وفاه فتاه فى حريق بمصنع باحد المصانع جنوب الخرطوم

Quote: اختنا و زميلتنا سمر صلاح اتوفت امس الاول في حادثة انفجار مصنع ب منطقة صافولا . هي خريجة علوم كيمياء التحقت بمصنع النيل للكيمياوات ب صافولا المصنع دا بصنع معطرات الجو يعني بستخدمو كمية من الغازات ... تفاصيل الحادثة حسب المعلومات الاتوفرت لينا : الكهرباء كانت قاطعة ادارة المصنع شغلو المولد الاحتياطي بعد مدة من الزمن الكهرباء العامة جات و لسبب ما تأمين المولد م فصل ف بالدارجي بقو كهربتين في نفس السلك ما ادى لحدوث حريق كهربائي ... سمر و زميلتا اثناء شغلهم لاحظو الحريق زميلتا قالت ليها ارح نطلع لكن سمر اصرت انها تبلغ المدير ب الحريق زميلتا كسرت قزاز الشباك و طلعت و سمر اتخطت النيران و مشت بلغت المدير بالحريق و بقو هم الاتنين يطفو في النار ب الطفاية و الحريق خرج عن السيطرة المدير قال ل سمر انها تطلع و لأنو ماف مخرج طوارئ بالمصنع كان لزاما انها تمر ب منطقة الحريق للمرة التانية و في اللحظة دي انفجرت انابيب الغاز و سمر وقعت ليها حديدة في رجلها (من السقف على م يبدو ) منعتها من الحركة المدير حاول يجر سمر من يدها لكن م قدر و النار حرقتو ف طلع و خلاها و قال للناس الخارج المصنع انو سمر جوا و ماف زول اتجرأ يخش لحد م جات المطافي ( بعد ساعة تقريبا ) و طفو الحريق لمن الناس خشت لقو سمر خلاص اتفحمت 💔 نحسبها شهيدة بإذن الله الموضوع انو واضح تماما المصنع م مطبق معايير السلامة المهنية لانو 1- م كان في مخرج طوارئ عدا المخرج الرئيسي الوحيد 2 - م كان في تدريب و توعية للعمال و الموظفين عشان يتعاملو مع حالات الطوارئ ( يعني من الباب و هاك اشتغل ) 3 - هل في check لل safety 4 - م كان في check دوري لطبلون الكهرباء ( التأمين ) عشان يتأكدوا انو شغال ب صورة سليمة 5 - الاسلاك المستخدمة في التوصيل كانت ذات مقاومة ضعيفة للتيار لاتصلح لاستخدامها في المصانع 6 - واضح تماما انو م كان في انذار للحرائق 7 - طفايات الحريق على م يبدو كانت منتهية الصلاحية او غير موزعة توزيع جغرافي متساوي داخل المصنع 8 - م كان في مراقبة لصيقة لكل اجزاء المصنع ( الكهرباء جات و ماف زول جايب ليها خبر ) 9 - عدد العمال و الموظفين في يوم الحادث م كان مكتمل و برضو المصنع اشتغل او الادارة م عينت العدد الحقيقي البشغل المصنع 10 - واضح تماما انو برتكول الطوارئ م كان مفعل 11 - ناس الدفاع المدني اتأخرو شديد او موقع الدفاع المدني كان بعيد عن المنطقة دي و هي منطقة مصانع اصلا ف للاسباب دي كلها المصنع م مطبق معايير الامن و السلامة و دي م اول حادثة نفقد فيها ارواح ناس بسبب الاهمال و تجاوز قوانين الامن و السلامة و انو المصانع بتمنح تراخيص العمل ساي كده بس و كلكم متذكرين حريق مصنع الكيميائية في كوبر و مصنع اميفارما ....الخ شيرو البوست عشان صوتنا يصل عمر حامد #تفعيل_قانون_الامن_و_السلامة_بالمصانع

Quote: بيان توضيحي لوزارة العمل حول حادثة الشهيدة سمر صلاح الخرطوم 20-5-2021 (سونا) – أكدت وزارة العمل والإصلاح الإداري وإدارة العمل بولاية الخرطوم حرصها وإلتزامها بإتخاذ كافة التدابير لضمان تطبيق إشتراطات السلامة والصحة المهنية حفاظاً على سلامة وأرواح العاملين والعاملات. وقالت الوزارة في بيان توضيحي اليوم إن وفد مشترك من مختصي السلامة والصحة المهنية بالوزارة والإدارة العامة للعمل بولاية الخرطوم زار المصنع الذى توفيت به الشهيدة سمر صلاح يحيى ومكان الحادث للوقوف على أوجه القصور فى تطبيق الإلتزامات وتشريعات السلامة والصحة المهنية الذي أدى إلى الحادث المروع . وأكد البيان إتخاذ مايلزم من تدابير لمنع تكرارها والقيام بتحقيق شامل حول الموضوع ونشر نتائجه لتمليك الرأي العام بالمعلومات الصحيحة بكل وضوح وشفافية، وأوضح البيان الى انهم سوف يقومون بتحديد اوجه القصور والمسئولية سواءً من ناحية التشريعات أو الممارسة والتطبيق . وترحم البيان على الشهيدة سمر صلاح يحيى التى توفيت أثناء أداء واجبها كما قدم خالص التعازي لأسرتها الكريمة.