المد المارق من زفرات الفجه ماشي وداخل بين شهقات الروح شهيق مجروح ملطخ بالدعا ماخد من سماك الساكته لون حزنو طامح زى وريدك كلما يوسع يضيق
يا صبحك فات بى ليلو سبعة ضحكات بى ليلو ويا فرحك مات بى ليلو سبعة نجمات بى ليلو يا عمرك طال بى سنينو الرايحه ما لاقيه الطريق يا حالك حال مسجون فى ضلوع الغبشه كاسيهو الرماد يا حليلو جافاهو الرفيق
وأماتك الدافقه الحنان تعبت تفتش فوق جزاير الريح تفتش ليكا فى وعر الدرب تنده تقالد في رواكيب الزمان تطيب خاطر العمر الكسيح ما عارفه ضلك من رهابك حننت قلب المكان ما فارزه جيتك من غيابك والمويه دساها الحريق
الجزر:
الموج سليل المويه المويه يا دم البحر يجري جنب العيون الكايسه دمعاتا جوه العروق الودرت فى موتا نبضاتا والواطا بت الكون مرقد الناس المشت بدرى الليل غنوة الخايفين ساكت يعاين فى الودار الموت عديل احسن كتير من الفزع مين البورينا الدرب مين البخت الجمره فى مويه الوجع دربك معلق فى الفضا وفضاك مكتف بالغبار وقلب سفينتك يشتهى الجوه فى خاطر السواحل وبره فى وش النهار
الموج سليل المويه المويه يا ست الروا جيب الكلام مليان عطش والريق يباس المشتهي كبي القصائد فينا ناولينا الدوا
وبين ريحة الملح البتاوق من دمانا حليلا قريفة القعاد فوق الحكاوي الصابه عينه وبين ريحة البن الرمانا قايمة حيشان من وِلف سهرانة نيمات الوداد
بين ريحة الملح السكن جنب القلب قفل دروبك بالسهاد رشرش صقيعة الروح نزِف وريحة الشوق الحمانا نفرد جناحو نبلو فى الضل السمح نعطنو فى النيل النِشِف راقدة كيمان العباد الجاورت نبع الأسى الموية يا السقم القديم الموية يا ست الروا سفن الغريب بايته القوا والشوق حلم فرزع غناويهو الهوا
07-28-2020, 01:25 PM
ابو جهينة
ابو جهينة
تاريخ التسجيل: 05-20-2003
مجموع المشاركات: 22495
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة