محمد المرتضى حامد ..والشاي الغنى ليه ود اليمني ..

Quote: بس للاسف شاي مغرب بدون لقيمات ما ينفع... ويا حليل حيشان السودان وقعدة المغربية مع الشاي واللقيمات والكهرباء قاطعة والفانوس مولع

Quote: تضي كيف الحال يا ود خالتي الشوق قدر مقالدة الأُمات يا تضي

Quote: تحية صباحية بمفردات دارفورية شريف ذهب ***** صباح الخير يا الحبان، صباح التِكِّو والقرقدان ومعاها خلخسان، صباح بركيب جامد ومديدة قضيم معمولة بالجير صباح بنيّة جميلة تفرتق مشاطها في درب البير، صباح صبياً مفتّل مخالف رجليهو فوق باسورو، فرحان - مرّة يِكِرّ ومرّة بدوبي -، جِمالو شبعانة رويانة تقدل قِدّامُو زي بنات البندر ، جسيماتهن ناعمة من موية العطرون، سناماتن زي اهرامات مصر، قوامهن لادن، شكلهن فاتن، مثل البنية فاتن، مشهد جميل يصابحك قدّام حلتنا قدّام فريقنا، ناس فطومة ناس مريوماي وحليماي، ناس أبّكراي الصغّير نُخامتو في خشم انافو، شديقو زي كديسة خواجات، شايل كاسو جاري وراء غنمايتو – صبي دلدُوم بقا وبقُوم – ، وهناك خالتك عشوشة تنادي فيهو - يا وليد خليِّ الغنماي – . وقاعُود صغيّر بنّكِس هناك بطارد في الحميلان " يا الله على المشهد الجميل " مع الضحوية سحاب مدودِل شايل، ومن بعيد هناك عمك أبو عشوشة بنادي – يا عيال اليوم اسرحوا قريب وأوعّكم من مُقطاع الوادي – ودِيِك خالتك حليمة مارقة من بطن الحلة حابقة جناها وراء ضهرا، كارباهو بفروة قويّة وفوق رأسها عُمرة كبيرة، نُصُّو عصيدة بملاح تقلية والباقي - أم جِنقِر ودشيشة وشوية دنزاي معاها بصلادي، واحمد الصغير ماشي وراها شايل في اِيِدُو كونجكناي، وديك سعدية جاية بي غادي شايلة بِسِكِلّة بي أيد وجردل كبير فوق رأسها الله اعلم بالفيها ( كمان جاني ولا شغل تاني ما معروف) وبي هناك أم جزايم مارقة من بيتهم شايلة طبق كبير مليان كسرة عسلية،.. ما اليوم تويزة في زرع سليمان العرّس مستورة قبل أيام، وهناك لمّة الصبيان، الشقوق ملأت الزرع بيت وراء بيت وزغاريد البنات على الصبيان الكمّلوا المخمّس في – فرت ساعة- ورجعو وراء بكتُلو معاهن باقي الشقوق. .. يا الله على الضحكات الجميلة – سباق الصبيان قدّام البنات – وفي نص ساعة الشقوق انكتلت ، والجرّاية إتِرمت ومن هناك موكب الزاد وصل، وشوف تاني الزغاريد من ناس خالتك حليمة وسعدية وأم جزايم الشايلات الزاد، ..ما خلاص الزرع اتحشّا والصبيان رموا الجرّاية، وشوف الونسة تاني وقت الغداء والمُزاح، شيء جري بي جاي وجاي عشان ما تتمسّح بمُلاح الكسرة، وشوف المشهد الجميل لامن المطرة بدأت تشَقِشق والكُل انكبوا على الشجرة الكبيرة والتانيِين على المشمعات (امكردُوس كتل عجوز في درب سوق) وبعد ما المطرا خفّت تعال شوف الجَمال تاني،.. العيش برَفرِف بيرك زي علم السودان كُلو أخضر ناير والموية جارية في كل مكان، البِرك اتِملأت لكن الخوف ما منها، الخوف من الوادي الكبير، لازم الجميع بتحركو بدري قبل ما يقطع ليهم الدرب. شوف الجراري ال في الكتوف والشباب الماشين صفوف صفوف، ويا الله على المشهد الجميل تاني على مشارف الحلة لمن الجموع تتلاقي من كل الدروب، ناس التويزة وناس السرحة وناس القنِيِص، داك أبّكر شايل ارنبايتو واسحاقة عندو اتنين وفيهم الجاى فاضى سِفرِ اليدين، لكن ما مشكلة، الكل رابح ما الحصاد بعدين بتقسّم لمن يبقى ملاح (فِيا) أو قول (جربي)، ما العادة السمحة عند أهلنا الطيبين مافي زول بخلّي رفيقو، وبعدين شوف الفرحة لمن المدا يقوم تحلف تقول ديل ماهم الصبيان القيّلو تعبانين للأرانب والجراري مطاردين، وديك نجم الصباح شق وراح - وحبيبي وين نمشوا سواء - ورقدة لي يوم باكر، نفس المنوال مبسوطين مافي واحد بكاشر، الله على الزمن الجميل وعلى بلادنا الحلوة، ويا ربي السلام يجينا باكر، وليكم يا أحبابي السلام . معاني المفردات : التكو والقردان والحلحسان : أسماء لنباتات جبلية والمقصود هنا ثمارها وهي معروفة . البركيب : اللبن الزبادي تفرتق شعرها : الفِرتيق البعثرة والمقصود هنا الفرد لإعادة المشاط صبي مفّتل: مفتول العضلات كارباهو : أي حزمه تويزة : النفير الجراري : المقصود هنا آلات العزق وليست الرقصة . فِيا وجربي : اسمان لصنف واحد من الملاح يصنع من لحم الأرنب يضاف إليه مسحوق حب البطيخ .

Quote: إمتثال وأبوحسين وحجوج سلامات .. شكرا لامتثال ست الشي زاتا ولعادل أبوحسين الذي نبهني لهذا البوست عبر مسنجر الفيسبوك ولكلام الحاج الذي أشكره عليه ،

Quote: قباني كيفك يا راسي يا زين.. عتابك دوما مقبول.. جيت كندا لأسبوعين وبعد خمسة أيام وفي ظروف كرونية كرتونيه شينه عدت فجأة إلى أديس سريعا ثم مسقط على غير ما خططت له بسبب ظرف طاري للغاية وأنت أعلم بأنك لست ممن لا ألتقيهم كشأني في كل زيارة، كان ما عشان آلاف هكتارات الود الأمدرماني والونسات الحصرية قبانيا نقول عشان العوازيم المزيلة لثلج ميساساقا. كنت سأعود إليك بعد أسبوع لكنهم قفلوها علينا الياكلوا الوطاويط وما زلت.. جاييك بس يفتحوا المطارات والخاطر

Quote: المهم ، كان كل شيء في الحوش رائعا ، لمة الأهل والجيران سيما عند شاي المغربية مع اللقيمات خصوصا إن كان من صُنع (فلانه اليورانيوم) البترمي اللقيمات وجيوش نابليون، قال Dunkin Donuts قال، إنه الشاي الغنى ليهو ود اليمني (أنا بريد شاين تقعدي انتي وتهِبِّي) وليس شاي ال kettle اليشبه اليود طعما ومظهرا، وفي أدنى التجليات يرافق الشاي بسكويت ساتي من الكنتين قبل ظهور البقالات التي أصبحت الوريث الشرعي للحيشان والصوالين التي انحسرت وأصبحت كالسمندل في حافة الغياب كما أتحف الرائع محمد عبدالحي،

Quote: سعيد بظهور الأخ الشيخ سيد أحمد و هو ولد حلتنا و صاحب قلم متميز ، فله من كمال الود أكمله أو كما يحلو له أن يقول دائما.

Quote: ااسامة الخواض محمد كمال الدين ده جاب لينا السياسة في طبق من ذهب ،واول مرة اقرا السياسة بمزاج عالي واريحية وغير معكننة المزاج وكانه قدامي في كباية شاي كبيرة بلبن مقنن في المغربية ومعاها صينية بتاعة لقيمات ،،،،والله بسطت لينا فهم البروليتاريا والبرجوازية والطبقات العاملة ...وشكرا،، مقال اوسكار ولا شك...

Quote: طريقة الوصف كهذا لزمن مضى قليلون هم من يجيدونه.

Quote: غايتو يا محجوب بالغت في الوصف،،

Quote: عزيزنا محجوب عبدالله، من الصعب أن أشرح للناس ماهو الشاي في دارفور وكردفان في مساء ماطر.. صعب جد.. ليس من سمع عن الحرب كمن خاضها.. قت ليك صعب وانت عارف..