الوثيقة الدستورية رغما عن اجحافها واعطابها الا إنها فصّلت ووضحت دور الشريكين العسكري والمدني دون تداخل كبير بين المجالس وكنا في انتظار اكتمال هيكل التشريعي. المصفوفة عبارة عن دغمسة وتداخل صلاحيات بين المكون العسكري والمدني والمجالس وقوي الحرية والتغيير. ارح.. نحاول نقرأ المصفوفة.
04-12-2020, 05:24 AM
Mutasim Idris Mutasim Idris
تاريخ التسجيل: 04-03-2019
مجموع المشاركات: 2435
في البداية التواريخ بأثر رجعي. ما كلفوا نفسهم عناء تغيير التواريخ عشان المصفوفة تناسب عظم مناسبة ذكري سقوط البشير والثورة السودانية المجيدة في عيدها الاول. بعدما افتكرنا (وهمانين) بإنتهاء اللجنة الامنية الكيزانية من المشهد وبداية تناغم بين عسكر السيادي والمدنيين عاد مسمي (المكون العسكري - المبهم -) من جديد. هل المكون العسكري هو الاجهزة الامنية كوووووووولها ام هو اعضاء السيادي العساكر الخمسة ووزيري الدفاع والداخلية بس؟ لانه كدا اما عدنا من حيث بدأنا او اهداء سلطة مزدوجة للعسكر في (مكونهم) والمجلس السيادي.
04-12-2020, 05:46 AM
Mutasim Idris Mutasim Idris
تاريخ التسجيل: 04-03-2019
مجموع المشاركات: 2435
اول بنود الشراكة: صياغة وثيقة تفصل مهام وصلاحيات المجالس الثلاثة. دي ما محتاجة وثيقة اللهم الا لشئ في نفس (آل يعقوب) لانه المنفذ لجنة مشتركة محشور فيها (المكون العسكري) معقولة؟؟؟ لما تجي لتكوين التشريعي هنا ح يهظر ليييييه عاد مسمي المكون العسكري في المصفوفة دي!! لانه العسكر بالوثيقة الدستورية اللي الغتها المصفوفة دي وغيرت نوع الشراكة فيها ليهم حق ال 33٪ (لناسهم) اللي ما معروفين منو؟؟؟ اما الآلة الاعلامية الموحدة كيف ح تنفذها 3 جهات! في خرمجة اكثر من كدا؟ بعدين ليييييه الحرية والتغيير خاشين في اعلام الحكومة.. مش مفروض يكون ليهم منابرهم؟
04-12-2020, 05:50 AM
Mutasim Idris Mutasim Idris
تاريخ التسجيل: 04-03-2019
مجموع المشاركات: 2435
ادخال الجبهة الثورية في اختيار التشريعي هو الغاء كااامل للوثيقة الدستورية. الجبهة الثورية واضح انها قدرت تضيف املاءتها علي الشريكين دون الرجوع لصاحب الحق الاكبر (الشارع). دا طبعا غير المحاصصة والرجوع للمربع الاول.
04-12-2020, 06:12 AM
Mutasim Idris Mutasim Idris
تاريخ التسجيل: 04-03-2019
مجموع المشاركات: 2435
في بند اصلاح الاجهزة الامنية في سؤال مهم يجب الوقوف عنده. هل مليشيا الدعم السريع داخل في الترتيبات الامنية مع حركات الكفاح المسلح بقومية (الجيش) وبقية الاجهزة الامنية ام المليشيا دي بقت واقع ومن المحرمات المساس بيها؟؟ راي عبدالواحد معروووف في الحتة دي.
04-12-2020, 07:19 AM
Hasheem Karouri Hasheem Karouri
تاريخ التسجيل: 12-20-2015
مجموع المشاركات: 2790
Quote: صياغة وثيقة تفصل مهام وصلاحيات المجالس الثلاثة. دي ما محتاجة وثيقة اللهم الا لشئ في نفس (آل يعقوب) لانه المنفذ لجنة مشتركة محشور فيها (المكون العسكري) معقولة؟؟؟
التوصل لاتفاق نهائي وشامل مع الحركات المسلحة ( التي هي في وجهه نظري ، عائق كبير امام الحكومة الحالية ) . هو سبب تاخير الكثير من الامور . واجراء التعديلات ، هنا وهناك . كلنا يعلم ان السته اشهر الاولي ، تكرس للسلام . ( ونحن الان وصنا الي سنه ، ولم يتم السلام الشامل ) . بل اصبح الوضع اسؤا. المكون العسكري ( لجنة البشير الامنية ) . اضافه للمليشيات التي يحاولون الباسها لباس الشريعية ، هم ايضا عقبة كبيرة . ادخال ملاحق علي الوثيقة الدستورية ، يحدث لمواكبة الواقع ، ولا يلغي مضمونها ، قد يحدث ذلك نتيجة المطالب ، والمطالب المضادة . من المكونيين .
العوائق كثيرة ومتعمدة
04-12-2020, 10:44 AM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7215
سلام يا معتصم عندي ملاحظتين على السريع كدا اولاً هذه الوثيقة تسمى خطة عمل وليست مصفوفة فمصفوفة العمل لا تحتوى على غايات ولا جدول زمني بل تهتم فقط بتوزيع الأعباء بين الأشخاص في المؤسسة. ويبدو أن كلمة مصفوفة إستخدمت هنا لكونها كلمة رنانة وغير محددة المعنى بالنسبة للشخص البسيط.
تاني شئ لم أستطيع أن أفهم إعطاء قحت مهام تنفيذية في مؤسسات الدولة وهذه المهام هي من صميم أعمال السلطة التنفيذية
04-12-2020, 03:46 PM
Mutasim Idris Mutasim Idris
تاريخ التسجيل: 04-03-2019
مجموع المشاركات: 2435
Quote: المكون العسكري ( لجنة البشير الامنية ) . اضافه للمليشيات التي يحاولون الباسها لباس الشريعية ، هم ايضا عقبة كبيرة . ادخال ملاحق علي الوثيقة الدستورية ، يحدث لمواكبة الواقع ، ولا يلغي مضمونها ، قد يحدث ذلك نتيجة المطالب ، والمطالب المضادة . من المكونيين .
العوائق كثيرة ومتعمدة
طالما لسة نحن بنتعامل مع (لجنة البشير الامنية) بعد سنة من (عزله) باسم دلعها (المكون العسكري) اذن ما سقطت. البرهان قال بقولوا لينا كلام هنا وكلام تاني لناسهم هناك. المليشيات او حركات الكفاح المسلح او الجبهة الثورة او المسارات ليه يقيفوا عقبة في تحقيق مكاسب ثورة قامت علي الاسلاميين ومن شارك الانقاذ الحكم. هل دا بيعني قحت في ثورة صامتة عليهم كانت وفي النهاية فشلت وقالت تشاركهم الحكم زي ما كان بعمل البشير؟؟؟؟ ولة دا بعني اسكاتهم ولو الي حين. مطالبهم شنو هم زاااااتم؟؟؟؟ الوثيقة اتلغت يا استاذ هاشم لما جردوا رئيس الوزراء من صلاحيات رئيس الجمهورية (الما معروفة) كانت شنو. وفي تجريده من تعيين الولاة وهيكلة الامن والشرطة واسنادهم لاجسام مختلفة وادخال الحرية والتغيير في التنفيذ. لما تم ادخال جسم الثورية في التشريعي واختياره. شنو الجد يا استاذ هاشم عشان يواكب.. تحياتي وشاكر جدااا علي المرور.
04-12-2020, 04:08 PM
Mutasim Idris Mutasim Idris
تاريخ التسجيل: 04-03-2019
مجموع المشاركات: 2435
Quote: اولاً هذه الوثيقة تسمى خطة عمل وليست مصفوفة فمصفوفة العمل لا تحتوى على غايات ولا جدول زمني بل تهتم فقط بتوزيع الأعباء بين الأشخاص في المؤسسة. ويبدو أن كلمة مصفوفة إستخدمت هنا لكونها كلمة رنانة وغير محددة المعنى بالنسبة للشخص البسيط.
تاني شئ لم أستطيع أن أفهم إعطاء قحت مهام تنفيذية في مؤسسات الدولة وهذه المهام هي من صميم أعمال السلطة التنفيذية
قاااالوا اسمها كدا ح نغالطهم ههههه. مصفوفة بجداول وكمان تواريخها بأثر رجعي شفت كيف. يعني احترام ساااي لليوم والمناسبة مافي. (كانوا داقين فيها حجر دقش؟). بإعطاء قحت (مهام تنفيذية) في مؤسسات الدولة في فترة حكم انتقالي بعني الغاء (للاتفاق) الاول الانجب المجلسين لتنفيذ الاتفاق زااتو وادخال اجسام جديدة تتفق بشكل مغاير علي تنفيذ (المصفوفة). مش كدا. بعدين يا مولانا ما لاحظت شئ في المسميات والتناقض في والتباين في معانيها (بالعربي دغمسة)؟ تاوق لبند السلام. غااااايتو.
04-12-2020, 04:15 PM
Elhadi Elhadi
تاريخ التسجيل: 01-06-2003
مجموع المشاركات: 9603
Quote: الناس جنت وفقدت عقلها وأصبحوا مثل قطيع البهائم تماماً الله يكرمك والسامعين
يقودوهم في اي اتجاه بيمشوا زيهم زي البهائم واحد
ناس شكرا سيدي الرئيس والرصاص في الرأس و الشلة ديك ما مشوا بس الطواقي اتغيرت ههههه. الشارع في ثورته ومحافظ وهنا شئ تاني غير.. ديل حقهم ما بضيع ابداااا والتاريخ ما ح يكتبوا نعوم شقير تاني لانه المرة دي اتكتب بالدم..
04-12-2020, 06:27 PM
علاء سيداحمد علاء سيداحمد
تاريخ التسجيل: 03-28-2013
مجموع المشاركات: 17162
Quote: في البداية التواريخ بأثر رجعي. ما كلفوا نفسهم عناء تغيير التواريخ عشان المصفوفة تناسب عظم مناسبة ذكري سقوط البشير والثورة السودانية المجيدة في عيدها الاول. بعدما افتكرنا (وهمانين) بإنتهاء اللجنة الامنية الكيزانية من المشهد وبداية تناغم بين عسكر السيادي والمدنيين عاد مسمي (المكون العسكري - المبهم -) من جديد.
تحياتى الاخ معتصم
ششنة على السريع :
- فعلا هناك ملاحظة على التواريخ ..من اول وهلة الظاهر الجماعة ديل لهم فترة شغالين فى المصفوفة دى وهى ليست وقتية بدليل ورود عبارات مثل : المكون العسكرى والآن ليس هناك مكون عسكرى الا ذا كان القصد وزير الدفاع ووزير الداخلية والاثنان يتبعان لرئيس الوزراء !!! او انّ هناك نية لاعادة مسمى المكون العسكرى باعضائه الستة كما كان فى عهد المجلس العسكرى الانتقالى . ايضاً ورد : تنفيذ المصفوفة تبدأ من الاسبوع الاول من ابريل ونحن الآن فى الاسبوع الثانى من ابريل , اصحى يا بريش وصحّي الجنبك .
- تكوين آلية اعلامية مشتركة توحد الخطاب فيها قوى الحرية والتغيير !! دا ما راكب عدلوا ومن الذى سيقوم بلفت الانظار وتقويم الاعوجاج ؟؟ فى الفترة السابقة الحزب الشيوعى وحيدا كان يقوم بلفت الانظار الى الاخطاء والآن من الذى سيقوم بدور الحزب الشيوعى ؟؟؟ وبالنسبة لبقية المهام المشترك فيها قوى الحرية والتغيير تمام ما فى مشكلة مثل : المشاركة فى صياغة الاستراتيجية الامنية وانفاذ اصلاحات عاجلة فى جهاز المخابرات وايضا فى الشرطة وجهاز الامن .
04-12-2020, 06:39 PM
جلالدونا جلالدونا
تاريخ التسجيل: 04-26-2014
مجموع المشاركات: 9390
قوم بلا هوم ويرك معاك بلا ..... متين وضع الاستراتيجيات كان مهمّة تنفيذية و معاك دى برضو مجلس الوزراء لا سلطة له على القطاع الامني كان بوليس كان جيش كان امن و الاستراتيجية دى البتجيب الوصاية على الاجهزة دى لرئيس الوزراء و قحت كحاضنة سياسية للحكومة مهتمها وضع الاستراتيجية دى كما وضعت برنامج الحكومة من قبل
04-12-2020, 09:26 PM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7215
يا جلالدونا لو بتعرف حجم المعاناة البعانيها عشان اتناقش معاك كان عفيتني من أي نقاش معاك الحاجة دي زي معاناة زول سايق عربية وداير يتونس مع زول في الشارع راكب حمار صعب علي جدا أضبط سرعة صاروخي مع سرعة حمار تفكيرك
Quote: متين وضع الاستراتيجيات كان مهمّة تنفيذية
وين كلمة وضع الإستراتيجيات دي في الفقرة الأنا إقتبستها من الشئ الذي أسموه مصفوفة؟. يقولوا ليك "إنفاذ إصلاحات عاجلة في جهاز الشرطة وبناء جهاز أمن داخلي يتبع لوزارة الداخلية" يقولوا ليك إنفاذ أنفااااااااااذ تقول لي وضع إستراتيجيات
04-12-2020, 09:40 PM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7215
هو بالله انت عندك مخيخ ,,, حكمتو بالغة امش اقراها كويس انفاذ اصلااحات عاجلة ناس قحت مسئولين من تحديد الاصلاحات بالتشاور مع المجلسين التنفيذ على السيادي و الوزاري دى مصيبة شنو دى ترامب و الكورونا و مولاكم
04-12-2020, 10:49 PM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7215
Quote: عبارات مثل : المكون العسكرى والآن ليس هناك مكون عسكرى الا ذا كان القصد وزير الدفاع ووزير الداخلية والاثنان يتبعان لرئيس الوزراء !!! او انّ هناك نية لاعادة مسمى المكون العسكرى باعضائه الستة كما كان فى عهد المجلس العسكرى الانتقالى .
هنا يا علاء ما قصدت بإلغاء الوثيقة ديك والرجوع للجنة الامنية الكيزانية.. او بتعني عساكر السيادي الخمسة مع الداخلية والدفاع! بعد سنة كاملة من التناغم وابداء حسن النوايا للعسكر لسة هم (ماخدين) في خاطرهم مننا؟! ولة هي السطوة والمؤسسة دي ما بتخرج الا خونة وإنقلابيين!!
Quote: وبالنسبة لبقية المهام المشترك فيها قوى الحرية والتغيير تمام ما فى مشكلة مثل : المشاركة فى صياغة الاستراتيجية الامنية وانفاذ اصلاحات عاجلة فى جهاز المخابرات وايضا فى الشرطة وجهاز الامن .
الكلام دا ما في الوثيقة (المعروفة) يا علاء الا وثيقتا ماااا معروفة. بعدين قوي الحرية اختارت وزارة لتنفيذ برامجها شنو التداخل في اداء الحكومة اللي اختارتها؟؟ عدم شغلة ولة عدم ثقة؟؟ بعدين الحكومة دي مفترض تكون حكومة ثورة.. ولة دا اخر مسمار في نعش نقاش الثورة ما اتسرقت.. شاكر مرورك يا علاء وتحاياي..
04-12-2020, 10:49 PM
Mutasim Idris Mutasim Idris
تاريخ التسجيل: 04-03-2019
مجموع المشاركات: 2435
ودي يا مولانا حافظ شالوها من حمدوك اللي كانت من مهامه في الوثيقة (المعروفة). عدم ثقة فيه ولة عدم امكانيات وفهم منه؟
Quote: ين كلمة وضع الإستراتيجيات دي في الفقرة الأنا إقتبستها من الشئ الذي أسموه مصفوفة؟. يقولوا ليك "إنفاذ إصلاحات عاجلة في جهاز الشرطة وبناء جهاز أمن داخلي يتبع لوزارة الداخلية" يقولوا ليك إنفاذ أنفااااااااااذ تقول لي وضع إستراتيجيات
قوي الحرية اتغولت حتي علي رئيس وزراءها اللي عنيته وجابته..
04-14-2020, 06:14 AM
Mutasim Idris Mutasim Idris
تاريخ التسجيل: 04-03-2019
مجموع المشاركات: 2435
أضافة الجبهة الثورية لاختيار التشريعي تعني المحاااصصة في اقبح صورها. الوثيقة الدستورية سمحت فقط لقوي الحرية والتغيير والعسكر السبعة (حسب فهمنا للعسكر ديل) باختيار الممثلين بالنسب المحفوظة 67 - 33 . اما تعيين (ولاة مكلفين) مبهمة وما عندها معني او تعريف. كل اعضاء الحكومة في كل هياكلها مكلفين. هل تعني كلمة مكلفين (مؤقتين) لحين الاتفاق النهائي؟ هل هم من العسكر الموجودين (مواصلة تكليف) ام مدنيين تعيين جديد؟؟؟؟ الله اعلم..
04-14-2020, 06:52 AM
جلالدونا جلالدونا
تاريخ التسجيل: 04-26-2014
مجموع المشاركات: 9390
كنا وين وبقينا وين.. والتشريعي في خبر ما ح يكون.. لا وثيقة حمت تغول العسكر لا مصفوفة ساعدت الحكومة. رفع اسم السودان من قائمة الارهاب اعاد الكورة من تاني لملعب المكون المدني وفرصة كبيرة للاستفادة من مواكب الزكري الثانية لثورة ديسمبر المجيدة لتوحيد الشارع, وسفينة عبور حقيقية لواقع اقتصادي وسياسي افضل. حان الوقت لقيام المجلس التشريعي رقيب الثورة واهم وسائل المحافظة علي مكتسباتها. خطاب حمدوك الاخير مصاحب مع قرار مجلس النواب الامريكي فيه رسالة واضحة للعسكر.. انتهي الزمن يا عسكر.. هل سيلتقط القفاز.. ح نشووووف.
12-15-2020, 07:16 PM
Asim Ali Asim Ali
تاريخ التسجيل: 01-25-2017
مجموع المشاركات: 13492
سلام عليكم الوضع دا ما اظنو ماشى لى خير (رفع اسم السودان ما اول حفله يهللو ليها الناس والناس هللت حتى ايام البشير لامر اوباما فى اخر ايامو ( اللجنه الامنيه ) لعبتها صاحوجابت فى المشهدالحركات بشكل منفصل بعد ماطلعو من ق ح ت وبقى المشهد اكثر ارباكا وعسير على التحكم فيه واداراتو مجلس الشركاء حيبقى حيتضخم ويتغول والتشريعى (حجوه ام ضبيبينه) سراب طول ما العسكر راكبين هر البلد والغريبه انو الدور الاساسى ليهم عاملين رايحين منو موضوع القرار الامريكى عن الشركات حيكون فالصو طالما الماليه فى ايد ناس زى الوزيره الحاليه (شايف انو تلبس كاكى ويركبو ليها دبابير احسن) حصار اترفع واسم اترفع من قائمه قول حصل ميه فى الميه وماحصل حاجه تانيه كيف يتم ادارتها فى ظل وجود شركاء (اضداد) وسيطره (خازوق المدفع) وين برنامج التنميه وين حشد الطاقات (قى ظل الحاصل دا ) نظام جكم دوله متشاكس يدعى التناغم(تعرف دى زى عندنا لما يقول ليك بضاعه اصليه او يابانيه طوالى تعرف انها تقليد) والادهى فيران فلول الدوله العميقه فى اجهزه الحكم (ازاله التمكين شغلهاملاطفه ساى)والفيران دى دايره شرعيه ثوريه ووين شرعيه ثوريه والعسكر حارسين كل مايتعلق بالنظام القديم من انو يتهبش والناس فى حاله انكار لكل مايواجه الثوره من عقبات سرقه بالتدريج وماشين هروب للامام لغايه ما يصلو بالبلد لهاويه وتبقى ماعرف ترجع لوراء وتقاتل او تسقط فى الهاويه او تستسلم وقبل الهبوط الناعم والانقاذ 2 (والمصيبه حتلقى ناس تبرر وتروج ليها ليها زى مابيحصل بالنسبه لمهزله جوبا)
12-16-2020, 00:34 AM
ترهاقا ترهاقا
تاريخ التسجيل: 07-04-2003
مجموع المشاركات: 8423
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Mutasim Idris
Hasheem Karouri
Hafiz Bashir
Elhadi
جلالدونا
علاء سيداحمد
Asim Ali
ترهاقا
فيس بوك
تويتر
انستقرام
يوتيوب
بنتيريست