. جيت من القاهرة قبل إسبوعين ، مشيت قبل رمضان ، وعندي شقتين في المهندسين ، مؤجر وحده . المرة دي لفت نظري كمية السودانيين القاعدين من غير هدف ومن غير وجيع. . الناس الطلعت بفهم معيشه ووضع أحسن. القاهرة حاليا عبرت شديد لا في شي رخيص لا في شي بتباصر. . الناس ديل اقتصاديآ عبروا وبستاهلو لأنهم شعب بشتغل، كباري ساي نقول ليهم مبروك
. طيب عن كمية الشباب السودانين البشوفوم قاعدين وشغالين أشغال بسيطة وهامشية وقبل أي شي، أي شغل حلال لا فيه عيب لا فيه نقد وكلها أرزاق نحمد الله عليها . طيب وقت انت قادر تشتغل لبيس أحذية ودليفري وبواب وعامل نظافة وحارس مش ممكن هم زاتم نشتغلم في البلد !!! . ماهو الليلة بالمنطق انت ما حتاخد أكتر من 100$ أو أقل في الوظيفة دي، ودي حاليا بقت رقم بسيط شديد في القاهرة ودي ما بتغطي منصرفات ما فيها أي نوع رفاهية حتي الأكل والشراب والسكن حد الجوع والحرمان 💔 . ولو قاعدين منتظرين وظائف هم في بعض بتمنوا ومنتظرين. . إحساس إنك قاعد مبهور بكم الانوار وتامي حياتك لف في قهاوي وآخر شي تبيع كليتك. بيع الكلي باب براه باب بوجع شديد . قهاوي وسط البلد لبيع الكلي للسودانين بقت مقصد وباب حل جاهز وانت فريسة جاهزة. . كمية الشباب القاعدين بس يلمو في قروش عشان يركبو السمبك تقطع القلب عشان خط الرجعة ليهم حار. وبكون نفسك تقول ليه انت بتدفع في تمن موتك ! . كمية الشباب السكارى وضاربين مخدرات في شوارع وسط البلد شي محزن. . شقق المحرمات للسودانيات شي بقطع القلب وبحزن ويخليك تبكي دم بحرقة. . كمية البنات الكلهم سماحة وطاقة وبشترو في وهم . كمية الناس الباعت أملاكها وجات القاهره حاليا ببكو ندم لأنهم اتخلعو بصرف البلد والحوجة بقت في المنصرفات ما قادرين عليها، وشوارع المهندسين بقت مرتع للشحدة باسم اتقطعت للعلاج. . الحرمان في عيون أطفال الجالية السودانية شي ما بتوصف ما بتوصف ما بتوصف، لأنها بلد للأطفال مغرياتها لا تعد، وفِي بلدنا العندو والماعندو بلعبو في نفس المكان. . الإجرام في المدارس السودانية والفشل في الجانب الأكاديمي بصمة محزنة. . السودانين واصلين مرحلة في مصر ما بسلمو على بعض لأنه بخافو من بعض يطلع حرامي أو مجرم. . من يومين شاب أدى راجل كبير حبوب يوصلها ليه السودان، طلعت مخدرات والأمن جرجر الحاج والله أعلم طلع منها وله لأ 😭 تصرف أناني حقتل المروءة بين الناس... السودانين في القاهرة قاعدين ساكين سراب. أولاد وبنات بحرقو في زهرة عمرهم تحت تمني السفر لدول الغرب . ولافين من دسكو لي بار لي قعدات سهر وشراب المصائب البعملو فيها ما بتوصف وما طبيعية. ياريت الأهل يجو يفتشو حال عيالهم قبل الحال ينكشف وفِي النهاية ما بتقدر تقول لي زول حب السودان بالغصب لأنه صكوك الوطنية ما بتتباع. بس ياريت نرجع نفتش عن عزة نفسنا لأنو دي أجمل خصلة كانت فينا
07-24-2021, 05:07 AM
adil amin
adil amin
تاريخ التسجيل: 08-01-2002
مجموع المشاركات: 37022
الشركة القابضة المصريةالبتنهب في السودان طيلة عصور الانقاذ مع الجنرالات الهسة و الجيش والامن وخارج ولاية المالية السودانية تصرف لي اي سوداني في مصر واسرائيل كمان مبلغ 10000 دولار وتذكرة عودة الي الوطن ولي حمدوك حيحيل المشكلة دي كيف ؟؟؟ مصر الناهب المباشر للسودان عبر العصور وفضحهم ابراهيم منعم منصور ومعاها الامارات والسعودية وقطر وتركيا وخدم لجان البل ما عايزين يبلو الدول دي وقالو ثورة كمان المرء حيث يضع نفسه ونحن 65 سنة ختينا نفسنا في المكان الغلط جامعة الدول العربية ومستمرين حتي الان يوليو 2021 ونرفس معاهم الحبشة دون حياء
07-24-2021, 05:21 AM
Asim Ali
Asim Ali
تاريخ التسجيل: 01-25-2017
مجموع المشاركات: 13492
Quote: السودانين في القاهرة قاعدين ساكين سراب. أولاد وبنات بحرقو في زهرة عمرهم تحت تمني السفر لدول الغرب . ولافين من دسكو لي بار لي قعدات سهر وشراب المصائب البعملو فيها ما بتوصف وما طبيعية.
وصف سمعتو قبل حوالى 15سنه وكنت اتمنى يكون كضب وصف واحد شغال قواد لاختو فى الملاهى ومن ثم سحب الزبون للشقه فى حفله خلاعيه (اوقى) شىء مؤلم دا غير قصه ام من جنوب السودان تم اختطاف بنتها المراهقه من الشقه خلال خروجها للعمل خطفها مصرى والام تقول انو تزوجها وانجبت منو لكنها ماعارفه مكانها والله اعلم هل تزوجها ام الامر له وجه اخر استحت الام ان تذكره عن مصير فلذه كبدها
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة