ف اليوم دا من السنه الفاتت طلعنا من الاعتصام ع الساعه ٣ وشويه كده ف العاده بنطلع قبل الزمن دا بكتير.. كان معاي بندر وارقم وقوقي وامونه ونحن طالعين كان ف ناس قاعده تجي ع القياده.. مشينا بي كوبري الحلفايا نزلنا قوقي ونحن ف صينيه المناره البعد الكوبري جات كميه من البكاسي فيها عسكر لابسين لبس الشرطه المبرقع حسبنا البكاسي كانو كم وتلاتين والبوكس فيه من ٦-٨ عسكري ما شفنا سلاح كانو شايلين عصي ودرقات.. بقينا نتشاور انه نرجع القياده ولا نعمل شنو.. ضربنا لشباب كلمناهم بالبكاسي وعددها وقلنا ليهو اننا حنجي كلامهم انو ما تجو لأنكم ما حتقدرو تخشو ف عربات كتيره دعم سريع وشرطه وغالبا حتتعرضو للاعتقال.. نزلنا امونه وكانت مصره انو لو بقي ف سكه رجعه القياده تجوني.. بعد وصلت البيت زي الساعه ٤ونص ٥ الا اتصل علي أحمد ربيع وقال عاوز شيوعي من الشيوعيين البكونو ف شارع النيل قلت ليهو حاشوف ليك واحد منهم قال لي اتصلي بيهم قولي ليهم انو اتصل عليه كباشي وقال انو القوات الجايه دي حدها كولمبيا وما حتصل حدود الاعتصام فنبه ناس التروس ما يجو عليهم.. ما اتناقشت معاه قلت ليهو حاشوف الشباب واكلمهم قال لي خليهم يكلمو برضو ناس قرفنا لانو التروس بتاعت شارع النيل بكونو ف شيوعيين وناس من قرفنا مع الشباب التانين.. بعد داك قال لي لو انتي ف القياده اطلعي.. اتصلت ع بندر وارقم هم سوا كلمتهم بالحاصل وأنهم يتصلو بالشباب هناك يوروهم الكلام دا بس انا رأيي انو القوه دي جايه لفض الاعتصام ودا كان رأيهم برضو وفعلا اتصلو بيهم وعرفو انو القوات الهناك كتيره وانو الناس الهناك متاهبه ومتوقعه فض الاعتصام وف مواكب جاءت ومواكب ما قدرت تدخل.. و بعدها بشويه حصلت المجزره ولم ينجو منها الا الشهداء فاضت أرواحهم وتركونا بجراح لن تندمل.. يمر عام ع ذكراها ولم نقتص لدم الشهداء وما زالت نتائج لجنه التحقيق ف رحم الغيب.. وما زال المفقودين مفقودين.. وامات الشهداء يتوقن لعداله دماء ابناءهن..
#المجد والخلود للشهداء #والخزي والعار لكل من ساوم وباع #الدم قصاد الدم ما بنقبل الديه تعديل اول: ما قدرت ارد ع كل التعليقات بس الاسئله اغلبها مكرره حارد بتعديلات بالنسبة للتساؤل بتاع انك لية سنة ساكتة بالكلام دا فعليا بعد فض الاعتصام ما كان في اجتماع للتجمع الا بعد فترة واول يوم اتلاقينا في دار التجمع جاء احمد ربيع وذكر انه كباشي غشاه وكذب عليه اتصل عليه بعد القوات دي جات وقال ليهو انو القوه دي جايه لحسم تفلتات ف كولومبيا ونبه الناس الفي شارع النيل يقعدوا ف تروسهم وما يجو عليهم عشان ما يحصل اشتباك فبقت ما قصة سرية بيني وبين احمد ربيع عشان ادسها ولا احكيها الكلام اتذكر هسا في سياق اجترار ذكري المجزرة
05-23-2020, 11:16 AM
عبدالعظيم عثمان
عبدالعظيم عثمان
تاريخ التسجيل: 06-29-2006
مجموع المشاركات: 8399
الكلام الفوق دا كارثي بمعنى الكلمة على المدعو احمد ربيع ان يخرج ويتحدث عن هذا الأمر لأنه إذا صح هذا الكلام.. المدعو أحمد ربيع كان على علم بتوقيت فض الإعتصام ولم يعلن هذا الأمر في حينه للعامة بل إختار أن يوصل الرسالة للشيوعين فقط في أرض الإعتصام
05-23-2020, 11:44 AM
Mutasim Idris
Mutasim Idris
تاريخ التسجيل: 04-03-2019
مجموع المشاركات: 2435
عثمان ميرغني قااااال في ناس من قوي الحرية كانوا في الاجتماع.. عشان كدا تحقيقات نبيل اديب دي ذر رماد في العيون والشارع ما ح ينتظر كتير بعد الكرونا دي.. لجان بري الليلة طلعوا الشارع.. الثورة مستمرة والحساب ولد. العساكر كانوا عاوزين الاعتصام يتفض اولا قبل التوقيع وقوي الحرية عاوزة الكراسي قبل ما يختلفوا ويتفرتق الكيان دا.. الجريمة دي فضايحها ح تبدأ تظهر وفي ناس ماااا ح تنستر.. سلام يا عبدالعظيم..
05-23-2020, 12:31 PM
عبدالعظيم عثمان
عبدالعظيم عثمان
تاريخ التسجيل: 06-29-2006
مجموع المشاركات: 8399
كل شوية الناس حتعرف حجم المصيبة العساكر قتلة ومجرمين لكن ان يكون الشخص الذي وقع على الإتفاق مع العساكر يعلم قبل فض الإعتصام ويختار فقط أن يخبر الشيوعين في أرض الإعتصام ويطلب منهم مغادرة أرض الإعتصام ثم يموت أبناء الشعب السوداني في هذه المجرة التي لن ننساها ما حيينا والله مافي سفالة وحقارة أكثر من هذا (اذا صحت رواية ومضة كمال)
05-23-2020, 01:44 PM
محمد البشرى الخضر
محمد البشرى الخضر
تاريخ التسجيل: 11-14-2006
مجموع المشاركات: 28869
Quote: لكن ان يكون الشخص الذي وقع على الإتفاق مع العساكر يعلم قبل فض الإعتصام ويختار فقط أن يخبر الشيوعين في أرض الإعتصام
الكاتبة ما قالت "وقعّ" على فض الاعتصام دي واحدة و التانية مسألة انو اختار اخبار الشيوعيين فقط جبتها من وين. قد يكون اتصل على آخرين عموما على أحمد ربيع الخروج و التعليق على هذه التصريحات الشي التاني الكاتبة دي تبع السكرتارية الجديدة المنتخبة ولا تبع الخرخروا ؟
05-23-2020, 02:20 PM
جمال ود القوز
جمال ود القوز
تاريخ التسجيل: 01-25-2013
مجموع المشاركات: 5925
معلومة فض الاعتصام يا عظمة كانت متداولة وعرفوها كثير من المعتصمين القوات الأبادت الثوار كانت تاتشرات الدعم السريع ووقفت قريب النص ساعة حتين بعد داك باغتت الثوار بي ضرب نار كثيف بدا بالتزامن مع ضرب نار شارع النيل وتحت الكبري وأغلب المتواجدين عرفوا نية فض الاعتصام البكاسي الاتشافت في صينية ود البخيت المنارة قوات تابعة للشرطة أي نعم شاركت في فض الاعتصام لكن ما كانت مسلحة بي رشاشات كان معاهم عكاكيز وعصي بس القتلوا الثوار يا عظمة قوات الدعم السريع وكانت تاتشراتهم واقفة ديل الأذوا الناس وفتحوا رصاص بكثافة وسط جموع الثوار مافي رصاصة اتفكت وجلت لازم تجي الرصاصة في راس زول أو في بطن زول الطلقة ما بتجلي نهائيا لان مضروبة وسط جموع الناس المكتظة فلازم تصادف ليها زول وتقتلوا المباغتة كانت في بدء اطلاق الرصاص .. وليس في حضور قوات مباغته من بره القوات د ي كانت واقفة مدة نص ساعة .. ثم جاتها اوامر باطلاق النار وبدت طوالي قتل في الثوار لكن كان من المستحسن تشيير المعلومة دي للجميع
05-23-2020, 03:10 PM
عبدالعظيم عثمان
عبدالعظيم عثمان
تاريخ التسجيل: 06-29-2006
مجموع المشاركات: 8399
مع التحية للاحباب حبيبنا جمال .. دي حقائق بالنسبة لي جديدة لو كده يا جمال الأمر واضح وجلي هو الدعم السريع وبدأت اصدق أن هناك مماطلة في اتهام الدعم السريع النائب العام او الحكومة .. لأن أي اتهام للدعم السريع معناه وقوع شرخ امني ومواجهة بين مختلف مكونات الجيش والامن والشرطة
أكيد سوف يكون هناك التفاف حول الموضوع من الحكومة أو النائب وهناك مخابرات دول ومحاور تتحين الفرصة للتدخل وتفكيك الدولة
لو كده ياجمال الجماعة معاهم حق في تسويف والتأخير وتبريد الموضوع لأن الأمر متعلق ببقاء البلد أو الذهاب الى الجحيم ..
