القدال --- المبتدا واصل الحكايه

المبتدا واصل الحكايه
كان ياما يكون وياما كان
بلد اتولد بعد السمايه
ريد انعطن فيهو الحنان
نيلنا النبع من الدوايه
وحبرك البسقي المكان

المبتدأ واصل الحكايه
عمتة الضهري اب سحابن شال
فرح طين البحر
وندى الجروف
برق ضحك القمر
طعم الحروف
وزي ضو الغناوي السمحه فينا
وفدعة البت الرتينه
زي عرضة الولد البهز قدال
مطر القصيد الكابي عينه
مونة السنين الراقده سترة حال
شان ترقص حليوه وتنتني
وتدي البلد شبال
والمبتدا واصل الحكايه
"في الفؤاد ترعاك العنايه"
يا قدال
يااااااا قدال
همك خواتيم النهايه
ريدك وحيد ما بنقسم
ريدك فعل
ريدك ضمير ما بنهزم
ريدك حرف
ريدك اسم
ريدك عمرنا وما كفاك
ولامن تفوت
يحرد فرحنا وبي قفاك
يختا الدرب
يزعل يموت
يحرد يلون ليل صفاك
وجع الفراق تعب السفر
الريشه أصبع غنيتك
واللوحة تتحدى السكوت
والمعنى شهقات الوتر

حلم البشر
لون الشدر
الدمعة في عين الكلام اتوهطت
وعسل اللسان اصبح حجر
واه يا بلد
حلمك مبحلق فى الشمس
شايل نهاراتك سؤال
حسك مصنقع من أمس
ينده تساويف المحال
ويا قدال
الليله شايفنك هناك
لابس الضيا
بهرج حقيقتك
وإنكسف حد الخيال

ويا قدال
يا طالع الأكوان
جيب لينا معاك وصال
يربط يكفينا
يا حارس الأحزان
خلى الحزن ينشال
من همنا الفينا
أملا المخالى أمان
وطنك بشاره وفال
عرج على الحبان
وحليوه ترقص وتنتشي
وتدى البلد شبال
يا طالع الأكون