|
|
|
 Re: ديل من زمن طه القرشى (Re: عبدالحفيظ ابوسن)
|
في زمنا كان في درس اسمو طه القرشى مريض
في كتابة المطالعة للابتدائي
يتحدث عن طالب مريض بالاسهال . ويكتب لمدرسته معتذرا عن الحضور للمدرسة
وهو درس تعليمي سلوكي ولغوي
المهم
قريناهو واستفدنا كيف نكتب خطابا وغيرو
وكبرنا جدا
وجات الانقاذ
وظهروا خفافيش الظلام سئ الدواخل والمقاصد المتلمسين للعيوب المعدومة
وتحدثوا ليه اسم طه وليه القرشي وسؤ القصد والحملة الصليبية
شالوهو
وجابو زراعة التنباك كمحصول في دارفور
| |
 
|
|
|
|
|
|
|
|
Re: ديل من زمن طه القرشى (Re: عبدالحفيظ ابوسن)
|
تحياتي ياصديقي ودصرّة منبرنا
برضو المثل :(سمح الكلام في خشم سيدو)
لماذا لايترك القرّاي الحديث لرؤساء الأقسام من كل وحدة في المناهج
بمعني للمنهجية أن يترك رئيس قسم شعبة التاريخ بإدارة المناهج أن يحدثنا عن كتاب تاريخ الصف السادس
ثم يتحدث بعده تربوي مختص من شعبة التاريخ ثم موجه تربوي للتاريخ وهنا صدقني الأمور بتكون واضحة
القرّاي سمعت مؤتمره وكمعلم وكأب وكمواطن لم يقنعني
ياخ في مؤتمر تقول : (اللوحة حذفنا منها جزء!!؟
دي ذاتها بها ريبة!!!!
| |
|
|
|
|
|
|
|
|
|
Re: ديل من زمن طه القرشى (Re: عبيد الطيب)
|
حبابك العبيد
اسعد دوما بك
كأنك تقرأني يارفيق الهم والوجع
هي فوضى اعلامية بأمتياز .
المؤتمر كان كارثة . اعادتني لرؤية القراي في اركان النقاش مطلع الثمانينات
كان علي القراي ان يكون مهنيا . ان يتحدث رؤساء الشعب عن المنهج وفلسفته . وان يفتح الباب للحوار والاسئلة
الهجوم لم يكن عن المنهج ابدا . بل هو صراع قديم تجدد .
يحمد للقراي كتاباته السابقة في فضح الكيزان وحملة الوعى والتنوير . لكن حاليا عليه دور اعظم كونه صار مسؤولا وفي موقع القرار
| |
|
|
|
|
|
|
|
|
|
Re: ديل من زمن طه القرشى (Re: عبدالحفيظ ابوسن)
|
برضو كان في مريم الشجاعة
درس عن بنت شافت القطر وجرت وقفتو ولوحت للسائق
المغزى واضح
قالوا ليه اسمها مريم وشجاعة كمان .
وطوالي لامن مسكو المنهج جابو قصة بت ادناها منقول المنهج الكيزاني القديم
روزة وشارلس ...روزة عشان تمشي تقابل شارلس بتقوم تجيب الخمرا لابوها عشان يسكر وينوم وبعدها تقوم تمشي تقابل شارلس بالظلام ويلاطفها ويلمسها من خلال الشباك ...قصة باللغة الانجليزية للصف الثامن اساس كتاب يدرس لمراهقين وين كان العلماء وقتها
| |
|
|
|
|
|
|
|
|
|
Re: ديل من زمن طه القرشى (Re: عبدالحفيظ ابوسن)
|
بتذكر الموضوع دة تم إثارته من قبل كوز جامعي مثقف ونحن في الثانوي وكيف إنه الكفار لوثوا معتقدات أطفال المسلمين عن طريق بث الرسائل من خلال الأسماء طه القرشي مريض ومحمود الكذاب ومريم الشجاعة واندرو والأسد
كان راسنا ضارب شديد ونحن بنسأله كيف إنه زول اسمه محمود يمثل النبي؟ في كم مليون محمود في الوطن العربي؟ يعني لو صحيفة نشرت عنوان (القبض على تاجر المخدرات محمود أحمد) ديل يبقوا أساءوا للنبي! وكيف إنه الرسائل الما فهمناها ونحن كبار دي يفهموها الشفع الصغار؟
هاني الكافر كان فايتنا بسنين ضوئية في القرايات والفهم بسبب أخوهو الشيوعي سأله سؤال كان غريب شديد على مستوانا في الوقت داك قال ليه: كيف يكون الإصابة بمرض الإسهال إساءة للشخص؟ موش المرض دة ابتلاء!
الكوز كان مقتنع بإنه لا يجوز إلصاق أمراض زي الإسهال بالأنبياء! وقال لينا انتو (شلة العباس) ما بتحترموا الأنبياء
و (شلة العباس) كانت تعريض وتنميط لينا كمدافعين عن هاني لما تم تكفيره في الفصل من قبل استاذ الاسلامية بسبب سؤاله عن سبب طلب النبي فك قيد عمه العباس دوناً عن باقي الأسرى! وهل يعتبر ذلك تمييزاً بسبب القرابة؟
أيضاً مما أثاره الكوز المثقف أغنية عقد الجلاد قصة الولد اليتيم نفس صوت الاسطوانة وإنه مقصود بيها النبي وبرضو قلنا ليه نفس الكلام نحن بنسمع فيها سنين وأصلو ما جاء في بالنا كلامه دة وكالعادة هاني الكافر قال ليه طيب مادام في زول معترض على تكرار نفس القصص عن النبي بنفس الطريقة ليه ما يتم حكايتها بطريقة حديثة؟ يعني بدل تحكيها لي بطريقة سيرة ابن هشام الما بقدر اقرأ منها صفحة أحكيها لينا بأسلوب ماركيز وانا بأكد ليك كل الشلة الموجودة قدامك دي حتستمتع لأنهم لما يمسكوا رواية لي ماركيز ما بفكوها إلا في آخر صفحة .. وفعلاً كنا الوقت داك مكتشفين جدد لماركيز ومجانين بيه لدرجة بنقعد جيعانين نلم قروش الفطور عشان نمشي نشتري بيها رواية لي ماركيز من قدام حديقة وقيع الله
طبعاً الكوز شاف إنه دة دليل على نجاح الاستهداف الغربي لي ديننا كوننا نشوف ماركيز حكاي أكتر من ابن هشام
أي نعم منطقناه في أغلب النقاط لكن النصيحة أدانا الضربة القاضية في النهاية لما قال لينا انتو بتقولوا لي أنا متابع كلام شيوخ الحركةة الاسلامية وما عندي رأي براي لكن انتو آراءكم كلها طبق الأصل لآراء هاني واللي ما جابها من راسه وإنما هي آراء أخوهو .. لما تجيبوا فكرة حقتكم براكم تعالوا طالبوني بالتفكير من راسي
اليوم داك وصلت لي إنه تفكير الطلاب بسيط ولا ينظر لما وراء السطور ولا يبحث عن المؤامرة بين السطور .. بس انتو خليكم طبيعيين وهم ما بتجيهم عوجة
| |
|
|
|
|
|
|
|
|
|
Re: ديل من زمن طه القرشى (Re: أحمد محمد عمر)
|
بالضبط يا احمد
فعلا ياهو كدة
نفس المنطق الافسدو بيهو الاغاني ومنعو بعضها
لايمتلكون معرفة ولا حس ابداع ولا بعد نظر
بفتكرو هم حملة المفاتيح وحاملى الاختام
شوف نحن قرينا دة كلو وبقينا كبار ومشينا ابعد في التعليم والمعرفة . ودة كلو مش ما اثر فينا بل ولا اقتنعنا بيهو بعدها
ماممكن نستقى معرفتنا ومزاجنا من فاقدى الحس . اي حس حتي الديني زاتو ماعندهم حس ديني
اتيحت ليهم فرصة 30 سنة لحكم مطلق وشوف النتيجة
بفكروا من محلين بس بدون امخاخ
بفكرو في شهوة بطنهم وماتحت ملابسهم التحتانية
وياريت لو بفكروا فيهم بأخلاق ولا حس انساني . يفكرون كما تفكر الحيوانات المفترسة الوضيعة .
لذا
خلوهم في غيهم يعمهون ونشوف شغلنا ما يعطلونا اكتر من العطلة العلينا
| |
|
|
|
|
|
|
|
|
|
Re: ديل من زمن طه القرشى (Re: عبدالحفيظ ابوسن)
|
الأيام دي أتيحت لي دراسة على الهواء مباشرة لعقلية الكوز السلفي التقليدي
أهل المدام من جهة أمها كلهم دواعش قايدين حملة شعواء على القراي والعلمانية
منشور قرب يوصل المية رد في فيديو استتابة القراي
بس قلت ليهم دة ما القراي ولم تتم استتابته ودة رابط جلسة الاستتابة
وعينك ما تشوف إلا النور
الاتهمني بالزندقة والاتهمني بالتشيع وفيهم ناس قالوا لي لما تتعلم صلاة الجماعة في المسجد تعال اتكلم في الشيوخ 
وانا طبعاً بااااارد لوح تلج ما عندي ليهم غير الوشوش الخضراء وتكرار نفس الفهم وكل مرة بقولها ليهم بطريقة جديدة .. أوكي كلكم شايفيني هسة بتشوشو في نار جهنم مافي مشكلة متفق معاكم لكن هل فيكم واحد بقدر يقول العمل الفيديو دة مفبركه وإنه كاذب؟ ولا الصفات دي حصرياً على العلمانية! :)
| |
|
|
|
|
|
|
|
|
|
Re: ديل من زمن طه القرشى (Re: أحمد محمد عمر)
|
من الحاجات الوصلت ليها إنه الكوز السلفي ما بقدر يقول (أنا غلطان) نهائياً
لأنه بعتبر نفسه ممثل للدين ووكيل الله في الأرض والكلمة دي معناها الدين غلط
بعتبر النقاش بينه وبين أي شخص مختلف هو نقاش بين الكفر والإيمان وهزيمته في النقاش تعني هزيمة الإسلام
ما عندو مشكلة وسائل .. يعني ممكن يتبع اي وسيلة للنيل من الآخر لأنه قصده نصرة الدين .. زي واحد منهم أمس جايب صورة وزير التربية والتعليم وقال أثر تعاطي الخمر واضح في رخية حواجبينه .. أي والله زي ما أقول ليك كدة .. ما عندو أي مشكلة في إنه يفترض أي حاجة من راسه ويصدقها ويدافع عنها ولما جيت قلت ليه كمان بقيت تتكلم في أشكال الناس! اعتبر كلامي دفاع عن الخمور .. والله صحي :)
دفاعهم عن الدين قائم على الكراهية .. ما عندهم أي علاقة بالمحبة واللين ولا مهتمين بنشر منهجهم واقناع الناس بسماحته بكل كل منشوراتهم في تسفيه الآخر والنيل منه
| |
|
|
|
|
|
|
|
|
|
Re: ديل من زمن طه القرشى (Re: عزالدين عباس الفحل)
|
اب سن وشركاه
بعيدا عن المقاصد والعقول. ليه العناوين دي كانت في كتب المطالعة
حليمة بائعة اللبن (كانت تغش وتقوم بخلط اللبن بالماء وتبيعه)
ونحن نعرف ان (حليمة) السعدية هي مرضعة الرسول صلى الله عليه وسلم وذلك في نفس الفصل
ولماذا لم يعطوها اسم آخر ؟
(محمود الكذاب) وهنا الذي صدقه الناس في مرتين ثم كذبوه وطنشوه في الثالثة واظن الربط هنا واجب.وجده قال ليكون (محمودا)
(طه القرشي) ليه المريض بالاسهال والمدعي المرض والذي يكذب ممكن نعطيه اي اسم
هل كان ممكن يسمى (جعفر نميري) مريض او (محي الدين صابر) عنده اسهال ؟او اي كان ؟
اذا كان هم تحاشوا الاسماء المعروفة .. فلماذا لم يتحاشوا اسم طه ( ما انزلنا عليك القرآن لتشقى)
والنبي (القرشي) .. صلوات الله وسلامه عليه
| |
|
|
|
|
|
|
|
|
|
Re: ديل من زمن طه القرشى (Re: أحمد محمد عمر)
|
Quote: ما عندو مشكلة وسائل .. يعني ممكن يتبع اي وسيلة للنيل من الآخر لأنه قصده نصرة الدين .. زي واحد منهم أمس جايب صورة وزير التربية والتعليم وقال أثر تعاطي الخمر واضح في رخية حواجبينه .. أي والله زي ما أقول ليك كدة .. ما عندو أي مشكلة في إنه يفترض أي حاجة من راسه ويصدقها ويدافع عنها ولما جيت قلت ليه كمان بقيت تتكلم في أشكال الناس! اعتبر كلامي دفاع عن الخمور .. والله صحي :)
دفاعهم عن الدين قائم على الكراهية .. ما عندهم أي علاقة بالمحبة واللين ولا مهتمين بنشر منهجهم واقناع الناس بسماحته بكل كل منشوراتهم في تسفيه الآخر والنيل منه |
سلام حفيظ و احمد
برضو انا فى قروب كدا لامى كرش الفيل. اها في اول يناير, واحد كتب دعاء طويل ببدأ بـ "اللهم اجعلنا عابرين لا نأذى احد ..."
في يوم 2 يناير, واحد نزل مقال كاتبو زول مؤيد للقراى. اول رد من الزول بتاع الدعاء, قاليهو "يا سفيه, الكاتب ده شيوعى ...." و كلام كتير.
اليوم التانى جبت ليهو مقال لكاتب اخر مؤيد للقراى ايضا. قام رد لي "الكاتب ده زاتو معروف مثلى ....".
فعلا زى ما قلت ما عندهم مشكلة في استخدام كل الاسلحة نصرة للدين.
| |
|
|
|
|
|
|
|
|
|
Re: ديل من زمن طه القرشى (Re: Asim Ali)
|
الفحل الكلام ماعن القراي
ولا اسمع لعلماء السؤ ولا اشاهدهم
يا احمد يسن طيب
ماكان مردود ذلك علينا في نسيج معارفنا وديننا ؟
ولاشئ
الذين ألحدوا في عهد الانقاذ لايقارنو بماقبلهم . كانت حالات فردية خجولة
في الانقاذ شفنا الملحدين والناكرين للدين كمجموعات . سلوك الانقاذ قدم خدمة لاعداء الاديان بمفارقته لروح الدين . بل وكان الالحاد يخرج من منازلهم لاضطراب اولادهم بما يسمعوه منهم ومايرونه من سلوك
بالمناسبة طه كان مريض عديل بالاسهال دون اي دلالات اخرى
ذكرتني قصة سيدنا عمر رضي الله عنه مع من يتسمى بأسم محمد
سيدنا عمر رغم الفارق الزمني ولكنه متقدم بما لايقاس من دعاة الدين
| |
|
|
|
|
|
|
|
|
|
Re: ديل من زمن طه القرشى (Re: عبدالحفيظ ابوسن)
|
الصراع معاهم يا احمد لن يكون طويلا . هم عاجزين عن الارتقاء بإنسانيتهم بل يعبرون عن روح الانسان الدنيئة بشكل مقزز . ولكن حتمية انتصار الانسان لامحالة
تعرف الحطيئة الشاعر المعروف وقصته مع سيدنا عمر . كيف استجاب سيدنا عمر لتعطفه وعفا عنه رغم شدة عمر
ولا قصة احد امراء بني امية والذي امر بقتل رهطا من الناس لخلافهم معه
لامن كتل كم واحد منهم وجا الدور علي فيهم قال ليهو
يا امير المؤمنين ان كنا اسرفنا في الذنب فقد اسرفت في العقاب
فعفا عنه وعن بقيتهم
اها شوف القسوة ثم العطف لمجرد قول لطيف
ديل يقروا في القرآن ويرتلونه واتخذوا له من المقرئين نجوما كالفنانين . ويتحدثون حديث الدين والاخلاق ويتباكون ثم يولغون 5ي الحرام كله . حسى ومعنوى
يسرقون ويقتلون ويظلمون
ويكذبون وينافقون
ولا يتورعون عن بذاءة قول ولا فعل وبعتبروها شفتنة وعدم كياشة
لن نستطيع ارجاع احدهم من عيب او ذنب او سلوك بتذكيره بآية او حديث دعك عنك عن قول
وبراك شايف
| |
|
|
|
|
|
|
|
|
|
Re: ديل من زمن طه القرشى (Re: عبدالحفيظ ابوسن)
|
| Quote: طه القرشي مريض ومحمود الكذاب ومريم الشجاعة واندرو والأسد |
بالإضاقة لي قصة حليمة بايعة اللبن - وهي تغش بإضافة الماء إلي اللبن.
لا يا أخ ود أبو السن لا نجعل كرهنا وبغضنا للكيزان أن نتقاعس عن نصرة النبي (ص)
وقول الحق في أمر ظاهر وباين لكل ذي بصيرة - ده كان إستهزاء وإزدراء لإسم طه ومحمود
وحليمة وووو حتي جعلنا وريطنا ونحن صغار إسم طه بالهبل والمرض والعبط والضحك وحتي
الآن بعضنا ما زال يقول للزول العوير أو الأهبل بالله شوف طه دا أو آآآآآ طاها
ويقال أن واضعي منهج كتاب المطالعة كانوا مصريين (أقباط) ويقال شيوعيين أيام نميري
ووزير التربية محي الدين صابر والله أعلم.
| |
|
|
|
|
|
|
| |
عبدالحفيظ ابوسن
عبيد الطيب
عزالدين عباس الفحل
Ahmed Yassin
Mahjob Abdalla
Asim Ali
محمد محمد قاضي
فيس بوك
تويتر
انستقرام
يوتيوب
بنتيريست