كتب الكاتب الفاتح جبرا المتوفرة بمعرض الدوحة
|
Re: مليار مبروك إزالة اسم السودان من قائمة � (Re: دينق عبد الله)
|
أخونا دينق عبدالله سلامات وتبريكات. اخبار جميلة وسعيدة في الدرب . الريكورد الكعب يا دينق الحمد لله اتمسح بي لستيكة . اتمسح عديل . و باقي أي عترسات بعد ده علم السودان حيرفرف نضيف و بدون أي نقط رمادية . ياخ الإنقاذ دخلتنا في وكر مرعب. الله يلعنهم. انشاءالله تتم كل حاجة علي خير .
| |
|
|
|
|
|
|
Re: مليار مبروك إزالة اسم السودان من قائمة � (Re: Salah Zubeir)
|
أخونا صلاح الزبير سلامات الف شكر علي المرور الكريم ياخ دعواتك ربنا يبعد العواض . وانت عارف عوارض بلدنا المحسودة . وعارف اطماع الطامعين في جنتنا الحبيبة. علي كل حال الشغلة نجضت. وما باقي إلا تشتيت الفول والتمر ونحر الجمال . من هنا، وقدام يا صلاح تاكل سنكيت مملح وشربوت صافي من هنا وقدام تمد جواز سفرك لي أي سفارة فرفوع الراس والتاشيرة تجيك تولول . لا ارهاب لاكباب .
| |
|
|
|
|
|
|
Re: مليار مبروك إزالة اسم السودان من قائمة � (Re: MOHAMMED ELSHEIKH)
|
سلام عليكم يا شباب جت. عانوا جاي عانوا جاي . ملف حمدوك الحشرو سياسة وفهم وحمرة عين. ملاقي الاحترام. وملاقي الموافقة. وعلي وشك المروق. . تب . والان بين البيت الأبيض وبين بناية الكابيتول وبين الكونجرس والأحلام . نظام مراجعة و و ضع بعض الحربشات. بعد ده لافي جرجرة لا شتين. يعلم الله ده كان العشم في ابننا البار د. حمدوك. الجنا ده من يوم شفناهو في القناة 4 وهو يمنطق في وكيلة وزارة الخزانة اتعشمنا فيه الخير . وتفينا علي الزمن الفات. وتفينا علي الحرامية. بعدها تاني طبق المقابلة وبهل اللنقليزي اب نيشنات في مقابلتو مع الصحافة الامريكية . لامن واحدة صحفية سيسبانة بدون ما تشعر صفقت. من داك اليوم عرفنا زولنا حيجيب المراكب للبر .
| |
|
|
|
|
|
|
Re: مليار مبروك إزالة اسم السودان من قائمة � (Re: Osman Musa)
|
لا موضوع رفع اسمنا من القائمة دا ما تخاف مني فيه خاف من محمد سليمان هههه بقعّد ليك الكلام لامن تشيل الهم زاتو لكن برضو بوستات عثمان موسى فيها البشارة دايما حتى ولو اتأخرت
يا ود الزبير فيديوك دا جاني زمان و نزلتو في بوست احمد موسى بتاع تسوية قضية السفارتين
| |
|
|
|
|
|
|
Re: مليار مبروك إزالة اسم السودان من قائمة � (Re: adil amin)
|
الزول دا قبل كم سنه اظن ظهر فى فيديو من نفس المكان ولابس بدله ومن جوا ومن بتاع ..واهو ليوم الليله الامريكان لو رفعو اسم السودان الان يكونو مابعرفو سياسه وغبانين يرفعو اسم السودان ولسه غندور ووانس عمر يتضرعو فى البلد ويدقو طبول حرب اجهاض الثوره اطلعو خارج المشهد وعاينو ليهو بصوره اوسع واذا فعلا الامريكان رفعو اسم السودان الان من قائمه الارهاب مهناها سيعاد تدوير حكم الكيزان) مش الوجوه القديمه وبرعايه امريكيه
| |
|
|
|
|
|
|
Re: مليار مبروك إزالة اسم السودان من قائمة � (Re: Hafiz Bashir)
|
Quote: يا ود الزبير فيديوك دا جاني زمان و نزلتو في بوست احمد موسى بتاع تسوية قضية السفارتين |
تعرف يا علاء انا قاعد في ضهاري الخرطوم ... شفتا الفيديو في الواتساب أمس بالليل ولامن اخدت لي تبا ... وقتا صباحتو بيض نبشر بيهو شعب سودانيز ولامن لقيت ودموسي قام باللازم قتا نساعدو بالفيديو .. المفروض في حالة زي دي عادة" ارسلوا لي الصديق هادم البوستات غيرتا رأي ورسلتو لي خبير طرمبه يظهر اليوم أدوهو شغل بعيد من أجهزة التواصل لي هسي ما فتحو ... غايتو الباش محمد سليمان وصاحبنا عاصم علي غبينتن كبيرة خلاس علي البلد دي ... كلو واحد بي سببو ...
| |
|
|
|
|
|
|
Re: مليار مبروك إزالة اسم السودان من قائمة � (Re: Salah Zubeir)
|
العنوان مختلف من الخبر.. لسة يا شيهنا.. زمان ناس الإنقاذ كانوا يخدرون الشعب بمثل هذه الجرعات .. لكن فى عهد الثورة المفروض الناس لا تنشر شئ إلا بدليل و مصدر حكومي.. موش واحد قاعد فى حديقة ويسجل زى ما يجى.. ما تفاؤل و ما تشاؤم.. وقائع بس.. غير الوقائع ما نتبع شئ
| |
|
|
|
|
|
|
Re: مليار مبروك إزالة اسم السودان من قائمة � (Re: Salah Zubeir)
|
Quote: غايتو الباش محمد سليمان وصاحبنا عاصم علي غبينتن كبيرة خلاس علي البلد دي ... كلو واحد بي سببو ... |
عبينه شنو ؟ فى زول بشيل غبينه على بلدو ؟ القصه كلها زول عندو راى وموقف برا تيار الراى العام السائد والبتغلب عليهو العاطفيخ وربما الشعور بالارهاق من طول فتره العقوبات. موقفى واضح من ايام قرار اوباما وكان فى بوست عن الكلام دا الناس فرحت وهللت اها وبعد داك كانت من اسوء الفترات على الناس من بعد الانفصال وهبه سبتمبر 2013 . رفع اسم السودان الان من القائمه وناس الجزولى ومعروف دعمو لمنو ولسه شايف عندو اعلان لايف مناهض للبعثه الامميه اللى دايرين ياخدو ذريعه لاشعال حرب جهاديه وشايف صوره خطاب لافه عن تغيير اسم الدفاع الشعبى الى اداره الاحتياط .يعنى عمليه مكياج تنكر للقديم تحياتى
| |
|
|
|
|
|
|
Re: مليار مبروك إزالة اسم السودان من قائمة � (Re: Asim Ali)
|
يا عاصم يا أخينا الجزولي والإخوان وأي زول عندك عليهو بينة سواء كان فساد او دعم إرهاب أو موالاة لي تنظيم عالمي ... ما عليك إلا تبلغ النيابات المختصه بهذه الجرايم ... الهتافيه ودق الجرس دا كوز ودا تنظيم عالمي ما حا توصلك لي نتيجة ... البلد علي حسب ما بيقولو بقت دولة القانون ... حقك تصل ليهو بالقانون فقط ... بعدين ما قريت ليك رأي عن ما يدور في تجمع المهنيين قايد ثورة ديسمبر المجيدة نوهاءي ... ولا ما عندك خبر ...
| |
|
|
|
|
|
|
Re: مليار مبروك إزالة اسم السودان من قائمة � (Re: Salah Zubeir)
|
Quote: شفتا الفيديو في الواتساب أمس بالليل ولامن اخدت لي تبا ... وقتا صباحتو بيض نبشر بيهو شعب سودانيز |
نصيحة من خبير جد ما زي خبيرك الكيشة دا, يا ود الزبير الناس دي تسعين في المية منها بتخش سودانيز من الموبايل و الأولد فاشون الزيي البخشوه من الكمبيوتر بكونوا فاتحين الـويب واتساب في تاب و سودانيز في التاب البعدو! فا شنو يا قريبك قصة تبشّر زول هنا بي حاجة من الواتساب أنسى! اللهم إلّا العوقة القنينيط البنبح بي تحت دا اصلو ما بعرف في الدنيا غير سودانيز اظن يوم السيرفر يفع بطلع الشارع يلقط اكياس الزبالة لحدي ما السيرفر يرجع لكن الناس الطبيعيين أولاد الناس الهنا ديل بخشوا الواتس اول شي, فا البتلقاه فيه أكيد مر عليهم وطبعا في سبب تاني انك ما تجيب امور الواتساب هنا لأنه الفبركات و السلفقة فيها بقت مبالغة, الواحد كان قال ليك سلام عليكم تقوقلها اول تتاكد منها. 44
| |
|
|
|
|
|
|
Re: مليار مبروك إزالة اسم السودان من قائمة � (Re: Salah Zubeir)
|
ياصلاح فصه عشم بمحامكات حتى للجوا ديل ومع الشايفو دا ..الله اعلم ...خليك من البرا .. بعدين انا راى عن العقوبات قلتو اظن فى بوست للاهت نعمات تصل الفتره لنهاياتها و(غاياتها) بنجاح بعدها نتكلم عن رفع عقوبات ..ولو ضرورى هسى تكون تعليق مؤقت لسته شهور والرفع النهائى بعد نهايه الفتره . اما موضوع تجمع المهنيين فانا متفرج وراى ثلتو يوم وضحت انو البمثل كليتنا فى المؤسسه (الدفعه الوراى فى الجامنعه ونعمل فى مجال واحد) كادر امنى تانى اتعب نفسى فوق كم اتكلم
| |
|
|
|
|
|
|
Re: مليار مبروك إزالة اسم السودان من قائمة � (Re: Asim Ali)
|
Quote:
يا ود الزبير فيديوك دا جاني زمان و نزلتو في بوست احمد موسى بتاع تسوية قضية السفارتين
|
ونزلتو في الفيس بوك فبرضو وفخامتي شلتو وزعتو على ثلة من الأولين والآخرين المعانا والضدنا ودا أكبر دليل على انو الكلام حقيقة وعلى وشك التنزيل لأرض الواقع بدليل احتفائي بيهو وطبعا زي ما اتا عارف وغيرك عارف العبدلله ما بلعب بسمعتو في التوقعات والاستنتاجات وفراسة قراءة الحاضر والجائي . اذن فأبشروا ونططوا . .............. شكرا سيد البوست
| |
|
|
|
|
|
|
Re: مليار مبروك إزالة اسم السودان من قائمة � (Re: طلحة عبدالله)
|
من موقع اخبار السودان منقول من موقع امريكي
أكد موقع قلوبال تريد ريفيو، إقتراب تدفق الإستثمارات الدولية على السودان، وقال “على الرغم من الوضع الاقتصادي والسياسي غير المستقر فإن السودان أصبح في وضع قريب يمكنه من فتح أبوابه أمام الإستثمار الخارجي”. وكشف الموقع عن عدة توصيات تقدمت بها هيئة النزاهة المالية العالمية للحكومة الإنتقالية بهدف إدخال مزيد من الشفافية حول التدفقات التجارية، وتقديم الحلول لمشكلات السوق السوداء في البلاد والتي توسعت في السنوات الأخيرة جزئياً بسبب ندرة العملات الأجنبية. وأوضح التقرير أن التفاهمات بين الحكومة الانتقالية وواشنطن حول رفع اسم السودان من قائمة الدول الراعية للإرهاب في آخر خطواتها، وأشار إلى أن الرفع الوشيك للسودان عن القائمة سيفتح الباب أمام المؤسسات المالية الدولية والشركاء التجاريين للدخول في السوق السودانية
| |
|
|
|
|
|
|
Re: مليار مبروك إزالة اسم السودان من قائمة � (Re: علي عبدالوهاب عثمان)
|
Quote: أكد موقع قلوبال تريد ريفيو، إقتراب تدفق الإستثمارات الدولية على السودان، وقال “على الرغم من الوضع الاقتصادي والسياسي غير المستقر فإن السودان أصبح في وضع قريب يمكنه من فتح أبوابه أمام الإستثمار الخارجي”. |
خد عندك قول واحد .. ناس قلوبال تريد عايزين يضمنو كومهم في اللحمة قبال التور ينضبح
| |
|
|
|
|
|
|
Re: مليار مبروك إزالة اسم السودان من قائمة � (Re: محمد على طه الملك)
|
اظنك بتحلم يا عثمان موسى طالما طرمبة ما زال رئيسا فان السودان سيظل في قائمة الارهاب ،وبالامس القريب فقط وضع السودان مرة اخرى في قائمة الدول المحظور مواطنيها من دخول امريكا والسودانيين الذين فازوا في اللوتري الامريكي ضاع حلمهم وسعيهم لدخول امريكا ... وطبعا هؤلاء الشباب ابذبن فازوا في اللوتري الامريكي وسمعنا انهم حزنوا لقرار طرمبة لو كانوا يعرفون كيف يحصد فيروس الكرونا الناس هنا في امريكا لما حزنوا ، بل كانوا فرحا ولو عرفوا كيف تعامل الشرطة الامريكية الاقليات من الافارقة والعرب والاسبان لما حزنوا ابدا.... ولكن حزنهم فقط يجب ان يكون انهم منعوا من رؤية عاصمة العالم نيويورك،،،،وحتى هذه ممكن يزوروها بعد انتهاء الكرونا بعد سنتين بتاشيرات سياحية ، ، ولكن الامل ان يفوز بايدن الديمقراطي في الانتخابات ويشطب اسم السودان من قائمة الدول الراعية للارهاب ،،،
| |
|
|
|
|
|
|
Re: مليار مبروك إزالة اسم السودان من قائمة � (Re: امتثال عبدالله)
|
أخونا المهندس محمد البشرى سلام بطعم الانتصار السودان البلد القديم الحضارة قادر بالمنطق والقانون يجيب حقو. كلام ترامب وإعلام الكيزان المخربين اخد اخرو . السودان دولة عظيمة . في امريكا في كتير من أبناء السودان الابرار شغالين لصالح خروج البلاد من تمنة الحصار وتهمة الارهاب. والسودان عندو كتير من الاحباب الامريكان الواقفين في صف دعمو . ياخ مليار مبروك. تحياتي .
| |
|
|
|
|
|
|
Re: مليار مبروك إزالة اسم السودان من قائمة � (Re: Osman Musa)
|
يا ود الزبير، يا أخي، إتّا زول مستنير، كلام الركابي الناقلو حمد في حق دكتور القراي دا كلام يستحق الادانة في البداية قبل كل شيء، لأنه أولا يدخل في باب حرية الاعتقاد وفيهو تهديد بالقتل، ثانياً الوثيقة الدستورية ألغت حكم الردة يعني كلام غير قانوني. ما بالضرورة القراي يلجا للقانون عشان الناس تقيف معاهو. أتمنى أن لا يجرفك عدم اتفاقك مع الجمهوريين في عدم وقوفك مع خياراتهم التي يدعمها القانون.
| |
|
|
|
|
|
|
Re: مليار مبروك إزالة اسم السودان من قائمة � (Re: Osman Musa)
|
Quote: يا ود الزبير، يا أخي، إتّا زول مستنير، |
شيخي أبكر ... غايتو أنا متأكد إنك قاصدني انا صلاح ود الزبير ... حتي لو ما كتبتا ما تقوله عني ياني أنا الكاتبو ... عقيدتي فيك ما بتسمح نغلطك ... والما عندو محبه ما عندو الحبه ... بس يا شيخي حيرتي في إنو أنا قتا الكلام دا وين ...
| |
|
|
|
|
|
|
Re: مليار مبروك إزالة اسم السودان من قائمة � (Re: Osman Musa)
|
أخونا أستاذ وليد طه سلامات صورة وييييين يا اخوي. دي مانهاتن عاصمة الأخبار الحلوة . في هادي المدينة المقسمة لي استريتات وافينيوهات. والمحتشدة بالصحف والصحافين يمكنك أن ترخي اضانك وتلقط أي شي . يا وليد في ركن أي مربع صحفي. وبين المتر والمتر كاميرا . بلاد متروسة بالكاميرات . ومتروسة بالمنتظرين من أصحاب المال للدخول لعالم نهر القاش ( والحل في المنقة ) كمية من الأموال يا وليد في خزن ناطحات السحاب منتظرة الفرج . اهلك البنجميناب . مستعجلين اكتر منك ومني . والله يا وليد واحد مزارع طويل المنكبين من أصحاب ناطحات الفيفس افينيو قال إلا نتفرج في خريطة مدروسة لزراعة الشمام في منطقة نهر القاش . حاجة تلف الرأس . يا شيخ وليد الدنيا مهتمة بي وطنا البي اسمو كتبنا ورطنا. تحياتي ومليار مبروك
| |
|
|
|
|
|
|
Re: مليار مبروك إزالة اسم السودان من قائمة � (Re: Asim Ali)
|
حصل شنو للقانون دا ؟؟ هل تمت اجازتو ؟
Quote: مشروع قانون في الكونغرس لربط إعفاء ديون السودان بسيطرة المدنيين على المال والأمن.
الكونغرس الأميركي .. صورة لـ "رويترز" الخرطوم 8 مارس 2020-
قال عدد من النواب في الكونغرس الاميركي انه يجب على الإدارة الاميركية ربط إلغاء الديون الخارجية للسودان بالسيطرة الكاملة للحكومة المدنية على الشؤون المالية وأصول أجهزة الأمن والمخابرات.
وقدمت مجموعة من أعضاء الكونغرس الجمعة الماضي مشروع قانون يحظى بدعم الحزبين ينص على دعم الانتقال الديمقراطي في السودان.
ومن بين الاعضاء الذين صاغوا مشروع القرار رئيس لجنة الشؤون الخارجية بمجلس النواب إليوت إنجل، عضو اللجنة مايكل ماكول، رئيسة اللجنة الفرعية المعنية بأفريقيا كارين باس وزميلها العضو كريس سميث.
ويمثل مشروع القانون أول خطوة ملموسة من جانب الكونغرس لدعم السودان بعد الإطاحة بالنظام السابق حيث يجيز تقديم المساعدة للحكم الديمقراطي وسيادة القانون وحقوق الإنسان بما في ذلك دعم إجراء انتخابات حرة ونزيهة وذات مصداقية.
علاوة على ذلك، فهو يأذن بتقديم المساعدة لبرامج التنمية، ويدعم تخفيف عبء الديون والتمويل المتعدد الأطراف من المؤسسات المالية الدولية شريطة أن يتم استيفاء بعض معايير الإدارة والشفافية المالية خاصة في إدارة الصناعات والموارد الاقتصادية بواسطة أجهزة الأمن والاستخبارات.
وأورد نص القانون المقترح "عند إزالة السودان من قائمة الدول الراعية للإرهاب، يتعاون وزير الخزانة ووزيرة الخارجية مع المؤسسات المالية الدولية وغيرهما من الدائنين الرسميين الثنائيين لدفع الاتفاق من خلال مبادرة الدول الفقيرة المثقلة بالديون (الهيبك) لإعادة هيكلة، أو إعادة جدولة، أو إلغاء الديون السيادية للسودان".
ومع ذلك يقول المشروع انه لا يمكن البدء هذه العملية قبل اتخاذ "خطوات ملموسة لتحسين الشفافية المالية" من جانب حكومة السودان.
وتشمل هذه الإجراءات سيطرة الحكومة على الشؤون المالية والأصول المملوكة لأجهزة الأمن والمخابرات السودانية.
ويتعين ايضا على الحكومة أن تؤكد أن أجهزة الأمن والمخابرات لم تعد تشارك في "الاتجار غير المشروع بالموارد المعدنية، بما في ذلك البترول والذهب" وتحديد الأسهم في جميع الشركات العامة والخاصة التي تحتفظ بها أو تديرها أجهزة الأمن والمخابرات وتحويلها إلى وزارة المالية أو أي كيان مدني عام آخر أنشئ لهذا الغرض.
بالإضافة إلى ذلك، يتعين على الحكومة تطوير "ميزانية شفافة تتضمن جميع النفقات المتعلقة بالأمن والمخابرات" ، كما يؤكد مشروع القانون.
ويجب على الحكومة أن تضع وتنفذ منهجية لاستعادة أصول الدولة والأرباح المحولة إلى حزب المؤتمر الوطني المحظور لعمر البشير أو مسؤوليها.
وخلال فترة حكم النظام الإسلامي التي دامت 30 عامًا، عززت الحكومة من سيطرة الأجهزة الأمنية والجيش على الصناعات الاستراتيجية والتجارة وقطاع الاتصالات.
وورد أن وزارتي المالية والدفاع السودانيين قد وافقتا مؤخراً على نقل جميع الصناعات والشركات غير العسكرية الخاضعة لسيطرة وزارة المالية.
وتحدث المسؤولون السودانيون عن إجراءات لاسترداد الودائع التي قام بها قادة الإسلاميين وشخصيات النظام السابق في البنوك الأجنبية، لكنهم لم يوضحوا أين توجد الأموال المسروق
|
| |
|
|
|
|
|
|
Re: مليار مبروك إزالة اسم السودان من قائمة � (Re: Osman Musa)
|
حباب شيخي أبكر (ابوبكر عباس) دي مداخلتك هنا في البوست دا .. وحات الشي حسن قدر ما قلبتا بوست ود موسي تحت وفوق بطن وضهر .. غلبني .. ما لقيت لي مداخلتك دي تصريفه ... طبعا ماك غلطان واكيد ختيت المداخلة دي في بوست ود موسي بدل بوست حمد لي حكمه تعلمها إنتا ويعلمها ربنا ... ومؤكد غلطانين نحنا الما بنعرف ... دحين يا شيخنا السماح ... ولو تكرمت وفكيت حيرتنا تكون ما قصرت ...
Quote: يا ود الزبير، يا أخي، إتّا زول مستنير، كلام الركابي الناقلو حمد في حق دكتور القراي دا كلام يستحق الادانة في البداية قبل كل شيء، لأنه أولا يدخل في باب حرية الاعتقاد وفيهو تهديد بالقتل، ثانياً الوثيقة الدستورية ألغت حكم الردة يعني كلام غير قانوني. ما بالضرورة القراي يلجا للقانون عشان الناس تقيف معاهو. أتمنى أن لا يجرفك عدم اتفاقك مع الجمهوريين في عدم وقوفك مع خياراتهم التي يدعمها القانون. |
التحية لي ود موسي ونستاذنو في رفع البوست ...
| |
|
|
|
|
|
|
|