♧ يَوْمِيَّاتُ عزابيٍّ رغمتْ أنْفُه £

《1》
●من الباب للطاق كدا، ممنوع أية مداخلات تنطرح فيها
أسئلة شماتة ساخنة محرجة و بايخة شديد من قبيل قولهم:
يا زووول كيييف عزابي؟ و ليه و من متين و هسة وين!¿

《2》
● كويس جدن إنو لسة ما زول عتب بجاي؛
خسوسن الناس الفايقة و رايقة و ملمومة على
أهاليها في هذه الأيامات الشتوية القارسة !!!

《2》
● إذن ، فالبوست موجه بوجه خاص و مباشرٍ
فقط لاستهداف فئة العُزاب المعذبين في الأرض.
▪حيث بالأمس القريب كانت ضربة بدايتِنا مع تبيخ
أول حلة {قطر قام} حيث حشدنا لها كل التكاوين
الممكنة و اللا~ممكنة من لحمٍ طيرٍ منزوعٍ من مؤخرة
(دفرنش) النملة و زيتٍ من نبات الخروع ، و كان
لباقي الدواشات دي ، فحدِّس عنها و لا حرجَ!!
● كبينا فوقا من كل ما جادت به الطبيعة من طماطمَ
و بصل الكلاب ، و قشة فار توم المكادة ، و بهاراتٍ و
توابلَ ما أنزل الله بها من سلطانٍ : من كسبرة ، شمار،
كُركُمٍ ، مسمار قرنفل، زنجبيل ،غرنجالعرق أحمرو أبيض،
شاي حب على إنو حبةبركة سوداء ، حلبة حصى،
عطرون وجردقة تراب، و حِمِت رِمِت...إلخ،

● لدرجة أننا لامن نزلنا خلطة الوصفة
السرية و هي كانت فعلن خرافية حار من
نارو تقيل ميزانو تشلوِط و بوخا يلوي،لقيناها
بلا طعمٍ و لا لونٍ و لا رائحةٍ معينةٍ..و لامن هممنا
باامخمخة أضْطُررنا ربطنا ليها راسنا بعصابة حمراء
كتلك التي اشتُهِر بأنها أيقونة للواعش( الدبابين )
و نحن نُواسي أنفينا الأمارة بترديد شعارات ثورية
من فبيل قولنا: غايتو بس "الجيعان بياكل" و
" البسوي السِّم لازم يضوقو" و "مافي سماً
عقب النار" و" أسغر منك دوسو" !!

《3》
●طبعن الروتين اليومي لحياة العزَّابة معروف
بأنو يغلب عليه طابع البساطة التي فيها الأناقة
في كل شيءٍ كالمطعم و الملبس و في المنشط و
المكره . غير أن ذلك لا يمنع من وجود مشكلةٍ :
تتمثل في قابلية تعرُّض معظم العزابة للإصابة بما
يُعرَف لدينا بمصطلح (الكوفارة)؛ فما عارفا في قاموس
الحناكيش أنتو بتسموها شنو؟! ممكن تكون "يابوسة"
و لا "أم بعيرة" و لا "إمساك" غايتو كلو وارد.

▪معليش حبيبو ود مهدي، أولن حنجاوبك
بسؤال احترازي محرج شوية: هل أنت عزَّابي!؟
سنك و مهنتك مش مهم ؛ بس الحالة الاجتماعية
لازم كشرط لكي نقبل دخولك في الخيت من أساسه.
● أما سؤالك الوجيه لو عن معنى رغم الأنف؟ فما أظن
تكون محتاجة لشرح . و أما لو عن الفكرة فمستوحاة
من كوميديا للمسرحي الفرنسي موليير طببب رغم أنفه
{ Medecin Contre Lui } و لك فقط أن تتخيل حالَ
من يجد نفسة فجأتن و بدون أية مُقدماتٍ (عزابياً)وعليه
أن يتدبر أموره من {Z} To {A} بعدما كان لديه من يصنع
منه طفلاً معجزةً مدلَّلاً في كلِّ يومٍ و ليلةٍ؛ ليتولًّى خدماته
الفندقية يُلبي أصغر نزواته بدءاً بإطعامه بالملعقة مروراً
بغسل جواربه و ليس انتهاءً بحف شواربه . و بات
بلسان حالٍ يقول"أضاعوني و أيَّ فتى أضاعوا "

يعني يا مهدينا نفهم إنك بتتمنى العزوبية؟!
ياخوي، العزوبة شر. طيب خلاس تعال نتبادل .
زي الزول داك القالو: جاي شاقي جبَّانة المقاير و كان
يدندن بي كوبليه " أنا الفي الدنيا ما مرتاح " لحد ما
واحد من الميتين رفع راسو تاوق ليو من جوة التربة
و قالليو" ياخونا ، تبادل؟!". حتين زولك عرف الطفى
النور منو و لحس رااحتو ، و قام صوف طاير
بي نمرة {5} لا يلوي على شيء !!!.

● حيَّ الله امتثال و الجابك يجيب عقابك . و لو أني
كنت شايل منك شوية و "في الليلة ديك لا هان عليَّا أقدر
أسامحك..و لا هان عليَّا أعتب عليك". ذلك أنني لمَّا افترعت
بوستاً تعيساً و غير موفقٍ كان بعنوان" الدبُّور و النحلة" كانت
تلكم النحلة هي امتثال عن استحقاقٍ و جدارةٍ. لكن ولا واحد
منكم جاء هببني. و أما الدبُّور فكان من نصيب أخوي/ أحمد
ياسين " يا غايب عن عيني بس حاضر في قلبي " !!
▪ و أما من تالا معاكم فهي تهمةٌ لا أنكرها و شرفٌ لا أدعيه.
فممكن تعتبري أخوك (حالياً) بكل فخرٍ، و العياذة بالله، زعيماً
لقبيلة العزابة. و بعد قليل سوف نوافيكم باللوكيشن المؤدي
مباشرتن إلي مقر بيت عزابتنا بأمبدة كرور محطة أب نيران
بمساعدة (GPS) على خارطة طريق عمو غوغل إيرث).
● و لكن هذا لا يعني بأنو النصف الآخر من الكوب مترعٌ دومن
بأحلى من عسل النحل. هذا ما سبق و نوهنا إليه ضمن خيت قديم
كان بعنوان "العريس الداقس" و دي طبعن على وزن الدبِّ الدَّاشِرِ ؛
أو إذا شئتِ، فهي"العريسُ اتحلسَ" على غِرار (الوزير دقس) !!

● تبدأ الدراما بعد أن تحس بالقلق يعربد بمشاعرك النبيلة ،
عندما تتبنة فجأة لتجد أن معظم أقرانك الكانو بياكلو معك في
صحن بوش واحد تحت عمود الكهربة الواقع جنب البقالة، قد اتلايمو
على أقفاصهم الذهبية كما تحلو تسميتها للمو عارف طبعن ح يقول عدس.
رغم إنو العرفو البير وغتاه لقوها عن خدعة فضفاضة و فخ (Bobby Trap)
عبارة عن برميل زفت ، و كابين فوقو باقة عسل عاملين ليه بيها مجرد وشية؛
نظام (Topping) ، لزوم التمويه و تغيبة اللَّتَر. عمومن أكتر ناس شربو المقلب
دا هم اللي بالشلاقة و الشفقة يقومو يقدو برميل الزفت دا من تحت.

● لكن برضو كفاية إنهم كانوا شجعان و علموها طائعين مختارين
و بكامل قواهم العقلية المعتبرة شرعاً و (غانوناً) !!

▪لا، معذورين تب.و نحن حاضرين نعتِّلو نجيبو ليكم من
الخور .لكن سمح، و كت صعبة تقلبو صفحةمعانتا مستحيل
توصلو لعش الدبابير( بيت العزابة) الوعناكم نوصفو ليكم .
عمومن هاكن دي استراحةو زوادة طريق ليكم قبال توصلو:
● فقد كتب لي عمنا الراحل المقيم / mahagoub قال:
تعجبنى التشبيهات ففيها اتقان يجمع بين طعامة الهزل و
رمزية الجد. لكن ما قلت لى عشته عزابى كم سنة.عندك
وصف للأشياء تدل على إنك زول صاحب خبرة مقرقح.

● فقلنا له: تشكر يا غالي الغالين أستاذي المحجوب ود عمر
و للإجابة على سؤالك، يمكن القول إنه ما بين شهقات الحنين
إلى ثدي أمي و زفرات الأنين من وعثاء السفر، كانت صرخة ميلادي.
ثم من تالة خبرة دي كطع شك، بس خليها في سرك لو علمها الحناكيش
ممن ترعرعوا في حجور أمهاتهم و في أكناف أبهاتهم، إذن لنازلونا عليها
بالسيوف المهندة. لدرجة أن سنيني مع العزوبية رغم كونها شرَّاً مستطيراً
إلا أنني بلاقي متعة في سرد ذكرياتها ، علماً بأني من جيلٍ محظوظٍ نشأ
و تربى على حساب أبوية الدولة، زمان الناس حنان حيث مجانية التعليم
و الصحة والترحيل.رغم أننا و للأمانة و التاريخ ، لم ندرك عهد ناس كوامر
هنا كانو ماسكنها منذ أ يام ذات الرأسين، ثم الوسطى، فالثانوي، ثم لا عند
البركس، حيث كان السكن داخلي و الإعاشة من حر جزلان أبهاتنا ، عبر
إدارة مشروع الجزيرة. هذا و لنا عودة أكيدة بعون الله إلى نفاجات
و أزقة بيوت العزابة إن كانت لديكم رغبة بمزيد من الحكي.
ثم كُتِبَتْ لنا بسطةٌ في العمر .هذا، و للحديث بقية..>>

{لستُ مجنوناً و لكن جئتُ رغمتْ أنفي}
《 شوية قفشات لا تخلو من مسحة شقاوة 》
● دي واحدة من نوادر خالنا شريف و هي بالجد نوادر
يصعب بل يستحيل انتزاعها منه إلا بشق الأنفس ، لتنزع
البسمة من شلاليف الحزانى زي الوقيعة من ود العين.
▪ قال: دا واحد من عروبنا أهل العوض عريس جديد لكن
شغال و عايش عزابي في الخرتوم محل تيارة دا بقوم و
عمو بشة كان و هسي حميرتي بنوم. علا بس عندو برنامج الخمايس دا شفت كان أكلو الطير في الباقير فلازمن يخراه عندنا هناك ناحية كَمِّل نومك نايمة على ضِفاف ترعة ود المنسي، ريفي أم صفقن عُراض محلية حشرو عباس.
ففي يومو داك شال معاه بقجت متاعو معاه لمحل الشغل
و من هناك فللي على أرض المحنة في قلب الجزيرة؛ زولك
" قرمان قرمت الخيل بالجمعة آخر الليل قايمن..إن شاء الله
خير و أنا قصدي الانبساط دايمن .. يا أخوانا مع البنات".

● لكن يا حسرة على رأي المسل "جات الحزينة تفرح
و ما لقتشي مطرح" لامن وصل هناك لقى بسلامتا عروسو
طافشة من البيت، لفحت توبا و مشت لي بكا قالو في شلعوها
الجعليين العباساب و جو يتموها الدقلاب ؛ باقي النساوين
أصلن جنهن حوامة تقول بالله مروحيات بدون طيار !!

● الشاهد زولنا قرفان للطيش و آخر دبرسة من ليلة
خميسو الراحت شمار في مرقة و بندق في بحر ، فلملم
مدفع دلاقينو و ضغط على أغصابو في الليلة ديك بات عند
ناس أمو؛ و صبحية الجمعة خلى ليها مصاريف و مرق سكت عّمَي في صنانة تصر العين و قفل عائداً أدراجه من حيثُ أتى.

● الولية لامن رجعت لقت القريشات صرتن و عاملة
محمبكة: شوفن يا بنات أمي الراجل الما بختشي دا كيفن
يعني يجي و يفوت و يجدع لي قرشين لا يودن لا يجيبن
و يخليني ماني عارفة راسي من كرعيني. هنا أمو بت اللبيب
تفتيحة و خبرة قديمة، كانت ناقشة كويس مشاعر ولدا؛ نهرتا
و قالت ليها : المصاريف الخلاهن ليك ديل أعدلي بيهن راسك
المرة دي و كرعينك ديل دخنيهن ومسحهين وأرجي بيهن
ولدي جاهزات الخميس الجاي بيعدلن ليك بلحيل.

● قبال نمرق من حوش حاجة بت اللبيب ،
دي تخريمة سريعة كمان .كان جابو ليهم في الحلة
داعية يدي دروس فقهية للنساوين و موضوع الدرس
اليوم داك كان عن موجبات الغسل.و ذكر من ضمهن غُسل
الجمعة و دم الحيض و النفاس و الجنابة ؛ و دي بالذات
قال فضيلته : إنو شرط وجوبها هو مجرد التقاء الختانين.
● قامت بت البيب تسأل عن معنى "المصطلح" قالو ليها دا
حاجة كدا زي ما تقولي: تشبه وضع "المرواد جنب المكحاة"
و لا بلغة راندوك سوقية شوية يعني "السنقة فوق الرنقة"
فانتفضت عمتك و قالت:عاد أنا حالفة و متنضرة أكان ما
عكَّمتو من رقبتو ماني مغتسلة و لاني هابشة الموية!!
☆شهقة لون و تكية خط:
بقى رمزية العكمة دي عالية وعميقة شديد؛
لأنها ما بتجي إلا بعد بلوغ القلوب الحناجر و
نزول (السيل) في الزُّبى. فشايف كيف!¿

(1)
[} لا يفوتنا كمدخل، أ ن ننقل وصفاً نمطياً حياً سريعاً لبيوت االعزابة.
ليها طابع خاص غير كل الطوابع. سواء أكان من حيث الترتيب والتنظيم
أو النظافه العامة". الملايات طبعاً نادرة الوجود من أساسو ، و إلا إن وجدت
فوسخة و معفصة كأنما أخرجت للتو من خشم بقرة .و لا عاركين بيها دوكة:
توجد على الحيطة بعض الكتابات المعهودة بخطوط كفافية: كرقم موبايل أو تاريخ
ميلاد شويفعة ما شافوها سنين و دنين (متل الزرع و ولى) ولَّا جكسوية مذيلة بتذكار
من ( فلان )؛ ناهيك عن أكياس الصعوط و بُجَّان البتيخ و كراكيب النعلات تعتر للزائر لمن
ترميه على مناخيره. بينما في ركن الغرفة هنوووووك ، تقبع إحدى كبابي الشاي مجدوعة و قد
تسلقها الذباب كيوم الجمرات في منى، بعد أن استخدمها عزابي زائر قرفان كمستجير من ضحضاح
الرمضاء بالنار., هو محروق الحشا أثناء عشرة كتشينة ليطفئ لهيب( إسنة و ست) أخدها للتو ساخنة
على قفا صنقوره.الحرج مرفوع و العجب منزوع دسمه عن كل زائر أغبرأشعث ليأتي في أي ساعة من ليل
أنو نهار و غير متوقع أن يصدم بأية مطبات خشنة و مفاجئات غير سارة ، كأن يجد تحتالسرير مثلاً طشتاً لغسيل مرزوع ليه جمعيتن لحدت ما تحلل إلى عوامله الأولية ؛ أو يندرع في رقبته حبل هدوم مشرور عليه شرموط معفن أو حتى جليد بهيمة مدبوخ بي قرض. هذا حال بيوت العزابة في الاغلب الأعم طبعا ًالا ما
رحم ربي . ودي ما شنافة في حقهم لا شيتين، بس من باب الأحقاق لحقوق الأنسان لأخية الإنسان ليس
إلا..و لا ننسي مرآة مكسورة مجدوعة في الصقيعة وقدسال على خديها بقايا من بزغات عزابي متسوك
هسة بي مطرقلعوت..طبعاً ممنوع أي حنكوش ما يجي بجاي يتاوق ليسمع الطلاسم دي .

[} و لو مشينا على كيف يعيش العزابة و كيف يصنعون ملحاتهم من أم شعيفة أو أم جنون (الموية بس والقرون). ولو الجماعة مرطبين خالس خمسة نجوم تلاقهم شادين أم تكشو، التكاوين حسب وصفة الشيف
أبو عزب: فرطاقة بصلة صغيره لزوم الكشنة و ملعقه زيت عليها (كراع شرموط) و نترك الخلطة (تجقجق) ونضيف الدواشاتو نحت فوقا الخدرة اليابسة . بعد داك نجي كوووولنا نتتفن ليه في سدر العوضة نلهمقا
مع مكطاع كسرة لقمة (بيني كربو) عيش ود عكر، من المزرعة إلى الطاحونة وعلى اطاجن راسو عديل.

[}عارفين ، مرة دخلنا على عزابة و أخذناهم على حين غرة شلنا لينا طوبة قعدنا ندق في
الباب ندق ندق و قلبنا يدق يدق كو كو كو كو كو كو ...لاكين لاحظنا في سلكة مدروعة في
الكيلون ، عاينا بالرقراق ،ثم حشرنا أنفنا شمينا لينا ريحة حراق حلة والشباب مشغولين بكونكان
الكوشتينة رمينا عليهم السلام مافيش أي رد لا بالتحية و لا حتى بأسوأ منها ؛ الكوتشينة مولعة
يا جماعة هوووووي السلام عليكم برضو مافيش فايدة ولا حياة لمن تنادي .في اللحظة دي
في واحد قافل قفلة على 6 أسود الزول رمي ليه 6 شيرية و صاحبنا طوالي راح جاريها:
خمسييييبن لامن الجيران سمعو و طلعت غلط وأنا قلت الحمد لله يا جماعه تالت
مرة السلام عليكم ألحقو حلتكم ديك حرقت قامت شيط.

♧ في سؤال وجيه ز منطقي،!!
@ مصطلح عزابة دا ظاطو ليش بكتبوه بال(زين) و ليس بالذال
رغم أنها و (عذاب الجحيم) متلازمتين كتوأم سيامي لا يمكن فصلهما
إلا بعميلة تدخل جراحي مضمونة الفشل. و معلوم طبعن ، إنو العزوبية
شرٌّ مستطيرٌ و حبوبتي بتشبها دايماً بالبشتنة في أدق و أحلك صورها.
فگدي ، خلينا نديگم خارطة طريق (GPS) على غوغل إبرث منطقية
جداً و مؤدية مباشرتن إلى بيت عزابة سودانيين في قلب العاصمة
المسلسة . المهم ياهو دا حالنا كان عجبك ، و لو داير تزورنا البيسعل
ما بتوه دارنا نحنا قريبة ليه .. و يلا هاكمالوصف الدقيق دا، يجيبك
لينا راسك عدييييل لحدت خشم بابنا، بتلقاه متكول بي دوقار دفار♤

♤ فأولن في التبادي ، تخش بشارع العناقريب تلقى ليك محل حلويات
تلبيت الشامي جنبو طابونة ( فرن أب نفاج) ؛ تمشي طوالي بلاقيك حلاق
و مصفف شعر(لبناني). جنبو بتاع تدليك و حمام (مغربي). و في الركن هنووك،
بتاع سراميك و فسيفساء و حجر أردني . تلف بأول زقاق تلقى ليك شلة سباكين
مصاروة على مكوجية (نيبال)، تفطهم و تواصل، بعديهم في عمارة ساكننها لعيبة
كورة أفارقة( أولاد قرف)، ديل ظاهرين من ريحة أباطاطم تجيب الضهبان، تكسر
شمالك حتة كدا، بواجهك بيت عمال نضافة (بنغال) جابوهم يحفرو مجاري الخريف.
و بعدين بلاقيك مقهى شيشة مليان ( مصريين ) مشغلين ليالي الحلمية ، و كابية
من فوق ليهو شدرة نيمة منشرة مية متر، تحتها ست كسرة و معاها ست شاى
(حبشية) تظبط ليك منها فنجان مدنكل و ترفع رأسك قدامها طوالي في بيت
عزابة عواطلية قرفا نين لامن شامين ريحة أباطاتم و ضبان جلدهم
مابيهم ، أها ياهو ديل الوحيديين ال(سودانيين) في الحتة دي.

مِحَنُ العَزَّابةِ (Re: دفع الله ود الأصيل)

(3)
غايتو ، جنس شلااااقة!!!..
مطلوب من الجميع تزويدنا بحكاوي عن شلاقات و نوادر ولطائف وخفائف
عن حياة العزابة في هذا البوست..حتى نستفيد و نأخذ العظات و العبر، و أيض
ا حتى نضحك و نمتع نفوسنا بالدهشة و الروعة والابداع.. وهاكم مني واحدة
كضربة بداية، باعتبار أن البسوي اسم لازم يضوقو أول زول:-

@ ديل عزابة تكاسة من عرب العسيلات كانو ساكنين بحري حلة حمد
تحتحديقة البلدية .. ففي ذات ذات مرة كان أب عاج الرئيس جعفر نميري جاتو
صحوة ضمير گدا، قام عمل لو نظام عفو عام فك سجانءا لرأي من نزلاء كوبر.

* لكن الظاهر السجانين غلتو قامو فكوهم دون فرز ليخرج كل من هب ودب عن بكرة أبيهم ،
فمهم و احد سوابق كتال كتلة، قام طوالي مشى استلم عدتو وهدوم الشغل.. يا زول بدلة و كرفتة
والذي منو آخر قشرة ، ثم انطلق بشارع البلدية ناحية قصر الصداقة ..لف جا جاي.. و كت ما لقا
أية ضحية و هو يتسكع في أزقة الحي الفقير لما ليه في اتنين من التكاسة الغلابة ديل.. قال ما
برجع قمحان فطوالي لفق قصتو المثيرة.. عمل فيها خبير موارد بشرية و هسي مندتب من
شركة توريد للسعودية.. جاي من هاك في مأموية مستعجلة عايز سواقيين و حرفيين ..

@ طوالي ساقوه جري على البيت.. فيهم واحد فراعي مرطب شوية أخونا النصاب
خاف منو يكشف نومتو فركز عليه بالأسئلة بتعرف عوض إبراهيم عوض ؟ كيف ياخ ،
جداً!!.. طيب معاكم عمر الجزلي و سهام العمرابي ..؟ ياخ الجزلي دا بالذات فردتي و بقية
الجماعة ديل كلهم شلتنا عدييييييل كدا في الجامعة كيف ياخ ! دا كلامك؟! المهم أخونا لقط
الفيها النصيب من هؤلاء العبطاء .. و بعد داك قام شحنهم ليك في أتنين من تكاسيهم و الباقين
لمن أجرو ليهم دفار عايز يطفشم و يزوغ.. و احدين قال ليهم طبعاً بيتنا في الصبابي ولا
الصافية مش فاكر ، المهم بعد طرمبة صلاح ابن البادية طوالي ، و بعدها بشويييية
بجيك بيت كابلي قدامو شدرة دقن الباشة تحتها مزيرة سبيل.. أها انتو بس
أرجونا هناك نمشي نظبط التاشيرات و نجيكم فلللي..

@ و انطلق بالباقيين .. مرقو بجوار سيمنا حلفاية في الأملاك و قطعو بكبري
النقل الميكانكي وبهناك بين جمعة الخرطوم و البركس ، فلما جو مقابلين بوابة
النشاط , والداون تاون قام النصاب قال لعمك بتاع التاكسي.. لو سمحت يا حاج ،
بس تديني عشرة دقايق بالكتير، أسلم على البروف محمد هاشم عوض دا.. دي
فرصة ما ح تتعوض بس ح أمرق ليكم هوا..أها من حيسو داك و اتلحس.

@ أها ، و تاني لا يوم الليلة دي .. و جماعتك العسيلاتية لا هو لا الجوازات.
.صنقرو كل واحد يحمر للتاني.. لمان ريقم خلاس نشف شتتو. راجعين لجماعة
كابلي ديلك لقوهم ملطوعين يشربو ما إروو لمان نشفو المزيرة.

مِحَنُ العَزَّابةِ (Re: دفع الله ود الأصيل)

(4)
هههههههههههههههههههه
ود المطامير ياخي كطعت مصارينا من الضحك. و كنت أعلم
أن هذه الرزانة و السمت الرفيع لا بد و أن ينطوي على روح من الدعابة
و الظارفة لا أحلى.. طبعاً أقول قولي هذا و نحن أمة مفترى علينا بتهمة التجهم
و يقال إن صرة الوش ماركة مسجلة باسمنا في كافة المحافل الدولية.. فتعظيم سلام ليك
يا شليق و قد أبت نفسي إلا ترد عليك التحية بأشفلق منها بصاعين ونصف. فالجاياك دي
خطيرة بالجد ، دايراك تمسك الشناط كويس:عرب جزيرة من جيهة العزازي في السعودية ..
كلهم شباب و خبرة في التعامل مع زبانية بوليس الكشة ديلك.. المهم معاهم واحد عمك جاي لنج
من البلد، مطلش ما عارف الشمش ظاتا بتطلع من علي وين.. من النوع العندو إسهل كلام داك يقابض
برا شغلة.. و عندو شعور خليط بالفرحة و بالحنين كلما يلاقي ليه جماعة يحكي موسوعة حياتو من و إلى
في 10 مجلدات ، و بالذات ما مصدق كيف أفلح في المجئ للسعودية عمرة و تشتيتة..قال بايع لو تلات بقرات
و حمار نعير بكاروهو.. ما خلا لشفعو و لا البتحلب الطنوب. أها يوم قاعدين بتغدو في مطعم يمني؛عمك أتحكر
ليك في النص الجماعة و لم ليك في الجماعة طوالي قعد يربق و يرص.. طبعاً الناس هنا متحرفة على داب وردة
تأكل لهمقة والعين على الباب(كشأن المومس العمياء في ملاحم بدر شاكر السياب).. هنا كبست الكشة.. قام الحكا
القصة دي(قريب عمك الشايب داك) قال أنا كنت في اللحظة ديك بحاسب الجرسون جا شرطي الجوازات أول زول
قبضني ليك من يد العراقي و طلب الأقامة و الهوية.. لكن أخوكم خبرة، أصلي ماشلت هم لنفسي قت لو: طيب ياخ
كديلو سمحت بس أرخي لي شوية خليني أحاسب الرجال و بمشي معاك إلى تحشرني في جحر ضب.. أها مما
الشرطيرخا لي شوية كدي رحت ناتل ليك يدي منو جدعتو رميتو ليك متل هناك و لحست رااحاتي و يا
فكيكي قمت سداري..لما و قفت هنوووك في قعر الزقاق تعتريني نشوة الانتصار التي لم تكتمل؛
لأني ما صدقت نفدت بجلدي ، أكانأشوف ليك عمي يتمرجح بين شرطيين و مشتح أضينات
و متل صفق العشر.. أها قلت ليه شوفليك طريقة منهنا العزازيي راس.. لاكين شن
ينسو ليك لو عامل لي فيها سندباد ، تشيل و تربق مع اللغاشي والماشي!!!

مِحَنُ العَزَّابةِ (Re: دفع الله ود الأصيل)

(5)
اقتباس المشاكسة
الأصلية كتبت بواسطة
ود المطامير مشاهدة المشاركة
هع هع هع هع
والله أحلى صباح يا الحبيب
قلت عمنا شغال يحكى بالطريقه الصاح
وفجأه عمتوهو ؟ هع هع هع
يديك العافيه يا الحبيب .. والله معاك نحلق فى أفق وردى جميل

[} دايماً تخجلني تواضعاً يا ود المطامير يا رائع و تشحنني شخصياً بدافعية شديدة لقبول
التحدي مع قلمي هذا المتجهم و الضنين بمداده و العصي في و داده..و إني سائله بالله أن يعتصر
لي نطفة من دموعه فيسكبها هتوناً على قصاصاتي اليباب كي يدعني أبوح لك و للجميع هنا، بما في
جعبتي كي ندير كؤوسنا مترعة بخمر المعاني، ناضحة بكل إشراق جميل و تفرد أصيل.. لدي الكثير
من النوادر لو لا أخشى عليكم الإطالة / خاصة وأننا شعب عزوبي بامتياز و لو كنا في بيوت زوجيتنا
و تجلب لنا نساؤنا لبن الطير لإنتزاع ابتسامة رضا من شلاضيمنا.. بهذه المناسبة أخوياً لينا يمني حب
ذات مرة يمارس معي نوعاً من الخبث البريء و فاجأني بسؤال خشن و مسيح لسفايف الركب،
حيث سألني عن اسم دلعي: مما جعلني ارتعش خوفاً و غلقت الأبواب و قلت له
زاجراً: كدي آآللخو أنت الحتة المهببة دي ما تفطها شوية! لأنو دي أسرار دولة.

[} علا لاكين بالطريقة دي ح ترجعونا ورا شديد لقصة أخوياً لينا واحد مسكين و ألتغ
(ألجن يعني) كان ساكن مع شلة عزابة.. فقامو يوم يتونسو (هبشات ماقبل جر البطانية).
رميات نمة دوبيت من هنا، و شمارات من غادي عن الغراميات و ما شابه.. فكان أكتر واحد
بقرقو عليه أخونا الطيب دا.. قالو ليه أها اللخو أنت كيفگ مع (مرض حامد) و المطبات الناعمة
دي؟؟ و الله الليلة أصلو مانخليك تنوم يا ود اللزينة، علا بس تقول لينا اسم الحنان بتاعك منو!؟!
{] زولك حلف بالتكطعو) ما يجيب سيرة الجكس(قال خايف الهوا يقسمو) قدر ما اتحايلو عليه
قالو: طيب ياخي لمح لينا ساااه، إن شاء الله بأية حاجة.. في النهاية بعد ما نعس طب قام قال
ليهم ثمح كدي إمهلو لي شيوة النجر نفسي شوية.. أنا بقول براي.. لكن بس بنطق ليكن فرد

قول آسجم و خلصنا : قال: إثما إثما,, ياخي إثما:
" فاطنة بت عبدالقا... ."

مِحَنُ العَزَّابةِ (Re: دفع الله ود الأصيل)

مشاكسة من ود المطامير
هع هع هع هع ،كل دا والحاله فرد حرف من إسمها ؟
دا الحنان ولأ بلاش
(6)
@ ود المطامير ياحبوب .. لا إطاله و لا شئ بل معك نتمنى ألا تنتهى السطور
و للكتابة عن نوادر العزابة نكهة أحلى ولا تضاهيها سوى شمومة البن الحبشي
على ظهر قلاية وهي تتهادي بين يدي جبوبة بت ود التاي، وقد تحلقنا حولها نحيط بها
ذات عصرية و من بيننا أخينا العزابي الذي هو بطل حكايتي التي أنا بصددها ، يوم أن جاءنا في إحدى
زياراته المكوكية المتكررة و كان في نفسه حاجة يريد قضاءها عند خاله في بيتنا و هو يتحين بكل بساطة فرصة
القاء (نظرة شرعية) على بابنة خاله و التي تمت خطبتها له على سنة الله دون أن يملأ شوفو فيها. و في أثناء تلك
الجلسة العائلية و عشرة الونسة مدورة ،إذا بالخطيبة تدخل علينا على حين غرة منا جميعاً، أحد سوى أخينا المتيم
و الذي كان مترحفاً أصلاً لقدومها ، دنت البنية و في يدها صينية جبنة متلكفة من مجاميعه : من ليفة و فناجين بيض
مرصوصات تحتها متل السواسيو. و بسرعة البرق خطف صاحبنا فنجان (البكرية) بحركة لا أرادية و شربه بشفطة
واحدة ليضعه فارغاً و لسان حاله يقول ( الجائي من الحبيب كلو حبابو عشرة) و من ثم بدأنا بقيتنا وعلى رأسنا الخال
العزيز في الاستمتاع بشرب القهوة وعند أول (جقمة) بزغناها كلنا و بضربة واحدة و دفقنا الفناجين ثم نظر الخال
الى بن أخته ليجده قد أفرغ محتواه في جوفه , و جعل يتلمض في انتظار دور(البركة) الخال مستعجباً!: يا باشري
يا ود أختي انت الجبنة دي شربتها كيف؟!! البت الملخومة المطرطشة دي طعمتو بملح وشطة باشري:
و الله يا خال ماني عارفو لو مطعم بشنو و ما حسيتبو زاتو ، المهم إنو طفي النار الكانت باقة في
جوفي.الخال: كيفن يا ود أختي، لا عاد كان كدي النقوم على النسوان بهناك أقول لهن زغرتن!!
والحمد لله باشري يعيش منذ ذاك اليوم حياة هادئة و جميلة مع البلايق الشعيرية بالويكة
و بطعم الجبنة بكاتولة الجردقة مع الويكاب. و يتذوق
الملح عسلاً مصفى وشهدا مراقاً على شفاه المحبين.

(7)
{]ود عماري الجيد[}
عزابة من عروبنا ديل في سوق المناقل دقشو كل مجالات التجارة ما خلو لا عناقريب ،
لا جلود و حبال عاشميق، لغاية ما كنّبو جيبهم قرب ينحت، غايتو فضل ليهم كراويش
رأس مال قامو حشروها في حقة تمباك قالو: نغير الكار، دايرين فد مرة ينافسو عمك
عبد الحق. فطوالي مطروليك و عطرنو و فرشو و قعدو يكوركو:
- يلا علينا جاي ، دا ود عماري الجيد!
- و الراسو برا كيف ، أريتو عاد بالسيف!
- و سفة من دا تعدل الراس، وتنعش جوك، تمرقك في كدباس!

{] قام جا خارت ليك عليهم عزابي ليه جلحات، عطلنجي بتاع لبط مفلس
عدمان السفة . قال أنمشي على العروب الطرش ديلك، أخمش لي منهم سفة بلاش.
- أها آآآ جنيات صعودكم كيف؟!هم من ما شافوه ليك ، واحد قال للتاني، خلاس
هسي بنستفح في عمك أب شلاضيم دا عامل متل (أحمد منقة) كل المعطيات
عندو ، بس فاضل يبرهن:
- ها زول قرب جاي بس، و الله دا وارد فرشاية و جردقتو حصاية،
- خلاس ، أكان كدي ، أدوني النضوق،

[} أها زول بعدما خلاس دنكلا ليك وختاها متل دقار البطاح سكس ويل،
داير يكب الزوغة ، يلا وقعد يتفلفس و يبطح في الحديث:
- والله آآجنا، مو متل أبوك، علا لاكين بربيك؛
هنا جماعتك اتحادرو لبعض:
- يعني شن قولك، تمباكنا مو عاجبك! و لا شنو؛
- والله ياخي ما أظنو يجيب ليكم مريسة تام زينو؛
الجنا لكز ليك أخوه و قال ليه:
- قوم آ جنا علي الهامل المنطلق دا شلخوا و ما تخليهو علا تبزغو السفاها دي؛
{] أها داك من حيسو سل ليك سكينو من ضراعو و تتتتتترب قمز ليك في عنقرة
عمك المستنكح ، ختاها ليه مع أرنبة نخريه و قال مهدداً:
- و حاة الله كان تشمها!!
{] هنا زولك انبهط و فضل متنح واقف متل الجخس في سلخانة الكريبة،
لحدت ما خرتوها ليك من شلاضيمو و أدوهو تلكدتين، وهو سلم راحاتو
للريح و قام بنمرة خمسة.وصاحو ليك فيهو:-
@ وت العفنة ، تاني عشان تجي المولد شايل أصابعيك
متل السلعلع و حايم.

♤ سؤال للنقاش:
▪هل لحياة العزوبية من محاسنَ على غرار نظرية :"فوائد الزوجة النكدية"و
و "نكدية" دي لو جابت هوا، نحن جاهزين نجازفاً "كندية" و يا دار ما دخل شر.
▪ فلماذ يختار عدد متزايد من الناس بجميع بقاع الدنيا البقاء بلا شريك حياة¿¡.
و وفقاً لمكتب الإحصاء الأمريكي، فإن عدد الرجال و النساء الأمريكيين الذين
لم يتزوجوا أو المطلقين أو الذين يعيشون بمفردهم في منحنى متصاعد.

▪تظهر أبحاثٌ حديثةٌ أن البعض ينظرون إلى العزوبية كمخرج طوارئ
من فتيل الزيجات غير الموفقة و التعيسة و وُجِد أنه "إذا كنت وحيداً،
يمكنك إعادة تدوير المفهوم لذاتك المنفردة: بأنك طالما لستَ عالةً على
غيرك فلن تكون فاشلاً. إذن كونك في حالة عزوبية يمكن أن تكون ميزةً
لحد ذاتها بدلاً عن كونها مصدراً دائماً لتوليد الطاقة المتجددة النكد".

《تعريف جذور الوحدة》
▪ ما دمتَ بحاجة لإنتشال نفسك من شعور الوحدة، فلا بد لك تعيين
دواعي هذا الشعور ؛ لكون الوحدة خشوم بيوت؛ منها المزمنة أي العزلة
الاجتماعية، و التي يمكن أن تداهمك حنى لو كنت عائشاً في كنف أهلك
و ناسك ، و منها كذلك مجرد الشعور بنوبات متباعدة و عابرة بالملل .

▪ وفقاً للجمعية الأمريكية للطب النفسي، فالوحدة المزمنة هي
العزلة الاجتماعية التي تحدث لصاحبها على مدارات زمنية ممتدة،
و قد تفرز آثاراً جانبية على الصحة النفياتية ؛ العقلية و البدنية.

▪ ووفقاً للخبراء، يعتمد الشعور بالعزلة أو الوحدة المؤقتة على
مدى الشعور الذاتي بالإهمال أو "التناقض بين المستويات المنجزة ،
و مدى الطموح المأمول في تحقيقه من العلاقات الاجتماعية".

▪ وأظهرت الأبحاث السابقة أن حتى الأشخاص المتزوجين
يمكن أن يشعروا بنوع من العزلة و التوحد ، كشأن نظرائهم
الوحيدين.و لاسيماً لدى بلوغ "سن البلوغ" المتأخرة أي: ما
يُصطلح عليها بأزمة منتصف العمر، أو الشيخوخة المبكرة.

《ما الذي يجعل بعض العازبين يشعرون بالسعادة؟》
●شملت قواعد بيانات مستمدة من مكتب الإحصاء الأمريكي
والمسح الاجتماعي الأوروبي. درس اتجاهات العلاقة في أكثر
من 30 دولة وإجراء أكثر من 140 مقابلة مع أشخاص عازبين
في الولايات المتحدة، وأوروبا، تتراوح أعمارهم بين 30 و78
عاماً من الجنسين، من مختلف المستويات الاجتماعية
والاقتصادية والعرقية.

●و وُجِد اختلافاتٌ جوهرية بين العازبين الذين
شعارهم: "حد يشعر بالسعادة يمشي يختار العذاب"
و غيرهم من فاقدي الحنان ممن يفتقرون إلى الشعور
بالسعادة، و التي تعتمد بشكل عام على ما إذا كانوا قد
استوعبوا الصور النمطية عن العزوبية أو فضلوا تجاهلها.

●و بشعر الأشخاص الذين لم يشعروا بالرضا بسبب حالة
العزوبية بالوحدة، لأسباب منها عدم العثور على الشخص المناسب
أبداً لسد فراغهم ، أو الشعور بأنهم قد يكبرون وهم معزوون كرهبانٍ
في صوامعهم، أو كما لو أنهم فقدوا حياتهم. وعلى النقيض من ذلك،
بتمتع العازبون الذين يشعرون بالسعادة بوحدتهم، إذ يقول نفسانيٌّ:
 "تحملوا المسؤولية في حياتهم وكانوا يشعرون بالرضا عن روابطهم
الاجتماعية كبديل للزواج".
● فيما يجد بعض العازبية الذين يشعرون بالسعادة المتعة
في وحدتهم، والحصول على تجارب مثيرة قد تكون خارج
العلاقة، مثل السفر أو البحث عن هوايات جديدة.

● و يشعر الآخرون بالسعادة لأنهم عمدوا إلى زوايا
منفرجة لبناء أواصر اجتماعية قوية كبدائل للعلاقات
الرومانسية الحميمة. ودعوا الأصدقاء لمرافقتهم في
نزهات ، و قضائهم أوقاتاً أطول و أسعد في التفاعل مع
جيرانهم، والبقاء على اتصال مع عشائرهم الممتدة.

وأظهرت النتائج أن الأرامل، والمطلقين، وغير
المتزوجين يتواصلون مع أصدقائهم بنسبة تصل
إلى 45٪ أكثر من نظرائهم المتزوجين.

ووجدت البحوث أيضاً أنه في حالة الأفراد الذين
لم يسبق لهم الزواج، فإن كونهم اجتماعيين أكثر
"منحهم الثقة ليشعروا أنهم غير منسيين".

《بناء احترام الذات》

● وأظهرت بعض الدراسات أن الأشخاص الذين لديهم
علاقاتٌ اجتماعية أوسع قد يتمتعون بمستويات أعلى من
احترام الذات، ولكن ذلك قد يحدث فقط إذا كانت العلاقة
جيدة ومستقرة، وتستمر على الأقل لمدة عام أو أكثر.

●ووجد بعض العازبين حسب المسوح الاجتمتاعية
الرضا في العمل نحو تحقيق أهدافهم المهنية.

《 فوائدُ مزعزمة للعزوبية》
♤ كسراً لتابوه أن العزوبة شرٌّ مستطيرٌ و يطوي في
ثناياه خطراً داهماً، يزعم البعض بأنما هي تاجٌ ملكيٌّ على
رؤوسالأعازب لا يراه إلا المتزوجون في الأرض. فلعل
هناك 10 فوائدَ لحياة الانفراد،وقد لا تخلو من شطط.
1. أنت سيِّد نفسك مين أسيادك:
●بدلاً من التعلق بشريك ليتحشَّر بأخص خصوياتك و لسان
حالك معه يقول :"يا سلام على ريدي .. الخلاك بقيت C.D "
فلعازبون و العازبات يمكن أن ينهضوا متى شاؤوا، البقاء خارج
دوامة الزوجية السخيفة و قضبان (القفص) المخيفة ، قدر ما
يشاؤون و أن يفعلوا ما يشاؤون ،منى و كما يشاؤون دون التزامات.
بالنسبة للعازبين فأن كل الملذات متاحةٌ و سهلة ليست ممتنعة
ولا يتوجب عليك أن تقوم بتفسير أفعالك لكائنٍ من كان ، عدا
لنفسك التي بين جنبيك.. العزوبية تتيح الفرص لاتخاذ عديدٍ
من الخطوات المصيرية المهمة و الاحساس باستقلالية
القوت و بالتاليى القرار. إيجاد وظيفة جديدة،
الإنتقال من الشقة، تطوير مهارات جديدة،
المشاركة بنشاطات و رِحَل و غيرها.
▪هذا رأي يُؤخذ منه و يُردُّ.

2. تخصيص أوقاتٍ للعلاقات العامة:

♤ العزوبية فترة حضانة جيدة لإعارة الإنتباه بشكل جدي لمعارفكم.
كونكم متاحين فإن ذلك يمكِّنكم بأن تكونوا هناك عند حاجتهم، للاعتناء
بهم و لتقوية العلاقات ، لتوسيع دائرة الأصدقاء، و لبناء صداقاتٍ وليدةٍ
يمكن أن تصمد إلى الأبد لتعود عليكم بمنافعَ شتى و تنجب أطفالاً.

● العلاقة الرسمية الجادة و لا سيما الزوجية تتطلب الالتزام بقواعدَ
ذهبيةٍ صارمةٍ ، ليس أدناها الانصراف لتدبير بشؤون الزوجية و تنشئة
الأبناء فكل ذلك يقتضي توفير مواردَثمينةٍ مقتطعةٍ من وقتكم. كثيراً
من(المساجين) المهروشين يجنحون لقطع صلاتهم بما خلف الأسوار.

4. أوقاتٌ متاحةٌ للهملة و الانطلاقة:
● بعيداً عن كتمة أقفاص الزنازن الذهبية، بالذات
بالنسبة للموحدين الخاضعين الىافعين شعار شركة/
سابتكو "متع نظرك بمشاهدطريق الرحلة؛ ثم دع أمر
القيادة لنا". فلدى العزابي كامل الحرية لتمضية عطلة
نهاية الأسبوع مستلقياً عاريا تمامن أو بكاد ، على رمال
الشاطئ المتحركة؟ التنقل كما بحلو له من سكنٍ لآخر؟
تلك أمور يمكنكم بالطبع فعلها خلال الحياة الزوجية أيضاً،
و لكن كعازبين سيكون ذلك متاحاً بعغويةٍ سهولة و يسر
أكثر مما لو كانت لديكم التزام عائلي مع طفلين فقط.
5. المواعدات:
● حيث لا يمكن ااتنبؤ بما تخبئه المقادير في كل
حينٍ ؟ من حيث توفر الإمكانات اللوجستية لقيا
من تتحرقون شوقاً لدفء حنانهم و حتى من
ستقعون طوعاً أو كرهاً في حبائلهم .

6. حرية الانطلاق بلا حراسات مشددة:
● لربما عندما تعيشون حياة إرتباط و بالأخص في
الزواج ، من الصعب إيجاد الوقت للتسكع الليلي الطويل
و السهر مع الاصدقاء. طالما أنتم عازبون، إستغلوا ذلك
بالخروج إلى حيثما تسوقكم خطاويكم.

7. العناية بأواصرَ عائليةٍ ممتدةٍ:

قبل أن تقوموا ببناء أسرة خاصة بكم،
ربما يكون عليكم أن تسخروا بعض الجهد
و الوقت، للعناية بعلاقاتٍ عائليةٍ قائمةٍ أصلن
مع الوالدين، الأخوة والعائلة الموسعة، كلها
دوائر عائلية التي يمكن ننمبتها و تفعيلها،
قبل ما تنكتمو داخل جحر ضبٍّ.

8. مناعةٌ مكتسبةٌ ضد انكسار القلب:
●قد تكون الحياة من دون حب هي حياة بدون حسرة وإحباط.
ربما يبدو الأمر على أنه مخيفاً، لأنو الكل داير ينحب و أن نشعر بأن
هناكظمن يتفقد وسادته لينقبض قلبه لوجودها خاليةً بدون أنفاسنا.
لكن حياة العزوبية تطرح لنا أسلوبَ حياٍ تنعدم فيه تقلبات مؤشر
بورصة المشاعر صعوداً وهبوطاً، ما بين خيبات الأمل المريرةً، الهزات
طالعاطفية الخطيرة ، التعلق بأهداب الوهم و لوعات ألم الفراق -وتلك
أحدى الأسباب المركزية التي بسببها العديد يختارون بالعزوية كنمط
حياةٍ مفضل لديهم أو على الأقل يحاولون إطالة أمده قدر المتاح.
ببساطة فإنهم يخشون أن يُلدغو من جحرٍ مرة أو مرتين..

9. من الممكن الإستمتاع بعاداتنا الغريبة:

● كأن تتمتعوا بقضم أظافركم؟ و حف شوارلكم
مشاهدة الرياضة كل اليوم؟ الإستماع إلى ما يروق
من برامجَ صاخبةٍ أو هادئةٍ متى و كيفما شئتم؟
ففي العزوبية مندوحةٌ عن الانكماش داخل
قوقع بياتٍ شتوي طابعه {الأنا و أنت}

10.الهوايات
●لا شك بأنه وحتى خلال الحياة الزوجية يمكن
أن نطور هواياتنا ونخصص لها الوقت، لكن كعازبين
و عازبات يمكن أن تتوجهوا إلى بعض الأمور التي تحبون
فعلها في غالب الوقت، الإنغماس فيها بمتعة و التواصل
مع طفلٍ معجزةٍ قابعٍ بدواخلكم قدر المستطاع برياضة،
قراءةٍ ،كتابةٍ تصويرٍ، تصميمٍ وغيرها ءلك ؛ يمكنك
تخصيص الوقت لمثل كل هذه الأمور