|
Re: كلونيا 555 .. نوستالجيا استلابية .. و شوق لأب� (Re: Ahmed Yassin)
|
Quote: أين الضجيج العذبُ والشغبُ؟ أين التدارسُ شابهُ اللعبُ؟ أين الطفولةُ في توقُّدِها؟ أين الدُّمى في الأرضِ والكُتُبُ؟ أين التشاكُسُ دونَما غَرَضٍ؟ أين التشاكي ما لهُ سَبَبُ؟ أين التباكي والتضاحُكُ، في وَقْتٍ معاً، والحُزنُ والطَرَبُ؟ أين التسابُقُ في مُجاورَتي شَغَفَاً، إذا أكلوا وإنْ شربوا؟ يَتَزاحمونَ على مُجالستِي والقُربِ مِنِّي حيثُما انقَلَبوا يتوَجَّهونَ بسَوقِ فِطْرتِهم نَحْوي إذا رَهبوا وإن رَغبوا فنشيدُهُم "بابا" إذا فَرحوا ووعيدُهُم "بابا" إذا غَضِبوا وهتافُهُم "بابا" إذا ابتَعدُوا ونَجِيُّهُم "بابا" إذا اقتَرَبُوا * * * بالأمس كانوا مِلءَ منزِلِنا واليومَ - ويح اليوم - قدْ ذهبُوا وكأنَّما الصمتُ الذي هَبَطتْ أثقالُه في الدارِ إذ غَرَبُوا إغفاءةُ المَحْمُومِ هَدْأتُها فيها يَشيعُ الهَمُّ والتَّعَبُ ذهَبُوا، أجَلْ ذهبوا، ومَسْكنُهم في القَلبِ، ما شطُّوا وما قَرُبوا إني أراهم أينما التفتتْ نفسي وقد سكنوا، وقد وثبوا وأحِسُّ في خَلَدي تلاعُبَهُمْ في الدَّار، ليس ينالهمْ نَصَب وبَريقَ أعيُنِهم، إذا ظَفِروا ودُموعَ حُرقتِهم إذا غُلِبوا في كلِّ رُكنٍ مِنهُمُ أثَرٌ وبكلِّ زاويةٍ لَهُم صَخَبُ في النافِذات، زجاجَها حَطموا في الحائِط المَدْهونِ، قد ثَقَبُوا في البابِ، قد كسروا مَزَالجَهُ، وعليه قد رَسَمُوا وقد كتَبُوا في الصحنِ فيه بعضُ ما أكلُوا في عُلبةِ الحلوى التي نَهبُوا في الشَطرِ مِن تُفاحة قضموا في فَضلة المَاءِ التي سَكَبُوا إني أراهُمْ حَيثُما اتجَهَتْ عيني كأسرَاب القَطَا سَرَبوا بالأمْسِ في "قرنايلٍٍ" نَزَلُوا واليوم قد ضمَّتْهمُ "حَلَبُ" * * * دمْعي الذي كتَّمْتُهُ جَلَدَاً لمَّا تباكَوا عندما ركِبوا حتَّى إذا سارُوا وقد نَزَعُوا من أضلُعي قلباً بِهمْ يَجِبُ ألفَيتُني كالطِفْل عاطِفَةً فإذا بِه كالغيثِ ينسكِبُ قد يَعجَبُ العُذَّال من رجُلٍ يَبْكي، ولو لم أبكِ فالعَجَبُ هَيهْاتَ ما كلُّ البُكا خَوَرٌ إنِّي وَبِي عَزْمُ الرجالِ، أبُ
|
قصيدة أب للشاعر عمر بهاء الدين الأميري . قبل كل شئ لا بُدّ من حضور هذه القصيدة في هذا البوست ...
| |
|
|
|
|
|
|
Re: كلونيا 555 .. نوستالجيا استلابية .. و شوق لأب� (Re: يحي قباني)
|
قباني مرحبا.
كل الرحمة والمغفرة لروح والدكم الطيبة. في زمنه واضح جدا بأنه كان لديه زوق خاص
كلونيا 555 شبراويشي لها تاريخ عريق، وكما ذكرت كانت المفضلة بعد الحلاقة كمعقم، ولكن طبعا الان الشغلة تطورت وصار المعقم هو مرطب في نفس الوقت. قصتي مع ال555 شبراويشي زمن الطفولة هي أنني مرة حاولت أن أستخدمها كعطر ، وبعد ساعة أو ساعتين عينك ما تشوف إلا النور ضربتني كاروشا(حكة) مبالغة وفي كل أجزاء جسمي الاعلى. ولم ينجدني من ذلك إلا حمام بارد.
شايف عائلة الشبراويشي أنتجوا كلونيا أخرى سموها 777 أيضا.
| |
|
|
|
|
|
|
Re: كلونيا 555 .. نوستالجيا استلابية .. و شوق لأب� (Re: Deng)
|
555 سلام يا بش وضيوفكم الكرام ورحم الله الوالد الرحمة الواسعة
كتبت أنا من قبل عن "طقوس" الحلاقة عند الأستاذ محمود محمد طه ... يمكنك أن تسميها "تعلموا كيف تحلقون".... كانت الكلونيا تلاتة خمسات جزء أساسي في هذا الطقس
كانت تُهدى له ويهديها للناس
لما دخل الأستاذ السجن في الأربعينات، كأول سجين سياسي حينها، كان يحلق بأمواس كانت متاحة حينها أسمها Ever Ready
كذلك يتعلّق كثير منا، حتى في منافينا، بصابون الفنيك (ويا حبذا الميزاب وارد عبدالكريم السيد شندي)
كذلك لنا عشق خاص لقلم البيق الأزرق Beg
| |
|
|
|
|
|
|
Re: كلونيا 555 .. نوستالجيا استلابية .. و شوق لأب� (Re: عبدالله عثمان)
|
رحم الله والدك وجميع أموات المسلمين الكلونيا دي كانت الحل الجذري لمشكلة حبوب الحلاقة البتظهر لي بسبب كمية الدهون الموجودة في جضومي وظلت ملازمة لي سنين طويلة شديد لحدي ما عرفت درب المرطبات حتى خليتها .. هسة بستخدم مرطب نيفيا بلسم بعد الحلاقة
تعرف موضوع العطور دة هبش نقص عندي مسألة الذوق في الملبس والعطور دي مفروض إنها فطرية عند الشخص، لكن انا الملفات دي ما نازلة عندي .. والله صحي أيام الجامعة مشينا أنا وود خالي زيارة لزميلنا في جامعة الرصيرص. الطلاب جو من التمرين العصر ففي واحد ظريف وأنيق كدة استحم وغير وجاء اتريح قدامنا من فتيل صغير كدة ريحة نفاذة عجبتنا وسألناه من اسمها قال رخيصة شديد ببيعها الدكان الجمب الداخلية. طوالي مشينا اشترينا فتيلين لينا الاتنين وبقينا نستخدمها لما رجعنا مدني جاني ود خالي في نفس يوم رجوعنا بالليل وأداني الفتيل بتاعه قال أخوهو الكبير شاكله قال ليه الريحة دي امشي رجعها للحانوتي الشلتها منه دي بريحو بيها الميتين وجدع ليه فتيل ريحة كبير قال ليه لو ما بتعرف تتريح تاني ما تشتري ريحة أنا بجيب ليك شلتها منه وضحكت على أخوهو المتفلقص. بعد ما اتريحت وفرحان بقن عندي فتيلين سألت أختي الكبيرة عن رأيها في الريحة أبت تجاوبني كلو كلو شابكاني ليك أصلاً الريحة هي تلطيف من العرق وكلام خير وإيمان فهمت منه الزوغان من الإجابة لكن هي ذاتها شن فهمها في العطور! مشيت بيها الجامعة أول واحد قابلني زميلنا من النهود قبل أدخل القاعة كويس جراني من يدي ساقني على الوضايات شغال لي انت متريح بي استيكة؟ فعلاً الريحة كانت نفس ريحة الاستيكة وأبى يخليني إلا بعد غسلت يدي ورقبتي وأخد مني وعد إني تاني ما اتريح بيها أها من اليوم داك اتعقدت وأبيت اتريح بقيت بس جابو لي ريحة هدية بكملها وخلاص لحدي ما لقيت يوم بوست في قروب فيسبوك عن واحد بسأل عن أفضل ريحة ومداخلاته بالآلاف طوالي فتحت لي ملف اكسل وبقيت متابع الترشيحات، استبعدت لي كم ريحة كدة اسعارها ريحتها عفنة :) ومسكت في الترشيح رقم 4 سعره كان ريحته حلوة .. عطر دارج من شركة الرصاصي ومن الزمن داك ما انقطع من دولابي
| |
|
|
|
|
|
|
Re: كلونيا 555 .. نوستالجيا استلابية .. و شوق لأب� (Re: أحمد محمد عمر)
|
Quote: سلااااااااام صديقي العزيز قبه ، رحم الله والدك ، وغفر له ، وجعل مثواه الجنة ،
|
رحمه الله يا فحل ..
كان والدي و صديقي و كاتم اسراري ..
لا اتذكره الا في صورة واحد و هي الاكثر في حياته .. جالسا في كرسيه .. و نظارة القراءه على وجهه و بيده كتاب .. كانت القراءه حياته ..
رحم الله اباءنا و امهاتنا ..
| |
|
|
|
|
|
|
Re: كلونيا 555 .. نوستالجيا استلابية .. و شوق لأب� (Re: يحي قباني)
|
Quote: ريحة الحبايب Quote: قمت انا واخي الاكبر بالدخول .. و كانت معي زجاجة ال 555 المفضله عنده
دي لو قريناها (555) مرة برضو ما حنصل لعمق المشهد دا .. الله يجعل مثواه الجنة |
سلام احمد يا حبيب ..
موقف مهيب ان يأبى ااخوتك الكبار ان يدخل احدهما .. فدخلت انا اصغرهم .. و سبحان الله كنت مرافقا له في رحلة مرضه الاخيره .. و كان يطلب ان اكون الوحيد الذي يقضي الليل معه في المستشفى .. و كان السر في ذلك هو انني الوحيد من كنت اساعد في حمام الفجر الذي تعود عليه طيلة حياته .. و شاء القدر ان اكون اخر من قام بحمومه و غسله و تعطيره .. حتى النزول الى القبر نزلت انا لاستلامه .. و وسدته القبله بيدي ..
رحم الله ابي الحبيب .. و اسكنه جنات الفردوس ..
| |
|
|
|
|
|
|
Re: كلونيا 555 .. نوستالجيا استلابية .. و شوق لأب� (Re: يحي قباني)
|
حبيبنا قباني .. يا سلام يا أخي مواضيعك دائما في العمق والذكريات الجميلة أهلنا زمان في ضواحي الدنيا كأنهم جزء من مصر وخاصة قبل عبدالناصر كل آباءنا وحتى جدي من أبي رحمهم الله كانوا في مصر ما زال الصندوق (سحارا) قابع وسط منزلنا وقمت بتجديدة قياساً لعمري يكون عمر الصندوق أكثر من 150 سنة أذكر حاجات مصر عندما كنا صغار كولونيا شبراويشي 555 جلابية غزلي ( مخطط بلون بني وأبيض) ثوب حريمي ( كرب روبر ) اسود اللحاف والبالطو ( حاجات الشتاء لأن البرد شديد عندنا) الذهب ( الجنيه عليها صورة ملكة بريطانيا ونص جنيه والعكش والشف ...الخ) ابريق النحاس والصحن للغسيل ( كان رمز في كل بيت )
بعد سنوات من حكم عبدالناصر بدأت اشياء مصر تختفي وبدأنا نرسل لأهلنا في مصر شاي أبو دينار أمواس الحلاقة الحبر ( حبر الكتابة ) أقلام الجبر ( توروبن)
تحياتي الحبيب قباني .. ذكريات
| |
|
|
|
|
|
|
Re: كلونيا 555 .. نوستالجيا استلابية .. و شوق لأب� (Re: يحي قباني)
|
Quote: يا سلام يا قبة تلات خمسات ، رحم الله والدكم وجعل الجنة مستقراً له وزي ما بيقولوا المصريين تعيش وتفتكر |
مونتا يا حبيب ..
رحم الله اباءنا و احبءنا ..
كان رجل جميل .. لم اسمع صوته مرتفعا على اي شخص حتى ابناءه ..
كان يناقش و يحترم الرأي الاخر ..
عاش نزيها عفيف اليد .. محب للقراءة و الشعر و الادب ..
| |
|
|
|
|
|
|
Re: كلونيا 555 .. نوستالجيا استلابية .. و شوق لأب� (Re: يحي قباني)
|
رحم الله والدكم قبة وحمدا لله انك تحتفظ بما يذكرك بعطره فللاباء عطر ! الكولونيا حاليا ممكن تضيف ليها مسك مسحون وتكبو في القزازة وتتحول لي عطر او مزيل عرق يبدو لي يا صاحب ان جميع الاباء يشتركون في هذه العادة مكنة حلاقة وامواس ناسيت او ابو صقر وفرشاة وكورية صغيرة فيها صابونة فنيك . والدي كان عندو اضافة حجر صغير بتاع شب . رحم الله والدكم ووالدنا وجميع الاباء
| |
|
|
|
|
|
|
Re: كلونيا 555 .. نوستالجيا استلابية .. و شوق لأب� (Re: عبدالحفيظ ابوسن)
|
دايماً أبوي عليه رحمة الله بيحلق وكِت الوآطة تبقى العِصيّر، بيحلق فوق التقروقة يفرشا ؤ يجيب المنضرا ؤ عِدة الحلآقة والرادي، والرادي دايماً في المواعيد دي بيكون إرسالو فيهو صرير وأزيز مرتبط يالعصرية خاسةً صوت العرب . بعدين جنب الرادي فوق الطربيزة بيكون في صندوق برنجي ؤ صندوق روثمان، ما عارف العلآقة بين اللِتنين ديّل شِنو ؟!، مع وجود جميع المجلآت والجرايد المصرية والسودانية إضافة لمجلة العربي والمستقبل وأقلآم رصاص زأيد كمية من ورق الفلسكاب!. لآمن كنت سغيّر أحياناً بعد ينتهي من طقوس الحلآقة ؤ يطبطب الـ555 يناديني، أها هنا أنا بكون إتوترت ؤ شعرة جِلدي كلّبت، طوالي يقول كدي ضفورك، جيبن جاي ؤ يبدأ يضفر لي بالموس وفي الحالة دي لآزم يتشال لحم مع الضفر ؤ بيعمل جرحة سغيرونة قريبة لنص الدايرة، أها بعد الضفير محل الجرحات لآبد من أن يتم تعطيرهن بالـ555 ؤ بمجرد ما يفكوني بجري فللي علي المستراح ...
| |
|
|
|
|
|
|
Re: كلونيا 555 .. نوستالجيا استلابية .. و شوق لأب� (Re: معاوية المدير)
|
فليرحم الله موتانا وموتاكم جميعا ،، وهكذا سنة الحياة جيل يمضي وجيل يقدم ،ولكل جيل ما يحبه ويعشقه،،، وشايفاكم كلكم بتاكدوا ان عطر الكولونيا ٥٥٥ بيستعمل بعد الحلاقة مع اني بقرا ان فتيلة العطر مكتوب عليها eau Dr cologne وما في كلمة after shave بعدها ، يعني عطر كامل الدسم...وعشان جيل اباكم كان ليه ذوق راقي كانوا بيستخدموا العطر كامل الدسم بعد الحلاقة،،، وود ابو سن بيقول انه اذا اضافوا ليه مسك بيمون عطر كامل الدسم،،، وسؤالي هو : هل مثل هذا العطر ،كولونيا ٥٥٥ موجود حتى اليوم في اسواق السودان ومصر؟ وهل يستعمل حتى الان كعطر بعد الحلاقة!؟ وانا اتذكر مل ما اسافر السودان في الاجازة اشيل معاي عطر شانيل هدية لخالي وحينها يمسك بزحاجة العطر :يا حليل ريحة ون مان شو الكنا بنجيبها من السعودية يا ها ديك الريحة البتقعد مع الزول اسبوع مش زي الموية البتشتروها بالشئ الفلاني والريحة تتبخر تاني يوم!! مش قلت ليكم لكل جيل عشقه وحبه وما يفضله!!! لكن يا ود قباني نوستالجيا اوسكار...
| |
|
|
|
|
|
|
Re: كلونيا 555 .. نوستالجيا استلابية .. و شوق لأب� (Re: امتثال عبدالله)
|
Quote: 555 سلام يا بش وضيوفكم الكرام ورحم الله الوالد الرحمة الواسعة
كتبت أنا من قبل عن "طقوس" الحلاقة عند الأستاذ محمود محمد طه ... يمكنك أن تسميها "تعلموا كيف تحلقون".... كانت الكلونيا تلاتة خمسات جزء أساسي في هذا الطقس
كانت تُهدى له ويهديها للناس
لما دخل الأستاذ السجن في الأربعينات، كأول سجين سياسي حينها، كان يحلق بأمواس كانت متاحة حينها أسمها Ever Ready
كذلك يتعلّق كثير منا، حتى في منافينا، بصابون الفنيك (ويا حبذا الميزاب وارد عبدالكريم السيد شندي)
كذلك لنا عشق خاص لقلم البيق الأزرق Beg |
رحم الله الشهيد ..
ذلك الجيل يشبه بعضه البعض .. والدي اصغر من الاستاذ ب 10 سنوات و ايضا درس الهندسة في غردون التذكارية .. لهم نفس الطقوس .. و ذات عزة النفس ..
| |
|
|
|
|
|
|
Re: كلونيا 555 .. نوستالجيا استلابية .. و شوق لأب� (Re: يحي قباني)
|
Quote: رحم الله والدك وجميع أموات المسلمين الكلونيا دي كانت الحل الجذري لمشكلة حبوب الحلاقة البتظهر لي بسبب كمية الدهون الموجودة في جضومي وظلت ملازمة لي سنين طويلة شديد لحدي ما عرفت درب المرطبات حتى خليتها .. هسة بستخدم مرطب نيفيا بلسم بعد الحلاقة
تعرف موضوع العطور دة هبش نقص عندي مسألة الذوق في الملبس والعطور دي مفروض إنها فطرية عند الشخص، لكن انا الملفات دي ما نازلة عندي .. والله صحي |
ابو حميد يا جميل ..
رحم الله والدي الحبيب و كل امواتنا ..
مسألة العطر يا احمد اديك ليها سر ..
ما شرط العطر البتشمه جميل في شخص يكون شغال معاك ..
تفاعل العطر مع الجلد هو الاساس .. ياما ناس شمت ريحة عندي مثلا و مشت اشترتها .. و تشمها عندهم كعبة .. و ممكن العكس .. لازم تلقى العطر البتفاعل مه جلدك و مكوناتك كلها ..
و المسألة دي حلها بسيط .. بدل ما تشتري و ترمي تغير .. تمشي المحلات تجيب سامبلات .. و تغير و ما تعتمد لغاية ما تلقى البمشي معاك ..
مع الخبره الطويلة ما حتحتاج لي زول يقول ليك .. براك حتعرف .. :)
| |
|
|
|
|
|
|
|