رسالة الثوّار للمخذلّين

Quote: زعلان وانت شايف الكيزان رتبو نفسهم وبقوا يطلعوا مسيرات وعايزين اعتصام؟ كنت فرحان وانت شايف نفسك الثائر الوحيد وشغال تخون في رفاق نضالك الصمدو 30 سنة لا اغرتهم مناصب ولا اشتروهم بقروش ولا كسرتهم معتقلات وتعذيب؟ مشيت ورا خط الكيزان والامنجية وهم بكسروا في تجمع المهنيين ولجان المقاومة والحرية والتغيير وشابكنهم قحاته ،قحاطة، بقر حول حمدوك، عمبلوك، فشلوك، السكران عدو الدين. ما خطر على بالك انو الحريه والتغيير الشابكهم قحاطه ديل ياهم لجنة اطباء السودان جيشنا الابيض وشبكة الصحفيين ولجنة المعلمين ولجنة الصيادلة والمختبرات والمهندسين والمصرفيين واحزاب وطنية ومنظمات مجتمع مدني ..الخ يطلع ليك كوز مستتر لايف يشبكك ما دايرين احزاب وهو تربية حركة اسلامية على اساس انها كانت رابطة معجبي الفنان عمر البشير عايز تنجز اهداف ثورتك بالتشكيك والتخوين والهدم لكل ثائر لانو اختلف معاك في وجه نظر ولا فكرة ولا خط سياسي؟ عايز تفصل لجان المقاومة من تجمع المهنيين من الحريه والتغيير وتكسر المدنيين وتقوي العسكر عشان يحققوا اهداف الثورة ويجيبوا حق الشهداء؟ في مسيرات الزواحف دي سمعت بي كوز بهتف بسقوط برهان ولا حميدتي ولا مشكلتهم حمدوك والحريه والتغيير (القحاتة)؟ عايز تنتصر ببث الاحباط وروح اليأس في ثورة شبابها فيهم الكان بضحك وتاتشرات كلاب الامن وبكاسي كلاب المؤتمر الوطني مطارداه وفيهم الثائر الاستشهد عاصر على جرحه ومبتسم زي الشهيد عمر عثمان؟ كنت متخيل انو حزب عقائدي حاكم 30 سنة مسيطر على مفاصل الامن والاقتصاد والاعلام في البلد ولسه مسيطر على كل ولاية وكل محلية حا يتخفي من الوجود بمجرد سقوط رئيسة وحكومته الاتحادية؟ ما عارف الكيزان مسيطرين الولايات والمحليات وبتمول فيهم حتى الان ليه؟ كنت متخيل حكومة بي امكانية معارضة حا تنجح في شهور تسيطر على البلد وتنضفها من الكيزان البعارضو فيها بي امكانية دولة؟ ما قدرت تفرق بين النقد البخدم الثورة والهدم والتفتيت الخدمت بيه الكيزان؟ فرحان وانت بتعلن فشل حكومة من 20 وزير وعارف انها ماشة بدون حكومات ولائية؟ ما سألت نفسك ليه فترة انتقالية 3 سنوات مقابل 30 سنة كيزان؟ الكيزان حا يتبلوا لانو دي ثورة ما لعب لكن تأكد انك كنت بتساعد فيهم لانك عايز تغير وضع 30 سنة بي 20 وزير اتحادي وفي 6 شهور بدون تحقيق سلام وتشكيل حكومات ولائية. اسهل طريقة لتفتيت الثورات استعجال تحقيق المطالب والكيزان اشتغلوا على الحته دي لانو املهم الوحيد الناس تنسى انو دي فترة انتقالية عمرها 3 سنوات مخصصة لبلهم ويحسو بالاحباط.

Quote: ههه معتصم اوعى تكون اتحسست من "مخذّلين" دي

Quote: ما اخذّل حميدتي عاد..؟ دفع ستة مليون لشركة العلاقات العامة تجمل صورته , بس زولنا (قزم الثورة) احتفل معاه بتخريج جنجويده وعمله رئيس الآلية الاقتصادية العليا ههه. عشان مؤتمر المانحين يجي يدي (أُمي) معروف عندهم بانه مجرم حرب ملايين . ههههههه. قشة ما تعتر ليكم انتو الما مخذّلين.. بعدين هو (قزم الثورة واقصر هاماتها) فضل ليه شنو بعد ما قلعوا منه كل شئ بالمصفوفة وأهدي حميدتي الباقي؟.. سفر وسياحة وسلامات وترحابات.. مش..