اقول ليك شي بالله بس اسمع في محراب النيل وركز اول شي في المقدمة الموسيقية مافي طبعا زول اطلاقا بعمل مقدمة زي ابو عفان
اتخيل زول في نهاية الخمسينات يعمل مقدمة وانترودكتري بمستوى وفهم متقدم زي دا اسمع المقدمة بس اول شي علي بالإيمان زي كأنك بتشوف وتسمع وتحس بالنيل وهو في بداية الخلق والتكوين الأول مع مشيئة الخلق الإلهية الاولي قبل ملايين السنين وهو يا داب بتكون في شلالات فيكتوريا وسهوب وسهول وجبال بحيرة تانا وزي كأنه عثمان حسين عمل الموسيقى التصويرية لملحمة الخلق والتكوين الاولى اسمع بس
ابوذر .. مالك علي ياخ ؟ حدث فإن حديثا منك يشجيني اول شىء ..سنة 1956 لمن عثمان حسين قدم في محراب النيل...لقى نقد قاتل واتهموه بتشويه الغناء رغم انه صاحب "الفراش الحائر"وقرشي محمد حسن..الصحف قادت حملة ضارية ضد عثمان حسين ولكن.. المستمع والجمهور كان لهم راي اخر.. هم من اجبروا الصحف للاعتذار الصريح..والاشادة بالعمل الجبار المقدمة بس سبق بيها الكبار وكانت في محراب النيل والتجاني يوسف بشير فتحا في ثورة الغناء كانت انطلاقة التوزيع الاوركسترالي وبداية للمقدمات الكبيرة ...والخرافية .... وردي وكابلي وغيرهم... شوف يا ابوذر ..عثمان حسين ادخل الات النفخ.. في المقطع دا عجب أنت صاعدا في مراقيك لعمري أو هابطا في انصبابك كـم نبـيل بمجـد ماضيـك مأخوذ وكم ساجد على أعتابك .. بتحس يا ابوذر بالامواج تتلاطم وبنبل هذا النيل. وكانك بتتفرج او تنزلق نحو الشلال الثالث
09-19-2021, 00:43 AM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
العبقرية برضو تكمن ليس في اللحن بس او التنوع الموسيقى وتكثيف الهارموني حتى القصيدة صعبة جدا والقافية فيها حرف نادر .. هو حرف ( الكاف ) الساكن ودا عصي وصعب في التلحين لكن عثمان حسين كيف طوع الكاف دي .... شىء محير
09-19-2021, 09:25 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8601
زي الفي حاجه مزعلاك مهما كانت، حقك علينا، حتى من غير ما نعرف هي شنو
انت بس قول الحاصل شنو
النداء السيزاري، النسبة ل يوليوس سيزر طبعا Et tu Brute
حتى انت يا بروتس
ههههه
كل الموضوع يا خواض هو اننا في أمور الموسيقى لما تستشكل علينا مسألة وتستغلق علينا وما نكون فاهمين اسمها شنو او اتعملت كيف بنسال الموسيقار احمد ياسين عشان يشرح لينا ويورينا هو زول اكاديمك طبعا وفارز الامور دي احسن مننا
09-19-2021, 09:27 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8601
والشكر لمحمد محمد قاضي. القصيدة جميلة والأغنية واللحن روعة والصور في الفيديو برضو روعة توري أنو الإنسان دا فعلا فيهو من روح الله. "فإذا سويته ونفخت فيه من روحي..."
ويا حبيبنا الخواض لم أفهم مداخلتك؟؟!! مع التحية
09-19-2021, 10:03 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8601
سلام عليك يا لمة الادباء والشعراء والفنانيين ورحمة الله وبركاته ،،،
Quote: اول شىء ..سنة 1956 لمن عثمان حسين قدم في محراب النيل...لقى نقد قاتل واتهموه بتشويه الغناء رغم انه صاحب "الفراش الحائر"وقرشي محمد حسن..الصحف قادت حملة ضارية ضد عثمان حسين ولكن.. المستمع والجمهور كان لهم راي اخر.. هم من اجبروا الصحف للاعتذار الصريح..والاشادة بالعمل الجبار
بالله عثمان حسين برضك تمت مهاجمته وإتهامه بتشويه الغناء والفن .. المهاجمين ديل هسه تلقاهم بتاعين .. يا السفرووووووك ايووووووة ...وبالقطر جابوك
الفهمته يعني طاسو وتباشي وبثينة عباس وعلي كايرو ما براهم؟!!ا وحا يجي اليوم او لننتظر اعتذار وإشادة الصحافة والاعلام بهم!
09-19-2021, 10:16 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8601
موضوع الهجوم علي المطربين والفنانين الحاولو يقدمو الجديد في الموسيقى والغناء، موضوع كبير وعريض ومؤسس وقامو بيه ناس معروفين بالاسماء في الوسط الفني في الوقت داك وفي قصة معروفة وشهيرة عن عازف في اوركسترا الاذاعة، لم وجمع نوتات موسيقية لمجموعة فنانين ورماها في النيل لانه هو والناس المعاه كانو ضد التطور والتقدم وكل شي جديد في الموسيقى والغناء
وعثمان حسين كان واحد من ضحايا واكتر مطرب تعرض للهجوم البليد دا كان هو المطرب التاج مصطفى
الموسيقار محمدية الله يرحمه قال كلام كتير جدا عن الموضوع دا
09-19-2021, 10:56 AM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
قبل ما نبحر مع عثمان حسين مقام ( فا) ميجر او الكبير الارتفع بالخماسي حقنا دا السوداني الاصيل...وصرع به السباعي محراب النيل هو ابحار لحني وموازير تدخل وجدانك تك تك تك مع الايقاع الهاديء ياهو نيلنا .. اعظم الهبات الربانية...اذا كان ربنا ادانا الازرق والابيض . ف عثمان حسين هو النيل الاسمر ياخي عثمان حسين طوع كل مفاتيح الموسيقى لتكون طوع افكاره والحانه.... حنجي نوضح كيف استلهم موسيقى لقصيدة التحاني.
09-19-2021, 11:03 AM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
ازدان النيل بحضور ووجود الخواض و محمدقاضي وياسر وحيدر المصري عازف القانون مبتعث البعثة المصرية قام بتدوين كل الاعمال الفنية الفي الاذاعة.حفظا من الضياع .. لانه تراث ثر..عميق ....حفزا من كل عبث ولكن كان ( سعدابي) عازف الفلوت الذي زاده الله بسطة في الجسم ونقص في العقل بفعل الغيرة والعجز وسوء الخلق... قام بحمل كل ذلك التدوين بخط اليد.. ورماه في البحر وهو يهدد وبتوعد
09-19-2021, 01:18 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
ابوذر .. عد بي الى النيل لا تسأل عن التعب دا سيف الدسوقي.. رجعتنا الى المدرسة ونحن بنلحن نشيد النيل بحماس واصواتنا تعلو ايها النيل سلاما ماجرى في الأرض ماء أنت يانيل كريم أنت عون ورجاء كلما ازددت ارتفاعا زاد في الناس الرخاء بك يحي الزرع والضرع ويغني الفقراء دمت للسودان كنزا وليدم منك الوفاء
09-19-2021, 01:27 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
جماع قال: وادٍ من السحر أم ماء وشطآن أم جنة زفها للناس رضوان...؟ كل الحياة ربيع مشرق نضر في جانبيه وكل العمر ريعان تمشي الأصائل في واديه حالمةً يحفها موكب بالعطر ريان وللطبيعة شدو في جوانبه له صدى في رحاب النفس مرنان إذا العنادل حيا النيل صادحها والليل ساجٍ، فصمت الليل آذان حتى إذا ابتسم الفجر النضير لها وباكرته أهازيج وألحان تحدر النور من آفاقه طرباً واستقبلته الروابي وهو نشوان أقبلت من ربوةٍ فيحاء ضاحكة في كل معنىً بها للسحر ايوان والنيل مندفع كاللحن أرسله من المزامير إحساس ووجدان
09-19-2021, 01:30 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
موسيقى والحان عثمان حسين هي سودانية خالصة ديباجة السودان السلم الكبير ذو السبعة درجات ..... عثمان حسين عمل شنو؟- نفصو درحتين اللي هم.. الرابعة .. والسابعة ..نغمتي فا و سي بيمول عثمان حسين صعب جدا نشرح العمله في الغناء السودان انا هسي بسمع باتصات لى كمنجة عربي وهي تتابع صلوات ابوعفان
09-19-2021, 03:25 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8601
انا دائما بقول انه عثمان حسين أعظم عبقرية لحنية في مدار غنانا كله علي الاقل في حيز المدرسة الفنية الأولى زي ما سماها بروف الفاتح الطاهر دياب عليه الرحمة بل ومن جية محمد ود الفكي بابكر من كبوشية لغاية الآن
كرومة برضو لا يقل شان من ابو عفان علي الرغم من ندرة الآلات الموسيقية في ألحانه وانعدامها تماما في بعض الالحان الا انه وحتى في مجرد اللحن الكلامي والادائي فقط تحس وتشعر بكل موسيقى الكون
عثمان حسين في كل الحانه بفصل اللحن على المعني، لدرجة كل مقطع بعمل ليه اللحن المناسب وفقا لمعنى الكلام
وعثمان حسين لحن كل اغانيه الا اغنية تسابيح فقط ودي لحنها عبد اللطيف خضر
الا فلتنزل رحمة الخالق وقبوله على روحك العبقرية يا أبا عفان
09-21-2021, 05:05 PM
osama elkhawad osama elkhawad
تاريخ التسجيل: 12-31-2002
مجموع المشاركات: 20363
نرجع لدرب عثمان حسين الاخضر ..عشان تهيم فيهو خطواتنا نشوانة في خريف 1946 سنة الفيضان...عثمان حسين عدا البحر بى فلوكة صياد سمك عشان يمشي الاذاعة ويسجل اغنية ( حارم وصلي مالك). عثمان/ بازرعة هما من شيدا قمم الرومانتك السوداني في ابهى صوره ورسخوها في القلوب والوجدان والاحساس .. سلاحهم الفتاك هو : قوة الكلمات وبراعة اللحن والصوت المتمرس .. والخبير المتلحف ببراعته من عزف العود خلف عبدالحميد يوسف. البراعة الخلت عثمان حسين يشيل كلمات التنقاري وبرضو بدأت بسؤال واجابة واستفهام: كيف لا اعشقك جمالك .. ما رأت عيناي مثالك .. تندي زي زهر الخميلة تزدهر في روح جميلة و عالية اخلاقك نبيلة و يخجل البدرين هلالك. شالها وختاها في ايقاع غربي اوروبي اسمو الفالس. كيف عمل الشغل دا وفي داك الوقت؟
09-24-2021, 12:24 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
عندي استفسار لمحبي عثمان حسين وبازرعة في تداعي الذكريات.. والرجوع . والحسرة لما مضى من ايام جميلة في( الوكر المهجور ) بازرعة اشاركيف أنسي ايامي ..يافتنتي الكبري ووحي إلهامي .. ذكري لياليكِ ..في خِدر ( واديكِ) هل كان يرمز الى ( وادي سيدنا ) المدرسة التي درس فيها ثم المشكلة التي حصلت هناك وبسببها..والقصة معروفة.
09-24-2021, 12:35 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
احاول بقدر المستطاع ان ابتعد او ازوغ من صلاح احمد محمدصالح ابعد بعيد عن( مات الهوى )...وباقي. .. الاعمال الجمعت بينهما لان اذا دخلنا في الجو دا .... صعب جدا الخروج
09-24-2021, 01:15 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
يا ابوذر ياخ . برضو حنبعد عن شجن عثمان حسين رائد التنوع اللحني .. يعني كل كوبليه بختلف في اللحن واللزمات الموسيقية عن الكوبليه الاخر او البعدو... ميلودي تاني.... توظيف. وبرواقة نجي تشوف عمل شنو في ( من اجل حبي) لبازرعة ودي مناسبة نوجه حبنا العميق لابي ذر ابوعفان استهل الاغنية بى رمية.. ملحنة جايي تترجاني ** أغفر ليك ذنبك ما كفايه الشفتو ** من نارك وحبك إنت فاكر تاني ** ارجع ليك واعاتبك لا..لا .. لالا لا لا ** دربي أصبح ماهو دربك وهنا الاوركسترا تبدأ بموسيقى آسرة تخطف القلوب ويدخل صوت أبوعفان مستلهما حالما بالميلودي الاول: (كنت تحلم بالسعادة ) هيّ غير ما إنت فاكر ** هيّ في كلمة مودة هيّ في نظرات مشاعر
09-24-2021, 06:54 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12475
اديبنا وشاعرنا الرائع باذر فنانا الجميل احمد ياسين ما هذا الابداع الذي فاق الحد .. طريقة مداخلاتكم واسلوب السرد والوصف .. أجمل ما قرأت عن عثمان حسين رجاء خاص استمرار هذا البوست بنفس هذا الاسلوب الجميل بازرعة انسان جميل وقد جالسته لمدة دقائق في القنصلية السودانية في جدة في ليلة تكريمه ( جمعيات الثقافة والفنون ) البوست في غاية الجمال لأنكم تكتبون وأنتم عالم آخر ومن فضاء جميل ودواخلكم مترعة بحب المبدعين
أجمل بوست .. وسط قبح السياسة والصراخ
واصلوا هذا الابداع .. استراحة لكل من يبحث عن الابداع
09-24-2021, 07:42 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8601
هل جات مفردة "واديك" ككلمة مقصود بيها فقط المعنى الشعري، يعني علي سبيل القافية فقط ولا كان مفصود بيها معنى مكاني معين وهو المدرسة
مافي زول عارف لغاية الآن
واتذكر في حلقات برنامج عمر الجزلي "اسماء في حياتنا" مع حسين بازرعة في نهاية التسعينات جات سيرة الوكر المهجور وبازرعة عليه الرحمة تهرب بدبلماسية بارعة جدا جدا عن الاسهاب في سرد قصة الأغنية
طبعا اي اغنية لبازرعة على الإطلاق عندها قصة حقيقية
يعني ما مجرد صناعة قصيدة عشان كدا انا مرة كتبت موضوع هنا اسمه الصادقين
عن الشعراء الصادقين، الما كتبوا فقط لمجرد الكتابة
لكن كتبو عن واقع صادق وحقيقي ومعاش
بازرعة ومحجوب سراج والدوش والتجاني سعيد وهاشم صديق
09-24-2021, 07:31 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8601
لاحظ معاي حارم وصلي مالك هي اول عمل فني غنائي يسجله عثمان حسين في الإذاعة بمعنى انه اول لحن ليه الأغنية من كلمات محمد البشير عتيق واصلا كانت مكتوبة عشان يلحنها عبد الكريم عبد الله كرومة أصر ابو عفان لما عجبته الكلمات انه لازم يلحنها ويغنينا وتاني بذكرك عشان تتخيل شاب عايز يقدم لحن وأغنية للإذاعة ام درمان وما ادراك ما إذاعة ام درمان في الوقت داك حتلقي قدامك لجنة فيها حسين طه زكي والخانجي والمعاهم وبكل بسالة الإبداع والإصرار والعبقرية والثقة، مشى ليهم ابو عفان واجيزت الأغنية واللحن من اول برزنتيشن
وكيف تكون العبقرية بالله لو ما كانت كدا ؟
الليلة دي لما اسمع حارم وصلي مالك بتتخيل انها لحن من الحان ابو عفان بعد ما استوى عوده واستطال ظله الإبداعي
مش اول لحن ليه
09-24-2021, 07:22 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8601
تعرف في احايين كتيره جدا واثناء ممارسة فعل الكتابة وتحديدا الكتابة في ومن خلال مواقع الاسافير الواحد بلقى نفسه وكأنه "متفن" في الواطا ذات أمسية قمرية ندية رفقة الصحاب والأحباب ومائدتهم عبارة عن ونسه ونضمي وما إلى ذلك
يمكن كمان ربما كانت نوع من ال nostalgia المقيمة والحنين الكامن لأيام مضت
09-24-2021, 07:43 PM
osama elkhawad osama elkhawad
تاريخ التسجيل: 12-31-2002
مجموع المشاركات: 20363
اهلا ابوذر جيد كلامك عن النوستالجيا. وكان ذلك واحدا من الاحتمالات للاجابة عن سؤال : لماذا يستخدم سوداني متعلم "لهجة عنقالية"؟؟
بعض من تلك الاجابات المحتملة: ١-الحنين. ٢-الندم على حياة المدنية . ٣-هوية زائفة من اجل ارضاء جهة او مجموعة اجتماعية ما يطربها استخدام لهجة العنقالة! ٤-ترييف اللهجة، فمثلما ساهمت هجرة الريفيين الى المدينة في "ترييف المدينة"، كذلك نجد لتلك الهجرة مساهمة أخرى تشمل ترييف اللغة.
فعلا السؤال بتحتمل عديد الإجابات سواء الانت ذكرتها وغيرها كمان
وانا بضيف ليها كمان إجابة ربما تكون أكثر تأثيرا واقوم قيلا، وهي بتتلخص في المقولة السيارة والشائعة
لكل مقام مقال
او لكل حادث حديث
يمكن للسبب دا وفي كل ومجمل الأحوال، بكون عندك احساس انه استعمال مفردات مغرقة في العامية الدارجة ما بكون بقصد التقليل من قيمة او أهمية ال topic subject matter الانت بتتكلم فبه وعنه
شكرا يا اسامة لوجودك المغني والمفيد حقا
09-24-2021, 10:23 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
صحيح" حارم وصلي مالك" اول عمل يسجله للاذاعة. -- الوتريات: عبدالحميد يوسف- حسن عطية- احمدالمصطفى-عاحمدالمصطفى-عثمان حسين الورشة المدرسة: عبدالله عربي -علي مرغني -عبدالفتاح الله جابو- كمنجات + خليل احمد( تلحين ) هنا تم صناعة اكبر مقام موسيقى ..ماركة وطعم السودان.. الخماسي.. الخرج من السلم السباعي الكبير .الغربي ..الشرقي او المصري قلنا خفضوا السباعي درجتين( الرابعة والسابعة ) طلع مقام( فا ) الكبير وهو عثمان حسين .. السوداني .. واصبح الخماسي المموسق الفاتن
09-25-2021, 11:45 AM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
" عاهدتني " نتاج فكر وسودنة الموسيقى على نحو الاثراء وتمكين الخماسي والروعة والتطور والنموذج والسبق والعبقرية كانت في( الفراش الحائر ) مع قرشي محمد حسن
09-26-2021, 10:17 AM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
ما بين السجانة وحي العرب نمسك السجانة اولا .. مدرسة الوتريات بقيادة عربي وعلي ميرغني وفتاح الله جابو وحسن بابكر ومركز انطلاف اﻻوكسترا وقاعدة الخماسي العم تخوم السودان في القبل الاربعة.. وتسرب الى غرب وشرق ووسط افريقيا حي السجانة كانت نقطة انطلاق عثمان حسين ومن قبله حسن عطية واحمد المصطفى وخليل احمد ومن بعدهم وردي واسماعيل حسن ... وحسن سليمان الهاوي الغنى(ما شقيتك. ..انت الشقيتني ) للشاعر خضر حسن سعد تلذي نعى فيها نفسه. وانطلق منها شاعر "ماضي الذكريات" الجيلي محمدصالح. والشاعر حسن محمد صاحب "خدعوك وجرحو سمعتك" اشهر اداءات خضر بشير. ومن السجانة تالق الشاعر الكببر حسين عثمان منصور. والفنانة منى الخير ..ومحمد حسنين والخالدي و كثيرون... لا نحصرهم في هذه العجالة.
09-26-2021, 11:22 AM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12475
يا سلام منك يا عم علي .. انا آآآآه.... يا سلام زخم وعبقرية عثمان حسين خلت اعظم فنان ومؤلف موسيقى محمد وردي يحمل عوده مرتديا جلابية وطاقية وشبشب مشى راجلا(كداري)من العمارات لغاية السجانة عشان يستشير عثمان حسين وياخد رايه في اغنية( مرحبا ياشوق ) لانها بالفصحى... وعثمان حسين هو الخبير والمتمكن في مثل هذا النوع من الغناء مشى السجانة ما لقاهو قعد انتظره في الشارع حتى عاد كالحبيب المنتظر. استاذنا الجميل الرقيق على عبدالوهاب... ذكرتني بكلامك عن ابراهيم عوض في السجانة كان في عازف وملحن اشتهر ب( بشير سلوى ) لانه هو القام بتلحين ( يا سلوى قلبي شن سوى ) ...
09-26-2021, 12:12 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12475
حبيبنا احمد فنانا الجميل صدقني الى اليوم لا اعرف الفرق بين السجانة والحلة الجديدة كان نادينا في الحلة الجديدة ( نادي ارتقاشا) وعمنا سعيد بدري كان زعيمنا ومسئول النادي طبعاً أنا رحت في اجازة رحمهم الله كان والد حمزة سعيد بدري عازف كمان ( قريبي جداً ) كان يحكي لي حمزة ما يرجع مبسوط إلا يكون مع وردي باقي الفنانين طماعين
رحم الله عمنا سعيد بدري واخونا حمزة رحمهم الله لهم صلة قرابة مع خليل فرح بدري البدرياب .. عائلة كبيرة عندنا في جزيرة ارتقاشا
تحياتي الحبيب الفنان احمد .. واصلوا هذا الابداع
09-26-2021, 02:02 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
Quote: ما يرجع مبسوط إلا يكون مع وردي باقي الفنانين طماعين
تحياتي استاذنا علي برضو كان في عازف ماهر اسمه احمد بريس كان من ركائز وردي قريبك العازف طبعا وردي ببسطو لأن وردي كريم كرم عجيب ونفسه كانت كبيرة . بمناسبة رجوع عمك سعيد بدري مبسوط ..احكي ليك دي: مرة بنتكلم وفي معانا كم عازف طلعوا في جولات خارجية مع فنان كبير .. قلتليهم طبعا رجعتوا مريشين وعدادات فل....وعملات صعبة وهدايا وكدة...صاح؟ قالوا يمين الفنان دا بعد ما قبضنا ما خلى لينا التكتح .. قالوا لعب معانا حريق خرتنا كلنا الاداهو لينا رجعوا.. طبعا الفنان دا مشهور جنوا قمار ..وحريف ومرزق
09-26-2021, 04:02 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2664
ابوالشيوخ .. الفنان برضو من مدرسة السجانة لازم نذكر يحي زاهر السادات الذي تعلم منه حسين عزف العود.. والملحن الكبير سليمان ابوداؤد والشاعر صلاح حاج سعيد والبقية تاتي
09-27-2021, 05:52 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12475
تعرف يا ابو حميد السخانة كانت هي المعادل الموضوعي والمعارف الفني لمدرسة ام درمان دا فيما يختص بالمدرسة الغنائية الاولى زي ما بسميها بروف الفاتح الطاهر
في امدرمان كان هناك عبد الرحمن الريح، شيخ الفنون كلها ومعاه الحيران طبعا كلهم من موسيقيين ومطربين
وفي الخرطوم بدت نواة الإيداع تتفتق مع حسين زهري باشا وعبد القادر سليمان وخليل فرح ومعاهم عبد الحميد يوسف
وانضم تاني لمدرسة الخرطوم خليل احمد، ال God father حق محمد وردي وعبد الفتاح الله جابو وجاهم من مدني بدر التهامي، وهو الجاب ليهم الكاشف ورمضان حسن والخير عثمان من مدني
