زمان كان عندنا فريق في الحلة إسمو ( التضامن ) شايفنو ليك ( الآرسنال ) بس بنحبو شديد ....!! والحلة دي كلها وراهو ....كنا بنجمع لي التبرعات ..
وكان معانا برضو ود لعاب شديد اسمو ( التاج ) بقولو ليهو ( التج ) لعاب عديل كدا .....حافظا حفظ وموهوب بعمل أي حاجه بالكورة دي ....⚽️ وهو ذاتو ظريف كدا وولد حي وحبوب ...!!
لما يجي التمرين دا أعمامكً كدا بجو يترصرصو بس يستمتعوا بي لمسات ( الساحر ) دا ......!!
وهو ما بقصر ....نوع الباصات الساقطة والبينيه ديك ..... عادي الصفقة دي بتدور ....👏👏 تسمع ليك الجماعة بي بره يعلقو ( التح يا منقطا ) ....!!!⚽️ والود صحي منقطا وواقعة لي ....!!
الكورة دي موهبة كمان لا أكتر ولا أقل ....!! ما حاجه بتعلموها ... زيها زي الغنا وزي الرسم وزي أي حاجه تانيه مبدعة ....!!
والله السودان دا ضايع ساكت ...كورة ( الزقاقات ) والدافوري دي صنعت ( البرازيل ) بس نحن كالعادة غزازة في الإنتاج وسوء في التوزيع والاستغلال... مواهب اتشتت في الشوارع دي وراحت شمار في مرقة ( بلد خام ) ...!! ( والنمرة كيف وكيف )
يعني عندنا هسا واحد اسمو ( خالد ) ..... دا أي لبسه كورة في الدنيا دي عندو ( أبو شغال في قطر ) ..... الجزم والشرابات دي اقلا حاجه ( أديداس ) ويوم قميص ( مانشيستر ) ويوم ( الريال ) 7️⃣ ..... والحبة دي ما عندو .....
أها أياما ديك البلد دي بي خيرا كان في مباريات كدا بين الأحياء والمدن قامو مرة عزمو فريقنا دا قالو يلعبو مباراة وديه مع فريق في ( مدني ) اسمو ( الشعلة ) ....!!! 🔥
فعلا يازول رتبو لينا الزيارة واتحركنا حافلتين ...
حافلة فيها الفريق ملخبت بالمشجعين والحافلة التانيه مشجعين ( صر ) مدفوسة دفس ...!! ( ود الحاجه بي طبلتو ) ...🥁 وأولاد الحلة ديل كلهم مشو ....واحدين لحقونا بالبص
البعثة متسدرا واحد كدا اسمو ( جابر ) ( جابر ) دا عامل فيها رئيس النادي ....!! ( وهو النادي أوضة ما عندو ) ....!! 😂
المهم عمك عايش الدور .....،!!
ومعانا المدرب بتاعنا اسمو ( فرا ) ( بكسر الفاء ) أها دا كمان لو قلت ليهو 4....4...2 دي يعني شنو ما عارفا ....!! شابكم ليك يا اخوانا ( مان تو مان )
( العبو الكورة فوق للخصم ...... واستفيدوا من المساحات ) ....!!
بس دي ياها الخطه الأبدية في أي مباراة ... ( ومافي غيرا )
الميزة الوحيدة إنو بعرف يحمس الناس ديل بديهم ليك جرعات قوية كدا بوقفم قنا
( يعني الواحد يجي بحماس معقول بديهم حماس ( فل ) ما بديهم فارغات ) ....!!
بقول ليهم شرف الحلة معلق في رقبتكم ....!!!
ما عارفين نحن ماشين نلاقي الشعله ولا ( الروم ) ....!!!
المهم يازول عملنا معسكر صغير كدا في صالون ناس ( جعفر ) صاحبنا دا
( كمية الموز الإتأكلت عادي ممكن تتصدر ) ...!!
و إكتملت الإستعدادات للمباراة .... وطبعا نوارتنا ( التج ) وفريقنا دا قاشر بالفنايل الما خمج ( طقم ) كدا رسلو لينا دكتور ( ياسر ) دا كمان أحلى زول في الحله ....اغترب ( الدمام) ومتابع أخبار الحله أكتر مننا ...!!!
هي ذاتا لو ما بلد ( عكس ) زي دكتور ( ياسر ) دا بغترب ....!!
( بحب السودان زي عيونو ديل ... إلا الجبر فراق )
وهو ذاتو زول قيافة كدا ومهذب وأخو أخوان ومن رموز حلتنا والله .... أساسي في كل المناسبات .....!! ( الضاحكة منها والكالحة ) ...!!
زمان زمن الحفلات بتكون في الحلة ( ياسر ) دا بكون شغال من الصباح في بيت العرس والصيوان والزينه تحلف تقول أخو العروس وكت تجي الحفلة بكون حالتو بالبلا والقميص مغبر ....وداير يموت من التعب بجي يبارك كدا ويستأذن ....!!
جكس الحله بغني ليهو بي تحت تحت
( الاخدر اللونو زرعي ) 😍😍
المهم يازول بالزي الازرق الكامل 👕👕👕 ( هدية ياسر ) أولادنا في مواجهة ( الشعلة ) مدني
وناس مدني ديل كمان شفاته حي ناس الشعلة دا وتلاتة أحياء مجاورة كلهم جو المباراة ....!!
وبدأ اللقاء المهيب ...وهجمات حذرة من الجانبين .... وطلعات استطلاعيه من اصحاب الأرض والجمهور وقالو كدا أولادنا ديل مسكو ليك الكوره ودسوها وعصرو ليك الجماعة وهجوم ضاغط كثيف
و( التج ) كل ما يمكسك الكورة ⚽️ نحنا نمسك اعصابنا ونهتف ....😱😱
( سيد الشي ياخ )
( جديع شديد ) ....!!
عمل ليهو استلام كدا ....ناس مدني ذاتم صفقو ..... 👏👏👏👏 طبعًا الناس ديل ذواقين شديد ....!!
( يتنفسوا فنون ) ...
والكبير دا ما كبير كمان في أي حته ....!! ( التج ) سيدا وملكا ..
المهم في عز الزنقة دي عندهم واحد قصير كدا إسمو ( القرج ) ...لفح ليك الكورة دي وجرى بيها إخترق دفاعاتنا دي كلها ....!!ً ( دا بكون الموز دا ) .....!!
ومشي جاب قون ...بتصدقو 😳
يازول القيامه دي قامت .... رجع ليك الثقة للناس ديل .....ونحنا خشمنا بقى ملح ملح ... وجمهورم دا ولع وإنتشى .....!! وبقو يكوركو ليك ...... 😱😱
وجماعتنا لياقتهم نزلت شويه عندنا ( سيردباكنا ) ( الجاك ) دا ....لعاب هو ...لكن الشيشه هدتو نفسو قايم ..!!
أها في كورة كدا جات قدام ( التمنتاشر ) استلما ليك حبيبنا ( التج ) دا بي سدرو ونزلا الدايمة ولأنو بلعب بي ( مخو ) ما بالكدارة ..... لمح ليك القون بتاعم دا متقدم حبة .....وقال كدا رماها ليك بي وراهو بي بوز الجزمة ......⚽️ والله التقول جدعا بي يدو
قون يدرس غايتو .....!!!ومفروض يعيدوه بالبطيئ
دا لو كان صادف ( رؤوف خليف ) كان قال
اووووووووووووووووووو مش معقول غير مقبول زلزاااال .......شي كبير ياعمررري 🎉🎉🎉
يمين الناس دي كلها وقفت ...ناس ودا الحاجه ديل الطبلة دي اتقدت ....!!!
( إنتا البتاكلو ينفعك يالتج ياخ )✊
وقالت كدا المباراة دي سخنت ولعت نار 🔥 والزمن ماشي .....والفريقين ضاغطين الدقيقة تمنيه وتمنين ( التج ) دا ( جرا ) ليهو واحد كدا ودخل ( الصندوق ) 🏃🏾♂️ لفا داير يشوت ....( غمتوهو ) ليك ( المعلمين ) ديل جوه (العمليات ) ....😳
لم يتردد حكم اللقاء في احتساب ضربه جزاء لم نشاهد بعدها شيئ لانو الجمهور كلو في الملعب ...( اجتياح لبنان )
والحكم إسمو ( طيفور ) ضعييف كدا .....
مرقنو رجلينو ( السكاكات ) ديل .....(كبرا ) غايتو بي ضعفتو دي اتملص من الجموع الهادره دي .... وحصلت اكبر عمليه تغطيه وتمويه خارجو بيها الراجل دا .....🏃🏾♂️🏃🏾♂️
لحدي ما جات عربيه شرطه خوفاً من حدوث مواجهة وفرقت الجموع وانتهت المباراة بالتعادل وضربه جزاء معلقه ...!! واعتبرونا فايزين ...!!
المهم طبعا كعاده السودانيين ورغم الأحداث المؤسفة دي ناس فريق الشعله مجهزين لينا حفل مرطبات كبير
( زمان اي حفله بعد المغرب بسموها مرطبات ) 😳
لي هسا أنا ما عارف ( المرطبات ) دي شنو ...!!!!؟ 🤔
ياربي يكون ياهو ( البرتكان ) دا ...!!!
يقول ليك جيب الحاجه الباردة يا ولد ....!! دون تسميتها باسمها ان كانت ( بيبسي ) او ( ميرندا ) ولا ( بزيانوس ) ومدني كمان فيها ( الاستيم ) المهم باردة ...
أحلى حاجه في السودان دا إنو في تقدير واحترام للضيف أياً كان ... والله الناس ديل أكرمونا جنس كرم وعزونا عزة ..
( مدني ياخ )
و( جابر ) رئيس النادي حقنا وقف على حيلو يتمطى قال كلمة ....!!! و ( أريتو كان ما قال ) ...!!
قال شكراً على الإستقبال وكرم الضيافه والحمد لله نعتبر نفسنا جغمناكم في مكانكم ....😳😳
( أبو الدبلوماسيه ذاتا ...)
( تجغمك الحدية يا جابر ياخ ) هسا في داعي ) ....!!
إنتا ( الطيب عبدالله ) ...!!! مالك انتا ومال الكلمات 😷...!! فضحتنا فضيحة ياخ
غايتو الجماعه بلعوها في ( حنانم ) ولو ما مسكو اعصابهم كان ( فلقو )......
( غايتو السودان دا لا حصل ولا بحصل تاني حلا شديده 🥰 )
وودعونا ليك لحدي الحافلات بالصفقة والعناق ..... وياها دي الرياضه ... روح وأخلاق ..... وياهو دا أصل هذا الشعب الطيب ...
صحيح ممكن نختلف ونتشاكل ... !!
( لكن القلب مليان محبة والروح ماليها الجمال 💕)
اللذيذة وبعد السنوات دي كلها لقيت ليك ( فرا ) دا صدفة في ( سعد قشره ) ( هو أصلا ما من حلتنا من حلة ورا ) ( مدرب اجنبي ) 😂😂
أها لقيتو ليك مع مع بتو دايرين يعرسوها في العيد ....!! لافي معاها يشيل ويشتري ليها في الحاجات .... ( حنين ياخ فرا ) 🥰 ( هي بت وااحدة ......!! عندو ستة أولاد )
سلمتا عليهو وشابكو ليك يا ( كوتش ) ويا ( كوتش ) لما هو ذاتو إتكيف قدام ( البت ) ....!! شعر بي روحو (مورينيو ) ...!! وهو زول لذيذ كدا ومستهبل النوع الممكن يبقى مدرب ودكتور ومحامي داك ....قابل لي أي حاجه ..'
( زي ناس ( فرا ) ديل في منهم كتار .....!! حقو بعملو ليهم رابطة ) ..... يسموها رابطة ( المطاطين ) 😂
المهم زولك إتنفش بي كلامي دا واتلفت ليك على بتو قال ليها .....نحنا يا بتي لما كنا بندرب ...البلد دي كانت ماشه صاح ...!! البت متكيفة تضحك ساكت ما عارفه إنو أبوها أحد أسباب تدهور الكورة السودانية ....😂😂
( وكل فتاة بأبيها معجبه ...) ( أنا ذاتي صدقتو ) .....!! 😂
تاني لصقتا ليهو يا ( كوتش ) ....عشان خاطر العروس
المهم أخدتو بالجنبة كدا قلتا ليهو والله أنا يافرا في سؤال داير اسالك ليهو من زمان ....!! واقف لي في حلقي الزمن دا كلو ....!! الحمد لله الليلة اللاقيتك ....!!
قال لي طوالي يا علوب ياخ ...!!
قلتا ليهو إنتا زمان لما كنت بتقول لي أولادنا في ( التضامن )
( قفلو الخطوط ....واضربوا في العمق ) كنت بتقصد شنو ....!؟؟؟؟؟؟
عاين كداااااا 👀
قال لي والله يا علوب أنا ذاتي ما عارف..!!!! 😅😳😳 😂😂😂
بس سمعت ( مأمون الطاهر بقولها في التلفزيون ولفحتها ....!!
لكن عليك الله ماجابت نتيجه ....😅
وانفقعنا ليك بالضحك أنا هو .....!!!😂😂😂
قلت ليها ربنا يتمم علي خير ....!!
وافترقنا على أمل لقاء ....!!
إندس ( فرا ) في زحام سعد قشرة .....!! ومشيت أنا إلى طريقي ابتسم لحالي وأنا استرجع هذه الذكريات الحب ...!!
أما العزبز ( فرا ) فاذا لم يسفر تاريخة التدريبي سوى تتويج هذه ( البنية ) في قفصها الذهبي فقد أنجز الرجل وفاز ....!!
ربنا يديك قدر نيتك يا ( فرا ) فقد حاولت أن تفعل شيئ في هذه الحياة .....!!
الفشل ليس وصمة عار ...!!
الفشل الحقيقي أن يفوتك شرف المحاولة ....!!
بتذكر يوم مباراة الشعلة دي كان ( فرا ) يومها أهما زول في الحلة محمولاً على الأعناق... والله بدي الجنة ....!!
( التج ) هسا شغال في بلدية ( العين ) ....!! مره عملو دوري المؤسسات في رمضان لعب عشرة دقايق جاب ليهو قون لي هسه بحكو بيهو .... والكبير كبير ياسيد الكفر
يا اخوانا الناس تتماسك بس تستفيد من المساحات وتضرب في العمق ....... أو كما قال
ممتعة يا دكتور ياسر --- استاذعبدالله ودعثمان قصدك النعيم سليمان ( الحكم ) الذي ادار مباراة اهلي مدني والاتحاد؟ الانهزم فيها الاهلي.. والحصل فيها..اهههههههههه
05-05-2021, 07:25 AM
Yasir Elsharif Yasir Elsharif
تاريخ التسجيل: 12-09-2002
مجموع المشاركات: 48726
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Yasir Elsharif
Nasr
عبدالله عثمان
Ahmed Yassin
محمد حيدر المشرف
فيس بوك
تويتر
انستقرام
يوتيوب
بنتيريست