|
|
|
 Re: يا سميري شوف صقلتا مع فدعتا ونقلتا (فيديو) (Re: خضر الطيب)
|
شوف صقلتا مع فدعتا ونقلتا
=======================
الحبيب الجميل خضر أمبس .. طولت الغيبة
الاغنية جميلة ورائعة
واهم حاجة بدون سماعة عشان الدكتور قال لي خفف من السماعات
بس ما فهمت ( صقلتا ,,, فدعتا .. نقلتا )
معقول يا خضر الحاجات دي في العربية ..
ضواحي الدنيا .. لازم حاشية وشرح
لكن روعة عجبتني عبارة ( نسيم الشمال ) عند الترابلة ( صلاح ) في الصيف
تبرد الموية في زبر وتعدي المراكب ويمكن تنوم تحت الشجر .. عكس (النو) الرياح الجنوبية
سموم وحر وعرق وزهج .. اسماعيل حسن قال ( المراكب كاسحة ما دام ريحنا نو )
أسوأ انواع عندنا في الشمالية
يا سلام على امدرمان فيها كل الثقافات ..
| |
 
|
|
|
|
|
|
|
|
Re: يا سميري شوف صقلتا مع فدعتا ونقلتا (فيديو) (Re: علي عبدالوهاب عثمان)
|
مرحب استاذنا على امبس
سرنقامي
الشاعر الجاغريو من شعراء الحقيبة
و هو من العيلفون بفيدك بتاريخو حبيبنا الفنان زميل المنبر ياسر السر
و الجاغريو هو سلطان الغرام
صقلتا معناها لمعتا .. بتلمع ذي الرتينة .. اكيد بتعرف الرتينة
الفدعة دي ما عارف اشرحا ليك كيف غايتو الا تشوفا
لكن بحاول اقربا ليك
لما رقصت انقسم جسمها الفوق فوق كانو ما ليهو علاقة بالباقي ..
و الباقي تمو خيال ههههههه
و النقلة دي اكيد شفتها في رقيص الشوايقة
| |
|
|
|
|
|
|
|
|
|
Re: يا سميري شوف صقلتا مع فدعتا ونقلتا (فيديو) (Re: خضر الطيب)
|
الشيخ الجيلي:
ورث أجدادنا يا الرتلة البناه جميل * الدرع الرقيق سلكه وتواتنه تقيل
والهاري البقسم الخودة نقره عديل * والوفرة البفوت الضرعه بكم ميل
الجاغريو:
هم الورثونا الموت يجينا عديل * بقت فطرتنا يرقد جيل يسلم جيل
نجود بأرواحنا للهيفا المشيها وجيل * وفي الوقعات تملى تحرم التأجيل
شعر المراثي:
أهدت السيدة المنينة طاقية للشاعر، كان معتزاً بها لأنها من عزيز عليه وكان في طريقه لحفل زواج بحلفاية الملوك، وعند كبري أم درمان هبت عاصفة وهطلت أمطار ألقت بالطاقية في النهر فحزن لها ورثاها وحرم على نفسه لبس الطاقية إلى أن مات!.
ذكرى المطرة شاعت يوم الأربعاء * أريت أرواحنا ضاعت حليلة المسبوكة ذاعت
لـى فقـدك ثكلـت كالفقدت جنينه * والأيــام عزتنـي بالحـربة السـنينـة
نـوح يالتهـامـي وثكـلى يالكنينة * ضـاع تاج رأسـي قـول فلتحـيا المنينة
الخلانـي أندب حزنان وأصطفيها * سـاعة الشـوق أشـوف حبى خياله فيهـا
نـورها يبق يدلك مهمـا أصطفيها * الآجـال مـقـدرة والأيــام تفيهـــا
بــي دمعــي وإنشــراقــي * مهمـا زاد تنـاثر ما بيطـفي إنحراقـي
مــن حظــــي إنسراقــي * مخنــوق عبرتــي ورمـت التراقـي
بنـوت الحلفـايا لابسات الحزايني * يـبكــنك حفايــــــــــــا
ياتـذكـار وفايـــــــــا * بي روحتك مرضت وفي وجودك شفـايا
قال الشاعر صالح عبدالسيد (أبوصلاح) للجاغريو: لو أنا مت قبلك ترثيني إنت وإذا إنت مت قبلي سأرثيك أنا. فمات أبوصلاح فقال الجاغريو:
وداعـاً ياصلاح دار الغرور خليتـها * تبكيك الشعراء بالحسرات دموعها مليتها
آيات الشـعر فاقـداك وياما تليتهــا * للعشـاق وبـي أفصـح لسـان حليتـا
رحلت وبي وراك أجمل قلبك كأنه زبادي * قدمـنا المراثـي اليسنسـره العبـادي
فقـدك ياصـلاح هاجمـنا واتبرجلنـا * وفـي سجون الهموم جمع شتاتنا سجنـا
لي أوصاف الحسان في الدنيا ليك سجلنا * وما تنسانا من أوصاف حسان الجنة
كذلك رثى الجاغريو بقصائد طويلة الشريف يوسف الهندي ومحمد إبراهيم فرح ناظر عموم الجعليين ومبارك زروق وغيرهم.
أنتقل الشاعر "الجاغريو" إلى جوار ربه في اليوم الأول من يناير عام 1969م ودفن بالعيلفون. وقد قام عدد من الشعراء برثائه منهم الشاعر الكبير إسماعيل حسن في قصيدة طويلة (وقفه على قبر فنان الحي):
وزى ماقلت .. كان ناس أحمد الطيبين .. وفنانين.. حروف منحوتة فوق لوح القدر قاعدين .. يغنوا الليل .. يهجموا الليل .. وتسمع صوته شاقي الليل .. يقول ياليل .. (يارايع جفيتني وأنا ضائع .. تعال لي .. يارايع ..
وكان ناس أحمد الحلوين .. وفنانين .. مع الحلوين .. ودا المقدور .. وكان لابد تشوفو العين .. وهبت ريح من المجهول .. وشالت أحمد المعروف .. وما مجهول .. فروع وأصول .. ونفضل نحن يا أحمد .. وراك تايهين .. تعبانين وفنانين .. وماعارفين متين نلحق .. قوافل الراحو والراحلين.
وقال عكير الدامر يرثي الجاغريو:
شاعر غير أديب مابحكم الأوزان * وغـير الكيـل يفيض مابرجح المـيزان
ما بننساك لأنك بسمة في الأحزان * وفي الأفراح زهزر طيب تنعش العجزان
فيك أعزي اسـم الشاعر الفنان * وأعـزي المجتمع وبلابـل الأفنـان
غناك روقة وقناعة صبر وإطمئنان * غناك حكمة وشعور ترشح أدب وحـــنان
سيف الهزة ظاهر مابدور لوبيـان * وعـرق العزة لو مات تلقى ليه ليـــان
جاغريو اسمه مابموت بالشعر الرويان * شعر كل المعاني الضاربة في المليـــان
ويقول فيه زغبير عبد الماجد:
ليك الغانية نقضت وجددت أحزانا * وزهدت روحها وإندمر جمالها الزانا
زرفت دمعتها وملت الدموع أجفانا * يابلبـل زمـان وفـي الشعر حسانا.
| |
|
|
|
|
|
|
|
|
|
Re: يا سميري شوف صقلتا مع فدعتا ونقلتا (فيديو) (Re: خضر الطيب)
|
لساده المينـــــــــــــــي
ياالساده المينــــــــــــــي عن ريده كلمينــــــــــــــي
************
ياالساده بكل صــــــراح من نظرتك انا عقلي الراح
فيك بعشق الانشـــــراح شفي قلبي بعد الجــــــراح
************
شادن ربيب البـــــــــطر في فؤادي ريده انســـــطر
اغراه صوت الوتــــــــر ياحبيب بقيت في خطـــــر
************
ياسميري شوف صقلتـه مع فدعته ونقلتـــــــــــــه
في الوقفه شوف وقلتـه واحذر سهام ومقلتـــــــه
************
غاب العزول المريـــــب ياحبيبي جيتك قريـــــــب
من قبل ما ننطـــــــــرب حصل الشعور الغريــــــب
************
ياحبيبي الفؤاد حــــرق قوماك ليل ننســـــــــــــرق
نكشف الطريق بالبـرق تاني لحظه ما بنفــــــترق
************
بسمت زهور الرمــــال مزجت نسيم الشمـــــــال
اتني بصديره مــــــــال ياجميل يا رمز الجمـــال
| |
|
|
|
|
|
|
| |
خضر الطيب
علي عبدالوهاب عثمان
فيس بوك
تويتر
انستقرام
يوتيوب
بنتيريست