|
|
|
 Re: مثلثات ابو صلاح (Re: أبوذر بابكر)
|
التوكيد او التأكيد في الأدب عموما وفي الشعر خصوصا
هو انك تجيب عنصر وتضعه او تضيفه لعنصر تاني، للاستعانة بالاتنين في وصف او رسم صورة بلاغية مدعومة
سواء كان العنصرين من نفس النوع او الطبيعة او المادة او كانو مختلفين عن بعض في النوع
مثلا
النوم والسهر
عنصرين او حاجتين مختلفات في النوع ونقيضين كمان
وفي نفس الوقت مشتركين في معنى اكبر بجمعهم الاتنين
البكاء والنواح
حاجتين من نفس الطبيعة والنوع والمعنى
الشاعر ممكن يستعين باي اتنين او اي معنيين بقصد التأكيد او ترسيخ الفهم والمعنى
او لرسم صورة شعرية مثلا الخ الحاجات البلاغة
الاستعانة بعنصرين هي الشي المألوف وشائع وكتير جدا عند الشعراء
لكن عند أبو صلاح مافي كلام زي دا
وعشان هو ابو صلاح، سيد التفرد والتميز
ولازم يكون مختلف من التانين
بدل الاتنين بقى بعمل تلاتة
كيف ؟
شوف بس مجرد النماذج القليلة الجايه دي
يتبع
| |
  
|
|
|
|
|
|
|
|
Re: مثلثات ابو صلاح (Re: أبوذر بابكر)
|
في "قسم بمحيك البدري"
لحنها وغناها كرومة طبعا، وبعده اولاد الموردة
وبعدهم محمد عثمان وردي
حياتي ونعمتي ويسري
رضيت لو يرض بي اسري
١- حياتي
٢- نعمتي
٣- يسري
برضو في نفس القصيدة
وبين عواسلك السمري
روايحي وفاكهتي وخمري
١- روايحي
٢- فاكهتي
٣- خمري
| |
|
|
|
|
|
|
|
|
|
Re: مثلثات ابو صلاح (Re: أبوذر بابكر)
|
في قصيدة " بلغ الأقوال يا هلال"
شوف دواي ممزوج في خلال
العنب والدر والزلال
١- العنب
٢- الدر
٣- الزلال
وبرضو
طرفي سابل بين انسبال
السهاد والنوح والوبال
١- السهاد
٢- النوح
٣- الجبال
وتاااااني كمان
طرفو سيف يتلامع قبال
الوتر والقوس والنبال
١- الوتر
٢- القوس
٣-النبال
| |
|
|
|
|
|
|
|
|
|
Re: مثلثات ابو صلاح (Re: أبوذر بابكر)
|
لسه لسه
ابو صلاح مبدع غير عادي ابدا
بالله في زول نصيح بقول
يا زهيرة الروض فتحي
والنسيم بالطيب كتحي
مبالغة والله
قال ليها يا زهرة الروض فتحي والنسيم الحايم دا
لما يجيك ويغشاك، كتحيهو بي عطرك واريجك وطيبك
الزول بكتح الناس بالتراب
وزهرة ابو صلاح بتكتح النسيم بعطرها
| |
|
|
|
|
|
|
|
|
|
Re: مثلثات ابو صلاح (Re: الشيخ سيد أحمد)
|
ازيك يا شيخ الناس
يا خليل الايناس
انا والله مفتون ب ابو صلاح لدرجة ما عادية
صالح دا كون مهول وشاسع من الإبداع الفريد
كل يوم بكتشف عنده شي جديد ما بتلقي عند غيرو
ان شاء الله بجيب أمثلة لعبقرية شاعرية ابو صلاح
غير الثلاثيات دي
| |
|
|
|
|
|
|
|
|
|
Re: مثلثات ابو صلاح (Re: أبوذر بابكر)
|
في "الكواكب احتفلو بالقمر"
الصدر قلع والردف نتر
والضمير تعب
حالتو في خطر
١- الصدر
٢- الردف
٣- الضمير (الخصر يعني)
استحالة صالح يكتفي ويقتنع بي اتنين بس
تلاتة يعني تلاتة
| |
|
|
|
|
|
|
|
|
|
Re: مثلثات ابو صلاح (Re: أبوذر بابكر)
|
في "البديع الهواك سباني
يا اخا البدر يا مكمل"
ديل ايديك ام حرير مجدل
والوريد ولا القامه اعدل
١- ايديك
٢- الوريد
٣- القامة
ابو صلاح لازم يجيب تلاتة حاجات
| |
|
|
|
|
|
|
|
|
|
Re: مثلثات ابو صلاح (Re: أبوذر بابكر)
|
ملك القوافي .. وشوف وسط منو !! العبادي.. ودالرضي .. عبيد ..البنا .. سيد .. عبدالرحمن الريح .. الأمي .. العمرابي .. عتيق
دا كان التحدي الكبير لبحر القصير .. وللبلاغة وللتشبيه والوصف والتورية والمحسنات البديعية وفي الاطناب ولزوم مالايلزم
ابوصلاح في (وصف الخنتيلا) قال:شوفة عارضك نعمة جزيلة ** ترد الروح و الغمة تزيلا
في (رشا يا كحيل ) قفلها ليهم بقافية رباعية . حتى الفراهيدي ما يقدر ببحوره الـ (الستاشر) ما الخمستاشر يخوض في المجال دا
الهوي سباني
يا الامرضني وماطباني
في خديدك يلوح نور رباني
نيران اشواقك لاهباني
واسهام الحاظك ناشباني
ومن ضمن الحاله التاعباني
....
القصيدة دي فيا حتة عجيبة .. وصف رهيب حيث قال
مالَ صدرك لحشاك تاني *** وكتفك مالَ بو فريع بستاني
يتّكل في دروعه (يبوس ) تاني
دا عربون لغاية بعدين نجي لحساب المثلثات عند ابوصلاح .. كان الله هون
| |
|
|
|
|
|
|
|
|
|
Re: مثلثات ابو صلاح (Re: Ahmed Yassin)
|
في "قسم بمحيك البدري"
لحنها وغناها كرومة طبعا، وبعده اولاد الموردة
وبعدهم محمد عثمان وردي
حياتي ونعمتي ويسري
رضيت لو يرض بي اسري
١- حياتي
٢- نعمتي
٣- يسري
برضو في نفس القصيدة
وبين عواسلك السمري
روايحي وفاكهتي وخمري
١- روايحي
٢- فاكهتي
٣- خمري
*
كلمات ولحن
استمع لها كلما ازدحمتالذكريات في قاع المخيخ، لتنسابا سويا
تحياتي ابا ذر
| |
|
|
|
|
|
|
|
|
|
Re: مثلثات ابو صلاح (Re: ابو جهينة)
|
ازيك يا جلال
قسم بمحيك البدري
أيقونة من تجليات ابو صلاح
لاحظ المفردات المتجلية والفريدة والمافي شاعر غير صالح
قدر يجيبها ويطوعها نظما ومعنى
الأغنية لحنها العبقري كرومة طبعا وغناها
وبعد داك أهداها ل الفاضل احمد عشان يغنيها
وفعلا الفاضل غناها وسجلها في أسطوانة
يعني ما بنلقى تسجيل حاليا بصوت كرومة
وسعيدين الناس الحضرو حفلات كرومة وسمعوها منو
كرومة كان كريم
ياما الحان واغنيات بديعة لحنها واهداها لغيره
الفاضل احمد صوته قريب جدا من صوت كرومة
وحتى طريقة الأداء متقاربة مع طريقة عبد الكريم
عشان كدا برضو لحن ليه اغنية
متلي كم ضايعين
مالي ومال حسان العين
| |
|
|
|
|
|
|
|
|
|
Re: مثلثات ابو صلاح (Re: Ahmed Yassin)
|
صالح دا ابدا ما عادي يا احمد
وفوق كل المعايير والمقاييس والتصنيفات
خليني بس أفضى شويه واجيب ليك نماذج من عبقرية الشعر عنده
مع تقديرنا وتقييمنا الكامل لكل زملاءه من الشعراء
الا انه هو كوم وكل الباقين كوم بلا استثناء
والاثبات حيكون بالامثلة والنماذج وتفصيل وتحليل كل نموذج
| |
|
|
|
|
|
|
|
|
 Re: مثلثات ابو صلاح (Re: أبوذر بابكر)
|
قصيدة متلي كم ضايعين
واحدة من تجليات ابو صلاح
كالعادة اداها كرومة ولحنها العبقري البديع
لكن المفاجأة انه وبكل طيب خاطر وجمال روح
كرومة اهداها للفاضل أحمد
الفاضل احمد مطرب حقيقي رغم انتاجه القليل مقارنة بمطربي الحقيبة التانين
واللحن كمان لحن متفرد ومميز ضمن الحان كرومة
صالح بقول في القصيدة:
"متلى كم ضايعين
مالى ومال سهام العين
لا اطيق تطعين ولا استطعت مرام
لحظات دغس لامعين
تهت بين تمعين ماء ونار وخضار
فى خدودو مجتمعين"
لاحظ
ماء ونار وخدار
لازم يلون ويزين اللوحة بتلاتة الوان/مفردات
وهنا يتبدى تفرد أبو صلاح وشاعريته العالية
| |
|
|
|
|
|
|
| |
أبوذر بابكر
الشيخ سيد أحمد
Ahmed Yassin
ابو جهينة
فيس بوك
تويتر
انستقرام
يوتيوب
بنتيريست