وكبرت الحديقة واستطالت اغصانها وانضم ليهم ابو علي ملك التطريب الأعلى حسن عطيه وحسن سليمان واحمد المصطفى قبل ما يحتوه ويتمنون آل ابو العلا في ام درمان، ومحمد حسنين وجاتهم كمان صاحبة الصوت الملائكي الأنا مسميها فيروز السودان، آمنة خير الله، منى الخير يعني من بري ابو حشيش، واللماها معاهم النقر عازف الكمان
النقر طبعا لاحقا اتزوج مهلة العادية
مدرسة الخرطوم، او السجانة تحديدا، اسهمت والله بنصيب الاسد، واللبوة كمان، ههههههه في مسيرة الإبداع الغنائي السوداني
09-27-2021, 06:17 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8601
والله الموسيقى، هذا الكائن الحي العجيب والغريب بتعمل في الأرواح ما لا يستطيعه اي شي
واي كائن حي ما بتفاعل مع الموسيقى انا بشك والله في كون انه حي
وعثمان حسين، وللمصادفة كمان، هو اصلا شايقي من مقاشي، عمل وانتي وابدع في الموسيقى عبقريات وتجليات غير عادية وهو لا درس ولا قرأ ولا عرف عن الموسيقى بس هي خلقة ربنا وابداعه في خلقه
09-27-2021, 06:41 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8601
مافي فرق بين السجانةوالحلة الجديدة الفاصل بينهم بس هو الشارع الممتد من الشمال للجنوب الببدا من كبري الحرية لغاية لفة القوز غربا ولفة الحجر او السوق الشعبي لاحقا
لكن فنيا كانو متكاملين ومتواصلين
في الحلة الجديدة تلقى رمضان حسن في ديم سلك وفي السجانة عثمان حسين في ديم التعايشة
وفي الحلة الجديدة تلقى موسي محمد ابراهيم مع البيكلو وفي السجانة تلقى حسن بابكر مع الكمنجة
بس تقطع الشارع
09-27-2021, 06:53 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12475
شاعرنا الرائع وفنانا الجميل زهجنا من قبح السياسة لنستريح في هذه الواحة الظليلة يا سلام مثل هذه الحكايات تجعل انسان يغوص في اعماق الوطن ويتجول في أدق تفاصيلها ..
واصلوا البوست ألاحظ أن الحقيبة كانت في أمدرمان
بوست جميل .. فوق فوق في القمة
يا ريت حبيبنا قباني .. كمان ..
09-27-2021, 07:09 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8601
فعلا فترة الحقيبة بدت في ام درمان بحكم وجود الناس الابدعوها وبدوها هناك
ابتداء ب محمد ود الفكي بابكر الجا ام درمان من منطقة الجعليين من كروشية تحديدا في بداية القرن العشرين وتحديدا في سنة ١٩٠٥ وجاب معاه نمط أغنيات منطقة نهر النيل ووجود إبراهيم العبادي كشاعر وتبنيه لمحمد احمد سرور كملتي
وكان معاهم نخبة الشعراء الأوائل يوسف حسب الله ومحمد علي بدري عم خليل فرح بدري، والمطبعجي
وبعدهم جات مجموعة العبادي ومصطفى بطران، بطران من بحري طبعا، وانضم ليهم محمد ود الرضي من شرق النيل ثم ابو صلاح وسيد عبد العزيز وعبيد عبد الرحمن وعمر البنا واخر عنقود شعراء الحقيبة عتيق و عبد الرحمن الريح
كلهم او غالبيتهم شاءت الصدف انهم يكونو من سكان ام درمان ومعاهم طبعا الشق الثاني في العملية الإبداعية الفنية الغنائية، وهم الفنانين سرور وبرهان وكرومة والفاضل احمد وعلي الشايقي وزنقار عشان كدا ارتبطت فترة غناء الحقيبة بأم درمان
09-27-2021, 08:13 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
اتخيلوا بس وردي في حفلة زواج اخت احد العازفين ..طلع بغني ،نورالعين" فجأة عثمان حسين جا داخل.. التفت للفرقة المصاحبة وقال حنغني "خاف من الله" وان هي الا دقائق حتى بدأت الفرقة تعزف المقدمة ... والاغنية دي وردي اعطى فيها الساكسفون مساحة كبيرة ..عثمان حسين بعد الترحيب به والسلام... التفت ناحية وردي مبتسما ورفع يده اليمين محييا وردي والفرقة ويده الاخرى في جيب البنطلون....ووردي عارف ان عثمان حسين بحب اغنية "خاف" جدا.. وخاصة المقدمة والكسرة في "كفى يا قلبي انسى الفات".. وردي رد التحية لعثمان...ناداهو ... عثمان تعال......طلع عثمان حسين المسرح مع وردي وغنى بذلك الصوت الغير عادي (خااف ... خاااااف من الله على ااا قلبي..قلبي من غرااااامك خااف"
09-27-2021, 08:25 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12475
شجن يا علي شجن في "شجن" يا شيخ علي ..قدر عثمان حسين ان يلحن ويغني اطول مقطع شعري مزدوج يعني مقطعين... اداهم في طبقة صوتية متوسطة وعبقرية ادائية لان المقطعين لابد وحتما ان يؤديان بهذه الصورة الصعبة وبنفس تفكير عثمان اللحني لو لاحظتوا الاوركسترا بتسلم عثمان حسين وكانك تسمع الموسيقى تقول "ياقلبي" ويدخل عثمان وبى نفس واحد متسائلا "يا قلبي لو كانت محبتو بالتمن يكفيك هدرت عمر.... حرقت عليه شباب( 12 ) كلمة... وطوالي واصل في المقطع التاني الاطول بنفس الطبقة الصوتية الوسيطة وبانسياب وسلاسة وجمال .. مواصلا ومستدركا : لكن هواك اكبر وما كان ليه تمن والحسرة ما بتنفع وما بجدي العتاب.... ( 13 ) كلمة
10-06-2021, 01:25 PM
HAIDER ALZAIN HAIDER ALZAIN
تاريخ التسجيل: 12-27-2007
مجموع المشاركات: 22434
يمين يا بلدي تنتصري.. وتبقي عظيمة تزدهري نفكر فيك بحرية ونعمل فيك بثورية نحصل كل من فاتنا ونبني الإشتراكية يمين يا ارض اجدادي تعيش الثورة خلاقة بإيمان ثوري ما بضعف بالإنتاج و بالطاقة مواكب تمشي تتحدى تدوس الظلم ينهدي وطال ما شعبنا بقاوم جوار الثورة تشد وما بترجع مواكبنا وما بتنقصنا حريه نحل اصعب مشاكلنا بنور الفكره والمنطق شعار الشعب حريه وثورة وعدل يتحقق نوضح راينا نتكلم ومن اخطاءنا نتعلم ومن تاريخنا والحاضر من امالنا نستلهم وما بتخدعنا نظرية وما بترهبنا رجعية من الواقع من الداخل نحدد نحن فكرتنا اصيلة فتية عملاقة نجسد فيها عزتنا نجسد فيها ايماننا بدين عايش في وجداننا موروثنا تقاليدنا ندعم موقف الثورة بأروع وحده فكرية
10-06-2021, 02:28 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
سلام و يا سلام يا حيدر الزين العمل البديع دا ..كلمات فضل الله محمد(وعي الاشتراكية) وبعض الناس قالوا (تعيش الثورة) والنشيد دا الكيزان حكموا عليه بالمؤبد بحجة الدعوة للشيوعية مع الوكر المهجور بحجة الدعوة للسفور والقبلة السكرى. الداعية للفجور
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوذر بابكر
Ahmed Yassin
محمد محمد قاضي
osama elkhawad
Yasir Elsharif
HAIDER ALZAIN
علي عبدالوهاب عثمان
الشيخ سيد أحمد
فيس بوك
تويتر
انستقرام
يوتيوب
بنتيريست