بعد ان قرأت كتاب رحلة ابن بطوطة.. وقفت محتار ومتمحن.. عند الحتة بتاعت انو زار ارض السودان..وزار مكان فيهو ناس بياكلو لحم الناس.. بعاعيت يعني.. سحاحير.. والبعاعيت ديل قال بيحبو ياكلو لحم النسوان.. وفي لحم النسوان اكتر حاجة بيحبوها هي الكفين والثديين.. ما عارف حكمتهم في كدي شنو؟ بعد قراءة الكتاب وتمعن فينا نحن معشر السودانيين.. قربت اصل الى انو نحن احفاد هؤلاء البعاعيت ما فيها اتنين تلاتة.. لقيت اننا ربما نكون الشعب الأوحد على وجه الارض بياكل لحم ني «المرارة» ـ الكبدة ـ ام فتفت ـالكرشة».. وبعض البعاعيت مننا ياكلو سن البرك.. وهي منطقة تلاقي الضلوع عند الصدر..
الحقيقة الحتة دي مغرية للاكل نية.. وتستاهل مني كل ثناء واحترام. الكرشة خلقهاربنا عشان تهرس الاكل وتهضمو نجي نحن ناكلها نية ونهضمها كمان.. اها في بعوتية اكترمن كدا؟
تنتابني مشاعر بعوتية.. عندما اقف عند جزار وهو يقطع في اللحمة بدون مااشعر ألاقي ريقي جرى وبطني كوركت.. ولولا الخوف من شيل الحال اشيل لي حتة لحمة نية واكلها.. اما حكاية اكل الكفين عند بعاعيت ابن بطوطة.. وجدت اننا استعضنا عنها باكل الكوارع.. فقلما نجد سوداني لا يحب الكوارع مما يثير لدينا رغبة قديمة وموروثة وهياكل مزمزة الكفين.. خصوصا كوارع الضان..
وشوفو المتعة في وش اي زول بياكل في العضام الصغيرة الفي كوارع الضان.. متعة بعاتي ما فيها شك.. تلقاهو ياكل العضم ويمصوويملصو من خشمو في الصينية او الطربيزة بكل متعة.. وينف.. ثم يتناول الذي بعده يسوي فيهو ما سواهو في اخوهو.. في اللحظة ديك لو سألتو من اسمو ما حيتذكرو ليك. اكل الثدي يتضح جليا..
عند اطفالنا الرضع.. تلقى الشافع وهو يرضع وفجأة وبدون مقدمات يعضي امو.. وهو سلوك بعاتي موجود في اطفالنا.. يدحض فرضية نظرية فرويد.. الشافع يعضي امو.. والام عشان تكبح جماح هذه الرغبة البعاتية.. ترصع الشافع في ضهرو وتقولليهو «احي.. الله يازاك» بالمناسبة.. كلمة احي دي.. هي كلمة بعاتية من صميم قاموس البعاعيت.. على حسب ما ورد في الاحاجي.. لكي اتأكد من ان كل رضع الدنيا بيعضو اثداء امهاتهم.. وهروبا من فكرة اننا بعاعيت.. سألت بعض الاخوة العرب.. ذكروا انه ليس لدىاطفالهم هذه الحركة البعاتية.. وحتى انو في واحد مصري قال لي.. وهو مطير عيونو: «ايه يا زول.. اوعى يكون اطفالكم بسووا كدي؟.. « نهرته وزجرته وانا استشيط غضبا وقلت ليهو «افو.... انت قايلنا نحن بعاعيت واللا شنو؟» وبيني وبين نفسي اتأكد انونحن بعاعيت اولاد بعاعيت احفاد بعاعيت.. وقاعدين نلد بعاعيت.. الله يجازيك يا ابن بطوطة كان داير تشككني في نفسنا.. وتجنني وتركبني القصبة. اما اكل البني آدم وعلاقتو بثقافتنا وسلوكنا.. البنحاول نهذبو.. خدو مثلا.. اتحدى اي واحد او واحدة.. يشوف ليهو واللا تشوف ليها شافع صغير وسمين ومبغبغ وعندو جضوم.. بطنو ما تفورعليهو؟.. ويكون عاوز يجضمو.. او يعضيهو في جضومو.. واعتقد ان اسلافنا البعاعيت كانوا بيستعملوا الجضيم في الجس.. ويعرفوا مدى سمن هذا الزول.. زي ما نحن حسي بنجس الخروف من ضهرو.. وما الجضيم للشفع الا هو جس مبطن.. واحيانا الواحد يلقى نفسو بطنو فارت على زول كبير وعاوز يجضمو علا خايف بس.. وخجلان.. اما في النضم تلقى جملة زي «اكل لحمي» او «اكلت لحمو».. و«ايدي اكلتني» و«قلبي اكلني» في الاغاني.. غنية «يوم طلعت القمرا».. يتضح الاكل والبلع للزول جد جد.. في المقطع «يبلع جب وجب في خصيمو.. جيت ليا»..شفتو البلع دا؟!..والتحيه يا عشاي..والعروس يغنو ليها الشحم ده واللحم ده .تقول بجهزوها للوجبه.... اما اغنية زيدان «لو الاماني بايدي كنت اهديك عيوني و اسقيك من وريدي» .. انا لا اشك ان حبيبة الشاعر دا بعاتية.. ومتعودة على الاكل وشراب الدم.. اها لو ما كدي عاد البيخلي الشاعر يهدي ليها عيون ويسقيها دم شنو؟.. بعاتية وكمان بتحب راس النيفا بتاع الزول.. وفي النيفا بتحب العيون.. الغريبة انوانا لما اسمع المقطع دا في الغنية دي.. احس برومانسية شديدة.. اتاريها مارومانسية.. اتاريها حركات بعاعيت ساكت.. لله الامر من قبل ومن بعد
منقول
07-09-2021, 09:12 AM
Ahmed Yassin
Ahmed Yassin
تاريخ التسجيل: 01-31-2013
مجموع المشاركات: 5507
قايلك وعيت وعرفت مصطلح بعاعيت مايو 1969 الشيوعيين والبعثيين والناصريين البضيعو في زمن شباب الثورة ديل ... كل من تخطي ال60 ولزال يرفس في الساحة السودانية بعاتي ...وكل من تخطت ايضا سعلوة الزومبيات بلغة هلك الكنديين انت وجي.... ولي وجووو
07-09-2021, 09:48 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: قايلك وعيت وعرفت مصطلح بعاعيت مايو 1969 الشيوعيين والبعثيين والناصريين البضيعو في زمن شباب الثورة ديل ... كل من تخطي ال60 ولزال يرفس في الساحة السودانية بعاتي ...وكل من تخطت ايضا سعلوة الزومبيات بلغة هلك الكنديين انت وجي.... ولي وجووو
انت جيت يا عشاي …
07-09-2021, 10:02 AM
Ahmed Yassin
Ahmed Yassin
تاريخ التسجيل: 01-31-2013
مجموع المشاركات: 5507
قصية أبن بطوطة زار السودان .. لم تحصل مطلقاً .. كذب وأفتراء ..
قبل سنوات أنا أكتب في كتاب عن حزام البقارة وهجراتهم الأولي والبيئات الوحشية التى قابلتهم .. وقعت علي رويات أبن بطوطة في الحزام المعروف اليوم بحزام السافنا وفي أجزاء الجنوبية المسمي بحزام البقارة .. ووقفت علي كل النقاط والبلدات التى زارها أبن بطوطة .. وأقصي حدود رحلته ومدي الأخبار التي تواردت إليه من البلاد المجاور عن طريق التجار ووفود للقبائل ..
هناك خلط كبير والناس لم تتحقق منه .. هو مالي الحالية وحتى عام 1963م تسمي بالسودان الغربي .. يعنى دولة مالي أجزاءها الجنوبية .. هى التى زارها أبن بطوطة .. وهذه هى الحقيقة.
لكن هنا .. آكل البشر جد جد يسمى بابوولا .. ربوه من ولدوه بلحم البشر .. الشقي أمه وأبوه ماتوا وهو صغير .. وأبن عمه رجل فاضل بحسب معايير مكانه أعتني به وكان يحفر الجثث الميتة حديثاً ويطعمه حتى ربي الصغير .. ثم أعلمه كيف يحفر الجثث ويأّكل نفسه .. وأخبره أين يجد أين أجود وأطيب اللحم في الأنسان ..
