في هذا البوست .. أريد من أي منكم أن يستشعر أهمية السلام .. له ولأسرته وأمنه الشخصي والنفسي والأجتماعي .. بالتأكيد تكون تأثرت بصورة أو أخري .. وهذا شيئ محتمل في هذا الوضع.
لكن السؤال ماذا أعددت لمواجهة فاتورة السلام ؟ .. فاتورة الحرب .. كانت خسارة في الأرواح، والمال العام ونهب لثروات أبناء السودان .. وخروج في أفواج وجماعات إلي الهجرة .. تلك فاتورة دفعناها وما زلنا ندفعها.
الناس الغلبهم الصبر .. وكبر عليهم التحدي .. لقد حان وقت هجرتكم أنتم كمان .. إلي حين رسوا مركب السلام علي بر الأمان.
المهم كل زول يحدد قيمة الفاتورة التى يريد أن يدفعها .. وينفذ .. إذا الحل عندك تتسلح .. أتسلح وإذا الحل عندك تهاجر .. هاجر يا أخي .. وإذا الحل في الصبر والأبتعاد من تحدي السلام .. أبتعد وأقفل بابك .. نحن الأن قرابة العام قافلين أبوابنا بسبب الكورونا .. يعنى بمقدروك اي إنسان أن يقفل نفسه.
بريمة
03-23-2021, 08:15 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27504
أهم شيئ أريد أن أقوله .. أنك تعرف قوتك .. في أي موقف .. وماذا تستطيع أن تفعل .. لو بمقدورك أن ترد اللكمة بمثلها أفعل لمن لكمك .. إن كان من لكمكم .. يحمل سلاح ناري .. فإنت غير مكافئ له .. أبلع اللكمة وإذهب إلي سبيل حالك .. و أشتكي لا تسكت.
إذا الموقف يتطلب منك أن تجري .. تهرب . فأفعل .. والله أنا ما ظننت يوماً أن أهرب .. لكن لما الرباطة في أمريكا لموا فيني .. ولكمتهم بنج زي البنج .. ثم تكالبوا عليّ من كل فج .. ودائرة الدائرة علي شخصي .. عرفت أن الشجاعة وحدها غير كافية .. بل من الحماقة أن تعرض نفسك وأنت غير مكافئ للأخر .. أهرب .. وأعلم أشجع البشر يهرب .. بخطط معلومة خطتي الفر والكر .. فر وحينما تستجمع قواك كر مرة أخري .. والمعركة سجال ..
لكن أنصحكم بعد ما أخذت كثير من الثقافة الغربية .. لو فررت من موقف لا تعود إليه حتى لو أمتلكت القوة .. أنسي الموضوع، لأن لا تعلم ما يخبأه القدر.
هذه بعض الأرشادات لعلها تفيد ..
بريمة
03-23-2021, 08:20 AM
زهير عثمان حمد زهير عثمان حمد
تاريخ التسجيل: 08-07-2006
مجموع المشاركات: 8273
يا بيما أسمع كلامي دا نحن خلاص ما عايز سلام نفصل محلنا وأنتهي الموضوع كا زول عندنا ولايتا عرفت تاني ما ذاتو سبب كلام عن سلام وغيرو البلد بلدنا ونحن أسيادا أمشوا فرقوا
03-23-2021, 08:23 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27504
Quote: أنت ما قلت مسلم ما عارف أن الابن للعصبه وليس الام المهم برضو عندي ولاية ومحل في السودان بعدين انت أمريكي بقاري بتاع الساعة كم
الخواجات دايماً بتاعين سلبطة .. مرة أخوانا لقوا خواجة في قري النيل الأبيض .. لابس عراقي وصديري وسروال .. وسكين للكوع ويداوس مع جماعته في أنداية عشان يطردوا فريق أخر من مرتادي الأنداية.
أنت شكلك مثل الخواجة داك ..
أنا بقاري سوداني .. أمريكا راتع فيها مرتع (لغة بقارية)!
بريمة
03-23-2021, 09:19 AM
اسماعيل عبد الله محمد اسماعيل عبد الله محمد
تاريخ التسجيل: 08-26-2007
مجموع المشاركات: 2816
Quote: اعمل لينا كتيب سميه (دراسة مقارنة بين الكاوبوي السوداني والكاوبوي الامريكي).
دا موضوع ذو شجون يا ول أبا ..
لو أخذنا موقف المرحوم نوري .. في الكلاكلة .. موقف ينم عن شجاعة الأنسان السوداني .. ما في شك مهما كانت الجريمة التى أرتكبها إلا أن قتله بسبب جسارته .. رجل شجاع رحمه الله.
في الغرب، هذا الموقف، يجب أن يستسلم فيه الأنسان تماماً .. ويسلم كل ما يملك .. ولو قالوا ليك أملص ملابسك .. أنت هنا لا تجازف ولا حتى بكلمة .. وليس لك إلا أن تقول "لا تقتلني أرجوك .. أرجوك لا تقتلني " وكلمات من شاكلة الأستجداء. كما إذا قيل لك إذهب معنا .. يجب أن تذهب كرهينة.. وإذا طلب منك أن تستلقي أرضاً فتفعل .. وحتى حينما تريد تتعرف علي ملامح المجرم .. تقول له "شكراً أنك حفظت حياتي .. " .. حتى لا يعلم أنك تتلصص في وجه لمعرفة ملامحه ..
تفعل كل ذلك وأنت في كامل رابطة الجأش .. إذا إنشغل المجرم بتفتيش جيوبك .. وفرط في قبضة سلاحه .. ويمكنك أن تخطفه أو حتى تضرب السلاح بقوة برجلك ويطير من الجاني فأفعل .. وفي نفس الوقت أنت معد نفسك لتهرب قبل أن يمتلك سلاحه .. وتصرخ وتقول "هلب ميي .. ألحقونى .. ألحقوني .." .. وتجري أقرب مكان فيه ناس أو نور ..
بريمة
03-24-2021, 05:52 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27504
مرة يا ول أبا، شغال في غسالة زول تركي وورديتي في الليل وذلك حينما حضرت حديثاً للولايات المتحدة .. في المكان هناك معطم ويستمر حتى الساعات الأولي من الصباح داخل مكان الغسالة .. وملاصق للمكان محلات تسمي 7-Eleven (ال 7 تنطق قبل ال 11 في الكلمة) وهى عبارة عن بقالة فيها كثير من الأشياء .. أهمها الشاي، والقهوة والحليب .. الساعة 2 صباحاً بدخل المحلة وبتناول عببوة حليب حوالي لترين .. وبرجع مكان العمل ..
شغال في المحلة حبشي هو صاحبي نشتغل مع في المطار وأسمه "قفا" .. وبرضو حبشية حلوونه .. نمشي نمزح معاهم .. ودائماً حينما أحضر .. بنطلع نحن الثلاثة قدام المكان هم بدخنّوا وأنا أشرب الحليب البارد .. ذات يوم جئت وأنا داخل .. لقيت زول شايل تلفزيون المحل .. تلفزيون كبار يصعب علي الفرد حمله .. خطر ببالي أن التلفزيون تعطل وجاء الرجل ليأخذه لمكان التصليح .. فسألته إن كان يريد مساعدة قال لا .. وذهب بسرعة وضع التلفزيون في عربته ثم ذهب بسرعة .. دخلت المحل .. لقيت الحبشي والحبشية مثل الكتبة .. يكتبون وبسرعة .. وأنا أسلم عليهم ولا يرفعون رؤوسهم .. سالتهم ممازحاً "ما جري يا جيراني في المواطنة؟" .. قال لي أنت ما شفت؟ .. شفته شنو؟ .. الزول شال تلفزيون المحل!! أي أي .. هل الزول المعتل التلفزيون حرامي؟ .. نعم، دا الحرامي .. !! .. سألتهم وأنتم قاعدين تسووا شنو .. ما تداوسوا الحرامي؟ .. عيييك التلفزيون لليوم ..
أنا أنبذ في الحبش ساعة .. ما خليت كلمة جبناء ورعاديد .. تقول الدكان حق أبوي أنا .. جاء البوليس سلمناه الأوصاف وأنتهي الأمر ..
دي محلة بشيل اللبن ..
العبار دينق .. لا يتحاوم بهذا "الأيل" الرفوف .. هو الرفوف بتاعته غير ..
أتوقع السودانين يدخلوا في هذا البزينس في السودان .. هو Franchise Store Chain .. المشكلة ح تكون قطوعات الكهرباء .. أغلب الأشياء تحتاج تبريد ..
بريمة
03-24-2021, 05:54 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27504
كؤود غايتو الا تكون قاصد كعود القعود بتعرف القعود يا بريمة نمش لى قدام شوية حديثك كتر عن الهرب و ستهرب من البلد الانت سيدا دى سلام شنو البتتحدث عنو انت يوم كان موسى هلال فى القمة كنت هلالي اكتر منّو و يوم حميدتى استقوى على موسى هلال صرت بعير لحميدتى بقيت زى الشوال الفاضى ماب تقدر تقوم براك جارى لاهث ورا الاقوى يا لخيابتك باخ الشمال يعمل الان جاهدا ليتسلح اوعى اسمع بيك بقيت شمالي اكتر من الشمال اليوم داك ماب نزيدك من الجرادة و تبقى عليك المثل البقول الضاق ركوبك ارح و ابقى مارق اما دلوكة الشتم المسمعنة داك راجنو بى يا اسماء عيل صبرى و نعيله فى عيله دخولا و خروجا حد الاعياء ____ الشمال و لا يمين الفقر النقر
03-24-2021, 06:37 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27504
والله من غير مجاملة .. أنا أحب أي بقعة في السودان .. وأستمتع جداً بتعدد ثقافاتنا السودانية .. يا أخي اليوم الذي أكتشفت فيه التركينج والشربوت .. يوم كان ماتع .. هل تصدق ناس الشمال لا يعتبرون الشربوت من فصيلة الدكاي !! .. ذات عيد فطر جميل .. وجاء صاحبي الأم درماني زيارة لي .. وجلسنا في ونسة أنا وهو والمدام .. والونسة دورت .. ومن بعد .. جاءنا صديق من "بري" لدي أخ وأخت عزيزين عليّ .. شوايقة .. عاملين شربوت .. كارب ..
يقوموا يدقوا فينى مقلب .. جابوا لي جك .. تقول عشرة لتر .. رسلوا ولدهم .. صغير .. قالوا ليه أمشي تلقي عمو أدم في الصالون ومعه صحبه .. ضع لهم هذا العصير وتعال .. وكلموه لو سألوك .. قول ليهم عصير من الشمالية .. وجاب كبابي ومصاصات .. ورجع .. أنا ذقت العصير .. لقيتو حلو .. مليت كبايتين .. واحد لي والأخري لصحبي .. ونحن ضاربين شيات تقيلة .. أي زول كشط كباية .. ثم تنينا .. دخل صاحبنا من "بري" .. قال هلا هلا .. والله معيدين .. كشط كباية .. ثم زادني وزاد لصحبي المعي .. هل تصدق .. كل زول فينا بقي تسري في جسمه حالة نعاس خفيفة .. وما أن لبثنا طويلاً حتى نمت وصديقي .. ونحن جلوس .. صاحبي ود "بري" .. روي شربوت تب .. وقال للمدام أنا ماشي أتونس مع محمد .. الناس ديل الشربوت نومهم .. أنا طشاش طشاش .. سمعت كلمة الشربوت . أي أي الجماعة شربونا مريسة ناس الشمالية ولا شنو.! .. تساءلت في نفسي .. لكن لما صحينا سري فينا نشاط لحدي يوم غد ..
ولما تجينى حلة تركين .. بدخلها في عدد كبير من الأكياس .. ولا أخلي منفذ للهواء .. لا هواء داخل ولا هواء مارق .. وبرضو المدام تتعرف عليها وترميها .. لو الدنيا شتاء .. بدس الحلة داخل كرتون وبختها في البلكونة .. والله كلما زاد عفانة يزيد حلاة ..
لدي أخ صديق من فاشر السلطان .. الفاشر أبو زكريا .. يجي له "الكول" فرش .. ويتصل عليّ .. يقول لي المؤونة وصلت .. وارد الفاشر .. نقول له .. كلم المدام .. تجهز المزة .. والمزة ملاح تقيلية أم درمانية .. زوجته من أم درمان .. وكل زول يشيل بالملعقة ويكب في الكول مثل البهارات وبكثافة .. يا زول ما ألذ تنوع أكلات السودان الشعبية ..
أنت يا جلالدونا .. أنت أمريكي .. بوديك السودان شنو؟ .. كمل بقية عمرك هنا وخلاص .. أنا ماشي السوداني .. لأني بحب السودان .. ولدي أراضي زراعية بالهبل .. أخرها تصدق لي مشروع زراعي ب 500 فدان .. وأنا قلت لو لم يصدقوا لي ب 30 ألف فدان لا أستثمر في السودان .. ح نستطيع المساهمة ونطور في البلد ..
وأنت قاعد تنعق زي البوم أو القعونج في وادي "العواي" في جنوب كردفان .. خلاص كفاية نعيق.
بريمة
03-24-2021, 06:58 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27504
بخصوص الشيخ موسي هلال .. أنا أكثر زول كتب بوستات عنه .. مثل ما كتب عن حميدتي .. هم الأثنين ناسي ... لو ملاحظ أنا لا أستثنيى أحد .. أرجع كم بوست لي عن دكتور جبريل أبراهيم محمد .. عن منى مناوي .. عن السيادي الطاهر حجر .. أي زول يقف في صف السلام هو زولي .. أنت ذاتك لو بقيت زول سلام .. تكون زولي ..
أنا أحمل ثقافة بديلة .. أن نتبنى أسلوب وسلوك جديد في الحياة .. بحيث لا نعرّض أنفسنا للمخاطر بسبب الحمية .. والحماسة .. المسألة تكون بعقل .. تداوس بفهم .. وتهرب .. تجري بفهم .. لما كنت في الثانوي .. كنت لو دقيت زول بعكاز .. بدقه لما أرقده سلطة .. ومرات يلموا فينى قوم يضربوني ضرب غرائب الإبل .. وأجي راجع البيت ولا أكلم أحد .. يكون ضامر شر يملأ الدنيا .. ولا تفش غبينتي إلا أدق واحد من الذين ضربوني لما الناس ما يقدروا يحجزوني منه .. اليوم، عرفت كل ذلك جهد في غير محلة .. وغضب وثأر غير مبرر .. غير الدواس الفردي .. كنت أقود دواسات جماعية .. نربط بأولاد الفريق كلهم .. عشان نضربوا أولاد فريق أخر .. جملة .. دوسة تكون لها ضل .. ذي ال mop
لاحظ الدواس دا .. الجماعة بالخطأ وقعوا ضرب في ملاكم وهم يجهلونه .. وتعال شوف عينهم ما تشوف إلا النور ..
بريمة
البنج رقدت
أها نوك أوت ..
دا لزومه شنو؟ .. لكن لو حاولت ممكن يحص ليك كده .. أعمل حسابك يا جلالدونا ..
بريمة
03-24-2021, 10:11 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27504
القائد مالك عقار .. بعد 40 سنة من التمرد .. يقول لجماهير الضعين .. لا للحرب أنا شخصياً .. لم أنعم براحة نفسية بمثل أنا الأن .. فضل لينا بس يأتي القائد الحلو والقائد عبد الواحد .. ويكون ألتأم شمل الوطن ..
بريمة
03-24-2021, 01:43 PM
محمد حمزة الحسين محمد حمزة الحسين
تاريخ التسجيل: 04-22-2013
مجموع المشاركات: 1437
سلامشنو والناس الاعمى شايل المكسر بسلاحو جارين على المدينه باحساس الغازى الفاتح المنتصر السلام مش يختو الكوره واطه وانما (خت السلاح واطه) والناس تشيل الطوريه وتبداء معركه السلام (نفس كلامى ودعوتى بعد سقوط الانقاذ ولاحقا ببوست اخر بالدعوه للتنميه والاعمار والاغلاق الثورى بعيدا انت قبيلتك وانا قبيلتى السودان دا حق السودانيين بدون فرز . الكلام دا بعرفو ناس زينا اولاد موظفى الحكومه الكان بيجوبو السودان من غير فرز وبعيد عن اوطانهم المحليه . والدى معلم عمل فى ابيضثم الكرمك (مفروض كنت ارى النور واعيش سنواتى الاولى هناك لولا كشف التقلات)وفى خواتيم خدمتو عمل بالفاشر معلما ثانويات وابتعث للتدريب وعاد معلم بمعهد تدريب المعلمين وهكذا سيره كثير من اهل السودانكان السودان وطنهم المعلم والطبيب والقاضى و.....الخ.وبالمناسبه وقفت على تمييزوعنصريه هناك لكل قادم يخدم كانه غازى اكثر مايزعجنى لما تسمع ناس دار صباح وضمنها حضرت رفض الطيب المرضى كحاكم اقليمل(لانو جاكم وافد من خارج الاقليم رغم خدمتو الاقليم كمحافظ لشمال دارفور وعشنا خلالها ايام اقسى لدرجه اننا فى كنا ممنوعين من اهلنا عد الخروج من حدود حى الكرانك حرصا على سلامتنا فى تلك الايام لكن الان اس تتكلم عن السلام وتحدياتو اول شىء السودن وطن واحد لكن بعدتوقيع الاتفاقيه ودخولها حيز التنفيذ تصاعدت نبرات العنصريه والانقسام وروح التشفى واستدعاء ماضى مرذول
03-25-2021, 03:08 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27504
نعم يا عاصم، التحديات كبيرة .. لاحظ يا عاصم نحن 30 سنة حروب .. هل بمقدورنا تجاوز كل تلك الفترة وأختصارها في سنة ونصف؟ .. صعب ..
لو أفترضنا كل الشعب السوداني كتلة واحدة .. ما زال تظل مشكلة أن الدولة السودانية كانت تدار ومازالت بتنظيم الأخوان من رئيسها إلي خفيرها .. هل يتمحي هؤلاء من الوجود بين يوم ليلة؟
نحن نحتاج للتأني وأهم شيئ عن يذهب كل الغل والبغضاء من النفوس .. والنظر للأشياء من خلال المصلحة العليا .. وبس
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Biraima M Adam
زهير عثمان حمد
اسماعيل عبد الله محمد
جلالدونا
محمد حمزة الحسين
Asim Ali
فيس بوك
تويتر
انستقرام
يوتيوب
بنتيريست