الدرامي الراحل عبد الحكيم الطاهر من فصول محو الامية إلى درجة الدكتوراه

مرحبا Guest
اخر زيارك لك: 03-28-2024, 04:15 PM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف للعام 2020-2023م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
01-02-2021, 06:14 AM

Emad Ahmed
<aEmad Ahmed
تاريخ التسجيل: 08-12-2009
مجموع المشاركات: 12705

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
الدرامي الراحل عبد الحكيم الطاهر من فصول محو الامية إلى درجة الدكتوراه

    05:14 AM January, 01 2021

    سودانيز اون لاين
    Emad Ahmed-جدة - السعودية
    مكتبتى
    رابط مختصر



    https://top4top.io/


    عبد الحكيم الطاهر هل تعرفونه؟ نعم هو ذاك الممثل الذي ما ان يتقمص دوره في اي عمل درامي إلا وصار منه... ايهما من الآخر؟ لا ادري .. المهم يمكنك ان تناديه كابتن كابو او الشاويش حميدة في دكين او الريس او العمدة سالم في مهمة خاصة جدا... لكن لا علينا بكل هذا هذه المرة .. انما سنأخذ معنا عبد الحكيم الطاهر في مهمة خاصة جدا بدأها بفصول محو الامية وانتهت بالدكتوراة عبد الحكيم الطاهر شخص يستحق الاحترام والحب والاقتداء به ... ستتأكدون من ذلك عندما تقرأون هذا الحوار وقبل ان نصل الى آخر حروفه.

    * عبدالحليم الطاهر قرأ في محو الامية
    ـ انا بديت القراية بالطريقة العادية ابتدائي وقريته في 3 مدارس .. مدرسة عبد المنعم الابتدائية جنوب كاترينا في الخرطوم لانه بيت عمي كان في نمرة 2 في السكة الحديد.

    * يعني ما كنت في البلد؟.. انا عارف انك من العفاض بالشمالية
    ـ ايوه نحن من الشمالية العفاض لكن ابوي ونسبة لضيق ذات اليد وضيق الرقعة الزراعية اهداني لي عمي وجيته بالجلابية والطاقية يعني ما مغلف في ورق سلوفان لأنه في الوقت داك ما كان ظهر ورق الهدايا.
    *.......... ؟
    ـ عمي كان باشكاتب في السكة الحديد موظف كبير وهو الخليفة محيي الدين محمد عثمان خليفة السيد محمد عثمان الميرغني جيت قعدت معاهم في بيتهم وشفت لي بواقي انجليز كده لانه كان خلاص حيمشي المعاش وقد كان .
    * ......؟
    ـ طبعا بعد المعاش عمي مشى بيته في الختمية بحري وضروري انتقل معاه من مدرسة عبدالمنعم في سنة ثانية لي مدرسة العزبة قريت فيها ثانية وثالثة اتوفى عمي وانا عملت شغب رفدوني..
    * ........؟
    ـ كنت مشاغب جدا وما شايف زول اكبر مني امكن لاني اتربيت بعيد عن ابوي وامي .. .. المهم اولاد عمي تعبوا تعب شديد لغاية ما اقنعوا ناس مدرسة حلة خوجلي يقبلوني معاهم وقد كان.. امتحنت جبت شهادة لكن بتدخلني الاهلية الوسطى ب 12 جنيه ولانو ما كان عندنا فضلوا اهلي اني اقرأ حاجة بتاعة صناعة فحاولوا يلحقوني بالنقل الميكانيكي ما نجحوا.

    * وهل راقت ليك فكرة ماتقرأ مدارس؟
    ـ طبعا تكيفت جدا كفكفت كم القميص ورفعت كتفي وخلاص كان عمري بين 12 ـ 13 سنة الكلام ده كان سنة 1962م، اشتغلت في المنطقة الصناعية ما خليت مصنع القزاز ولا مصنع الكبريت ومصنع الصابون والحلاوة ... اليومية 15 قرش يشتغل 12 ساعة .
    * .....؟
    ـ كانت احسن حاجة اشتغلتها عامل نظافة واحيانا عامل تعبئة لغاية ما ثبت في مصنع النسيج اليومية كانت 20 قرش مع اوفر تايم.

    * كيف كانت تفاصيل اليوم عندك؟
    ـ بصحى الساعة 6 صباحا امشي المصنع انظف المكاتب اجيب الشاي والفطور للموظفين لغاية الساعة 3 ظهر اطلع امشي الشلة في الختمية كنا ذي الحصين نركب عجلات ودافوري وسينما لغاية آخر الليل .
    * .........؟
    ـ مرات بنقعد في قهوة حاج الصافي او في حديقة عبود كانت جديدة في الوكت داك.. او نخش سينما وطنية الدور الاول ونخش سينما حلفايا الدور الثاني... مرات كنا بنمشي مع فريق التحرير لدار الرياضة نلبس اصفر ونجيب الكورة من ورا الشبكة.. كان الكابتن بتاعه في الوقت داك علي سعيد لاعب حريف والحارس اسمه ا لزين قديم جاء بعده ادوارد الخواجة اخو ادمون منير .. وبرضو كانت عندنا علاقة ذي دي بنادي الامير.

    * نسيت القراية؟
    ـ تماما .. ا سمي بقيت ما بعرف اكتبه .

    * شنو الرجعك ليها؟
    ـ في يوم من الايام سمعت اعلان في الاذاعة عملوا الفكي عبد الرحمن الله يرحمه في برنامج الاطفال قال فيه دايرين ممثلين لبرنامج الاطفال.. مشيت عشان اقدم ليهم .

    * وانت علاقتك شنو بالتمثيل في الفترة ديك؟
    ـ كان عندي نشاط تمثيلي كبير اول حاجة بقلد واحاكي المشاهير في الحلة والمجتمع لي شلتنا وبشارك في مناسبات الحلة عرس طهور زول مسافر زول جاي من سفر بعد الفنان تنتهي وصلته اجي انا امسك المايكرفون واقلد بت قضيم وابو قبورة واحكي نكت وقصص وحكاوي مشيت امدرمان كداري من بحري لغاية المسرح القومي .

    * وقابلت الفكي عبد الرحمن عليه رحمة الله؟
    ـ ايوه كان لابس جلابية وعمه وقاعد في بلكونة المسرح القومي بتطل على شارع النيل.
    * .....؟
    ـ الكلام ده سنة 1968م، قال لي حاكي الديك ... حاكيت حاكي الحصان حاكيته حاكي القطر عملته .. اها قام اداني ورقة قال لي اقرأ لينا التمثيلية دي هنا وقف حمار الشيخ في العقبة... لعثمة شديدة مسك الورقة وقال لي رغم انك موهوب جدا لكن يابني الممثل ده عبارة عن انسان متعلم ومثقف واذا ما اتعلمت وكنت شعلة من الثقافة ما حتنفع تكون ممثل... امشي اقرأ ..

    * ولم تشفع لك كل تلك الموهبة؟
    ـ ابدأ...
    * طيب لو وقفنا هناك قليلا لغاية ما تنقمص لينا شخصية الفكي عبد الرحمن وقدامك كل الممثلين بتاعين السودان الليلة ح تقول لي كم منهم الكلمة القالها ليك الفكي؟
    93% منهم اقول ليهم امشوا اقروا واتثقفوا وانا برضو معاهم ..

    * نرجع مرة اخرى للعام 1968م ؟
    ـ ديك لحظة غيرت كل حياتي .. رجعت البيت متحير وبقيت افكر ... ونسيت شلتي في اليوم داك..

    * كانت بتتكون من منو شلتك؟
    ـ احمد عبد الحميد ود مؤذن زاوية الختمية وعبد الوهاب سيد احمد وبابكر الريح حامد محمد احمد العطا ومتوكل مصطفى خليل محمد احمد ود الشايقي وعباس الطيب وكمال وعوض محمد حسن شرف الدين وغيرهم.

    * فكرت تقرأ بجدية؟
    ـ جدا انا بحب التمثيل وعشان امثل لازم اقرأ مشيت لي ود اختي كان كابتن طيار وكنت بساعدة وهو طالب قلت ليه داير اقرأ قال لي بساعدك عشان تنجح وتمثل .. كنت داير امثل مع ناس هاشم صديق وعوض صديق وابو العباس محمد طاهر شفتهم جوه التلفزيون وانا مع الفكي عبد الرحمن.
    * .. ؟
    ـ مشيت افتش فصول محو الامية في نادي العمال بحري في 4 شهور عدت لمستوى قراية وكتابة بتاعة زمان بعدها مشيت مدارس الشعب كان بتشرف عليها البعثة التعليمية المصرية لاقيت استاذ فاروق ابوبكر اللي هو الان مدير تعليم بحري... ربنا يمد في ايامه.. ودي مدارس مسائية للزول الفاتو قطر التعليم.
    * ...؟
    ـ قابلت استاذ فاروق وانا مكفكف القميص وقالب اللياقة بتاعة القميص والود شغال وعندو عجلة .... الود كبير يعني ... قلت ليه دايرين نقرأ قال لي اقيف كويس ... طوالي نزلت الكم وصلحت اللياقة ووقفت كويس الوقفة اللي يوم الليلة .. قال لي بمتحنك لو نجحت بتخش رابعة طوالي وقد كان .
    *.......؟
    ـ ما كنت انا براي الكبير لا في ناس تانين كتار اقول ليك شيء زملائي في الوقت داك هسه منهم د. محمد الرحيمة اخصائي باطنية وبلال محمد بلال مدير مكتبات جامعة الخرطوم. دي نماذج بس .
    * ...؟
    ـ اتعلمت المسؤولية في المدرسة دي .... بقى استاذ فاروق يكلفني بمهام اقوم بيها شعرت بقيمتي.

    * وواصلت الدراسة؟
    ـ والشغل صباح عامل في مصنع النسيج والمساء قراية وامتحنت الاعدادي مع شفع اولاد صغار يوم امتحان الرياضيات الولد يقول لي: جاتلك كم ياعمو؟
    قاصد حل المسألة..
    * ....؟
    ـ نجحت للاعدادي وكان في نظام بعملوه المصريين للناس القدرنا كدة وهو انك تقرأ الاعدادي في سنة واحدة تبدأ قبل 3 شهور من بداية العام الدراسي تقرأ اولى 3 شهور تمتحن تدخل ثانية تقرأ 3 شهور تمتحن تمش ثالثة تمتحن في نهاية السنة الحمد لله انا عبرت طوالي من اول سنة ونجحت في الاعدادي .. في الوقت داك مصنع النسيج فتح فصول محو الامية ولانه لقوا احسن معلم للعمال هو العمال نفسهم كنت انا اكثر عامل مؤهل للدور داك وفعلا بقيت معلم بعدما اتعملت لينا كورسات في تعليم الكبار ومحو الامية... في ظرف 3 سنوات نزلت نسبة الامية في مصنع النسيج السوداني من 93% الى 42% وارتفعت نسبة الانتاج لغاية 150% مما جعل الاستاذ محمد توم التجاني يشيد بي خلال خطابه بالاذاعة ودي كانت اول مرة اسمع فيها اسمي .. وانا كنت طالب بالكلية القبطية بالمساء وشغال صباح.
    * ....؟
    ـ كتار جدا اخرجوا من فصول المصنع اهمهم رئيس النقابة كان ماعنده طريقة يترشح لانه امي رغم شعبيته الكبيرة بعد الفصول اترشح ونجح وبقي عضومجلس ادارة وقعد مع خليل عثمان في تربيزة واحدة.

    وامتحنت من الاعدادي للتوجيهية( الثانوي)؟
    ـ طبعا وكنت منتظر النتيجة عشان اقدم الشهادة للمصنع ابقى موظف .. مشيت في الاجازة وكونت فرقة المسرح والتمثيل بمركز شباب بحري سنة 1972م، معانا عصام محمد احمد وامين محمد طاهر وصلاح والزين احمد محمد وكتبت تمثيليات مثلناها في برنامج الشباب البتقدمه بخيتة الجبوري ويخرجه عريفي على الهواء مباشرة . واراد الله يجينا الاستاذ الراحل محمد رضا حسين بنص مسرحية (الامسية الساخنة) عشان يشارك بيه في مهرجان المسرح في الوقت داك سنة 1977م، وبعد 3 بروفات مالقى معانا بنات مشى وخلى المسرحية قام صديق حسن جاب لينا 3 بنات مثلن معانا وقمت انا باخراج المسرحية وبطولتها وشاركت في المهرجان وفي الختام كتبت جريدة الصحافة في صفحتها الاولي جائزة الاخراج لعبد الحكيم ا لطاهر وجائزة التمثيل لعبد الحكيم الطاهر .
    * ....؟
    ـ طبعا اعتمدنا على الاساس الوضعة لينا الاستاذ محمد رضا حسين وشلت الجريدة شهر 11 سنة 1977م، وجيت معهد الموسيقى والمسرح اقابل د. خالد المبارك قلت ليه الدولة اعترفت بي ممثل ومخرج وانا داير اقرأ قال لي اكتب طلب كتبت الطلب قام استاذ هاشم صديق قال لي وقت انت مخرج وممثل جاي تعمل شنو؟ قلت ليه جاي اتعلم بعملوهم كيف ودخلت المعهد .

    * ولغاية الوقت داك ما رجعت للفكي عبد الرحمن؟
    ـ ابدا لغاية ما اتخرجت سنة 1982م قلت ليه بتذكرني يا استاذ ؟ قال لي لا .. قلت ليه انا جيتك سنة 68 قلت لي امشي اقرأ هسة انا اتخرجت داير امثل معاكم في برنامج الاطفال قال لي انت لسة محتاج تتعلم عشان كدة تعال نعلمك تاني في برنامج الاطفال وفعلا ماتعلمته في برنامج الاطفال لم اجده في المعهد .

    * وتواصلت الرحلة؟
    ـ طبعا .. 1982م، اتعينت معيد في المعهد وسنة 1987م، مشيت مصر دراسات عليا وسنة 2000م نلت الماجستير وفي 2008 م نلت الدكتوراة

    * من اقواله:
    * اتبترت اصابع يدي اليسرى بمصنع النسيج سنة 1962م وجيت لي ود عمي قلت ليه اقفل لي الزرارة بتاعة القميص دي اداني كف قال لي اقفلها براك وقفلت براي ومن الوقت داك ما حسيت باني فاقد جزء مني.
    * من 1978م حتى 2003م اشتغلت في كمية من الاعمال لا احصيها.
    * كونت فرقة الصم والبكم شاركنا بها في مهرجان باسبانيا فزنا بجائزة العرض المتفوق أمام اوربيين واسيويين وافارقة.

    (حوار صحفي منقول من صحيفة الصحافة)






                  

01-02-2021, 06:15 AM

Emad Ahmed
<aEmad Ahmed
تاريخ التسجيل: 08-12-2009
مجموع المشاركات: 12705

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدرامي الراحل عبد الحكيم الطاهر من فصول � (Re: Emad Ahmed)

    https://top4top.io/
    الف رحمة ونور تتنزل على قبر الرجل العصامي الدرامي دكتور عبد الحكيم الطاهر
                  

01-02-2021, 07:49 AM

بدر الدين الأمير
<aبدر الدين الأمير
تاريخ التسجيل: 09-28-2005
مجموع المشاركات: 22928

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدرامي الراحل عبد الحكيم الطاهر من فصول � (Re: Emad Ahmed)

    يا سلام ياعماد
    سيرة تدرس للأجيال
    الف رحمة ورحمة على روحك
    ياعبدالحكيم الطاهر
                  

01-02-2021, 08:33 AM

بابكر قدور
<aبابكر قدور
تاريخ التسجيل: 02-26-2013
مجموع المشاركات: 1561

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدرامي الراحل عبد الحكيم الطاهر من فصول � (Re: Emad Ahmed)

    أخي الأستاذ عماد
    لك الود والتحايا الطيبات
    توقفت كثيراً عند الصورة في أسفل الحوار مع عبدالحكيم الطاهر عليه رحمة الله
    ورأيت فيها نفس ذلك الدفق الغريب الذي يفيض منه وهو شئ غريب لا تجده في
    كل الوجوه التي تراها وأظن هذا الشئ هو الموهبة التي خصه الله بها فقادته طوال
    مسيرة حياته وأوصلته إلى حيث "كان" .. وكان جزءاً من حياتنا نحن كشعب وأمة
    .. وكان شخصاً فاخراً في حياتنا يقيم في دواخلنا حيث التجلة والإحترام والذكرى
    الطيبة .... رحم الله د.عبدالحكيم الطاهر رحمة واسعة وتقبله مع عباده الصالحين في
    عالي الجنان ولك الشكر مرة أخرى ياعمدة ....
                  

