العيد يوم الخميس 13 مايو

Quote: #خواطر -رمضان متين؟ الثلاثاء ولا الأربعاء ؟ - رمضان ما بتحدد إلا بعد تحري الرؤية؛ لأنو الرسول صلى الله عليه وسلم قال (صوموا لرؤيته وأفطروا لرؤيته فإن غمَّ عليكم فأكملوا عدة شعبان ثلاثين يوماً) - طيب.. والحديث ده علاقته شنو بالموضوع؟ - الحديث ده يعني الصيام بكون بالرؤية بالعين المجردة وليس بالتقويم يعني نحن ح ننتظر تحري مجمع الفقه الإسلامي وإعلانه لنتيجة التحري اليوم - ح يحصل شنو يعني؟ -المجمع ح يتحرى الشهر في غرب أم درمان الكيلو بعد 40 لو شافوا الهلال =يبقى بكره رمضان ولو ما شافوه ح يكون بكره 30 شعبان يعني ما رمضان عملا بالحديث (فإن غمَّ عليكم فأكملوا عدة الشهر ثلاثين يوماً). -يعني عادي ممكن نصوم في يوم والسعودية في يوم؟ - آي عادي.. والحاجة دي حاصلة منذ عهد الصحابة ناس سيدنا عبدالله بن عباس في المدينة المنورة صاموا يوم الجمعة وناس سيدنا معاوية بن أبي سفيان صاموا يوم السبت، ومافيه زول قال للتاني (أنت ماكل يوم.. عليك القضاء). - طيب.. السعودية قالوا بكره - سيبك منهم.. أنت في السودان.. ما في السعودية..ودي ما أول سنة انت تصوم وفاقاً أو خلافاً للسعودية، بعدين يا حبيب الحديث ما قال صوموا لرؤية السعودية... قال (صوموا لرؤيته) الحديث.. صلِّ على النبي عليك الله. - طيب.. هسي في دول قاعد تخالف السعودية؟ -انت مالك مركز معاها كدا؟.. آي.. نصف الكرة الأرضية قاعد يخالفه لانو الليل في النصف الأول نهار في النصف الآخر.. وبرضو سلطنة عمان والمغرب كثيرا ما تخالفها... بعدين يا حبيب الموضوع ما خطير يعني.. أنت بس صوم محل ما قاعد. - طيب.. ناس مجمع الفقه الإسلامي ديل كيف؟ ثقة يعني؟ - مجمع الفقه الإسلامي يحوي 50 فقيهاً وعالميا سودانيا وفيه دائرة العلوم الطبيعية على رأسها بروفيسور على شرف الدين هو متخصص في الفيزياء الجوية وفي المجمع لجنة لتحري الأهلة على رأسها الأمين العام للمجمع د. عادل والبروفسور محمد حبيب الكنزي مدير جامعة أم درمان الإسلامية، وهو رجل ذو تخصص دقيق في المجال ده برضو اللجنة فيها باحثين من معهد السودان لعلوم الفلك ورئيس قسم الأرصاد والفيزياء الجوية بجامعة أم درمان الإسلامية. - طيب.. والسودانيين الفي السعودية؟ -ديل يصوموا مع السعودية، والفي أمريكا مع أمريكا، والفي البحرين مع البحرين وهكذا. -طيب.. هسي في زول قال شاف الهلال في جبل أولياء ووو -اسمعني.. دقيقة عليك الله.. الكلام ده حصل برضو السنة قبل الفاتت كان كوكب الزُهرة قريباً من مكان القمر، فالناس شافوه وقالوا ده الهلال، وهو ده ما الهلال.. ده كوكب الزهرة.. حتى كتيرين من الناس البقولوا شاف الهلال بقول ليهو شفتو وين من الشمس إجابته بتكون عكس الاتجاه المفروض يكون.. هو ما كضاب.. لكن هو ما شاف الهلال.. شاف قمر أو كوكب تاني. في سلطنة عمان عندهم تحري ممتاز.. لو جاء زول قال شافوا عندهم لستة فيها عشرين كوكب أو جرم سماوي محتمل.. يطلعوا الستة دي وبسألوهو... من البداية بقولوا ليهو أنت صادق.. لكن، نحن دايرين نتأكد... هل شفت الهلال لفوق ولا لتحت.. الخ من الأسئلة.. ودائما بيطلع كلام اللجنة صحيح وكلامه خطأ لانو بكون شاف جرم سماوي ما.. غير هلال الشهر - لجنة تحري رؤية الأهلِّة في المجمع دي بتشتغل في رمضان بس؟ - لا لا.. كل شهر هم بيرصدوا ويتحروا الهلال من قبل سنين وقد أسسها الشيخ العالم الكبير الشيخ إبراهيم أحمد الشيخ الضرير الأمين العام لمجمع الفقه الإسلامي الأسبق (شوف صورته تحت). -أنت المعلومات دي جبتها من وين؟ - لأني كنت مقرر اللجنة دي لحد أبريل 2020م، وبننشر رؤية كل شهر في صفحة مجمع الفقه الإسلامي على الفيس. -الصور دي لتحري السنة الماضية. منقول