الخلاصة .. عمك بأكل في البشر حتي اليوم .. وقال الأمر صعب تركه .. وقد حاول لكن يجد تخونه نفسه الأمارة بالسوء .. فيشوي شية شيتين! .. (المصور من أمريكا .. نيو جرسي ..).
بريمة
07-12-2021, 10:19 PM
Shinteer
Shinteer
تاريخ التسجيل: 09-04-2002
مجموع المشاركات: 2525
ابن بطّوطة يا حاج بريمة زار السودان، لأن السودان كان يعني كل الجزء المغمور دا، والذي ما زال مغموراً. ابن بطّوطة زار السودان، ولا شك في ذلك.شيخ يحيى، شغل البعاعيت دا أنا اقتنعت بيه من زمن ليس بقريب. ذات ليلة سمحة وعامرة، الجماعة الخبراء جابو الـSashimi وأنا جديد بيناتهم، وأنا من منطقة كلمة سمك دي جاتنا قريب، وكلو عندنا حوت وبس. وأصلاً ما بناكل الحوت ولا عندنا بيهو علاقة. كمان يجيني نيْ!!! أها ردموا الساشِمي وأنا قعدت أعاين ليهم واستغرب في ناس تاكل حوت نيْ. واحد من كبار الخبراء قال مالك؟ ياخي شيل لك قطعة ساشِمي وأعطنها في مرقة الصويا دي وشيل عليها شوية wasabi. قلت ليه يا زول والله الحوت دا أصلاً ما بناكلو لو مشوي أو مغلي في غلاية.فقال لي: يا عربي انت بتاكل كبدة ألبل (الإبل) نيّة وبتاكل المرارة والكرشة والرئتين نيات، وبتاكل البرِك نيْ حتى قبل الخروف ما يكتمل سلخو، وبتاكل أبغازي كمان، جايي تقول لي الحوت الني كعب؟ فجأة فتح الله علي بالمغامرة وجربت الحوت الني، ومن ديك وعيك. غايتو كمية الحوت الني الأكلتو بشبع قبيلة.لذلك نحن لا نختلف عن البعاعيت في شيء.قدّس الله سر الحوت الني واللحم الني برضو.شهيتنا أكل البعاعيت.ياما أكلنا في السودان الشغيغ أكل لا يصلح لود أبنادم ظاطو.
Quote: قايلك وعيت وعرفت مصطلح بعاعيت مايو 1969 الشيوعيين والبعثيين والناصريين البضيعو في زمن شباب الثورة ديل ... كل من تخطي ال60 ولزال يرفس في الساحة السودانية بعاتي ...وكل من تخطت ايضا سعلوة الزومبيات بلغة هلك الكنديين انت وجي.... ولي وجووو
جقود .. قوم
07-12-2021, 11:17 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
بالشفناهو ...اثناء ذبح الخروف يقطع حتة لحمة حمرا وياكلها نية بالاضافة للمرارة و ام فتفت وخصية الخروف(اللفت) العلي الشمال بعرفوها كيف ما عارف. دا بوصلنا الى انه ممكن : كل امرء بعاتي وابن بعاتي وذو نسب في البعاعيت عريق
07-13-2021, 01:23 PM
الصادق عبدالله الحسن
الصادق عبدالله الحسن
تاريخ التسجيل: 02-26-2013
مجموع المشاركات: 3244
Quote: كل امرء بعاتي وابن بعاتي وذو نسب في البعاعيت عريق
وبالضغط على الرابط بالأزرق في الأسفل سوف يكتشف ضيوف البوست وكل المحيطين بمائدة القباني "المترعة" بأن للـ"عراقة" عنوان، وبأن لآخر المتداخلين نسب في "الباعثين" عريق.
وقد ينسل ويظهر من عُمق أعماق الأرض ومن تحت التراب ومن وسط غبار البوست بعاتي ينتفض ويتلاعب بذيله ويتلمظ اللحوم النيئة عند بِرك وتُرع الدماء، ويتراقص طرباً على وقع أنغام السكاكين بعاتي ضخم وعاتي وسمين يُدعى أحمد ياسين.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة