أم الشهيد كنداكة

Quote: أم الشهيد قلب كنداكة ««::::»»::::««::::»» يا يمه آآه لو آآه تفيد موجوع حال البلد مخنوق الكاتل فيه مطلوق يغُش فينا سواقا كان تنفع فينا عُواسا ونتنازل عن قصاصا تصبح ليهم هي مقاده تنشف فصول معناها رأس العسكر كما الجبخانة فاضي محشي كمان بارود إلا يا امي حلفنا جماعة تبقى الثورة نتقاسم فيها باقي شهاده نركز في خشم الساحة إلا نعيش وفق حلاته حرية قايده معاها سلامه ودعتينا لآخر شارع ديك عيونك تباري خطواتنا تقري لينا الماعوذتين تختمي فيها بالإخلاص شايله الفاتحة على أرواحنا تدعي ربك يحافظ علينا وتكتبي كتابك يا الكنداكة تعلقي لافته من روح جنياتا مطلب واضح يجب تنحى عسكر مدني أحزاب الفكه إلا العسكر ود الهرمه وزع علينا كل جبخانة إلا العسكر يا امي مُحال يشكر صوب كبر هلل ركز باصق طلقه فوق أرواحنا حصد أرواحنا عشان يتحكر يبقى المشهد زي الأول كان وليدك رافع هتافنا فوق كتيفه شايل الموكب خاتي قليبه في قلبي ولله حاميني هو بصدره إلا العسكر كان مترصد قال لجندي نفذ امرك ما تردد يرجف زنادك كل الطلق وقع في صدره فجاءة طارت روحو منه طار فوقنا مليون عصفور رؤية عيد أبت تحقق سال الدم يا امي والجبخانة أبت توقف دم وليدك هو دمي كل الوكت كان جنبي حامل روحه فجر شهامة بعزيمه قائد أيامنا كايس يهل بكره العيد تتم الفرحة نقعد ننجم حلم البلد نصبح أحرارا رابط حلمه بكل جساره فجاءة رفت عينك مخافه ابت تنزل دمعة حراقه بقت محبوسة خلف ترباسا وكت تتاوق من شُباكا نازلة في قلبي وجاعة فجرت فينا جميع أركانا طارت ركت في غضبي إلا الجبخانه ما خوفتنا من نتلاقى وإنتي الراكزه تضمدي جراحنا تمسحي المطر من جبهاتنا توزعي قلبك نار فانوس تهشي في سحب عتامه جن كنداكات الحِله يعزن لمح حسك وقع خطاهن وصل صوتك أرض و وديان خاتي مهابه كان بردد مع الثوار وليدى حي بين ثوار الماتو العسكر مع الطغيان هداك وليدي بين بمبان يقدل بين مليون ثوار ثورة تمد للأجيال يرشح دمه من شريان وريدو يلاقح دم الشهدا عينو تهاتي لضو الشمس كتف أكتوبر لصق أبريل شعب إصرار وحدة يسير غبن ألشهدا في الثوار كل شرارة تولع نار هداك الدم متل النيل فوق الخضرة يشيل قندول يرك عصفور زاهي ألوان تبقى السهلة حدائق زهور تبق الضحكة وكت قصاصنا تبقى الثورة كل أيامنا عادل البراري ٢٤ مايو ٢٠٢١ الخرطوم - البراري

(عدل بواسطة عادل البراري on 05-26-2021, 09:34 AM)
(عدل بواسطة عادل البراري on 05-28-2021, 11:09 AM)