أيام الدنيا بى خيرها .. وقبل إغتراب الفنان هاشم ميرغنى لقطر كان أجمل ما فى العيد أن الإذاعة والتلفزيون يحرصان على إستضافته ليغنى بالعود ويبهج أهل السودان بفنه الرفيع
وتعودت فى كل عيد ان أواظب على الإستماع لبعض أغانيه
أهديكم إحدى أجمل أغانيه لديها وقع خاص عنده وعندى شاعرها عزمى أحمد خليل .. رحمهما الله وكل سنة وأنتم طيبين
05-25-2020, 09:38 PM
MOHAMMED ELSHEIKH
MOHAMMED ELSHEIKH
تاريخ التسجيل: 03-21-2008
مجموع المشاركات: 11838
كل عام وأنتم بخير، كما تفضلت هاشم كان يغنى من أجل الفن و(صادق) فى إحساسه. فى مداخلتك يبدو مع السياق كتبت إسمه مقرونا بى (صديق) الغرية أن إسمه ثلاثياً هو (هاشم الصادق ميرغنى)
تحياتى وتقديرى
05-26-2020, 05:28 PM
علي عبدالوهاب عثمان
علي عبدالوهاب عثمان
تاريخ التسجيل: 01-17-2013
مجموع المشاركات: 12483
هاشم ميرغني لا يتكرر ، التلفزيون والاذاعة ظلموه عندو قدرة علي التطريب عالية بعدو قريب قريب اي عبدالعزيز محمد داوؤد و كل اغاني الحقيبة هو مجيد فيها صفوة جمالك وجوهر صدر المحافل قلبي مالو اليوم
وبرضو في زول هناك قولة سلام تبقالو روح هاشم اتخطف سريع
05-27-2020, 05:57 AM
اخلاص عبدالرحمن المشرف
اخلاص عبدالرحمن المشرف
تاريخ التسجيل: 03-04-2014
مجموع المشاركات: 10314
● سلام يا نادر و أنت بحق صاحب إحساس مرهف و نادر . بصراحة《هاشم في العيد سرحتني بعيد شوية، قربت تطفشني من العنوان لولا أنه لنادر.
●جمعتنا بمهندس الديكور/ هاشم ميرغني محطات ترانزيت طويلة طوييية طول ليلك ، مع ود الحاوي . حيث ثنائية الدَّفءُ الإنساي لا-منتاهي الأناقة في كامل بساطته. كان لامن يلاقو الزول في الشارع ساي يوقفوه يعرفوه بأنفسم، و بحركة مسرحية خفيفة الدم. مثلاً ود الحاوي يقلدك من ورا و يغمد ليك عيون و يسألك : حذِّر فزِّر أنا منو . و قبال تبدأ تضايق يفكك و يقول ليكة: ياخ معاك أخوك في الله/ عبد اللطيف ود خِدِر ، من أهلك الرباطاب وارد حي البوسطة - أمدرمان . و قبال تكمل اندهاش تتلفت تلقى التاني معاه طفلين ، يقول ليك شايف ديل أنا جايبم هسة راجعين من الروضة كنا عاملين شمطة مع الأبلة مزعلاهم. قت ليها اسمعي، قسماً عظماً لو ما وريتك حدودك وينة، ما أكون أنا هاشم ود الصادق ميرغني. و بكدا يكون تم التعارف و لا من شاف و لا من دري . كان آخر عهدنا بيه" يوم ودعنا حسنو و لازمنا الشجن " و ذهب فلم و لم يعُد ، في رحلة تشافي روتينية كانت إلى أمريكا.
05-27-2020, 10:21 AM
نادر الفضلى
نادر الفضلى
تاريخ التسجيل: 09-19-2006
مجموع المشاركات: 7022
Quote: هاشم ميرغني لا يتكرر ، التلفزيون والاذاعة ظلموه عندو قدرة علي التطريب عالية بعدو قريب قريب اي عبدالعزيز محمد داوؤد و كل اغاني الحقيبة هو مجيد فيها صفوة جمالك وجوهر صدر المحافل قلبي مالو اليوم
وبرضو في زول هناك قولة سلام تبقالو روح هاشم اتخطف سريع
دكتورة إخلاص أتاريك سميعة غنا من النوع الممتاز إختيارتك للإغانى، وفعلاً هاشم فى أغانى الحقيبة ما بتحصل أما حنجرته الفخيمة وقدراته على التطريب عالية جداً وعبد العزيز أبوداؤود فعلاً حنجرة فريدة وتطريب عالى عند زيارة هاشم ميرغنى لأمريكا أحد معجبيه كان بيسمع شرائطه وأول مرة يشوفو .. قال لى أنا كنت بتخيلك زول طويل أخدر وضخم وبى صلعة .. وصف ليهو أبوداؤد
ما عارف ليه ذكرتينى هاشم فى بدايغته كان مرات خيلانى بيجبوه فى جلسات إستماع رخرافية .. مرة جا وقبل ما يصلحو الجلسة فى الحوش .. كان قاعد فى الديوان .. وبدا يغنى قدامه تربيزة فيها طفاية سجاير معدنية مفتخرة، المسافة بعيدة عن هاشم هو طويل والتربيزة إرتفاعها قصير Coffee Table الفى نص طقم الجلوس .. خالنا المامور رحمة الله ليه كان ما بفوت يسجل أى أغنية لهاشم فرش منديل فوق طفاية السجائر ووضع فوقه المايك .. ورغم دا لامن هاشم بصوته الفخيم الجهورى غنا الطفاية كانت بتهتز أما صوته بتحس وكأنه يملأ أى فراغ فى الغرفة .. الما سمع هاشم بيغنى مباشرة فاتو كتير من متعة الطرب .. وطبعا لامن يغنى بيكون فى سكون تام للحضور بيصيخو السمع تماماً يخيل ليك ما فى زول عاوز حتى يحرك أصبعه عشان ما يعمل شوشرة .. فيلم ونسة جانبية وللا إمرآة أو راجل يتونسوا أو حتى يعاينو لبعض مافى، لأنه الإبداع القدامهم دا يتملكهم وينأسروا له طواعية
أذكر اليوم ذاك كان بدأ يغنى رمية آمنه السمحة لأول مرة .. كانت روعة .. وقبل ما ينتهى منها دخل علينا قريب رحمة الله عليه شفقان قطع علينا الغنا قال يا أخوانا خلاص الجلسة جاهزة فى الحوش والنساوين جو. أنا لحدى هسة زعلان عشان قطع الرمية الجميلة.طبعا هاشم أكلها لكن كان معاقبتو لينا ما غنى الرمية دى مرة تانية فى تلك الأمسية .. لكن ما قصر أطرب وأشجى
رحمة الله عليه.
05-27-2020, 10:25 AM
نادر الفضلى
نادر الفضلى
تاريخ التسجيل: 09-19-2006
مجموع المشاركات: 7022
دي حالة دي يا نادر ؟ تكرش الكبريت وتفوت؟ يا نادر الزول ده ما فنان واحد . الزول ده شلة فنانين وتفانين وألوان ورسومات بديعة في جوفو . وحالتو الفيض الفيه نصو ما طلع . له الرحمة.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة