|
|
|
 Re: جك الفول اصدارة أدبية جديدة هذا العام بمع� (Re: Moutassim Elharith)
|
| Quote: كدي نزل مقدمة صلاح الزيـن عشان نفهمها ليك وبالمرة نزل باقي الخمسة قصص وقت اصلاً اصدار منشور للتنوير والوعي .. |
في كلمة " مجاناً " في الجملة الفوق دي ناقصة ....
واصلاً وقت انفتح باب التعديل فمفروض نغير " منشور " بمطوية ..
وايضاً يجب تصحيح الجملة لتبقى ستة بدل خمسة ..
عليه نعيد كتابة المداخلة مرة أخرى :
| |
 
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: أبوبكر عباس)
|
قبل كدا كلمتكم انو أنا ورب شنو كدا بحسد لي زول واحد في الدنيا دي على الطريقة التي عاش بها وهو الطيب صالح،
ما قاعد أحسدو على عبقرية الحكي؛ أنا برضو لا أقل عنه عبقرية،
قاعد أحسدو كيف عاش حياته، فاهمني داير أقول شنو يا بهم؟
مثلاً لما كان يقعد يشرب قهوة في شارع الشانزليزيه ما قاعد يشربها زي بقية الناس
أشرح ليكم كيف؟
والله، لو شرحت ليكم مائة سنة ما ح تفهموا
اسمو منتدى ولحميدتي وكباشي مائة بوست!!
الواحد يخليكم في ظلامكم يا أخ
شوفوا ليكم عيش أقيفوا في صفو
عليكم اللعنة
| |
|
|
|
|
|
|
|
|
 Re: جك الفول اصدارة أدبية جديدة هذا العام بمع� (Re: عباس محمود)
|
يقول ليـك الكتاب مكتوب عليه مجاناً يُهدى ولا يباع .. زي مطويات جمعية الدعوة والإرشاد وهداية الجاليات البتلقاها في ميقات السيل الكبير ..
تقول ليهو جناح ودار وبتاع ..
أقرب ستاند بتاع اعلانات والكتاب باذن اله متوفر :)
يا دكتور نزل باقي الإبداع .. أقشع بالنور عيون طلحتوف المستنير
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: أبوبكر عباس)
|
عطاف دا منو يا مستجير ؟؟
والله ما سمعت بيهو إلا قبل يومين بس
قالوا سجنوه .. ولا كلفت نفسي ذاتو عشان
اعرف اللخو دا عمل شنو ؟؟
من جهة أخرى يا المستجير المستميت عشان
تكون ظريف وما أنت بكائن ولا يحزنون ولا تفكر ذاتو
أنا لما جيت الصحافة جيتا كاتب مقال .. عندي
شهود أحياء منهم قسم خالد وأحمد نصر وشجرابي
وأبو العلاء محمد البشير، الخ وآخرين رحلوا منهم الاستاذ حسن
عز الدين، وعبد المجيد عبد الرازق ..
المرة الوحيدة الطلعت فيها ميدانيا كانت لقصر الشباب
والأطفال عملت حوار مع يوسف عبد الفتاح كان وزير دولة
بوزارة التخطيط العمراني واللا حاجة كدا .
أيام كان نظام الكيزان في عز هوجته وأول
ما وصلت المكتب لقيت لي كائن منتظرني
قال اسمو كمال وهو مدير مكتب يوسف عبد الفتاح
بصراحة ما عجبني شكلو خصوصا لما قال لي
الأسئلة شنو؟ قمت قلت ليهو عايز أسألو عن هوايتو
المفضلة وفنانو المفضل وماذا يعنى له الغسق ..؟؟
عاين لي شذرا من فوق لى تحت وقال لي اتا شغال
في ياتو جريدة ؟؟ قلت ليهو جريدة حائطية في
مركز شباب البشاقرة ... عاين تاني بشذر أكبر
من الشذر الأول وقال لي دقيقة .. دخل غاب ليهو
زي تلات دقائق وجاءني متنكر في شكل مخلوق
تاني مبتسم وقال لي دقيقة بس يا استاذ الوزير
معاو تلفون بس يخلص.. وبصراحة في الأول لما لاقاني عابس
وعامل فيهو ضكر بط كان احسن لي من ابتسامتو
السمجة دي .. المهم لحسن حظو واللا حظي ما عارف
جاء طالع يوسف عبد الفتاح الأول مرة أشوفو ورحب
بي شديد ثم قال لي اتفضل ..
دخلت عملت معاهو الحوار صفحتين وكانت الجريدة
مستنياهو عشان تطلع بيهو مانشيت .. والمانشيت
عملو قسم خالد مدير تحرير نجوم الرياضة ساعتها
ورئيس تحرير صحيفة قون حاليا .. ممكن تجر ليهو
حبل تلفون تسألو ..
بس دي المرة الوحيدة الرسلوني فيها الميدان وكان
اختيار هيئة التحرير برئاسة الراحل حسن عزالدين
وضم عوض احمد عمر زميل المنبر نواحي السعودية
وعبد المجيد عبد الرازق وقسم خالد وأحمد نصر ..
وجكينا القصة دي لييييييي ؟؟
عشان بس تتأكد من أنك زول كضيضيب ساي زي
ما قلت ليك ذات مناسبة ما لا وكمان ورأسك
فاضي مهما صادقت المثقفين خخخخخخ
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: طلحة عبدالله)
|
Quote:
أقشع بالنور عيون طلحتوف المستنير
|
يقشع شنو يا حيدروف ؟
عليك طلاق تلاتة دا القشعان ذاتو ما عارفو بتم كيف ؟
زيو وزي واحد اسمو معمر موسى العامل فيها جيفارا نواحي الفيسبوك
داك أنا برضو عملت ليهو متابعة وكل ما القاهو
في وشي بتمغي فيهو والجماعة يشيلو ويردمو في الوشوش
الضاحكة .. وهو يا عيني عليهو ياكلا في حنانو ساي ويعمل
فيها ما شغال بي الشغلة .
هسة المستجير دا كان قال الروب بفكو .. خخخخخخ
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: طلحة عبدالله)
|
| Quote: هسة المستجير دا كان قال الروب بفكو .. خخخخخخ |
طلحتوف عليـك ديـنك ما تفكو ..وإن طقطق .. هسه عاين منطقو الجزافي دا في بطران البطن ؛)
يا دكتور وزي ما قال حسيـن جنكم تسلبطو الناس في بعض ..
بعدين يا دكترة انا منطلقاتي بتختلف من طلحتوف وان كان مسارنا على الحد الادني بيتحد مع حق تعبيرك عن استنارك على ضوء كشافاتك الذاتية ..
بمعنى آخر طلحتوف من مدرسة الطقطقة والربيط لمن تنزّ زيت الوعي قسراً ..
انا كديمقراطي أصيل ومن المعبرين بلسان UNICEF فبتبع مدرسة .. دعوا البراعم تزهر والورود تتفتح وان تيــك Care على مواهبنا بضرورة تشجيعها وتحميسها لتبدع اكثر..
احياناً المسارات بتتقاطع تقاطع مسار التوم هجو وسيد ترك مع المثقفين وتقوم تضرسك اللغة باعتبارك رجل ناعم و حساس كدة وتحرد ويغرق الكون في العتمة،
لكن من المهم لأي لاعب ناشئ ما يتحسس من كوراك اعمامك القاعدين في طرف الميدان وياخدها من جانب سلبي ويصاب بالاكتئاب أو يقعد يشد في طرف شورت الكورة لي تحت وباكر يجي يتمرن بي ترييننج..
ابداً كلامهم ونداءتهم المتضمنة تمييز سلبي تجاه الناس الوجيهيين الوسميين او ضد التوجه العالمي في الاعتراف بحق المغايرين في السعادة او ان يقدم نفسه proudly ما القصد منها التحطيم..
ابداً كجمهور مهتم بإبداع كروي بيعتبروه مثابة تشجيع ودعم وحث وتنويه للاعب انه لو ما بذلت جهدك واصى ابداعك فمصيرك حا تبقى زي ديل..!
نشوف امونة ونجيك راجعين بعد طلحتوف يقضي وطره منك او تكورك .. أيهما سبق :)
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: HAIDER ALZAIN)
|
بختك يا المستنير ب زماله الطيب صالح وكان زول بحر بعيد القرار انشغل ب التأمل عن الكتابه فضاعت مننا اجمل الروايات
طبعا انا ما ناقد ادبى وحسب قدرتى شايف قلمك به جذوه إبداع لاتملك انت صبرا ولا زمنا لتشتعل فى مسارات السرد
فيما يتعلق ب كربون الاخوان طلحه وحيدر دى محبه ساى وانت تتوهط كرسى فى سودانيزونلاين يسمح للاخرين بتعبير مختلف فى كل شئ...دا كلام مضغوط شديد
*
الكربون لاجيال الستعينات قبضه حديده للرقبه تكتم النفس لمن الزول يفرفر يستخدمها الاطفال والصبيان فى عراك التحدى وله طقوس اكثر رعبا من العراك نفسه فى رسائل حرب قبل المعركه يحملها رسل بين الطرفين:)
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: طلحة عبدالله)
|
| Quote: كدي نزل مقدمة صلاح الزيـن |
| Quote: صداقاتك ( ما في زول يقراها تلصقك) للمثقفين |
قالت ليه موش العرقي دة؟ جيبو تعال اشربو هنا في البيت بدل معدي الليل كلو مع أصحابك
قال ليه الموضوع موش العرقي وإنما الونسة وانتي ما بتعرفي تتونسي
قالت ليه بس انت تعال جربني الليلة والله أونسك ونسة
أول ما شرب الكاس الأول قال ليه تتذكري لمن كنا في باريس؟
قالت ليه سجمي يا راجل انت من ولدوك ما مرقت من الحلة دي!
قال ليها موش قلت ليك ما بتعرفي تتونسي
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: HAIDER ALZAIN)
|
تبت من العمرة
خلاص تاني ما بعمّر
زمان العمرة بتعمل لي غسيل روحي من أدران الإلحاد الماسكة فيني شهور
المرة دي قدر ما حنستها أبت لي
قدر ما عصرت العيون يفكن ليهن دمعة قدام الكعبة اسمع هاتف يقول لي ناقة صالح دي اتآمروا عليها تسعة وعقرها نفر واحدين قالبين القرية كلها لشنو!
ذنبهن شنو النسوان الفي البيوت والأطفال الرضع؟!
قدر ما لفيت ما شفت قدامي غير حجار مرصوصة
غايتو تعب سواقة وسهر ساي
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: طلحة عبدالله)
|
يا عبد الرحيم،
أول مرّة ألاقي دينا خالد كان بدبي ومعاها تلاتة أسبانيات وطبعاً دينا تشبه الخواجيات وتسدل شعرها مثلهن،
عرفتها من غير تقول لي
وقمت كتبت في سودانيزاونلاين؛
"لاحظت في عيون إحداهن بريق عرفت أن جذوته من الصحراء فصافحتها ونطقت اسمها"
أها لاحقاً دينا قالت لي؛ يا أخي كلمة جذوته هي الخلتني أحبك،
فشنو كلمة جذوة في مداخلتك كسرتني، لكن طبعاً ما بقدر أحبك زي دينا خالد
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: Abdelrahim Mohmed Salih)
|
هههههه يا مستنير
التحيه ل صاحبه الاسم وللقهوه المشروب الساحر محفز الإبداع
والقهوه تحتاج الى مساحات مقدره لسبر اغوارها ولازال أجد فى لسانى طعم قهوه الأربعاء وتسمى قهوه عبدالقادر الجيلاني عند امهاتنا بكل طقوسها وتلك قصه لم تجد راوى
اها يا مستنير القهوه او البن كما يسمي عندنا له جذوه لاتقل ابداعا....وذلك عشق قديم
وياريت تجدع باص حريف فى مجلس القهوه التى تحولت إلى مشروب عالمى نزع منه الراسمأل والسوق الهلوع سحر لايقتصر على شرب عجول.... نتوقع قصه قصيره وانت فى قعده او وقفه القهوه الصباحيه
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: حيدر حسن ميرغني)
|
النص الثاني بالإصدارة الأدبية، نص في غاية الروعة والرقّة والخيال ، اسمو:
هدهد محمود درويش
صوفية الشيوعيين:
الهُدْهُد:
في التمانينات كنت في سنة تانية جامعة بمجمع شمبات، جامعة الخرطوم، كنت بلعب في ميدان السلة بإدمان، الميدان محاط من ثلاثة جنبات بشجر منقة غزير، ومن الجنبة الرابعة داخلية مدني، الداخليات في مجمع شمبات كانن مسميات على المحطات الزراعية والبيطرية، تجد غير مدني؛ غزالة جاوزت، نشيشيبة، يامبيو والحديبة وهكذا...
لمان المغرب أذّن وقفنا اللعب والناس مشت الجامع، مشيت النادي جنب الميدان واشتريت شاي من عثمان وقعدت في كرسي جنب مسرح مهجور فيهو تلفزيون قديم، الإمام كان بصلي بجزء من سورة آل عمران وتحديداً سرحت مع الآية: كلما دخل عليها زكريا المحراب وجد عندها رزقاً، قال يا مريم أنّى لك هذا؟
في اللحظة دي حسيت في زول واقف وراء الكرسي، قال لي:
يا ود بت أبقناية، جنّك كورة، لا مشيت الجامع لا مشيت المكتبة
إلتفت لقيت محمد سنهوري
ود جيرانا في مدني جنب مدرسة القسم الثاني وبقرأ في نهائي بيطرة
ورئيس رابطة البطري
ودائما مهندم
وجادي جداً
ومكيس واحدة دفعتم اسمها ماريا من رفاعة
تزوجها في نفس السنة بعد اتخرج،
سرنا معاهو من مدني لرفاعة،
وأنا في البنطون في بص السيرة، قلت في سري:
لو الدنيا دي جادة زي جديّة محمد سنهوري دا؛ أخير لي أتلب في البحر دا من هسّ.
إلتفت لقيت هدهد بت جيرانا الجميلة وقريبة سنهورى في طرف البنطون والنسيم يداعب خصلات شعرها، طوالي طردت فكرة الإنتحار من رأسي.
في خيالي كانت في فكرة ربط بين صلاة مغرب شمبات ديك والعذراء مريم وماريا وسنهوري وحياة زكريا ويحيى ومحسن خالد، وهدهد وهدهد محمود درويش، لكن كدي نرجع شمبات في ذلك اليوم....
بعد محمد سنهورى مشى مني، جاء عصام سحس شايل ليهو كراس وقال لي:
جيب خمسة جنيه
أديتو
سلمني الكراس وقال لي ماشي المرسى أجيب نص عرقي.
تاني يوم بعد سكرتو فكّت جاني في الغرفة قال لي أديني الكراس
قلت ليهو:
ما أديتني كراس
قال لي:
لو رجعت ليك الخمسة جنيه؛ بترجع لي الكراس؟
قلت ليهو:
هو لكن إتّا ما أديتني كراس،
إستغليت سكرتو وقلت ليهو:
الظاهر العرقي أُمبارح كان كارب،
مرق من الغرفة غاضب
جاني بالشباك حاول يترجاني أرجع ليهو الكراس،
حنني
قلت ليهو:
"لا تكسر زجاج الكون حول ندائنا"
تحولت ملامحة لفرح طفولي عجيب وتأكد من وجود الكراس معاي، وردّ لي:
لا تضطرب
لا تصطخب
واهدأ
قليلاً كي نرى فيك العناصر وهي ترفع عُرْسَها الكُليَّ
نحوك
واقترب منا لنُدرك مَرَّةً
هل نستحقُّ
بأن نكون عبيد رَعْشَتِكَ الخفيةِ؟
جاء راجع بالباب وقال لي:
جيب البتاع دا
لقاني فاتح الكراس، قريت ليهو:
قال الهدهدُ السكرانُ:
غايتُنَا المدى
قلنا: وماذا خلْفَه؟
ردّ لي بصوت عجيب:
قال المدى خلفَ المدى خلف المدى
خطف الكراس ورجع صفحة لورا وقال لي:
تعايرني بالسكر؟
أسمع الكلام دا:
لكنَّ رحلتنا إلى النسيان طالت
والحجاب أمامنا غطى الحجابْ
ولَعَلَّ منتصفَ الطريق هو الطريق إلى الطريق من سحابْ
ولعلنا يا هُدهدَ الأسرار
أشباحٌ تفتِّش عن خرابْ
قال:
اتركُوا أجسادكم كي تتبعوني
وردد أتركوا أجسادكم كي تتبعوني زي تلاتة مرات
وقال لي:
فهمت يا مادي؟
أتركوا أجسادكم
انعن ميتينك وميتين خمسة جنيهك
الصوفية عندك إلا يدقوا ليها نوبة؟
شايف الناس القاعدة في المرسى سكرانة دي؟
ديل هم الصوفية الحقيقيين
هسّ إتّا بماديتك دي فرقك شنو من الكيزان؟!
قلت ليهو: شكراً يا هُدهد
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: أبوبكر عباس)
|
بوست جميل
احمد عمر انا برضو عمرتي مابارحت وصف بوست الخواض
لاس فيجاس
طول المسافة من مكة الي المدينة كنت بتخيل في شكل الرحلة اللي
كانت بالجمال او الحصين دي غبرت كيف خلال جبال في جبال مد البصر
تحت بالبصات الحديثة زهجنا منها
اما الطواق حول الكعبة ، كان معاي حلفاوي كل ما نكمل نصف لفة يحسبهم 4 هههه
اها والفتحة بتاعة قبر النبي ديك خليها ساي
بس القداسة شكلها في الزحمة ذات نفسها .....
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: عبداللطيف حسن علي)
|
في قصّة موجودة بالكتاب وسقطت سهوًا من القائمة الفوق وهي؛
تراكتور جون داير:
قامت من النوم على صوت ناعم لتراكتر ماركة جون دير، إندهشت عدة إندهاشات! الإندهاشة الأولى والعظمى; كيف ميزت ماركة التراكتور من الصوت؟ وكانت قبل نومتا ديك تُسمي التراكتر بابور، ولم تر غير بابور ناس ود الحرات، ولم يخطر ببالها قط أن لهذا الكائن العجيب أسماء وماركات! لقت نفسا كمان عارفة بشكل دقيق سبب نعومة صوت الجون دير الجديد؟ يعود ذلك لنظام الجير (Gear) الجديد الذي لا يعمل بالجير بليت (Gear plate) القديم ! وبدل أن تنخلع وتصيح بالقديم: يا أبجلابية، لقت روحا بدل الخُلعة مندهشة ورافعا كفينا لفوق والأطابع مفرقات، وشالت ليها نفس لأعلى وفاتحا عيونا وخشما بطريقة درامية وتصيح: وواو!
عليك الله يا زينب بتي سوي لي أنا وأمك دي كبايتين شاي سادة، وجيبي لي معاك الرادي من اللوضة النسمع بيهو نشرة خمسة (برضو بالقديم)، وتعالي النكلمك بالخبر السمح دا. بسرها قالت: والله الأبوات ديل مساكين (عند ناس المدن داقسين)! امور العرس دي نحن البنجيّها وانتو بس تبصموا، أموت في ود أخوك والسعودية!
بفرح شديد سوت الشاي، وختفت الرادي بالليد التانية، ختت صينية الشاي في تربيزة الصفيح الصغيرة، ولو ما تخاف الكضب، التقول قبل تخت الشاي في التربيزة لمحت في سطح التربيزة خريطة البلد كاملة مرسومة من نقيّر البوهية العشوائي!
كغير العادة، وللمرة الرابعة في تاريخ البلد، لم تلعن شارات ضبط الوقت الأم درمانية تمام الخامسة بذات الصوت المعهود، خمس مرات، بدأت النشرة بمارشات عسكرية حتى خيل لزينب انو الرادي يهتز والكديسة الراقدة تحت العنقريب إنتبهت! توقفت المارشات وبعد لحظات صمت بدت طويلة للثلاثة والكديسة، وقف المذيع على حيلو وقال: ضرب الخونة السد في أعلى صعيد النهر، نرجو من المواطنين شمال السد وحتى الحاج عبد الله (مكان حلة زينب) أخذ الحيطة والإبتعاد عن الن... إنقطع الإرسال
- يا بت بسرعة جيبي لندن:
أستعاد الثوار عاصمتهم من قبضة كتائب الحكومة وقال قائد الثوار أن الكتائب المندحرة قذفت السد قبل تسليم المدينة.
بسرعة شديدة هربت الكديسة لمكان عال، بعدها بلحظات غمرت المياه كل اليابسة، سمعت زينب تشهد والدها وإستنجاد أمها بسيدي الحسن، والشئ الأتكادت منو هو كمال خريطة البلد على سطح التربيزة بعد سقوط صينية الشاي منها بفعل المياه وطفو التربيزة للحظات
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: HAIDER ALZAIN)
|
صديقي بشكة كان سكران وفي السوق الشعبي مدني
سأل بتاع طبلية السجائر أنت من وين يا ولد؟
بتاع الطبلية قال ليهو من العمارة طه
بشكة ختّ كف يدو اليمين فوق راسو والكف مفتوح ومتحرك
وقال ليهو من الطابق الأول؟
وحرك كف يدو الشمال بنفس الطريقة فوق الكف اليمين فوق الراس ووصل
ولّ من الطابق التاني؟
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: أبوبكر عباس)
|
العوجة الحج يا عبد اللطيف
عندي تصميم شديد إنه دي تكون آخر سنة لي في السعودية وعاوز اختمها بي حجة كاااااربة لأنه الله أعلم تاني أجيها راجع
بس بالطريقة دي الحجة حتكون زي عمرة صاحبي الأردني
داك اتصل بي تلفون وقعدنا نتونس ونضحك ونحكي شمارات، ما خلينا زول ما ضحكنا فيه
في نص الونسة سألته قلت ليه انت هسة خلاص راجع من العمرة؟
قال لي لا لا والله أنا في السعى دقيقة النسأل ليك المدام دة الشوط الكم؟
قالت الشوط الخامس
وواصل ونسة وقرقراب عادي
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: أحمد محمد عمر)
|
الإندهاشة الثانية:
إندهشت زينب من كونها لم تنخلع من لبسها لبنطلون جينز فيهو شرطتين متشابهتين صناعيتين تحت الركب، وأستغربت من زوال حساسيتها تجاه شعرها الأجعد ولونها الداكن! وأبتسمت بسخرية من الخلطات الكانت بتجيها ليهن بت جيرانم الجامعية من الخرطوم، شئ بول إبل، شئ كردم بالبردم! وحمدت الله على زوال عصر التزلط.
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: أبوبكر عباس)
|
أوقف ألكس التراكتر بالقرب من البيت الخشبي وصعد السلالم الخشبية برشاقة شديدة، لقى زينب بتحضر في الغداء، من نافذة المطبخ قبلها قبلة عابرة وصعد للحمام، لمان رجع لقى الأكل جاهز وزينب مندمجة بشكل غير عادي مع برنامج ناشونال جوغرافك، والحلقة كانت عن أبقار قبائل الأمبرارو، لمان الحلقة وصلت للحتة البعملوا فيها الأمبرارو التعاويز والحجبات لمنع العجول من رضاعة أمهاتهم؛ وقفت على حيلها وختت يدينها فوق راسها، وبانت صرتها المُزينة بزرارة فضية، وقربت تقول: يا سبحان الله!! لكنها قالت: أوو ماي قود ألكس، التفاصيل دي موجودة في ذاكرتي من قبل المشاهدة دي، وما عارفا مصدرا!!
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: أبوبكر عباس)
|
النص الرابع:
أجمل الحلوين، عهودك وين؟
لو أنت ناسي الناس أنحنا ما ناسين
أجمل الحلوين:
الوقت سنة 88 أيام إنتخابات الرئاسة الأمريكية، راكبين لوريين (مثنى لوري)، واليوم بالشهر العربي كان يوم تلطاشر، متحركين من حمرة الشيخ أو الوز وماشين أم بادر.
الوكت كان بعد الساعة عشرة بالليل وكنا راكبين في اللوريين حداشر بت وتلطاشر ولد، وطباخ ومساعد طباخ، والمساعد البيطري بتاع سودري ومعاهو عود*، زايد السواقين والكمساريين وزي تلطاشر خروف.
ونحنا ماشين، اللوري السايقو نابري وحل في قوز رمل، وقفنا اللوري التاني في حتة ثابتة ونزلنا الصاجات وبدأت الناس تنزل للإستمتاع بدق الصاجات والنسيم والرمل وضوء القمر.
في اللوري بتاعنا كانت معاي واحدة من بنات الحلنقة بكسلا اسمها قمر، قالت لي: بكوري أبو طويلة، عليك الله، أفتح لي الباب الخلفي بتاع اللوري وخليني أتكل في كتفك الطويل دا وإتا في الأرض؛ عشان أنزل
أتذكر يا أخوانا، وما طالبني حليفة، أتذكر عاينت ليها وأنا قاعد في شوال جوة اللوري وهي واقفة، أتذكر إنعكاس ضوء القمر من الزمام الذهبي الكانت لابساهو في عيوني، قلت ليها بفرح شديد وباللهجة المصرية: أوي أوي هو نحنا نطول
قالت لي من ناحية طول إتّا طويل...
بسرعة ورشاقة وخفة شديدة تلبت من اللوري وفتحت الباب ووقفت جنبو وشبكت يديني وقلت ليها أنزلي في يديني
قالت لي لا، إتّا بس خليني أثبت يدي اليسار في كتفك وبعدين بنط في الرمل
وقفت جنب اللوري ديدبان، وشديت الكتف، هي جلست في طرف اللوري بعد جدعت شبطها في الرمل، وختت يدها في كتفي ونطّت ومع وصول أقدامها للأرض صرخت بصوت عالي، إلتفتت لقيت طرف الإسكيرت (الإسكيرت من نوع الإسكيرتات الواسعة بتاعة زمان أيام القماش رخيص) إتعلق في مسمار في خشب اللوري، بسرعة حررت الإسكيرت وقلت في سري تيمناً بالتراث الديني: سبحان الله مثبت القلوب!!
أجمل حاجة كانت بتميّز قمر دي، غير حلاتا وزماما، كانت ضحكتها الدائمة والقعقعة في بعض الأحيان، وأنا وحات الله، ردتها (أحببتها) قبل حكاية تثبيت القلوب بمسمار اللوري!!
الصرخة خلت الناس كلهم جونا بخشم باب اللوري، وبضحكتها اللذيذة قالت للفاجعين: ما في حاجة، إنزلقت من اللوري وبعد الجماعة إنتشروا همست لي في أذني: وحات الله، يا أبكر، الحصل دا تمرقو؛ بخاصمك...
رديت ليها بابتسامة.
تذكروا الطيب صالح في واحدة من رواياتو وقف اللواري في الخلا جنب بعض وصنع ليهو حفلة؟ أها لمان اللوري أبى يطلع كان الأستاذ المشرف على الرحلة ومعاهو الدكتور البيطري بتاع سودري كانوا لحقونا باللاند روفر 110 بتاع البطري وقال لينا: أوكي نزلوا السراير وأعملوا العشاء خلونا نبيت هنا..
كل واحد فينا كان عارف مهمتو شنو، انتشرنا والطباخين جهزوا عدتم وأنا ومعتصم ضبحنا خروف وعلقناهو في شجرة، وبقية الناس صنعوا دائرة مع المساعد البيطري وقمر مسكت الإيقاع
بدأ بأغنية الراقصين التويا
كلمولي أبويا
عشان أروح الدونكي
اجيب شوية مويه
كان اول مرّة أسمع الأغنية دي، كوركت للسواق الوحل اللوري وقلت ليهو: أحبك يا نابري
الحب الجد جد جاني بعد إتعشينا والفنان غنى لينا أجمل الحلوين عهودك وين لو إتّا ناسي الناس أنحنا ما ناسين وصوت البنات البشيلن معاهو يرددن:
يا أجمل الحلوين عهودك وين
وأنا واقف أصفق ولمان يقولوا عهودك وين؟ بعاين بخبث لضابط الإيقاع وأشّر بأصبعي لقلبي
يا أخي، وحات الله، ما بقدر أوصف ليكم لمعان أسنان قمر مع أبتسامتا وزماما وضوء القمر ونشوة اللحظة!
يا أخي، الطيب صالح شنو ولواري شنو؟؟
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: HAIDER ALZAIN)
|
النص الخامس:
بطانة أبعلي:
كان في الطبعة الأولى بإسم أسلاك
بطانة أبعلي:
مرّة قمت من قرية السعدية بلوري قاصد رفاعة وتمبول.
السعدية دي فريق كواهلة سعدية وهي آخر قرية تابعة للجزيرة شرق رفاعة وأهلها لحدي التمانينات كانوا رُحّل.
قبل التحرك من السعدية خلوني أوصف الصورة قبل أركب اللوري.
الوكت كان أول يوم في ضراع الأسد ستة صباحا، شيخ عوض الكريم خير الله قال لي: لو ما المطرة دي جاية كنا مسكناك معانا لحدي ما تاكل كرامة حاج الدابي، عاين شمالو وكورك للبنات السايقات حمير الري لبيارة أم طرطارة ورجعن وحماهن الورود، لأنو المطرة أكيد جاية.
اللوري وصل قرية الكاهلي زيدان، ودخلها من فريق أولاد عون، ركبوا فيهو أربعة رجال لابسين جلاليب بيضا وطواقي خضر، لفت نظري انو الجلاليب نظيفة كغير عادة متسوقي تمبول! ركبت كمان امرأة شايلة ليها جدادتين فيوميات - بسري قلت أكيد الفيومي دا دخلتو للعرب ديل جمعية بلان سودان- وواحدة بلدية وسخل أبيض أضانو مشرومة، ورجلو اليسار مربوطة مع يدو اليمين، الجداد علقوهو برّة اللوري والسخل توشك بدأ يكركم في رباط جزمتي الاديداس.
مجرد ما اللوري إتحرك واحد من الأربعة النضاف وقفو وقال لأخوانو: عيك نسينا عدة الشغل، قبل ما ينزل من اللوري واحد من أخوانو همس ليهو في أضانو الما مشرومة: مع الطارات جيب معاك حجر ولّ طوبة المرة دي واحدة في اللوري، الله يكفينا شرّها.
المداح جا راجع اللوري ومعاهو طارين في مخلاية، صاحبو قال ليهو: إن شاء الله إتذكرت الحجر؟ ردّ بالنفي، وقال البتجي من الله كلها سمحة.
دخلنا مرزوق حوالي تزعة ونص ومشينا نزلنا مكنة بابور عند ميكانيكي طرف الحلة، التنزيل أخد وكت طويل لأنو المكنة تقيلة، بالمناسبة مرزوق دي مولود فيها أحمد الجابري الفنان.
بقينا في اللوري أنا والكمساري، والمداحين الأربعة، والمرأة والسخل ًوتلاتة جدادات بجنب اللوري.
الكمساري خِلص من المرة حق نفرين بحجة انو السخل والجدادات بساون زول!
ضربت معاهو حجة شديدة وبعد قنعت منو قالت ليهو: خليتك ليوم القيامة إن شاء الله النار تشوشوك زي الشية، قال ليها إتي يا مرة مجنونة؟ نار شنو الربنا بشوي بيها الناس؟!
إتي ما عاقلة؟! معقولة ربنا يرمي ليهو زول حي في نار؟! هسع أنا بقدر أرمي سخلك دا حي في النار؟! دا كلام ساي ما في عذاب بنار ولا شيء.
لا شعوريا إنحزت للكمساري وبسري قلت الكمساري دا علماني!!
بعد عشرة دقائق من خروجنا من مرزوق الجابري نزلت المطرة من النوع البفلق في الرأس داك. بسرعة عمر الكمساري طلع ليهو تلاتة مشمعات صفر؛ أدى المرة واحد، وواحد غطى بيهو شوالات العيش والتالت إتكونا فوقو أنا والمداحين وخرتاية الطارين، بعد داك عمر جاب السخل وجا إتكوم معانا تحت المشمع، بسري قلت: الكمساري دا علماني وحنيّن.
المطر صبّ صبيباً بدّع (علي وزن خبّ خبيباً بدّع بتاعت ود بادي)، السواق شاف ليهو حتة عالية وتكّل فيها، سيد اللوري الراكب جنب السواق نزل وكورك للمرة وساقها ركّبها قدام وجا إندفس معانا تحت المشمعات، بعد المرة نزلت، المداح قال للمداح: ما قلت ليك جبيب معاك طوبة؟ المداح ردّ للمداح: وأنا موش قلت ليك البتجي من الله كلها خير؟ ووقف على حيلو ورفع يدينو الإتنين لفوق واستقبل المطرة بصدرو.
عمر الكمساري طلّع ليهو من خّرج جنبو تمر بركاوي ووزعوا علينا بالخمشات، وبحركات الكماسرة السريعة ديك مدّ للمرة والسواق القدام خمشتين، بسري قلت: الكمساري دا علماني، حنيّن وكريم، وبسري برضو شكرتو شكر شديد علي فكة الجوعة الدخلها فوقنا برد المطرة.
شوية والمطرة هِدت، عمر شال واحد من المشمعات ومعاهو حبال وظبط لينا تاية بجنب اللوري في دقائق (كنت داير أسري وأضيف للكمساري صفة سريع، لكن خلونا من الجمل الإعتراضية دي)، شلنا المشمع التاني جلسنا فوقو وإنضم لينا السواق. سيد اللوري قال للمداحين أمدحوا لينا، نزلوا الطارات لقوها مرخية، قلت ليهم أنا عندي بابور غاز في شنطتي، وأضفت: نحن برضو عندنا عدة شغل.
شدينا الطارات وكل زول حمس يدينو في البابور والمداحين قعدوا جنب بعض، وبدوا بمدحة: شيء لله يا حسن، يا حسن، الأداء بتاعم أحسن مية مرة من أداء الجمهوريين لهذه المدحة، والمداح الما جاب الطوبة صوتو لو ما أحسن من صوت إخلاص همد، بكون زيها.
قلت ليهم إتوا جمهوريين ولّ ختمية؟
ردوا لي بمدحة سريعة:
شيء لله يا أب جلابية ويا عثمان شيخ الختمية
شيلوا الفاتحة وأعقدوا النيّة، التمساح جيبولوا أذية
بعد مدحة التمساح وقفت على حيلي منتشياً وقلت للمداح الما جاب الحجر: اسمك منو؟ قال لي: يوسف، قلت ليهو: شوف يا أب شرا، إتّا صوتك دا أسمح من فنانين ام درمان الحاليين ديل كلهم، ومديح الرسول (ص) حاجة سمحة بلحيل، لكن الزمن عندو حكمو، وحوامة الحلال دي للمديح يمكن بطنك دي ما فايتها، دحين أقلب حقيبة، حافظ غنا حقيبة؟ قال لي: شوية، قلت ليهو ما مشكلة هسع بكتب ليك واحدة وبقول ليك اللحن ونجرب،
بتقرأ؟
هزّ راسو لتحت.
كتبت ليهو جزء من الشاغلين فؤادي:
الشاغلين فؤادي .. وفايقين تائهين
يكفي البي زارف .. دمعا ما يقيف
تالي القبلي شايف .. لي برقاً لمع
والصيد في الخمايل .. ياناس إجتمع
قوموا يا أحبّة .. نسترق السمع
ما بطيق القعدة .. والمها اجتمع
وخلطها مع ما بين تبري ناصع وأخدراني اللون
وقفت على حيلي وريتو اللحن كيف، البشوفني يقول اللحن حقي!! عبد الوهاب وردي بس!!
يا أخي، يوسف دا لمان وصل حتة والصيد في الخمايل يا ناس إجتمع، قلبي قرب ينقلع
أول مرّة أسوق عربية من مدني للخرطوم كانت خريف ٩٣ والعربية كانت بفلو بيضا.
أول ما طلعنا من مدني وجنب برج الإذاعة الفي ود المجدوب، صبت مطرة
طلعت العربية من الشارع ووقفت في حتة عالية
بالرغم من الوقت كان نهار إلا إنّو الواطة ضلمت وجابت ليها برق قوي، فكرت إنّو برج الإذاعة دا بشتغل مانع صواقع،
جات رعدة قوية جدا جدا، قبلها بثواني ظهر برق ما شفت زيو مباشرة شرق النيل وتحديدا في ابحراز.
ما في زول بصدقني، لكن من محلي داك شفت قبّة الشيخ يوسف ابشرا بأبي حراز شرق ود المجذوب وشرق النيل الأزرق، البغنن ليهو البنات:
بالضرى بالضرى يا ابشرا
بالضرا ان شاء الله راجل مرة
يا ابشرا
شفت الصاقعة امتصّاها الهلال الفي قمة القبة، وشفت ابشرا قاعد ليهو في كرسي أخضر في نص القبة ومتوشح بشال اخضر بالدهبي، وشايل سبحتو.
في اللحظة ديك مرت بخيالي تلاتة حاجات:
- شوف السيدة آمنة بنت وهب للنور الذي أضاء مدائن كسرى يوم وضعت الرسول
- عمر بن الخطاب من المنبر يقول لسارية: الجبل الجبل
- قصة يوسف ابشرا وهو صبي برعى بالغنم في الصفيّا وبرد (يرد الماء) بيهن الرهد في ابحراز (قول ٧٠ كلم)، بشرب من الرهد، لمان يصل الصفيّا، قطرات الماء البلن شنبو بكونن ما نشفت!!
بعد سبعة سنين والسبعات ليهن دلالات في الأديان، وتحديداً شهر اتنين سنة ألفين، أخدت رخصة القيادة من بر دبي، بشرت الكفيل بالعين، قال لي:
بكرة تعال استلم السيارة عشان تفتح فرع دبي.
جيت العين وبيتّ (بمعنى نمت) في بيت العزابة بالبريمي، العزابة كانوا لمان أجيهم بفرحوا بي زي فرحة الشايقية بزيارة أبوهاشم، واحد من العزابة ديل مسميني غرونوي،
قال لي: وحات الله، يا أبكر، إتّا أعفن زول يلاقيني في الدنيا دي، أعفن دي ما شتيمة زي حمبرّة، أبداً دي شكر، حتى إنّو لما قال لي كدا قلت ليهو: القلوب عند بعضها يا عفن.
العزابي دا أهديتو في بداية تعارفنا رواية العطر لباتريك زوسكيند، الزول دا كان حافظ كل المقاطع المعفنّة الفي الكتاب
ونسوني ونستهم وماخلينا واحد من اصحابنا المتزوجين ما قطعنا فوقو وحددنا درجة هرشتو من مرتو،
قعقعنا قعقعة من لا يخشى الفقر ، ولَم نستغفر، وسخرنا من أي شيء في أي شيء لي أي شيء،
اليوم داك لقيت معاهم محاسب أنصاري جديد لنج، وعندو إبريق بلاستيك بلو للصلاة.
قلت ليهم: روضوهو لي الأسبوع دا، بجيكم الويك اند الجاي ببكي ليهو بعين واحدة زي المهدي عشان نحفظو الراتب الجديد
استلمت العربية برادو بابين ذهبية الموديل البحبوهو اليمنيين، كانت في التسعينات وبداية الألفية عربية الشرطة السائدة في السعودية.
جيت بيت العزابة دخلت العربية في الحوش وبعد غسلتها توجهت لدبي، قبل ما امرق من البيت عفصت الابريق بتاع الأنصاري باللستك متعمداً
كبيت بترول في محطة العوهة، العوهة دي آخر نقطة في العين المدينة، هسع الاسم قلبوهو الفوعة، ما عارفو عملوا شنو؟! لكن غيروهو.
اشتريت سندوتش نقانق زيادة طماطم وخالي طحينة، وعصير مشكل، ومسكت الظلط.
لمان وصلت كبري غباشة، نفس المطرة بتاعت ود المجدوب دوّرت، والدنيا انقلبت ليل، برق رعد خطيرين
طلعت العربية من الظلط، لمان البرق شدّ، شيطاني قال لي:
ديك مرقك منها ابشرا، دي بتمشي منها وين؟
تذكرت عفصة الإبريق، قلت ليهو:
الله ما بعابي ولا ينفعل وابشرا "لحاق بعيد"
الغريبة، تعبير "يا لحاق بعيد" دا كان كاتبو بابكر سالم ابو سنون في كل لواريهو (جمع لوري) في مدني
ما عارف جاني من وين نابل؟
كمال ود عمي قال لي، وكنت قاعد ابني ليهو في قفص حمام بحي مايو جمب جامع بابكر سالم ابوسنون، وأنا بالمرحلة المتوسطة، قال لي:
لو تقول كل يوم الصباح "يا لحاق بعيد" تلاتة مرات، أصلا ما بتفقر.
نزلت من العربية قلت انزل تحت جسر قباشة دا، آخد لي بولة، النصيحة أنا زي النوبيين بهرش من الرعد هرش شديد، قلت وأنا نازل من العربية:
يا لحاق بعيد
تلاتة مرات
دي كانت أول مرّة استعمل وصيّة ود عمي
حصلت حاجة غريبة جداً جداً
دي ما ظنيت زول واحد يصدقها، أكبر من ديك
حيدر حسن ميرغني ذات نفسو ممكن ينكرها، وفِي أخفّ الأحوال يقول:
"ان كان قد قال، فقد صدق"
حصل برق وسيفو فصل بيني والعربية، بقى قدامي زي بوابة التنقل بين الماضي والحاضر البجيبوها في الأفلام الامريكية الخيالية.
أول مرّة أدخل إستاد مدني كنت في بداية المرحلة الابتدائية، مع ود أختي عبد المنعم سعيدالذي يكبرني بسبع سنوات.
المباراة كانت بين المريخ العاصمي والنيل مدني، سبّطت مطرة شديدة، نزلنا ادسينا في ضهر اللوحات الجانبية، كل مرّة كان يقول:
جايّة رعدة
فعلا تجي بعد كلامو
أدهشني صدق التنبوء بتاعو
لاحقا شرح لي إنّو الضوء يسبق الصوت
أها سيف البرق لمان شقّ بيني والعربة، شاهدت نفسي طفلا تبلله الأمطار في إستاد مدني، وانتظرت الصوت، لكنني وجدت نفسي في زمن مختلف خالص عن ود المجدوب وأستاد مدني وعن غباشة!!
لقيت روحي في زمن مختلف ومكان مختلف، فتحت عيوني لقيت ارض خضراء منبسطة على مد البصر، تزين الخضرة زهرة التبر البيضاء
المكان عرفتو بطانة اب علي، وقاعدين في ضَل تاية، وجنبنا بهم ضان وشاي مشدود في نار بعر، ونغني واشيل معاهم وأقول:
تالي القبلي شايف لي برقا لمع
والصيد في الخمائل يا ناس اجتمع
الصوت الأساسي في الغنا عرفتو صوت المداح الحكيت ليكم بيهو قبيل
قلت ليهو:
أبشرا، اللماك بي شنو؟
قال لي: اللماني بيك اتّا عارفو، لكن قول لي:
بنطلونك وجزمتك ديل غيرتهم متين؟ ووين؟
انتهت
| |
|
|
|
|
|
|
|
|
|
Re: جك الفول اصدارة أدبية جديدة هذا العام بمع� (Re: أبوبكر عباس)
|
النص السادس:
ستاربكس*
للأديب أبوبكر عباس،
قصة من أدب الواقع نشرت سابقا من غير تنقيح بهذا المنتدى
يجري العمل حاليا في النص لتحويله لعمل إذاعي
هامش:
* للقراء والأعضاء من الخرطوم وضواحيها وضواحيها تشمل مدني:
استاربكس = اسم سلسلة مقاهي غربية، تٌدرج مع الشركات اليهودية أيام هيجات المقاطعة العربية للبضائع الاسرائلية/الأمريكية
ستاربكس:
وأنا طالع من صالة المغادرة بمطار دبي الساعة واحدة صباحا بعد وداع صديق مسافر لندن، قلت أطلع صالة القدوم أشرب لي كراميل فرابشينو من ستاربكس. مع الشفطة الأخيرة وقبل ألحس الكريمة لمحت لي زول آخر مرة شفتو كان قبل تلاتين سنة، عرفتو من مشيتو، إنتظرتو عند المخرج، إزيك يا دكتور عبد المنعم محمد حمد؟ عاين لي بدون إندهاش وقال لي: كويس الله يبارك فيك، ما عرفتك!
- أنا مجدي سفسفة صديق محجوب أخوك الصغير الكارثة، كنا جيرانكم زمان بدباغة مدني جنب قبة ود كنان.
قلدني "ونزلت منو دمعة " وقال لي متجنباً النظر لي مباشرة: أديني تلفونك يا مجدي، أنا مرهق جدا وماشي الفندق بتصل بيك بُكرة بعد بُكرة نتونس ونجتر شوية من شقاوة الماضي بتاعتك ومحجوب ورونق ماضي الدباغة.
فجاءة خلعت جلابية مراكبية دبي ولبست عراقي دراويش ود كنان وقلت ليهو بتركيز شديد: تمشي معاي، ما بزعجك، ساكن براي على بعد حداشر دقيقة من المطار وبوفر ليك إقامة مريحة جدا وكنت في هذه الأثناء قد سحبت شنطتو الصغيرة وتقدمت خطوة نحو بوابة الخروج.
إبتسم وردد: حداشر دقيقة! جنّك ذاتو!
رجّعت ليهو مقعد العربية الأمامي لوضع الاستلقاء، لاحظت الحزن المخلوط بالإرهاق على ملامحه، قررت بيني وبين نفسي الهروب للماضي مباشرة دون السؤال عن تداعيات الزمان عليه خلال التلاتين سنة الماضية.
رأيك شنو يا دكتور، نزيد للحداشر دقيقة ساعة تاني؟ أعزمك فوقها شيّة بقهوة الفنانين في الهواء الطلق، المميز في الشيّة دي، انو الفنانين ديل، عندهم صحانا يتم تسخينها للحفاظ على صوت طقطقة الشواء المحبب والصوت (أزيز على قول جيجي صديقتي) دا، بكون مستمر أثناء تناولنا ليها، ودا، واحد من تلاتة برامج لو ما عملتهم لضيوفي بدبي بكون قطع شك مستضيفم مجاملة ساكت. هزّ راسو بالموافقة وأضفت والليلة تخلي النقّة كاملة لي وإتّا تستمع، كرر الهزّة.
اخترنا مكان خافت الإضاءة ومكشوف للاستمتاع بنسايم نوفمبر اللطيفة والشيّة أم صوت، بعد كتابة الطلب، قلت ليهو: يوم قبلوك بالدفعة الأولى بكلية الطب جامعة الجزيرة (79)، اليوم داك، أُمي قالت لأبوي بعد صلاة المغرب: الليلة، بيوت الدباغة كلهن فرحانات بود محمد حمد غفير التلفزيون القبلوهو بالجامعة، ردّ عليها بفرح: بستاهل؛ هو وأبوهو مبروكين.
تاني يوم ونحن راجعين من المدرسة المتوسطة وفي نص ميدان التلفزيون، محجوب أخوك حاول يقشر بيك عليّ، طوالي قبضتو من شنطة الدمورية وقلت ليهو: أسمع هوي، نعّوم دا، حقنا كلنا...
أول خميس ليك وإتّا عائد من الكلية الإعدادية لبيتكم، لقيتنا قاعدين نلعب بلي في ضلكم، قلت لينا أسمعوا إتوا الاتنين ديل، أوعة ألقاكم تاني قاعدين متفنين عند بت المنى تضربوا في البليلة العدسية بسلطة الروب، دا أكل غير صحي... سكتنا وأضمرنا عدم الطاعة وبعد إتّا دخلت البيت، محجوب علق ساخراً: يكون الاسبوع دا، ادوهم محاضرة عن البكتريا بالإنجليزي!! وواصل متحديا: البليلة والنيفة ديل، لو جاء عميدك سكن معانا هنا ما بنسيبن.
مرّة ونحنا متفنين مع البليلة، محجوب لمحك من بعيد وقال لي: الزول البمشي زي السمبرية داك، نعوم أخوي قوم كُب الجاز نمشي البحر. بعد السباحة مشينا إنتظرنا النيافة يفتحوها؛ نشتري لينا واحد باسم. أثناء الإنتظار قلت لمحجوب: إتّا يا فردة، السمبرية بتمشي كيف؟ قال لي ما عارف، لكن أخوي دا، مشيتو فيها حاجة مميزة ما عارفها شنو! قلت ليهو: إذاً نختصر الموضوع ونسميهو سمبر، قعقع وقال لي حقو الزول الليلة يخليك تضرب لسان الباسم براك يا بجعة.
ونحن راجعين البيت نام في العربية وبمجرد دخول البيت؛ غطّفي سابع نومة، صحى العصر وبعد الأكل والقهوة التركية ابتسم وقال لي: جلسة الفنانين غيرت مزاجي ويبدو أنو الصدفة دي، زي المحسوبة!! قلت ليهو: آخر عهدي بيك خريج جديد وعينوك بمستشفى مدني وفي نفس السنة ديك، أنا ومحجوب سافرنا للدراسة وناس بيتنا رحلوا من مدني، اعتقد محجوب سافر يوغسلافيا، يا أخي، الزول الجميل دا، كان مُعجب بيك إعجاب شديد.
رجع ضهرو لورا وقال لي: محجوب دا، أجمل أخو ممكن تختارو وهو يتبع قلبو دائما، في واحدة من منعطفات حياتي جربت اسلوبو وكان سبب سعادتي.
وواصل:
بعد سنة في المستشفى أخدوني بالجامعة، في مرّة راجع البيت بعربيتي الموريس، جنب كبري حاجة عشة، العربية سخنت وطلعت دخاخين، وقفتها وأقرب باب دقيتو وطلبت من البت الفتحت الباب مويه للعربية، جابت المويه وأنا متحرك أفتح الكبوت، مسكتني من كتفي بحركة سريعة شرطت معاها طرف التوب بباب الزنكي وقالت لي إنتظرها تبرد. في لحظات الانتظار جابت لي شاي بنعناع.
بعد دورت العربية قالت لي: الراديتر داير تسليك ونطقت الراديتر بإنجليزية سليمة، نزلت من العربية وقلت ليها: بتزوجيني؟
ردّت: محتاجة أعرفك أول
قلت: عشان تعرفيني، محتاجة عُمر بحالو
الخميس البعدو، بت المنى ما باعت سلطة الروب، وناس العشير اليوم داك ما طبخوا، وأبو عركي غنى لينا: عن حبيبتي بقول لكم وبدل الحمامات الحزينة قامت أدتا برتكانة غيرها لي قامت أدتا من حنانا ورفض يشيل قروش وحتى عرقي العازفين جابوهو أصحاب محجوب هدية.
بعد ستة شهور من العرس توفى عمك محمد حمد أو المناضل كما يحلو لمحجوب منداته، إتّا طبعا عارف انو الحاجة إنتقلت بالتيتانس وهي بتضع محجوب.
بعد أربعين يوم تانية جاتني بعثة دراسية بإستلفونيا (يوغسلافيا)، سافرنا أنا وسهام وخلينا خالتي سكينة الربتنا مع اهل سهام. الأقدار المقصودة وقعتني مع محجوب في مدينة واحدة.
سنة 89 الجامعة وقفت البعثة، ومحجوب إتزوج صديقته وصديقتنا الجميلة إيليزابيتّا الإستلفونية وهو على أعتاب التخريج.
سنة 90 إنهار الجدار وأصبحنا مُستكين، قربت أنهار وأدمنت الفودكا،
نسيت أقول ليك: جابو لي محجوب الصغير سنة سبعة وتمانين ،وإيليزابيتّا الصغيرة يوم تمانية وعشرين رمضان سنة 90.
يتبع..
باقي بس حكاية سهام التي أصبحت تتحدث بالإضافة للعربية والنوباوية، عدّة لغات بطلاقة زي بتاعة اللديتر!
بعد سنين من زواجنا وفي إحدى عُطل عيد الميلاد بمدينة لوبلانا، أثناء ما سهام بتغزل ليها في بربتوز من الصوف لمحجوب - كانت قد تعلمت طريقة غزل الإستلفونيات ولغتهم من كلية المجتمع- سألتها وهي منهمكة، وبعد شفطة فودكا كبيرة جنب المدفاة: إتّي يا سهام، أهلك قبيلتم في السودان شنو؟
- طبعا إتّا بتعرف أهل أمي ناس دندنة الميكانيكية وأصلهم من جبال النوبة، لكن أبوي مقطوع من شدرة، تزوج أمي وعمرو ستة وستين بعد صداقة طويلة لخالي عثمان بمحالج مارنجان، وتقريبا من حكاويهو وحكاوي أهلنا بالتبني ناس الشقلة عوج الدرب، أستطيع أصور ليك حكايتو: حبوتي أم أبوي أنصارية أم درمانية غرابية، تم إغتصابها بعد كرري من الجنود الجعليين أو الشايقية؟؟ المهم، المرة الربت أبوي لقت حبوبتي مرميّة جنب كماين الشقلة الجنب المسيد ديك، وساقتها بيتها وولدت أبوي عندها وبعد أقل من شهرين ماتت.
واصلت سهام: طبعا القصة الحكيتها ليك دي؛ استنتاج مني
الغريبة بالرغم من انو الدم الغرابي ماليني من من جهة حبوبتي الأنصارية وأمي النوباوية، لكن ملامحي جات تشبه الجلابة (بالقديم) وكأنو بتول النوياوية ما أُمي!!
صرخت فيها بإعجاب شديد بعد أن إبتلت عروقي بالفودكا وثبت أجر الونسة: طيب ما نحن أخوان في الإنسانية.
قالت لي: كيف يعني؟
تحركت للمطبخ جبتا زيادة جبنة، زيتون، خيار وجزر، وجيت شفطّ لي بقة كبيرة وقلت ليها: مرّة يا ستي، وبعد دراستنا للمكونات الحيوية للجسم، كنا أنا وأبوي راقدين في برندة الزنكي بتاعة الديوان، وأتذكر اليوم داك المطرة كانت صابة والكهربا قاطعة وأبوي بجغم ليهو في عرقي، قلت ليهو: إتّا يابا، لي شنو ملامح جدي الله يرحمو بتختلف من ملامحك وملامح أولاد عمومتك وأولاد خيلانك الكنت زمان بتودينا ليهم في الكردة غرب شندي؟
قال لي: الليلة يا ولدي، زي ما بقولوا أولاد الزمن دا، الكلام دخل الحوش!!
جدك دا، ولدوهو بعد كتلة محمود ود أحمد، والظاهر أنو حبوبتك غلبا تقع البحر، وفقعا ضحكة عكست فيها أسنانو البرق القبلي.
قالت لي: فعلا أخوان في الإنسانية وحقو لو جبنا لينا ولد تاني نسميهو سلام...
سوف أغيب عن المنبر لمدة طلطاشر يوم مدة سفري للمغرب لحضور فعالية ثقافية بمدينة أصيلة (ليست مهرجان أصيلة).
| |
|
|
|
|
|
|
| |
أبوبكر عباس
HAIDER ALZAIN
Ahmed Yassin
Hadeer Alzain
Moutassim Elharith
طلحة عبدالله
عباس محمود
Abdelrahim Mohmed Salih
حيدر حسن ميرغني
عبداللطيف حسن علي
shaheen shaheen
فيس بوك
تويتر
انستقرام
يوتيوب
بنتيريست