يا رب تحفظ هذا الوطن ..
تحياتي عبدالعظيم
شكرا جمال على المعلومات
05-23-2020, 04:22 PM
Arif Nashed
Arif Nashed
تاريخ التسجيل: 05-12-2014
مجموع المشاركات: 12692
عضمة وضيوفك تحياتي. البحصل ده كله تشتيت للكورة والهدف منه توسيع دائرة الاتهام والتأمر. حزب الامة فك خيمته في ساحة الاعتصام قبل المجزرة بيوم إلا يدخله ذلك في دائرة الاتهام.
القول الفيصل في تقرير نبيل أديب...
05-23-2020, 05:04 PM
عبدالعظيم عثمان
عبدالعظيم عثمان
تاريخ التسجيل: 06-29-2006
مجموع المشاركات: 8399
وين طلب من الشيوعيين المغادرة، الشيوعيين واقفين في التروس ( وين كنت إنت واقف )، نبهم قال ليهم هناك قوات بخصوص كولومبيا أعملوا حسابكم، وأكيد الشيوعيين أبلغوا الباقيين من حولهم، يعني الشيوعيين ظلوا موجودين حتى لحظة فض الاعتصام، واقفين في التروس، وطلب من زميلته المغادرة، وهذه يمكن فهمها بالتفكير السوداني البسيط، خلوا البنات يمشوا، قدموا البنات.
05-23-2020, 07:21 PM
عبدالعظيم عثمان
عبدالعظيم عثمان
تاريخ التسجيل: 06-29-2006
مجموع المشاركات: 8399
الموضوع دا عامل ضجة شديدة في الفيس من أمس بين مندهش و مهاجم لتوقيت ومضة ومهاجم لموقف أحمد ربيع وبين شامت وناس ما قلنا ليكم و اتوقع الملايفاتية ح يعملوا بيه حفلة و دلوكة كبيرة ودعم لكذبة التوقيع على فض الاعتصام
زميلة المنبر ريهان الريح كتبت
Quote: المشكلة الجدجد في كلام ومضة واحمد ربيع هي في نصيحته ليها (لو انتي في الاعتصام امرقي) .. يا كافي البلاء احنا قاعدين ماسكين تلفوناتنا وبنشوف في سليمي اسحق عاملة لايف والرصاص هبطرش من فوق راسها وهي بتحمي في روحها وبتوثق ومافي زول قال ليها امرقي.. شايفة بعيوني رامي الشيخ وهو بحاول يلقي ليهو ساتر من الرصاص ويتلفت ينادي في اخوانه واخواته عشان يحتمو بي مستشفي المعلم والرصاص طاخ طراخ في راسه وما قولنا ليهو ارجع بيتكم .. شايفة بعيوني غازي وهو واقف في باب مستشفي رويال كير سد منيع بين العساكر والجرحي وما قولت ليهو ارجع... شوفنا مدني متكلنه وشوفنا جيهان الطاهر في لايف بتصرخ في العساكر و شوفنا ناس جارين وناس واقعين وناس مقبوضين شوفنا لايفات لي ناس ما بنعرفهم لكن من حجم المأساة بقينا قرايب وبعد ده كله كنا بنكتب في الفيسبوك الناس تحمي اعتصامها.. الناس تمشي القيادة تساعد اخوانها.. مافينا زول قال لي زول امرق من القيادة واحمي روحك .. احمد ربيع العرفتو ولاقيتو زمان يختلف تمام عن احمد ربيع الهسة ... انت يا زول حصل ليك شنو أحمد ربيع ؟؟
حزبنا دا ما فيهو كبير على المحاسبة، ولو أحمد ربيع أو غيرو أخطأ في حق الشعب السوداني يتحاسب ذي الترتيب، لكن إنت شخص كذاب بدون أن يرمش لك جفن، لأن الشيوعيون ظلوا وقفين على المتاريس وفي قلب الاعتصام للنهاية، فأين كنت أنت ؟.
05-23-2020, 07:59 PM
محمد البشرى الخضر
محمد البشرى الخضر
تاريخ التسجيل: 11-14-2006
مجموع المشاركات: 28869
Quote: كأول رد فعل..احمد الربيع يكشف لـ(تاسيتي نيوز) تفاصيل اتصاله بومضة كمال الخرطوم: تاسيتي نيوز
في أول رد فعل له کشف القیادي بتجمع المهنیین أحمد الربیع لـ(تاسیتي نیوز) تفاصیل اتصاله بعضو تجمع المهنیین ومضة كمال، وقال: حینما اتصلت بومضة لتخرج من الاعتصام کنت أقصد أن تخرج من کولومبیا هي ومن معها من المعتصمین داخل کولومبیا ولیس من مکان الاعتصام.
ونوه أحمد إلى أن اتصاله بومضة تحديدا جاء بسبب مقابلته لها خلال ذلك الیوم في الاعتصام داخل القیادة وتأكده من الفریق کباشي حینها بعزمهم علی فض کولومبیا، وأضاف: وذلك لأن کباشي اتصل بي بحكم تمثيلي للجنة المیدان داخل الاعتصام.
وكشف الربيع عن أنه أتصل بآخرين داخل لجنة المیدان وطلب منهم إقناع الشیوعيین وشباب حركة أو مجموعة قرفنا بمغادرة کولومبیا إلی داخل مقر الاعتصام، وأضاف: لم أکن اتوقع فض الاعتصام.
وشدد أحمد على اتصاله بالكثيرين بحكم أن ذلك من واجباته ومسؤولياته تجاه المعتصمین.
05-24-2020, 00:35 AM
اخلاص عبدالرحمن المشرف
اخلاص عبدالرحمن المشرف
تاريخ التسجيل: 03-04-2014
مجموع المشاركات: 10314
وقت احمد ربيع كان بقول لي وضة كمال '' إذا كنتي في القيادة أطلعي'' كان أبطال تجمع المهنيين أمثال : د. عمر صالح (لجنة الأطباء المركزية) ، و غازي الريح يتفقدون التروس
التحت دي شهادة د. عمر صالح (سكرتير لجنة أطباء السودان المركزية)
Quote: . في ذكرى الفض ومجزرة الاعتصام ..!
بدأ سلوكيات جديدة في ميدان الاعتصام وقلة درجة الإحساس بالأمان والليلة التي فتحت أعين الناس أكثر على اختراق الميدان أمنياً هي الليلة التي سبقت الفض بيومين او ثلاثة والتي تم فيها عربة تاتشر من الدعم السريع من قبل مجموعة لم يفلح معها أي نصح عن منعها من فكفكة العربة ورفعها في لافتة المعروضات والتي كان معلقاً بها عدد (2) موتر وهراوات وغيرها فكانت ليلة عصيبة جداً خصوصاً بأنها كان مسبوقة بهطول الامطار وانقطاع التيار الكهربائي، ووقتها ايقنا أن الميدان أصبح خارج السيطرة وأن هناك إختراق أمني للاعتصام بعد أن فشلت محاولاتهم الأولى في فضه بالقوة قاموا بادخال عناصرهم الذين بدؤا في عمل سلوكيات تتنافى مع أدب الثورة وسلميتها والتي كانت عنصراً أساسياً ومهماً وراء انتصارها.
فض الاعتصام جاء على مراحل وعبر محاولات عديدة جميعها مهدت لعملية الفض في (29) رمضان ومع كل محاولة كانت النداءات تخرج عبر صفحة تجمع المهنيين السودانيين والصفحات الثوار والثائرات ومع تراكمها وكثرتها خلقت حالة من الاسترخاء فأصبح من يطلقون النداءات بمحاولات الفض أشبه بمحمود والاعتصام هو القرية والنمر هو المجلس العسكري.
بدأ ذلك اليوم بترتيبات كثيرة بشان صلاة العيد في الميدان وكيفية دعم الميدان بملامح العيد، ولكن تواترت الاخبار كما العادة في نهار ذلك اليوم عن محاولات فض الاعتصام، فكان التأهب، خصوصاً وأنه قبل أيام من الفض دخل القيادة حوالي (12) بص سعة (50) راكب ممتلئة تماماً واشيع في الميدان أن هناك اجراءات تسليم وتسلم للحرص القديم الموجود في الميدان من قبل (11) أبريل وكانوا يهتفون هتافاً ثورياً طمأن هواجس الثوار والثائرات بالميدان، ولكن في يوم الفض "كأن الارض انشقت وبلعتهم".
مساء ذلك اليوم كانت هناك حركة مكثفة داخل الخرطوم من قوات الدعم السريع والشرطى وآخرون يرتدون زياً أسوداً، وكنت بصحبة الأستاذ نبيل سليم وعلي فارساب وقد اتفقنا على مراجعة جميع التروس وبدأنا بتروش شارع البلد وكان عدد الثوار قليل جداً وكانت هناك مجموعة متحمسة في انتظار أي اقتحام لكي يتصدوا له، وفي نفس التوقيت كان هناك فيسبوك بث مباشر من husam habour وجلال محمداني من شارع المك نمر عكس العدد الكبير الذي ينفي أي نية لفض منطقة كولومبيا بل المستهدف الاعتصام ككل قمنا بالتواصل مع البقية بشأن بقية التروس في شارع النيل والجامعة، الكلينك، صينية بري وكوبر، الجامعة والجمهورية، كانت الأعداد في الميدان ضعيفة بغير المعتاد ومع بزوغ الفجر دخلت عربة هايس من اتجاه السيد عبدالرحمن لاستطلاع الأوضاع ثم عادت وخرجت من نفس الطريق واعترض طريقها الثوار وكان سائقها متوتراً ويتصبب عرقاً الطقس المعتدل في صبح ذلك اليوم، بعد أن اخلو سبيله بدقيقة دخلت عربات الدعم السريع محملة بالدوشكات والمدفعية المتوسطة، ثم بعدها دخلت عربات تويوتا بكبينة واحدة 5 شنكل وهي تحمل أفراد دعم سريع يرتدون زي مكافحة الشغب، وهنا بدأنا بمراجعة بقية التروس والشمس قيد الشروق وأرسلت النداءات عبر قروب إعلام التجمع بما حدث وكنا نقف قبالة البحرية والجوية وكان من ضمن الموجودين ghazi elrayah واتجه نحو مراجعة تروس الجمهورية وذهبنا نحو تروس الجامعة وكبري النيل الأزرق ومع وصولنا للتدريب المهني ودخولنا على النفق بدأ إطلاق الرصاص الحي وكانت هناك عدد من الإصابات التي يتم نقلها لعيادة التدريب المهني، انسحبنا في إتجاه الفرقة السابعة مشاة والتي كان هناك فردان منها متواجدون بالخارج ومع دخول القوات قاموا بالانسحاب لداخل الفرقة وعندما لجأنا للفرقة تم قفل الابواب بالطبلة والجنزير وبعدها قاموا باطلاق الكلاب البوليسية لطردنا، وفي طريقنا للخروج إتجاه صينية بري قمنا بتثبيت عدد كبير من الشباب المتجهين نحو إطلاق الرصاص في بسالة نادرة منهم، في الطريق انتبهت لحركة أفراد الدعم السريع الموجودين في عمارة "القناصة" وهم يحاولون توجيه بنادقهم نحونا ولكن كان هناك من يقوم بايقافهم بعد ارتكازهم لأن الطلقة التي ستخطئونا ستضرب اخوانهم الموجودين في اتجاه البحرية والبرية وغيرها من إدارة القوات المسلحة، فلم تكن شفقة ً علينا ولكن هذا هو التحليل المنطقي، بعدها ظهرت القوات التي ترتدي الزي الأسود إتجاه صينية بري وبدؤا في تمزيق الخيام فقد كانوا يحملونا أنواعاً مختلفة من الأسلحة ومن بينها "سكاكين" لم تكن الإصابات كثيرة في هذا الإتجاه وبدأنا نتجمع من جديد جنوب شرق صينية بري لكن دون جدوى.
عدد أفراد الجيش الذين كانوا يتواجدون في ذلك اليوم لا يتجاوزن الثلاثون فرداً، لن نتعافى من هذا الجرح وسيظل فقدنا جلل لا يضاهيه فقد.
رحم الله الشهداء وعافى المصابين وأعاد المفقودين ..
05-24-2020, 09:13 AM
علاء سيداحمد
علاء سيداحمد
تاريخ التسجيل: 03-28-2013
مجموع المشاركات: 17162
المهم جداً الاستاذ عثمان ميرغنى هل قابل لجنة اديب وقام بالادلاء بشهادته حسب ما جاء فى اللقاء ادناه فانه يظهر انك تملك معلومات عن فض الاعتصام : " يا عثمان لا تنسى ابدا "
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة