. زمان كان بقولوا ان غالبية الشعب السوداني بفهم في السياسة لان السياسين كانوا بستعملوا كلمات سياسية واضحة المعني ولا يقبل الا تفسير واحد , لكن السياسين اليومين ديل بقوا بستعملوا كلام كبار زي الدراب علي قول اهلنا ,وما بفهموا الا المثقفاتية....يعني ناس سياستي راحت علي وزن قرايتي راحت الزينا الا يشوفوا ليهم مدرس محو امية سياسية. والحمد لله بعد حضوري لكم درس عصر كدا بدات افهم شوية في السياسة السودانية الجديدة, قلت اجيبوا في الركوبة لزوم الفائدة للزي كدا وكمان عشان نتعلم ذيادة ويمكن نلقي وظيفة في السياسة, اصلوا اليومين ديل زي الدافوري حكومة التنوقراط الحكومة الاولي بعد سقوط الانقاذ سموها حكومة تنوقراط : عمي فهمني وباقي ناس الحلة انوا حكومة التنوكرات دي ناسهم متنكرين لذاتهم ولا دايرين شي لنفسهم... همهم الاول والاخير السودان واهلها ... قلنا ابشر بالخير اها لما جاء قريبنا المثقف قال انوا فهمنا كلمة تنوقراط غلط ...وانوا دي كلمة اجنبية ومعناهو بالعربي السوداني كفاءات (حكومة كفاءات غير حزبية)، ....قلنا خير يعني وزير الرياضة اكيد لعب كورة زمان ووزير الزراعة لو كان ما مزارع اكيد كان عندو حواشة ووزير التربية بكون اشتغل ناظر مدرسة ....يعني بالدارجي كدا : اي زول بخوتوا في وزارة اكيد عندوا خبرة في المجال.. يعني بالاجنبي كدا مجلس الوزر اء ديل ناس تنوقراط مية بالمية....وبالسوداني ديل ناس خبرة ومعلمة وهندسة والنتيجة مضمونة. مش زي زمان وزير الصحة كان تاجر عملة ووالي دارفور من الشمالية ومحافظ بورتسودان من مواليد الخرطوم... وهلمجرا لكن ما الاسف وضع البلد قحت....لا الحال انصلح ولا الظروف اتغير حكومة المحاصصة الحزبية بعد فشل حكومة التنقراط تماما ووضح انهم حزبيون, جماعتنا المثقفاتية السياسين الحزبيون خجلوا وقرروا انو يكونوا صريحين في الحكومة رقم اثنين وسموها حكومة محاصصة حزبية اول ما سمعت كلمة محاصصة حزبية افتكرت انوا معناهو الوزراء متخصصين من الاحزاب لكن اولاد الحلال لحقوني وقالوا المقصود باكلام داك كيمان حزبية ...يعني كل حزب يدوهو كوم من الوزارات يخط فيهو الزول البعجبهم....قلت وب علينا لانوا اتذكرت حكومة الاحزاب القبل الانقاذ...انشغلوا بالصراعات الحزبية ونسوا شغل الحكومة لحدي ما جيش الكيزن انقلبوا عليهم وشالو الحكم المهم ما علينا بكرة ونشوف. لذلك اطالب بالاتي: وزير حزب الامة يلبس جلابية الانصار ووزير الحزب الشيوعي يلبس بدلة وكرفتة ووزير الحزب الاتحادي يلف عمة الختمية ووزير حزب البعث يلبس الجلابية العراقية او السورية ووزراء الحركات المسلحة يلبسوا كاكي بدون طاقية عشان نفرقهم من الجيش والوزير الماعندو حزب يلبس الجلابية السوداني ويلف عمة كمال ترباس عشان نعرفهم لما نشوفهم في التلفزيون وفي الجرايد ونفرق بين الشغال كويس و الشغال كويس كعب......لانو بعدين الحساب ولد....وزي ما قالو: اكلو اخوان واتحاسبوا تجار.
02-05-2021, 03:34 AM
PLAYER PLAYER
تاريخ التسجيل: 04-23-2002
مجموع المشاركات: 10283
مجلس السيادة لحدي قبال اسبوعين كنت فاكر ان مجلس السيادة معناهو مجلس الرئاسة يعني عندنا ١١ رئيس.....لكن لما سمعت بزيادة عدد أعضاء مجلس السيادة إلى 14 في صف العيش ....قلت ماشاء الله بقوا اربعتعاشر رئيس جمهورية لكن الزول الواقف قدامي التفت قال لي : الرئيس واحد هو عبدالفتاح ونائبوا حميدتي وبس.... سالتوا والباقين ديل شنوا قال ديل ما عندهم شغلة بالرئاسة....ديل ناس الاحزاب والحركات المسلحة الشاركوا في الانقلاب ضد البشير ادوهم وظائف رمزية عشان ياكلوا منو العيش و ما يزعلوا ويطرشقوا الثورة . قلت ليهو جزاك الله خير يا الاخوا يعني ديل زي اعضاء مجلس قيادة الانقاذ والمجلس العسكري الانتقالي بتاع ثوارالذهب وثورة مايو بتاع النميري . قال لي ابشر. لكن السؤال المحيرنا هو: مواهي الناس ديل ومخصاصاتهم يجيبوا من وين لان خزينة الدولة فاضية للاخر.....خوفي يكون علي حساب الشعب برفع الدعم وذيادة البنزين ....والخ.
02-07-2021, 05:06 AM
PLAYER PLAYER
تاريخ التسجيل: 04-23-2002
مجموع المشاركات: 10283
الحزب الشيوعي السوداني لعب الحزب الشيوعي دورا كبيرا في نجاح ثورة ديسمبر ٢٠١٩ من خلال مشاركة كوادره في التنظيم والدعم البشري والمادي والمعنوي مما ذاد الثوار قوة حتي تحقق الهدف الرئيسي برحيل النظام , ومع بداية الاعداد للمرحلة الانتقالية وقف الشيوعيون بقوة في وجه العساكر لمنعهم في سرقة الثورة من الشعب ,فكانت النتيجة ولادة المرحلة الانتقالية بمشاركة الشىوعي, ولكن بدوم مقدمات اعلن انضمامه للمعارضة ليكون الحزب الثاني بعد عدوهم اللدود الجبهة الاسلامية. فتسائلت كغيري من الجهلاء بالسياسة: ياربي الزعل الشيوعيين دي منو من ناس (قحت)؟ لكن واحد من المثقفاتية السياسية قال السؤال الصحيح هو: الشيوعيون زعلوا من شنو في (قحت)؟ اصلوا القوالات كثيرة....تحت تحت سمعنا انوا الشيوعيين طالبوا بوزارات معينة وما ادوهم....وتانين بقولوا الشيوعين قالوا ناس فلان وعلان لو ما طردوهم من الحكومة بنسيبوا...وفي خبر طشاش بقول الموضوع قريشات. المهم مهما كان السبب فعيب من الشيوعيين انوا يعارضوا في المرحلة الانتقالية لانوا الحكومة لحدي حسي ما عارفة كوعا من بوعا... لكن الشعب عارف انوا المعارضين للثورة هم الكيزان وحسي معاهم الشيوعي.
02-07-2021, 11:49 PM
PLAYER PLAYER
تاريخ التسجيل: 04-23-2002
مجموع المشاركات: 10283
كنا في مناسبة اخوية والونسة مدورة والضحك وفجاءة واحد قال : يا شباب سمعتوا اخر الشمارات.... الناس قالوا بصوت واحد : لا لا قال: مناوي قال الناس لازم تتصالح مع الكيزان...... الناس صنت وما بتسمع غير النفس طالع ونازل وفجاءة واحد قال: يمين بالله ما اخدت يدي في يد كوز. وتاني قال: مافي صلح مع الناس ديل قبال ما ناخد تارنا. وتالت رد: نصالح اليهود ولا نصالح الناس ديل واحد استاذ من الحاضرين وقف وقال: ممكن اسالكم سؤال قالوا اتفضل مشكلتم مع الإسلاميين شنو واحد رد الكيزان ديل دمروا البلد وجوعوا الناس واحتكرو خيرات البلد لانفسهم ,هربوا قروش البلد لبرة وسوا شركات في تركيا وماليزيا...الناس ديل عملوا عمايل فينا وفي البلد الشيطان ما بيعملو. الاستاذ رد ليهوا : كلامكم دا كل صاح...بس ما رديتوا لسؤالي مشكلتم مع ما منو من الإسلاميين ديل؟ واحد من وراء قال: النهبوا البلد الاستاذ قال ليهم : كلامك عديل وما فيهو عوجة..... ما كل الكيزان حرامية صاح واحد قال: كلامك في محلو..مثلا حاج ابكر بتاع الدكان كان مع الكيزان لكن الشهادة لله الزول نضيف زي جلابيتي دي ودوغري زي عصاية ودعلي...بس بعد الثورة قفلوا دكانوا عشان كوز.... لكن الفكي احمد كان زول الله ساكت ما عندو الشي الفلانى...لكن اول ما اشتغل مع الكيزان بيت الجالوص بقت عمارة والدكاكين ما بتحسبوا ويغير في العربات زي الجلاليب ...والنسوان بقن دبل. الاستاذ قال: بالضبط كدا ....نشوف كل الناس الاشتغلت مع الاسلاميين البرة البلد والجوة...ونراجع كشوفاتهم وقروشهم وممتلكاتهم...اللقيناهو سارق نختوا في الشمال ...والبنلقاهم زي حاج ابكر نختو في اليمين.......... يلا ناس الشمال نسالهم من اين لك هذا؟ ...اذا ما عندوهم اثباتات نشيلوا منهم ونرجعوا خزينة الدولة. وناس اليمين نتصالح معاهم ونخت يدنا في يدهم ونبني البلد سواء ... لان بصراحة كدا الوطن و اهلنا الفيهوا بحتاجوا لكل ايادي ابنائه...................دا الكلام القاصدوا مناوي.... الجماعة بصوت واحد قالوا دا الكلام ولا بلاش... طيب الزول مناوي دا ما كان يتكلم عربي عشان نفهموا...الفسلسفة بتاع السياسين دي لزوموا شنوا....
02-11-2021, 04:30 PM
PLAYER PLAYER
تاريخ التسجيل: 04-23-2002
مجموع المشاركات: 10283
Quote: أعلنت 7 ولايات سودانية اليوم الخميس حالة الطوارئ عقب مظاهرات خرجت في الأيام الماضية بمناطق عدة للتنديد بتدهور الوضع المعيشي وغلاء الأسعار وشح بعض السلع الأساسية، في وقت طالبت فيه "لجنة إزالة التمكين" بملاحقة ناشطين في حزب المؤتمر الوطني المنحل بتهمة الضلوع في هذه الأحداث.
والولايات التي أعلنت حالة الطوارئ هي جنوب وغرب وشمال وشرق دارفور(غربي السودان)، إضافة إلى ولايتي شمال وغرب كردفان وولاية سنار. وتتهم قوى إعلان الحرية والتغيير بشكل مباشر حزب المؤتمر الوطني المحلول بالوقوف وراء الاحتجاجات المصحوبة بعمليات الحرق والنهب.
ويقول عضو المجلس المركزي للائتلاف الحاكم جعفر حسن، إن الحزب الحاكم سابقا هو من يرتب للاحتجاجات الأخيرة، ويبدو ذلك من خلال تزامنها واتسامها بالعنف.
زول واقف في المحطة بنتظر في المواصلات وبقراء في جريدة... واحد وا قف جنبوا قال: ما أشبه الليلة بالبارحة قلت شنو الكلام المكتوب في الجريدة بقول ان الكيزان وراء المظاهرات وليس الاوضاع المعيشية البقت اسوء مما كان...ودا نفس الكلام الزمان حكومة الانقاذ كان بقولوا....ناس المعارضة وراء الاحتجاجات وليس فشل سياسة الحكومة الاقتصادية برفع الدعم من السلع الاساسية وذيادة الاسعار. يا زول كلامك صاح...ودا في السياسة بسمو الاتهامات الجاهزة ....وبالدارجي اسمو سياسة النعامة. ضحكتني بسياسة النعامة دي....تعرف المحيرني ان الولايات القالوا الكيزان هم سبب المشكلة دي غالبيتهم حقت الحركات المسلحة الكان بحاربوا الكيزان وحسي بقوا في الحكومة....ياني ناسهم بقوا كيزان بعد ما قادتهم انضموا للحكومة..دا ما كلام بدخل العقل. يا زول الله كريم ...بس نصيحتي لناس الحكومة...اصحي يا بريش.......لصبر الشعب حدود ...اكان ما مصدقني اسال البشير والنميري..................
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
PLAYER
فيس بوك
تويتر
انستقرام
يوتيوب
بنتيريست