01-02-2021, 05:19 PM

Amira Hussien
<aAmira Hussien
تاريخ التسجيل: 11-26-2016
مجموع المشاركات: 1706

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدرامي الراحل عبد الحكيم الطاهر من فصول � (Re: Emad Ahmed)

    له الرحمة والمغفرة
    شكرا عماد
                  

01-02-2021, 06:28 PM

Nasr
<aNasr
تاريخ التسجيل: 08-18-2003
مجموع المشاركات: 10759

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدرامي الراحل عبد الحكيم الطاهر من فصول � (Re: Amira Hussien)

    المبدعين الحقيقين شوية
    وواحد منهم المرحوم عبد الحكيم
    إنها سيرة عطرة بحق وحقيق
    تجعلك تفخر بالسودان
    الدي أنجب مثل هذا المبدع

    ألا رحمه الله رحمة واسعة
    وجعل الجنة له مآبا
    والعزاء لكل متلقي إبداعه وأصدقاءه وأسرته
                  

01-02-2021, 07:55 PM

سيف النصر محي الدين
<aسيف النصر محي الدين
تاريخ التسجيل: 04-12-2011
مجموع المشاركات: 8995

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدرامي الراحل عبد الحكيم الطاهر من فصول � (Re: Nasr)

    يا سلام عليك يا عمدة.
    الف رحمة ونور على روح الراحل الكبير عبد الحكيم الطاهر. عرفته عن قرب لفترة في القاهرة
    واشهد بأنه كان انسانا جيدا على كافة المستويات.
                  

01-02-2021, 10:06 PM

Ahmed Yassin
<aAhmed Yassin
تاريخ التسجيل: 01-31-2013
مجموع المشاركات: 5507

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدرامي الراحل عبد الحكيم الطاهر من فصول � (Re: سيف النصر محي الدين)

    عمدة وضيوفه الكرام
    الراحل دفعة اخي الكبير (مصطفى) ونفس التفاصيل وكانا يعملان معا في مصنع النسيج السوداني
    حق (خليل عثمان) في المنطقة الصناعية بحري اخي مصطفى كان في قسم (لف المواتير)
    وتاملا معا في الصف السادس الابتدائي (الدراسة ليلية) وكان مصطفى الاول على الفصل
    ثم درسا معا المرحلة المتوسطة بنظام (3×1) يعني المرحلة كاملة تخلصها في عام واحد بدل ثلاثة اعوام
    والاتنين درسا الثاني و التحقا بالكلية القبطية ، ومصطفى التحق بجامعة القاهرة فرع الخرطوم حتى تخرج من كلية التجارة
    دا درس بليغ في الطموح والرغبة في التطور وعدم اليأس ‘ عبدالحكيم من مراسلة في المصنع الى محاضر في المسرح
    له الرحمة والمغفرة وربنا يدخله الجنة
                  

01-03-2021, 08:06 AM

بدر الدين الأمير
<aبدر الدين الأمير
تاريخ التسجيل: 09-28-2005
مجموع المشاركات: 22928

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدرامي الراحل عبد الحكيم الطاهر من فصول � (Re: Ahmed Yassin)

    احر التعازى لفردة جناح عبدالحكيم الطاهر
    الفنان محمد السنى دفع الله
                  

01-03-2021, 11:45 AM

Khalid Abbas

تاريخ التسجيل: 12-16-2017
مجموع المشاركات: 1993

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدرامي الراحل عبد الحكيم الطاهر من فصول � (Re: Emad Ahmed)

    اللهم اغفر له وارحمه وادخله فسيح جناتك مع الصديقين والشهداء
    وشكرا على البوست شخصيات زي دي مفروض تدرس في المدارس يتعمل عنها افلام قصيرة تعرض في المدارس
    والاحياء عشان الناس تتعلم منها وتكون حافز لعدد كبير من الناس
                  

01-03-2021, 06:45 PM

Nasr
<aNasr
تاريخ التسجيل: 08-18-2003
مجموع المشاركات: 10759

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدرامي الراحل عبد الحكيم الطاهر من فصول � (Re: Khalid Abbas)

    أتفق معاك يا خالد أن المغفور له بإذن الله عبد الحكيم مفروض يتعمل عنه فيلم
    ولو فيلم وثائقي
    ولحسن الحظ ممكن تتلقي مادة محفوظة في مكان
    من مسلسلات أو مسرحيات أو أفلام شارك فيها

    رحمه الله
    مثال لمبدع حقيقي
    ومثال لمثابر طموح عبر بجهده
    وثقته بنفسه
    وثقة آخرين بفنه وموهبته
    من فصول محو الأمية لنيل الدكتوراة

    ذاك المبدع حياه الغمام

    ولك جزيل يا عماد علي التوثيق لمبدعي وعظماء بلادي
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de