في صنف تالت يا نصري ناس الوليد مادبو واشباهه الربطو كرفتاتهم وحرسوا التلفون راجين مكالمة تعيينهم في الحكومة الانتقالية ولامن جلّت انطلقت فيهم ناريّة نيرانها ما بترحم ههههه
مادبو ده فاقع مرارتى يا محمد اخير منه الكيزان و قدامى محاربى القحاته ههههه
فى ناس كتار كانوا مرشحين لحكومة حمدوك و لم يتم اختيارهم ؛ مع ذلك لم ينقلبوا على الحكومة امثال الدكتور معز بخيت ، كان من اقرب المرشحين لوزارة الصحة ؛ بالرغم من عدم اختياره الا انه احتفظ بموقف معتدل من الحكومة .
Quote: اكتر زول اكس قحاتى Exقحاتى عضو المنبر معتصم ادريس جننى جن فى تويتر
هههههه قلت لي ورمااااان صابر..
Quote: ما يجمعنا مع قدامى القحاتة ، كراهية الكيزان عشان كده البيناتنا عامرة
يلا بوست نتونس فيه.. يا النصري في نص التسعينات واقفين نحن مجموعة قدام سفارة الكيزان في واشنطون فيهم ثلاثة من اعضاء المنبر سعادة السفير نورالدين منان والاستاذ الخردة نصرالدين وزوجاتهم واطفالهم الصغار وكان برضو معاناعبدالله مولانا (abdallah abdallah). لما جيت واشنطون لقيت الناس ديل وقفاتهم راتبة بمناسبة وغير مناسبة طوالي المظاهرات مدورة واللافتات موجودة في ضهر عربياتهم. صيف خريف شتاء بجليده..لما يصل العدد عشرين كانوا بحسوا بفخر وانجاز. المخذّلين كانوا علي قفا من يشيل..كانوا ما بجونا في المظاهرات خوف من تصويرهم لكن كانوا بقدموا لجوء ومنان كان بياخد من وقته وزمنه ويساعد.او يجوا يتصوروا فيها و يرفقوا الصور دعم لقصتهم.. المهم.. في مساء نفس اليوم اتذكر كنا في شقة واحد من اصاحبنا وكان زارهم المرحوم السفير بكار. ومع الونسة و حماس طغي جات كفكرة اقتحام السفارة وانا طبعا بالحماس والعمر اتبنيتها وطوااالي قاليك عاوز اتصدر الفكرة يقوم يجي مولانا زميل البورد عبدالاله زمراوي (كان بتكلم في التلفون) يعرض في نص الشقة ويديني محاضرة في القانون الدولي وغير الدولي ومستقبلي مصيري (هائج) ووو هههههههههه. لو خلاني كان خشيت التاريخ ياااخ وبقيت الليلة حاجة في الحكومة حقت الاصحاب والمحاصصات دي وشاورني في الولاة ههههههه. كراهية الكيزان غير الشخصي واللي عملوه في الراسمالية الوطنية وقتها وتدميرهم لاسماء كانت عمود فقر الاقتصاد السوداني كهاشم هجو ومجموعة شركاته الدالي والمزموم كان شخصي برضو زي اي حر نال سخطهم بعدم موالاته ليهم. الكلام كتيييير يا النصري يا اخوي لكن تعال نسالك انت زااتك مش جبت لينا نمضي مية الف امضاء انه الجنجويد منظمة ارهابية؟ ماااااالك ما جبت ليها تاني سيرة هههه. هسي نقول شنو للشهداء ياااخ دا رئيس الثورة حقتكم واقف جمب الخرق بالرصاص اجسادكم وفي النيل رمامكم الليلة شريك.. المبادئ لا تتجزأ.. علي قولة تبارك. لو ناسكم انستروا ياهو المراد ولو انفنسوا زي قزم الثورة واقصر هاماتها تعالوا اركبوا معانا بس بالباب الوراء المرة دي ح يكون.. الشوارع لاااا تخون..
فعلا انا كنت متحمس لادانة و حظر الجنجويد المعروفين باسم الدلع دعم سريع ؛ و جمعت مئات التوقيعات لاعتبارهم منظمة إرهابية.
لكن يا قحاتى قديم ؛ الفرق بيننا و بينكم ، نحن نحكم العقل و لا نستجيب للانفعال.
الكلاب الجنجويد ده ، افضل خيار متاح هو التعامل معهم المثل الانجليزى بقول If you can't beat them , join them
طبعا المثل غير دقيق لوصف العلاقة مع الجنجويد.
الحاجة التانية و مستغرب منها جدا ، انه ضحايا الجنجويد ديل (على مستوى القيادة) ابتداء من الحلو لعبدالواحد و مناوى و جبريل و عرمان ، كلهم و بدون استثناء ماعندهم اى ضغينة من الجنجويد ؛ بالعكس معجبين بيهم جدا و يدهنسوا ليهم . حاجة عجيبة جدا خاصة من المدعو مناوى ده ! رافع لى الضغط.
نرجع للجنجويد والعمل معهم . يا معتصم ؛ فى السياسة تحتاج أحيانا تتخذ قرارات قاسية لانها ببساطة افضل الخيارات .
من الجنون ندخل فى مواجهة عسكرية مع البهائم ديل و من العبط ازاحتهم من المشهد السياسي.
اقل الخسائر تشتغل معهم بحذر ، تشيل افضل ما عندهم ؛ و ترمى فى الكوشه أسوأ ما عندهم.
اعتقد القحاته الحاليين كانوا فى قمة النضوج السياسى عندما قرروا العمل مع المجرمين ديل ، على الاقل لغاية البلد تطلع من عنق الزجاجة و بعد داك ظووووووووووط لابتين ليهم المجارمه.
خليك عاقل يا معتصم و ارجع قحاتى الاصل هههه
04-20-2020, 02:42 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 32993
Quote: اقل الخسائر تشتغل معهم بحذر ، تشيل افضل ما عندهم ؛ و ترمى فى الكوشه أسوأ ما عندهم.
في سلم السوء الانساني الكيزان بجو في المرتبة قبل الاخيرة من الجنجويد. بتسمي شنو (مخاليق) بشتغلوا الشغل القذر لاسوء من ربنا خلق من البشر؟ كنت محتفظ لرئيس الوزراء بحق اخلاقي انه رئيس الحكومة رغما عن سلحفائية تفكيكه دولة الكفر ومحاكمة مغتصبينا جسد وثروة لحدي ما يوم رقد وانبطــــــــح لفريق الخلا الامي وحضر تخريج دفعة تااامنة من اسوأ مخاليق الله. من اليوم داك عرفته قزم واقصر هامات الثورة. كان ياااااخ يجيب منيس الكوز علي الاقل نسيجه قريب منهم. الجنجويدي يباع راس ويستعمل في حروب او قمع عزل وقتل وسحل واغتصاب لابرياء. في السياسة يا النصري كمان في اخلاق يااخ. نعم اتفق مع عدويّ اللي يمتلك قضية وعنده ضمير. خموا وصروا.. قال رئيس الالية العليا لانقاذ الاقتصاد كمان.. هههههههههه
04-20-2020, 04:43 AM
Mutasim Idris Mutasim Idris
تاريخ التسجيل: 04-03-2019
مجموع المشاركات: 2435
لو قابلك جنجويدي بس اتعوز ساااي يا اخوي. حسنات تلقي.
Quote: حسى يا معتصم اخير ليك ولا الكيزان و لا نوع الجنجويدى الفوق ده ههههه؟
نحن ناسكم وان اختلفت الدروب يالنصري. عان دا يا النصري واحد من اثنين عشان ما اخش في غلاط اما جنجويدي من اللي حضر قزم الثورة واقصرها قامة تخريجهم في يوم انبطاحه الكبير او قد يكون كمان واحد من الجيش اللي ما حمي شعب ولا حرر ارض واخرج من رحمه التبيعة دي بدون جني في ليلة رقادهم في الخلاء ايام دكّهم قري وحرق مخيمات العزّل.. يقدر زول يقول ديل حقننا هسي ولة خلاص البيعة تمت و السعر انقبض والزبالة دا فطس. في كل الاحوال ندعوا ليه انه الاان يسأل. عارفه ما بمثلك.
الجنجويد ديل خازوق ركبو فينا بشه ، تماما مثل خازوق الحظر. لا عندنا فيهو يد او كراع . خلافنا معاكم فى كيفية التعامل مع الخازوق ده !! الاثنين متفقين انهم اشرار مجرمين قتلة سفلة اولاد لزينا .. متفقين معاكم فى كل ده ؛ خلافنا هو كيف نتعامل مع هذا الشيطان الملعون !
انتو رايكم ندخل معاهم قى مواجهة ؛ يموت من يموت و يعيش من يعيش .
انت نفسك اعترفت انهم العن و أسوأ من الكيزان فى ميزان السلم الإنسانى، كيف تريد من شعب اعزل يحارب هؤلاء البهائم الذين لا يعرفون رحمة و لا قوانين حرب وسلام ؟ بالمنطق البسيط ؛ كيف تقبل ان نواجههم و نحن شعب اعزل و هم مدججين بالسلاح والروح الحيوانية المتعطشه للدماء ؟ مافى منطق . ما تنسى برضه ان حالة البلد لا تسمح بمواجهة هؤلاء السفله ؛ الحكمة تستدعى مهادنتهم حتى يقوى عود البلد و بعد داك ظووووووووط
العزيز بريمة سلامات.. في ظل (التناغم) الحاصل بين رئيس الحكومة دا ورئيسه في لجنة آلية انقاذ الاقتصاد وتسلمه ملف السلام والحوار مع حركات (الكفاح) المسلح بالاضافة لادواره في نيابة المجلس السيادي السيد حميدتي.. هل تفتكر يا بريمة انه البشير قلل من امكانياته الفكرية والتنظيرية ولم يسمح ليه بلعب دور اكبر في الانقاذ وحصره بس في دور اقل من قامته وقدراته وما بشبه روي وفهمه وفكره وامكانياته وتصوره لتطوير السودان ودفع عجلات السلام اولا وبالتالي التنمية؟؟ يعني كان اطال امد الانقاذ ولة فعلا انحاز للثورة واهله كما اشيع. لانه ببساطه طالما استطاع حمدوك ومن خلفه حاضنته قوي الحرية في تسليم كل الملفات دي لحميدتي وادراكهم لقدراته في فترة وجيزة كان البشير والانقاذيين اولي بالمعروف لانه ربيبهم وخريج مدارسهم. بقول يعني. برضو كمان شايف سعيه الي بناء دور لمليشيته دي هل دا (يقرأ) حق مكتسب لدوره في الثورة وبالتالي بداية لتغيير من الجيش السوداني المترهل اللي فقد شرعية حفظه لارضه وحماية عرضه وتاريخه الانقلابي منذ ان تم تكوينه بعد الاستقلال ام تغيير الصورة النمطية للجيوش في العالم التالت الي مايشبه مليشيا الجنجويد (Mobile). مع اضافة او دمج بعض الاسلحة كالطيران مثلا ليكمل صورة مغايرة وجديدة لحال الجيوش دي وقدرتها حماية وحفظ مافي مقدورها بدون تطاول (امريكا وروسيا دنا عذابهم). لانه نحن كمان علاقاتنا مع دول الجوار في افضل حالاتها وح تبقي تحت رعاية (المحور) خاصة بعد دخولنا حلف البحر الاحمر الجديد في مطلع السنة. يعني محميين من اربابنا الجدد هههههههه. قلنا نحاورك يا بريمة.. تحياتي..
04-21-2020, 03:46 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 32993
الأخ معتصم، شكراً علي فتح نافذة للحوار .. لكني ح أحبطك، أنا ليس لدي أي شيئ أقوله لك .. بالجد .. أنا لا أري أن هناك مساحة للحوار بينى وبينك .. أسلوبك وأسلوب النصري أسلوب إقصائي .. لا يحتمل رأي أخر .. يصبح مضيعة لوقتكم ووقتي أن نتحاور حوار طرشان ..
وشكراً بريمة
04-21-2020, 04:47 AM
Mutasim Idris Mutasim Idris
تاريخ التسجيل: 04-03-2019
مجموع المشاركات: 2435
الاخ بريمة.. تحياتي.. آسف جدا لو أنت حسيت انه طرحي (إقصائي).. ما عارف احبط ليه لكن اكيد مقدر ليك جدااا ما عندك شئ تقوله.. يبقي الود بينا..
Quote: لكني ح أحبطك، أنا ليس لدي أي شيئ أقوله لك .. بالجد .. أنا لا أري أن هناك مساحة للحوار بينى وبينك .. أسلوبك وأسلوب النصري أسلوب إقصائي .. لا يحتمل رأي أخر ..
بالمناسبة يا معتصم والنصري، أنا ليس لدي ناقة ولا بعير فيما يحصل في السودان .. قربت 30 سنة غربة .. أنا ما لم يجعبنى لغتكم .. في الإساءة المباشرة والعنصرية .. لزول اخترتموه ..
تفسيري الوحيد لسلوكم .. هو فقط عنصرية .. ما بتقولوا نفس الشيئ في البرهان ليه؟ أذهبوا بوست كاتبه من أبناء الغرب: الدومة حنظل .. بخصوص عثمان ذو نون .. بغض النظر عما قاله أو رفض الناس له .. ما كان في داعي الناس تسيئ للأخ الدومة.
نفس الشيئ هنا ..
بريمة
04-22-2020, 06:16 AM
Hamid Elsawi Hamid Elsawi
تاريخ التسجيل: 09-22-2005
مجموع المشاركات: 3450
عودة يا نصري للموضوع عندي كلام كنت عايز اكتبه لكن كان نسيت ولا انشغلت ما عارف انت ما تقول قحّاتي بمعنى ولاءك للحرية و التغيير كتحالف و قيادات و شخصيات و احزاب و غيرها ولاءك للميثاق نفسه و بنوده و أهدافه ما تحقق منها وما تعثر وما زال ينتظر تحالف الحرية و التغير يضم الوان طيف شتى و على بعضها تحفظات كبيرة سلوك ومطامع و تاريخ بل و التآمر العديل دا على الحلفاء من بعد 11 ابريل و انجاز البند الاول في الميثاق رسميا فقد التحالف واحد من أهم اسباب قوته في الفترة الماضية و هي وحدة الهدف و العمل لأجله, الان لكثير من اعضاء التحالف اهداف ذاتية وللأسف بعضها يتعارض مع الاهداف الرئيسة عموما دي السياسة كدا و الديمقراطية كدا الحرية و التغيير ليس حزبا شموليا يلغي حرية الاختلاف داخله عشان كدا كلنا نقول مع ميثاق الحرية و التغيير و نفتخر, بعد داك كل حزب بي طريقته وبرنامجه
04-22-2020, 07:32 AM
Mutasim Idris Mutasim Idris
تاريخ التسجيل: 04-03-2019
مجموع المشاركات: 2435
بريمة ازيك.. شفت المستنقع دا انا مااااا بتجرجر ليك فيه ابدااا. لو الحقائق الجبتها ليك هنا عن المليشيا اللي تاريخها لا عاوز نضارة لا (نضارة) يعتبر اساءة ليهم صدقني أفتخر.. ولو برضو كلامي عن لحم الراس (المعفن) دا من كل نواحي البلد يعتبر عنصرية اعتبرني انا متعنصر علي السودانيين بني جنسي كوووولهم. .وأعتز. انت الكلمة دي حائمة ليك في راسك ساااي وتشيل وتلصق فيها محل ما يقابلك.. وكل اناء بما فيه ينضح.
Quote: تفسيري الوحيد لسلوكم .. هو فقط عنصرية .. ما بتقولوا نفس الشيئ في البرهان ليه؟ أذهبوا بوست كاتبه من أبناء الغرب: الدومة حنظل .. بخصوص عثمان ذو نون .. بغض النظر عما قاله أو رفض الناس له .. ما كان في داعي الناس تسيئ للأخ الدومة.
04-22-2020, 07:50 AM
Mutasim Idris Mutasim Idris
تاريخ التسجيل: 04-03-2019
مجموع المشاركات: 2435
Quote: تحالف الحرية و التغير يضم الوان طيف شتى و على بعضها تحفظات كبيرة سلوك ومطامع و تاريخ بل و التآمر العديل دا على الحلفاء
يعني فعلا كلامنا انه الثورة اتسرقت. التآمر دا مش ممكن نقول عليهم خونة؟؟ عارفين في خيانة حاصلة لكن ما عارفين من منو بدليل الاهداف اتأخرت.. يا يقولوا منو المتآمرين ديل يا كل المكون دا شريييييك في الخيانة. بعدين الحلفاء منو؟
Quote: من بعد 11 ابريل و انجاز البند الاول في الميثاق رسميا فقد التحالف واحد من أهم اسباب قوته في الفترة الماضية و هي وحدة الهدف و العمل لأجله, الان لكثير من اعضاء التحالف اهداف ذاتية وللأسف بعضها يتعارض مع الاهداف الرئيسة
يعني خلو ميثاقهم اللي ساقوا بيه الناس كضب ودجل لحدي ما ركبوا وشاركوا العسكر وخلوا الشارع يبكي شهداءه.. ديل منتظرين يحققوا حاجة؟ يعني نقول علي الثورة الفاااااتحة. والحاصل دا مسرحية ساااي بطلها الممثل حمدوك طالما هو بنفذ في اهداف المتآمرين ديل.
Quote: عشان كدا كلنا نقول مع ميثاق الحرية و التغيير و نفتخر, بعد داك كل حزب بي طريقته وبرنامجه
مش من حق الشارع علي المكون دا يعرف الحقيقة منو اللي بعملوا علي عرقلة اهدافه اللي طلع ومات واغتصب وحرق واترمي في النيل واتجمد شهور في التلاجات ومفقودين ما معروفين لسة وين؟. قلنا حمدوك يمشي كفاه تمثيل يخلينا نعرف منو المتآمر علي الثورة واهدافها أو يبقي يمشي الكوشة معاهم.
04-22-2020, 09:29 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
هلا ود ادريس اولا لا اتفق مع عبارة سرقة الثورة دي أبدا نعم هناك عراقيل شي متعمد وشي فرضته ظروف لكن لا اوافق على قولة سرقة حتى لو كانت الامور مشت كما نشتهي ونلنا كامل المدنية برضو الناس كانت ح تختلف على تفاصيل و على اهداف وعلى تفاسير وزوايا نظر بدون دليل لا استطيع ان اتهم شخص او حزب بالتآمر أو اصفه بالخيانة - ولا احد يمتلك الحقيقة المطلقة, حتى ما أراه خيانة من زاويتي قد يراه غيري و شريكي في الثورة و رفيقي في النضال و حليفي بصورة أخرى طبعا لا اختلاف في الثوابت نجي لكلامك بشكل عام, تذكر لمّا سألتك عن الحل وجهة نظرك كانت تصفير العداد و الرجوع بعقارب الساعة ليوم تلتين يونيو, يعني العودة للمواكب و التتريس و نضال الشوارع و كذلك العودة للبنبان و الاعتقال وربما الرصاص لا قدر الله! غيرك ممكن اشوف في كلامك دا خيانة! ايوة الخيانة الواحدة دي ما وجهات نظر بقى, وبيع لدماء الشهداء غيرك يرى ان الوسيلة الصحيحة لرد حق الشهداء و حفظ دماء الاحياء هي السير بسفينة المدنية رغم العراقيل و الابحار بها بحذر حتى عبور الفترة الانتقالية وحينها تتحقق المدنية الكاملة التي ترد الحقوق دا الفرق بين وجهتي النظر و الذي يجب ان يظل مجرد اختلاف في وجهات النظر ولا يصل للتخوين و الحكم على الآخرين بالمجانية دي
Quote: يا بريمة انت زول خيالى (على قولة واحد اخونا) !! دومة شنو البقرا ليه ، لا ادخل بوستاته ابدا ، هو فى نظرى من المملين (وهم كثر فى المنبر)
وبالطبع أي غرابي ممل .. بريمة ممل، كبر ممل، الدومة ممل .. والقائمة تطول .. فقدنا كل أبناء الغرب .. ما عدا قلة قليلة مستحملة هذا الوضع الشاذ .. شيئ نبذ ظاهر ومستتر ..
شفت نحن القلة من أبناء الغرب ديل عاملين ليكم كاروشة .. عارف ليه لأننا نمتلك ثقافة وتراث ونظرة للحياة مغايرة .. ويصعب عليكم تصور شيئ غير ما هو موجود في حظيرة الخرطوم البشرية السمجة .. السودان أرهب وأجمل بكثير مما تتصورون .. ح نقلع منكم أي حاجة في الانتخابات القادمة .. وح تشوفوا ..
كثيرون جداً كانوا مواظبين علي المنبر من أبناء الغرب ذهبوا بسبب النظرة الإقصائية .. إقصاء من ناس يعتبروا طليعة المجتمع. ما ح يجوا راجعين أخذوا في خاطرهم ومشوا .. كلامي دا ما تعتبروا لوم .. أبداً .. دا الواقع .. ونحن عايزين نؤثر فيه .. نخرجكم من الظلمات العايشين فيها ناس الخرطوم .. أنا زوجتي أم درمانية .. وعندي منزل في أم درمان .. ودرست وتخرجت في جامعة الخرطوم .. عشان كده عارف سركم ونجواكم .. وبعافر معاكم لعلي وعسي .. ح تفقدوا حاجة إسمها وطن أسمه السودان .. إن لم ترتقوا بوعيكم السياسي لمقام الوطن ..
يا أخ تبكوا علي الماتوا في فض الأعتصام .. ديل 80 في المية منهم هامش .. لكن لم تبكوا علي الملايين الماتت في عقر ديارهم لأنهم بعدين منكم؟ .. و دار ما دخلك شر ..!!
يا النصري أخوي أرسي وأنظر للمسألة بعين الأخر .. 37 سنة أولاد النوبة في الكراكير .. ناس ولدوهم في الكراكير تزوجوا وخلفوا في الكراكير .. عايزين يا ناس قحت تجييبوا ليهم والي من الكلاكلة .. مولود ومتربي في الكلاكله ..؟؟ وهم يحاربوا ويموتوا 37 سنة .. ولا بواكي لهم ..
بريمة
04-22-2020, 04:26 PM
Mutasim Idris Mutasim Idris
تاريخ التسجيل: 04-03-2019
مجموع المشاركات: 2435
ودالبشري كيفك.. زي ما قلت كل زول يشوفها من زواية نظره.. انا بالنسبة لي قوي الحرية لما قالت ما ح تشارك في (الانتقالية) وعينت حمدوك علي جهازها التنفذي يعين تيم عمله ويباشر في تنفيذ الميثاق بتاعهم من خلال الوثيقة الدستورية. عينت ممثليها في السيادي (المجلسين تكنوقراط) فهمنا انهم ح ينتبهوا لقواعدهم ويرجعوا لمؤتمراتهم الحزبية ويبدأوا في مشروع تجهيزهم للانتخابات بتقديم برامجهم لشارع تماما يجهلهم. لحدي هنا كويسين.. ترجع القوي دي و(تتفق) كوووولها علي تأجيل التشريعي والولاة اللي مفروووووض برضو يكونوا كولهم تكنوقراط هنا بدأت الريحة تفوح و(الاطماع) تبين واللولوة تبدأ ومعاها اتعطلت كل شئ من محاكمات رموز النظام الي تفكيك دولتهم ولجنة التحقيق في فض الاعتصام (بالوثيقة) وبالتالي عمل الحكومة المعينة واتفاقمت الازمات.. هنا ظهر الطلس بتاع تبرأت الجنجويد من مجزرة القيادة العامة بتمثيلية هيئة العمليات لتمهيد الطريق لفريق الخلا في مشوار تمكينه و تبعها تمثيلية اغتيال حمدوك اللي قاااالوا ال اف بي أي حقق فيها ونتائجها ما طلعت ولا ح تطلع طبعا, واخيرا حملة القومة لإلهاء الشارع وعودته بعد تململ يصطف وراء حمدوك اللي هم كووولهم مدارين عوارتهم خلفوا. دا لو ما سرقة ثورة نقول طب عدييييل يا قول النكتة.. يعينوا ولاتهم حسب شنو ما معروف وكيف ح يتفقوا الله اعلم وكذلك ممثليهم في التشريعي وكدا الثورة تبقي حقتهم كلها علي داير الاطماع والتآمر والخيانة.. نجي لكلامي الزمان.. يا ودالبشري قد تكون ما فهمت انا قصدت شنو بالعودة الي حدود 30 يونيو.. انا قصدت بعودة الكورة تاااني لملعب قوي التغيير لما قالوا مواكب شهداء الشارع سلمها ليهم مليونيييييييية هرش بيها العسكر لمن هم زاااتم ما صدقوا. بإستقالة حكومة حمدوك او حتي مجرد تلويحه بيها ح يعني تعبئة الشارع تااااني ضد العسكر و بإعتبارهم المعطلين تحقيق انجازات الثورة من جهة وح يسمح للقوي دي بإعادة اولوياتها وإبعاد المخذّلين المتآمرين سواءا كانوا احزاب او حركات وفضحهم ونفض الغبار عن ميثاقهم اللي نسوهو واهملوه. تصدق عندي امل في قوي التغيير و لسة عندي انهم يفوقوا ويعقلوا ويعودوا لوعيهم لانه التاريخ لن يرحم والجيل دا زي ما عصف بالكيزان قاااادر علي محوهم , و هم اساسا مكتوبين بقلم رصاص. لو فاكرين انه قسمة الولاة ح يساعدهم مع التشريعي علي تغييب الشارع فهم واهمين لانه الجيل دا اوعي واشرس وقادر علي التغيير متي ما اراد رغم صبره علي الازمات الان وتحمله الاخفاق. البمبان والرصاص والاعتقالات شغالة يا ود البشري لحدي آخر موكب طلع من الثوار لتسليم مذكرة قيام التشريعي و تعيين الولاة لحمدوك اللي قااااال ح يكون لجنة هههههه. غايتو يا ودالبشري الحقيقة الوحيدة المتفقين عليها انه لا الكيزان ليهم عودة تاني ولو اتعلقوا بأستار الكعبة ولا فريق الخلا ح يحكم ولو لمعوه ذهبا,, ههههه تحياتي.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد البشرى الخضر
Mutasim Idris
Biraima M Adam
Hamid Elsawi
فيس بوك
تويتر
انستقرام
يوتيوب
بنتيريست