|
|
 Re: د. القراي والمناهج: حصة الدين وغنماية حاجة (Re: عبدالله عثمان)
|
[٢٨/٢ ١٠:١٧ ص] الفاتح سوركتى. ج. اعناب التعاونية: إتأخرت اليوم داك من حصة الدين لأسباب قد تكون مامقنعة للكثيرين
مُجرد حدث بسيط وهو إنو غنماية حاجة الزايرة جارتنا وقعت في بير بيتنا
بير بيتنا كانت مرحاض في طور الإنشاء وبعمق مترين تقريباً
حادثة الغنماية كان ليها أثر عميق في نفس حاجة الزايرة وأمي بصورة قد تكون غير مفهومة لكن أمي قالت لي بعد كم سنة إنو حاجة الزايرة في حياة زوجها كان عندها مراح من الأغنام ولكن بسبب السطو الدائم والمباشر إنحسرت الأغنام لعدد واحد غنماية ويمكن لأنو حاجة الزايرة كانت تعيش في منتصف الفقر تماماً بعد مازوجها تقاعد عن العمل وزادت عليها ضغوط الحياة
اليوم الأتخرت فيهو عن الدرس كان يوم مشهود لأنو الموجه التربوي عندو زيارة للمدرسة وأنا دقيت باب الفصل والحصة شغالة والموجه كان قاعد في كرسيهو والاستاذ حسة بالحرج من تأخيري وكان لازم يعمل الواجب ويسألني عن أسباب التاخير وفعلاً دا الحصل وأنا حسيت بالخجل من موضوع الغنماية وسلم الخشب بتاع حاج بشير الجيت شايلو أنا وعثمان سيد الدكان وحليفة أمي إني لازم أطلِع الغنماية عشان حاجة الزايرة ماتتوتر وحسيت فعلاً إنو التفاصيل العجيبة دي ممكن تخلي الزملان يضحكو فيني وسمعت صوت الاستاذ وهو بينهرني عشان أديهو سبب وجيه للتأخير وعاينت للموجه التربوي الوقور القاعد في الكرسي ويعاين لي وشفت نظراتو الوديعة وهيئتو الكان ظاهر عليها الوقار وتاني الاستاذ نهرني وجاب السوط والسوط كان صديق دايم للطلاب ومتعودين عليهو ولكن الموجه التربوي الجايي من الوزارة لمراقبة الأساتذة ناداني براحة وقال للاستاذ خليهو وسألني بطريقة ودودة عن سبب التأخير وهنا لاحظت لطيبة الزول دا ولقيت كل الكذبات الكنت داير أقولها طارت من راسي وبديت أحكي التفاصيل الحقيقية بدون خجل وحسيت بالأمان وأنا بحكي وكل ما أقول جملة يجي الموجه يسألني عن التفاصيل وأنا واقف جمب السبورة وأحكي عن أمي وحاجة الزايرة ست الغنماية وسلم حاج بشير وعثمان سيد الدكان والكلام القالتو خضرة أختي وتاني الموجه يسألني وأنا أغوص أكتر في التفاصيل وأستاذ الدين شايل السوط في يد والطبشيرة والمساحة في اليد التانية وكتاب الدين راقد على صفحة اربعة اربعين في الطربيزة
القصة دي أخدت كل زمن الحصة تقريباً وبعدها الموجه قعد يكتب كلام كتير في كراسو ويعيد علي الأسئلة لحدي الجرس مادقّ وبعدها طوالي قام على حيلو ودخل يدو في جيبو وأداني شلن أبيااااض وقال لاستاذ الدين خلاص نقوم نمشي والأستاذ سأل الموجه باستغراب (طيب باقي الدرس حقي)
الموجه التربوي قال ليهو الدرس إنتهى يا أستاذ .. مش حصتك حصة دين
الأستاذ قال ليهو أيوا
الموجه عاين للأستاذ وعاين لي وبعد داك عاين لباقي الفصل وقال ليهم (مش حصتكم حصة دين .. ياهو دا الدين .. ياها الحصة الأداكم ليها الولد)
______
| |
  
|
|
|
|
عبدالله عثمان
Yasir Elsharif
فيس بوك
تويتر
انستقرام
يوتيوب
بنتيريست