وسوف يضعونه في مقدمة كل الأحزاب ...) اكثر من يتضرر من وجود هذا الحزب هم من يدعون بالإسلاميون (والإسلام منهم براءة) ... بكل طوايفهم .. أنا ما عارف ثقتهم في الفوز بالانتخابات دي جاياهم من وين بعد عملتهم (خريتهم) خلال ال ٣٠ سنة ... ما أظن فوزهم حا يكون straight ... مافي شك سوف يستخدم المال المكتنز خلال ال ٣٠ سنة ...
10-09-2021, 08:07 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
التعالي والتذاكي ورفض الحلول الواقعية أمراض أصابت النخب الحاكمة وداعميها من الطبقة المثقفة (طنباره) ... منذ ما قبل الإستقلال ... كانت سببا في تحول مطلب الحكم الذاتي في ستينيات وسبعينيات القرن الماضي من قبل الجنوبيين وقيادتهم إلى دولة كاملة الدسم في ٢٠١١ ... كانت نظرت هؤلاء النخب للمشكلة والقيادة الجنوبية هي نفس النظرة إلى ترك وربعه ... هناك الدينكا وجوزيف دينق ... وهنا الهدندوة وترك ... نظام فرق تسد ... إني أرى دولة شرق السودان قد بدأت في الظهور بفضل تقاعس الحكومة وبفضل التدخلات الداخلية للجبهة الثورية (ورقة إتفاقية جوبا تبلها وتشرب مويتا) وبفضل التدخلات الخارجية (بيان الترويكا) المساند للحكومة ... والتي تعتبره الحكومة ونخبها صك لدخول الجنة ... وهو خارطة طريق لتفكيك ما تبقى من السودان ... لقطة الإسبوع :- ترك قال :-
Quote: لكن المكون المدني كان يريد من العسكريين إبادة شعب شرقي السودان، وفق تعبيره."
أستاذنا كمال عباس في رده على ترك :-
Quote: طبعا حميدتي وكعادته وكذبه المعهود يكون وراء هذه الفرية
وأردف :-
Quote: ياترك الجماعة ديل جونا وقالو لينا :- ماتخلو نفاخ نار من البجا ـ حرضونا علي كتلكم ونحن رفضنا ! .
10-15-2021, 05:44 AM
Salah Zubeir Salah Zubeir
تاريخ التسجيل: 08-17-2015
مجموع المشاركات: 5293
Quote: احتج نحو 400 ضابط بكلية نميري العسكرية لدى رئيس مجلس السيادة القائد العام للقوات المسلحة عبد الفتاح البرهان مما وصفوه ب(الهجوم الممنهج)، عليهم بأجندة أجنبية على القوات المسلحة والأجهزة النظامية. وقالت مصادر وفق (السوداني)، إن البرهان طالب الضباط بعدم الالتفات للهجوم، وإن القوات المسلحة تتمسك بالمحافظة على سلامة البلاد والعباد. وبحسب المصادر، فان الاجتماع ضم عبد الفتاح البرهان وضابطاً برتب المقدم والعقيد بحضور السيد رئيس الأركان ونوابه وقادة القوات الرئيسية وقادة الوحدات بالخرطوم.
المصدر :- من بوست في الصفحة الأولى بإسم أبو الزهراء ... ماهي العسكرية؟ ومن هو قائدك العسكري؟ السبت ١٣ أبريل ٢٠١٩ سألت من يجلس بجواري يا قول حبيبنا طلحة ... من هو عبدالفتاح البرهان؟ من يجلس بجواري هو المفتش العام الأسبق للقوات المسلحة ويأتي الثالث في التراتيبية لقيادة الأركان المشتركة أنذاك ... وهو برتبة فريق أول تم تعيينه كمفتش عام فبراير ٢٠١٨ وطلب منه التقاعد في سبتمبر ٢٠١٨ وتم التسليم والتسلم بينه والبرهان في ١٨/٩/٢٠١٨ ... وكانت مفاجأة للكثيرين داخل الجيش لمعرفتهم به كقائد عسكري بكل ما تحمل الكلمة من معنى ... أصابع قوش كانت واضحة في التخطيط للانقلاب الذي تم بعد أقل من ٧ أشهر ... قال لي ... البرهان هو أحد ضباطه العظام الموثوق فيه ... كعسكري لا غبار عليه ولو كنت مكانه لن أرضى بهذا الموقع وسوف أطالب بذهاب كل ضباط هيئة الأركان المشتركة وإفساح المجال لقيادة جديدة في الجيش والمجلس العسكري بعد استقالة رئيس هيئة الأركان المشتركة (عبدالمعروف) ... هذه هي القاعدة في الجيش على مستوى القيادة ... العسكرية هي الولاء التام لقائدك وتنفيذ أوامره ... قائدك دا ممكن يكون الأعلى رتبة أو الأقدم منك ... يعني لو كنت عريف وهناك عريف تم تعيينه قبلك بي يوم فهو قائدك ... الولاء في الجيش من المقدسات ... الولاء لقائدك هو عضم ضهر العسكرية .. أي خلل في هذا المعنى ينتفي وجود الجيش ... يعني البنقلب على قيادة الجيش إذا فشل بمشي الدروة وإذا نجح سوف يطيح بكل من هو أعلى رتبة او أقدم منه ... ما لم يذكره الخبر في الكوت أعلاه ... غضبة هؤلاء الضباط بسبب الشتائم الموجهة للقائد العام للجيش اعتبروها إساءة لكل فرد في الجيش ويقال بأن هؤلاء الضباط طالبوا البرهان بما هو أسوء من الانقلاب ... حفظا لكرامة ضباط وجنود الجيش ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Salah Zubeir
محمد البشرى الخضر
Hafiz Bashir
طلحة عبدالله
Hatim Alhwary
الشيخ سيد أحمد
Ahmed Yassin
محمد نجيب عبدا لرحيم
فيس بوك
تويتر
انستقرام
يوتيوب
بنتيريست